రేపే మున్సిపల్‌ ఎన్నికల పోలింగ్‌.. ప్రశాంతంగా సాగేనా.?
కడప జిల్లాలో మున్సిపల్‌ ఎన్నికల పోరు రసవత్తరంగా మారింది. నామినేషన్ల దశ నుంచే రాజకీయ వేడి రాజుకున్న నేపథ్యంలో.. పోలింగ్‌ రోజున ఎలాంటి పరిణామాలు చోటుచేసుకుంటాయన్న ఉత్కంఠ నెలకొంది. ప్రధాన పార్టీల నేతలు, అభ్యర్థులు పరస్పరం సవాళ్లు విసురుకుంటుండటంతో ఎన్నికల వాతావరణం మరింత వేడెక్కింది. ఈ పరిస్థితుల్లో పోలింగ్‌ ప్రశాంతంగా సాగుతుందా? ఓటర్లు ఎలాంటి ఒత్తిళ్లు లేకుండా తమ ఓటు హక్కును వినియోగించుకోగలరా? అన్న ప్రశ్నలు తలెత్తుతున్నాయి.
రాజకీయ ఆధిపత్యం కోసం సాగుతున్న పోరులో సాధారణ ఓటరు ఇబ్బందులు పడకుండా చూడటం అధికార యంత్రాంగానికి కీలకంగా మారింది. ఎన్నికలు నిష్పక్షపాతంగా నిర్వహించడంతోపాటు, పోలింగ్‌ కేంద్రాల వద్ద ఎలాంటి అవాంఛనీయ ఘటనలు జరగకుండా పోలీసులు అప్రమత్తంగా ఉండాల్సిన అవసరం ఉంది. రాజకీయ పార్టీలు సంయమనం పాటిస్తేనే ప్రజాస్వామ్య ప్రక్రియ సజావుగా సాగుతుంది.
కీలక ఘట్టం.. నేడే పోలింగ్‌.!
నెలల తరబడి సాగిన రాజకీయ వ్యూహాలు, ప్రచారాలు, ఆరోపణలు, ప్రత్యారోపణలకు ఆదివారం ఓటర్లు తమ తీర్పుతో సమాధానం చెప్పనున్నారు. కడప నగరపాలక సంస్థతోపాటు బద్వేల్‌, ఎర్రగుంట్ల, రాజంపేట, పులివెందుల, జమ్మలమడుగు, మైదుకూరు పట్టణాల్లో ఉదయం 7 గంటల నుంచి సాయంత్రం 5 గంటల వరకు పోలింగ్‌ జరగనుంది. జిల్లావ్యాప్తంగా 4,39,035 మంది ఓటర్లు తమ ఓటు హక్కును వినియోగించుకోనుండగా.. 336 మంది అభ్యర్థులు బరిలో ఉన్నారు. ప్రతి ఓటు కీలకంగా మారిన నేపథ్యంలో పోలింగ్‌ శాతంపైనా రాజకీయ పార్టీలు దృష్టి సారించాయి.
పులివెందులలో టెన్షన్‌.. టెన్షన్‌.!
జిల్లాలో అందరి దృష్టి పులివెందులపై కేంద్రీకృతమైంది. వైఎస్‌ జగన్ పులివెందులలో ఓటు హక్కు వినియోగించుకోనున్న నేపథ్యంలో అక్కడి భద్రతా ఏర్పాట్లపై ప్రత్యేక దృష్టి సారించారు. గతంలో చోటుచేసుకున్న రాజకీయ పరిణామాలు, నేతల పరస్పర సవాళ్ల నేపథ్యంలో పోలింగ్‌ రోజు పరిస్థితులు ఎలా ఉంటాయన్న ఉత్కంఠ నెలకొంది. ప్రత్యర్థి పార్టీల నేతలు తమ బలాన్ని చాటుకునేందుకు ప్రయత్నిస్తుండటంతో పులివెందులలో రాజకీయ వాతావరణం వేడెక్కింది. ఈ నేపథ్యంలో సుమారు 750 మంది పోలీసులతో భద్రతా ఏర్పాట్లు చేసినట్లు సమాచారం. ఏఎస్పీ స్థాయి అధికారుల పర్యవేక్షణలో బందోబస్తు నిర్వహించేందుకు చర్యలు చేపట్టారు.
