హీరోలుగా ఓ స్టేజ్‌కు ఎదగగానే.. తమను వెండితెరకు పరిచయం చేసిన దర్శకనిర్మాతలనే మరచిపోయే కథానాయకులు ఎందరో..! కానీ తాను మాత్రం ఆ తరహా కథానాయకుడిని కాదంటున్నాడు నాని... అష్టాచమ్మా సినిమాతో హీరోగా పరిచయమైన నానిని.. ఈ ఏడేళ్ల కాలంలో కొన్ని విజయాలు, మరికొన్ని పరాజయాలు పలకరించాయి. రీసెంట్‌గా ఎవడే సుబ్రమణ్యం’, ‘భలే భలే మగాడివోయ్’, ‘కృష్ణగాడి వీర ప్రేమగాథ’ లాంటి సినిమాలతో వరుసగా హ్యాట్రిక్ హిట్స్ అందుకున్నాడు నాచురల్ స్టార్ నాని. గత కొద్ది రోజులుగా నాని కృష్ణగాడి వీర ప్రేమగాథ సక్సెస్ టూర్ ప్రమోషన్స్ లో బిజీగా ఉన్నాడు. కాగా నాని పుట్టిన రోజు ఈ రోజు. ఈ రోజు తన బర్త్ డే అయినప్పటికీ తను ఏ మాత్రం ఎంజాయ్ చేయకుండా తన తదుపరి సినిమా షూటింగ్ లో బిజీగా ఉన్నాడు. నాని ప్రస్తుతం తనని అష్టాచమ్మా సినిమాతో హీరోగా పరిచయం చేసిన ఇంద్రగంటి మోహనకృష్ణ డైరెక్షన్ లో తన తదుపరి సినిమా చేస్తున్నాడు. శ్రీదేవి మూవీస్ అధినేత శివలెంక కృష్ణప్రసాద్ ఈ చిత్రాన్ని నిర్మిస్తున్నారు.

ఓ ప్రేమకథకు థ్రిల్లింగ్ ఎలిమెంట్స్, కామెడీని జతకలిపి ఓ సరికొత్త కథగా ఈ సినిమా కథను దర్శకుడు తీర్చిదిద్దారట. ఇందులో సురభి, నివేదా థామస్ కథానాయికలు. ఇటీవలే హైదరాబాద్ లో ఫిస్ట్ షెడ్యూల్ పూర్తి చేసుకున్న ఈ చిత్ర టీం సెకండ్ షెడ్యూల్ కోసం కొడైకెనాల్ వెళ్ళారు. ఈ రోజు ఉదయం నుంచి షూటింగ్ కూడా మొదలు పెట్టాడు. ఈ షెడ్యూల్ మార్చి 6 వరకూ అక్కడే జరగనుంది. ఆ తర్వాత మళ్ళీ హైదరాబాద్ లో మిగిలిన షూట్ ని ఫినిష్ చేస్తారు. ఇప్పటికే 40% ఫినిష్ అయిన ఈ సినిమా షూటింగ్ మొత్తం ఏప్రిల్ చివరికల్లా పూర్తవుతుంది. మే చివర్లో సినిమాని రిలీజ్ చేయనున్నారు. ఇక ఈ చిత్రానికి ‘ధమాక’ అనే టైటిల్ ని పరిశీలనలో వున్నట్లు ఫిల్మ్ నగర్ టాక్.