English | Telugu
మురిసిపోతున్న నాగార్జున
Updated : Nov 13, 2015
పుత్రోత్సాహము పుత్రుడు జన్మించినపుడే పుట్టదు... జనులా పుత్రుని కనుగొని పొగడగ పుత్రోత్సాహము నాడు తండ్రి పొందును సుమతీ... అని సుమతీ శతకకారుడు ఏనాడో చెప్పాడు. ఇప్పుడు అక్కినేని నాగార్జున ఆ పద్యానికి తాజా ఉదాహరణగా నిలుస్తున్నాడు. నాగ్ తనయుడు అఖిల్ నటించిన ‘అఖిల్’ సినిమా దీపావళి కానుకగా విడుదలైంది. సినిమా రిజల్ట్ విషయం అలా వుంచితే, ఈ సినిమా ద్వారా అఖిల్ తెలుగు ప్రేక్షకుల నుంచి పాస్ మార్కులు పొందినందుకు నాగార్జున మురిసిపోతున్నాడు. పుత్రోత్సాహంతో పొంగిపోతున్నాడు. అఖిల్ విడుదల కాగానే ప్రెస్ మీట్ ఏర్పాటు చేసి ‘‘ఏ నటుడికైనా డిక్షన్ చాలా అవసరమని నాన్నగారు చెప్తుండేవారు. అఖిల్ గొంతు చాలా బావుంది. డైలాగ్స్ బాగా చెప్పాడు. డాన్సులు బాగా చేశాడు. మొదటి సినిమాకే ఇలా చేస్తే పది సినిమాల తర్వాత ఇంకెంత చేస్తాడో అనిపించింది’’ అని నాగార్జున చెప్పాడు. ఈ మాటల్లోనే నాగార్జున ఏ రేంజ్ పుత్రోత్సాహంతో మురిపిసోతున్నాడో అర్థమవుతోందని టాలీవుడ్ వర్గాలు అంటున్నాయి.‘అఖిల్’ సినిమా బాక్సాఫీసు దగ్గర కూడా సక్సెస్ అయితే నాగార్జున పుత్రోత్సాహానికి హద్దే వుండదని భావిస్తున్నాయి.