రాజకీయ శ్రేణుల మోహరింపు.. పోలీసులకు సవాల్‌.!
ప్రధాన రాజకీయ పార్టీలు తమ అభ్యర్థుల గెలుపు కోసం కార్యకర్తలు, అనుచరులను పెద్ద సంఖ్యలో రంగంలోకి దించినట్లు ప్రచారం జరుగుతోంది. ఓటర్లను సమన్వయం చేసుకోవడం, ప్రత్యర్థి వర్గాల కదలికలను గమనించడం వంటి పరిణామాలతో చివరి నిమిషం వరకు రాజకీయ వాతావరణం వేడిగా మారింది. అయితే, ఈ మోహరింపు పోలింగ్‌ కేంద్రాల వద్ద గుంపులు, వాగ్వాదాలు, ఘర్షణలకు దారితీయకుండా పోలీసులు ముందస్తు చర్యలు తీసుకోవాల్సి ఉంది. ముఖ్యంగా సమస్యాత్మక ప్రాంతాల్లో ప్రత్యేక నిఘా ఏర్పాటు చేసి, పరిస్థితులు అదుపు తప్పకుండా చూడటం కీలకంగా మారింది.
ఓటు వేయగలమా? ఓటర్లలో సందేహాలు.!
స్థానిక రాజకీయ విభేదాలు, ప్రత్యర్థి వర్గాల మధ్య పోటీ నేపథ్యంలో కొందరు ఓటర్లు తమ ఓటు హక్కును స్వేచ్ఛగా వినియోగించుకోగలమా? అన్న సందేహాలు వ్యక్తం చేస్తున్నట్లు తెలుస్తోంది. ఓటర్లపై ఎలాంటి ఒత్తిళ్లు లేకుండా, భయాందోళనలకు తావులేకుండా పోలింగ్‌ జరిగేలా చూడటం అధికారులకు ప్రధాన బాధ్యతగా మారింది.
560 పోలింగ్‌ కేంద్రాలు.. పటిష్ట భద్రత.!
జిల్లావ్యాప్తంగా 272 ప్రాంతాల్లో మొత్తం 560 పోలింగ్‌ కేంద్రాలను ఏర్పాటు చేశారు. వీటిలో 155 అత్యంత సమస్యాత్మక, 180 సమస్యాత్మక కేంద్రాలుగా గుర్తించారు. ఈ కేంద్రాల్లో ప్రత్యేక భద్రతా చర్యలు చేపట్టనున్నారు. అలాగే, 335 పోలింగ్‌ కేంద్రాల్లో వెబ్‌కాస్టింగ్‌, 138 ప్రాంతాల్లో సీసీ కెమెరాల ద్వారా పర్యవేక్షణ చేపట్టనున్నారు. ఎన్నికల విధుల నిర్వహణకు 3,864 మంది పోలింగ్‌ సిబ్బందితోపాటు 208 మంది సూక్ష్మ పరిశీలకులను నియమించారు.
ప్రతి ఓటూ కీలకమే.!
పులివెందులలో రాజకీయ పోరు తీవ్రంగా ఉండటంతోపాటు జమ్మలమడుగు, కడప ప్రాంతాల్లోనూ ఎన్నికలపై ఉత్కంఠ నెలకొంది. ఈ నేపథ్యంలో పోలింగ్‌ ప్రక్రియను ప్రశాంతంగా ముగించడం పోలీసు యంత్రాంగానికి సవాల్‌గా మారింది. ఎక్కడా ఘర్షణలకు తావులేకుండా, ప్రతి ఓటరూ స్వేచ్ఛగా ఓటు వేసేలా చర్యలు తీసుకోవాల్సి ఉంది.
భయాందోళనలు వద్దు.. స్వేచ్ఛగా ఓటేయండి.!
