ఇటీవల సినిమా పరిశ్రమలో నేరాలు, ఘోరాలు ఎక్కువైపోయాయి. రకరకాల వివాదాలు సినీ ప్రముఖుల్ని చుట్టుముడుతున్నాయి. అలా తమిళ పరిశ్రమలో ఒక దారుణం చోటు చేసుకుంది. తమిళనాడు హైకోర్టు జడ్జి కుమారుడు ఆత్తిచుడి, ఆయన అత్త మహేశ్వరిపై తమిళ నటుడు దర్శన్‌ దాడి చేశాడు. బాధితుల ఫిర్యాదు మేరకు దర్శన్‌ను పోలీసులు అరెస్ట్‌ చేసి దర్యాప్తు చేస్తున్నారు. అసలేం జరిగిందంటే.. చెన్నయ్‌లోని ముగప్పేర్‌లో దర్శన్‌ నివాసం ఉంటున్నాడు. అతని ఇంటి ముందు ఒక టీ స్టాల్‌ ఉంది. అక్కడికి టీ తాగేందుకు వచ్చే వారి వాహనాల పార్కింగ్‌ విషయంలో తరచూ గొడవ జరుగుతూనే ఉంటుంది. 

ఇటీవల తమిళనాడు హైకోర్టు జడ్జి కుమారుడు ఆత్తిచుడి, అతని అత్త మహేశ్వరి, మరి కొందరు టీ తాగేందుకు అక్కడికి వచ్చారు. దర్శన్‌ ఇంటి ముందు కారును పార్క్‌ చేయడంతో దాన్ని తియ్యాల్సిందిగా దర్శన్‌ అడిగాడు. మెల్లగా మొదలైన ఈ వివాదం ఒకరిపై ఒకరు దాడి చేసుకునే వరకు వెళ్లింది. ఆ క్రమంలోనే మహేశ్వరికి కూడా గాయాలయ్యాయి. ప్రస్తుతం ఆత్తిచుడి, మహేశ్వరి ఆస్పత్రిలో చికిత్స పొందుతున్నారు. ఈ ఘటనపై కేసు నమోదు చేసుకున్న పోలీసులు దర్శన్‌, అతని సోదరుడు లోకేశ్‌లను అరెస్ట్‌ చేశారు. దర్శన్‌ కూడా ఆత్తిచుడి, ఆయన భార్య, అత్తపైన కూడా ఫిర్యాదు చేశాడు. పోలీసులు వారిపై కూడా కేసు నమోదు చేశారు. విజయ్‌ టీవీలో ప్రసారమైన బిగ్‌బాస్‌ సీజన్‌-3 ద్వారా నటుడు దర్శన్‌ పేరు వెలుగులోకి వచ్చింది. ‘గూగుల్‌ కట్టప్ప’ అనే సినిమాతో హీరోగా పరిచయమయ్యాడు దర్శన్‌. వాస్తవానికి అతను శ్రీలంకకు చెందినవాడు.