English | Telugu
నిర్మాతల మండలి ఆవేదన
Updated : Apr 16, 2011
నిర్మాతల మండలి ఆవేదన చెందింది. వివరాల్లోకి వెళితే ఆంధ్రప్రదేశ్ చలన చిత్ర నిర్మాతల మండలి(ఎ.పి.ప్రొడ్యూసర్స్ కౌన్సిల్)వారు ప్రస్తుతం మన తెలుగు సినీ పరిశ్రమలో గత వారం రోజులుగా ఎ.పి.ఫిలిం ఫెడరేషన్ ఆధ్వర్యంలో జరుగుతున్న సమ్మె కారణంగా నిర్మాతలు ఆర్థికంగా ఎంత నష్టపోతున్నారో, తరువాత సినిమా తీయటానికి వారికి కళాకారుల డేట్లు దొరక్క ఎన్ని ఇబ్బందుల పాలవుతున్నారో మీడియాకు తెలియజేశారు. వారు ఇంకా మాట్లాడుతూ ప్రభుత్వ లేబర్ యాక్ట్ కన్నా, చెన్నై, కర్ణాటక, ముంబై కన్నా తెలుగు సినీ పరిశ్రమలోనే సినీ కార్మికులకు ఎక్కువ జీతాలిస్తున్నామనీ, ప్రస్తుతం వారు చేస్తున్న సమ్మెకు 32 శాతం వారి జీతాలను పెంచామనీ, అందుకు 17 క్రాఫ్టులు అంగీకారం తెలిపినా, కొందరు నాయకుల సంకుచిత,దురాశాపూరిత ధోరణుల మూలంగా ఈ సమస్య అపరిష్కృతంగా ఉండిందని వారన్నారు.
నిర్మాతలు ఇంకా మాట్లాడుతూ వారు సమ్మె విరమించి సినీ నిర్మాణాలకు సహకరిస్తే బాగుంటుందనీ, లేకుంటే తాము ప్రభుత్వం దగ్గరకు వెళ్ళి లేబర్ యాక్ట్ కన్నా ఎంత ఎక్కువ ఇస్తున్నామో తెలియజేసి,వీరు రాకపోతే తమకు నచ్చిన వారితో తమ సినిమాలను నిర్మించుకుంటామనీ అన్నారు. ఈ విలేఖరుల సమావేశంలో నిర్మాతలు దగ్గుబాటి సురేష్, స్రవంతి రవికిశోర్, ప్రసన్న కుమార్, దిల్ రాజు, దమ్మాలపాటి శ్రీనివాసరావు తదితరులు ప్రసంగించారు.