ఓటర్లు ఎలాంటి భయాందోళనలకు గురికాకుండా పోలింగ్‌ కేంద్రాలకు వచ్చి తమ ఓటు హక్కును వినియోగించుకోవాలని జిల్లా కలెక్టర్‌ డాక్టర్ శ్రీధర్‌ చెరుకూరి, ఎస్పీ షెల్కే నచికేత్‌ విశ్వనాథ్‌ పిలుపునిచ్చారు. ఎన్నికల సమయంలో శాంతిభద్రతలకు విఘాతం కలిగించే చర్యలకు పాల్పడితే చట్టప్రకారం చర్యలు తీసుకుంటామని అధికారులు స్పష్టం చేశారు. నవంబర్ 1న బ్యాలెట్‌ బాక్సుల్లో నిక్షిప్తమయ్యే ప్రజా తీర్పు నవంబర్ 3న ఓట్ల లెక్కింపుతో వెల్లడికానుంది. దీంతో కడప జిల్లాలో మున్సిపల్‌ ఎన్నికలపై ఉత్కంఠ నెలకొంది.
[ Kadapa Municipal Elections, AP Municipal Polls, Kadapa Elections 2026, Pulivendula Elections, YS Jagan Mohan Reddy, Jammalamadugu Elections, Kadapa Political Tension, Andhra Pradesh Politics, Municipal Polling, Election Security, Police Deployment, Sensitive Polling Stations, Voter Safety ]
వైసీపీ మాజీ నాయకుడు, మాజీ ఎంపీ విజయసాయి అనగానే ఎవరికైనా గుర్తుకు వచ్చేది ఆయన రాజకీయ విమర్శలు, వ్యూహాలు, ప్రెస్ మీట్లే. ఒకప్పుడు వైసీపీ అధినేత జగన్ కు సన్నిహితుడిగా, పార్టీలో నంబర్ 2గా ఓ వెలుగు వెలిగిన విజయసాయి రెడ్డి ఆ తరువాత క్రమంగా పార్టీలో ప్రాభవం, పలుకుబడి కోల్పోయారు. దరిమిలా 2024 ఎన్నికలలో వైసీపీ పరాజయం తరువాత ఆయన పార్టీకీ, ఆ పార్టీ ద్వారా వచ్చిన రాజ్యసభ సభ్యత్వానికీ రాజీనామా చేశారు. రాజకీయ సన్యాసం ప్రకటించి వ్యవసాయమే తన వ్యాపకమని ప్రకటించారు. అయితే కొద్ది కాలానికే రాజకీయ సన్యాసంపై యూటర్న్ తీసుకుని సొంత పార్టీ అంటూ ప్రకటనలు గుప్పించారు. పనిలో పనిగా జగన్ పై విమర్శలూ గుప్పించారు. విజయసాయి తొలి నుంచీ కూడా సోషల్ మీడియాలో యాక్టివ్ గానే ఉంటూ వచ్చారు. ఇప్పుడు తాజాగా ట్రెండ్ మార్చారు. ఇన్ స్టా గ్రాం రీల్స్ తో సందడి చేస్తున్నారు.
ఇటీవల సోషల్ మీడియా ప్లాట్‌ఫారమ్‌లలో విజయసాయి రాజకీయ విషయాలకే పరిమితం కాకుండా, విభిన్న అంశాలపై రీల్స్ రూపొందిస్తూ నెట్టింట ట్రెండ్ అవుతున్నారు. తాజాగా తారకరత్న కుమార్తెతో కలిసి ఆయన ఇటీవల చేసిన ఒక వీడియో సోషల్ మీడియాలో విపరీతంగా వైరల్ అయ్యింది.
