స‌ర్దార్ గ‌బ్బ‌ర్ సింగ్ సినిమాకి ద‌ర్శ‌కుడెవ‌రు? ఈ ప్ర‌శ్న‌కు స‌మాధానం అంత సింపుల్ కాదు. ఎందుకంటే ఈ సినిమాకి `పేరు`కి ద‌ర్శ‌కుడు బాబి అయినా.. వెన‌కుండి అంతా న‌డిపిస్తోంది.. ప‌వ‌న్ క‌ల్యాణ్ అన్న‌ది ఉన్న‌మాటే. త‌న ప్ర‌తి సినిమా విష‌యంలోనూ ప‌వ‌న్ క‌ల్యాణ్ జోక్యం చేసుకొంటాడ‌న్న‌ది అంద‌రికీ తెలిసిన విష‌య‌మే. కానీ స‌ర్దార్ విష‌యంలో మాత్రం ఈ జోక్యం మితిమీరిపోయింద‌ని టాక్‌. ద‌ర్శ‌కుడు బాబికి కేవ‌లం మోనేట‌ర్‌కే ప‌రిమితం చేసిన ప‌వ‌న్‌... షాట్ కంపోజీష‌న్‌కూడా తానే ద‌గ్గ‌రుండి చూసుకొంటున్నాడ‌ట‌. న‌టీన‌టుల‌కు డైలాగ్ ఎలా ప‌ల‌కాలో కూడా ప‌వ‌నే చెబుతుండ‌డం చూసి.. మిగిలిన‌వాళ్లంతా షాకైపోతున్నార‌ట‌. అంతే కాదు.. ఈ సినిమా టైటిల్ కార్డులో `ద‌ర్శ‌క‌త్వ ప‌ర్య‌వేక్ష‌ణ‌` అనే కార్డు ప‌వ‌న్ పేరుమీదే ప‌డ‌బోతోంద‌న్న‌ది అత్యంత విశ్వ‌స‌నీయ వ‌ర్గాల స‌మాచారం. ఆల్రెడీ ఈ సినిమాకి క‌థ అందించిన ప‌వ‌న్‌.. స్ర్కీన్ ప్లే కూడా త‌నే స‌మ‌కూర్చాడ‌ని, ఇప్పుడు ద‌ర్శ‌క‌త్వ ప‌ర్య‌వేక్ష‌ణ కూడా త‌న పేరు మీదే వేసుకొంటున్నాడ‌ని, ఇక బాబికి ఉత్తుత్తి ద‌ర్శ‌కుడిగా ముద్ర ప‌డ‌బోతోంద‌ని ఫిల్మ్‌న‌గర్ వ‌ర్గాలు గుస‌గుస‌లాడుకొంటున్నాయి.

అన‌వ‌స‌రంగా ఈ సినిమా ఒప్పుకొన్నానేమో..?? అనే బాధ బాబికి రోజు రోజుకీ ఎక్కువ‌వుతోంద‌ని అత‌ని స‌న్నిహితులు చెప్పుకొంటున్నారు. గ‌బ్బ‌ర్ సింగ్ విష‌యంలో నూ ప‌వ‌న్ విప‌రీతంగా జోక్యం చేసుకొన్నా.. క్రెడిట్ మాత్రం హ‌రీష్ శంక‌ర్‌కి ద‌క్కింది. ఈ సినిమా విష‌యంలో బాబికి మాత్రం మొండి చేయే మిగిలే ఛాన్సుంది. సినిమా పోతే... ప‌వ‌న్‌కి బాబి స‌రిగా ప్ర‌జెంట్ చేయ‌లేక‌పోయాడు అంటారు... ఒక‌వేళ హిట్ అయితే.. ప‌వ‌న్ మ్యాజిక్ ప‌నిచేసింద‌ని చెప్పుకొంటారు. అలాంట‌ప్పుడు ఈ సినిమాతో బాబికి న‌ష్ట‌మే త‌ప్ప ప్ర‌యోజ‌నం ఉండ‌దు. బాబి భ‌య‌ప‌డేదీ అందుకోస‌మే.