English | Telugu
విదేశీయుల లెక్క తేల్చడంలో వైఫల్యం- ఏపీలో పెరుగుతున్న కరోనా కేసులు..
Updated : Mar 29, 2020
ఈ నెల 22న జనతా కర్ఫ్యూ విధించిన నాడే అంతర్జాతీయ విమాన సర్వీసులను కేంద్రం నిలిపేసింది. కానీ ఇవాళ్టికీ విదేశీ ప్రయాణికుల సంఖ్యను రోజుకు వెయ్యి చొప్పున పెంచుకుంటూ ప్రభుత్వం గణాంకాలు విడుదల చేస్తోంది. అదేంటని అడిగితే కేంద్రం ఇచ్చిన లెక్కలు సమగ్రంగా లేవని, అందుకే తాము ప్రతి రోజూ వాలంటీర్ల సాయంతో విదేశీ ప్రయాణికులను లెక్కిస్తున్నట్లు చెబుతోంది. అయితే ఇప్పటికే పరిస్ధితి చేయి దాటిపోయినట్లు తాజా గణాంకాలు వెల్లడిస్తున్నాయి. నిన్న ఒక్క రోజే ఏపీలో ఆరు కరోనా పాజిటివ్ కేసులు నమోదయ్యాయి. వీరిలో విదేశాల నుంచి వచ్చిన వారు ముగ్గురు ఉన్నారు. ఇంకా ఇలాంటివారు ఎందరున్నారో తెలియదు. వీరి లెక్క తేలితేనే కానీ ఏపీలో కరోనా వైరస్ ఎప్పుడు నియంత్రణలోకి వస్తుందో తెలియని పరిస్దితి ఇప్పుడు నెలకొంది.