అయితే విజయసాయి ఈ వీడియో చేయడం వెనుక పొలిటకల్ స్ట్రాటజీ ఉందని పరిశీలకులు విశ్లేషిస్తున్నారు. తారకరత్న కుమార్తెతో వీడియో చేయడం ద్వారా తెలుగుదేశం శ్రేణుల మద్దతు పొంది తన పొలిటికల్ రూట్ లో ఇబ్బందులు లేకుండా చూసుకుంటున్నారని పరిశీలకులు విశ్లేషిస్తున్నారు. అలాగే రాజకీయాల్లోకి సొంత పార్టీతో రీఎంట్రీ ఇవ్వబోతున్న విజయసాయి, ఇలా రీల్స్ లో నెట్టింట, నెటిజనులలో గుర్తింపు తెచ్చుకునే ప్రయత్నం చేస్తున్నారని అంటున్నారు.
[Vijay Sai Reddy Instagram reels, New Political Strategy, AP politics, videos, digital politics, Telugu One]
.webp)
అర్నాబ్ పెను తుపాను ఆంధ్ర ప్రదేశ్ లో పెను విలయం సృష్టించింది. ఈ పెను తుపాను కారణంగా భారీ స్థాయిలో ఆస్తి, పంట నష్టం సంభవించింది. తుపాను హెచ్చరికలతో ముందస్తు జాగ్రత్త చర్యల కారణంగా ప్రాణనష్టం కనిష్టానికి తగ్గంది కానీ ఆస్తి, పంట నష్టం అపారంగా వాటిల్లింది. ఈ నేపథ్యంలో తుఫాను ప్రభావిత ప్రాంతాల్లో పరిస్థితిని సమీక్షించేందుకు, నష్టాన్ని అంచనా వేసేందుకు కేంద్ర ప్రభుత్వం ప్రత్యేక బృందాలను రంగంలోకి దించింది. రాష్ట్రంలో జరిగిన నష్టానికి తగిన సహాయాన్ని అందించాలని ముఖ్యమంత్రి న చంద్రబాబు నాయుడు కేంద్ర ప్రభుత్వాన్ని కోరడంతో, కేంద్రం తక్షణమే స్పందించి సహాయ చర్యలను ముమ్మరం చేసింది.
అర్నాబ్ ధాటికి తీర ప్రాంతాలు తీవ్రంగా దెబ్బతిన్నాయి. ముఖ్యంగా ఉప్పాడ వంటి తీర ప్రాంతాల్లో సముద్రపు అలల తీవ్రతకు మత్స్యకారుల బోట్లు, వలలు, ఇతర పరికరాలు పూర్తిగా ధ్వంసమయ్యాయి. కాకినాడ, కోనసీమ, పశ్చిమ గోదావరి, విశాఖపట్నం తదితర జిల్లాల్లో కురిసిన భారీ వర్షాలకు లోతట్టు ప్రాంతాలు జలమయమయ్యాయి. వరద నీటిలో చిక్కుకున్న పలువు స్థానికులను, కార్మికులను రెస్క్యూ టీమ్స్ సురక్షిత ప్రాంతాలకు తరలించారు. విద్యుత్ సరఫరా పూర్తిగా నిలిచిపోవడంతో పాటు రహదారులపై చెట్లు కూలిపోవడంతో రవాణా వ్యవస్థ అస్తవ్యస్తమైంది.
ప్రభుత్వ ప్రాథమిక అంచనాల ప్రకారం, ఈ తుఫాను కారణంగా రాష్ట్రంలో సుమారు రూ. 4 వేల600 కోట్ల మేర ఆస్తి, పంట నష్టం వాటిల్లింది. గతంలో వచ్చిన హుద్‌హుద్, తిత్లీ వంటి తుఫానుల అనుభవాలను దృష్టిలో ఉంచుకుని ప్రభుత్వం ముందస్తు జాగ్రత్తలు తీసుకోవడం వల్ల ప్రాణ నష్టం చాలా వరకు తగ్గిందని అధికార వర్గాలు వెల్లడించాయి.
ఈ సంక్షోభం నుంచి నుంచి రాష్ట్రాన్ని గట్టెక్కించేందుకు ప్రభుత్వం అన్ని శాఖలను సమన్వయం చేస్తూ ముందుకు వెళ్తోంది. ముఖ్యంగా దెబ్బతిన్న విద్యుత్ లైన్లను పునరుద్ధరించడం, మునిగిపోయిన ప్రాంతాల్లో తాగునీటి సరఫరాను సరిచేయడం వంటి అత్యవసర పనులకు ప్రాధాన్యత ఇస్తున్నారు. మత్స్యకారులు కోల్పోయిన బోట్లకు, జీవనోపాధికి తగిన నష్టపరిహారం అందించేలా ప్రతిపాదనలు సిద్ధం చేస్తున్నారు. బాధితులకు ఎలాంటి అసౌకర్యం కలగకుండా పునరావాస కేంద్రాల్లో అన్ని రకాల వసతులు కల్పిస్తూ, వైద్య సేవలను కూడా అందుబాటులో ఉంచారు.
అయితే ఏపీని ఆదుకోవడానికి తమిళనాడు ప్రభుత్వం ముందుకు రావడాన్ని ఇక్కడ ప్రత్యేకంగా చెప్పుకోవాలి. అర్నాబ్ తుపానుతో అతలాకుతలమైన ఆంధ్రప్రదేశ్ రాష్ట్రంలో తుపాను ప్రభావిత ప్రాంతాలలో విద్యుత్ సరఫరాను సత్వరమే పునరుద్ధరించడానికి తమిళనాడు సహాయాన్ని కోరింది. ఈ మేరకు మంత్రి గొట్టిపాటి రవికుమార్ తమిళనాడు ప్రభుత్వాన్ని రాష్ట్రంలో తుపాను ప్రభావిత ప్రాంతాలలో విద్యుత్ పునరుద్ధరణ వేగవంతం చేయడానికి అదనపు విద్యుత్ శాఖ సిబ్బందిని, పరికరాలను కోరారు.
ఇందుకు తమిళనాడు సర్కార్ క్షణం ఆలోచంచకుండా సరే అంది. ఇక్కడ గమనించాల్సిన అంశం ఏమిటంటే.. తమిళనాడు అసెంబ్లీ ఎన్నికల ప్రచారంలో ఏపీ ముఖ్యమంత్రి నారా చంద్రబాబు, ఉప ముఖ్యమంత్రిపవన్ కల్యాణ్ ఇద్దరూ కూడా ఎన్డీయే తరఫున ప్రచారం చేశారు. అంటే తమిళనాడు సీఎం విజయ్ కు, ఆయన పార్టీ టీవీకేకు వ్యతిరేకంగా ప్రచారం చేశారు. ఆ విషయాన్ని మనసులో పెట్టుకోకుండా తమిళనాడు ముఖ్యమంత్రి విజయ్ ఏపీ వినతికి తక్షణమే స్పందించి ఏపీకి తమిళనాడు విద్యుత్ సిబ్బందిని, అవసరమైన సామగ్రిని పంపేందుకు అంగీకరించారు.
అలాగే తుఫాను ప్రభావిత ప్రాంతాలలో విద్యుత్ పునరుద్ధరణ పనులకు సహాయపడటానికి తెలంగాణ కూడా విద్యుత్ సిబ్బందిని పంపింది. ఎన్నికలలో రాజకీయ వైరం సహజమే కానీ, కానీ విపత్తు సహాయక చర్యలు దానికి రాజకీయ విభేదాలకు అతీతంగా ఉండాలన్న సందేశాన్నిఏపీ, తెలంగాణ, తమిళనాడు ప్రభుత్వాలు తమ చేష్టల ద్వారా చాటాయి. రాష్ట్రల మధ్య సమైక్యతకు, పరస్పర సహకారానికి ఇటువంటి చర్యలు ఎంతగానో దోహదం చేస్తాయని పరిశీలకులు అంటున్నారు.
[Tamilnadu Telangana come forward Help AP, Cyclone Arnab, Damage, Andhra Pradesh, Chandrababu Naidu,Vijay, Revanth, Telugu One]
ALSO ON TELUGUONE N E W S
టాలీవుడ్‌లో లీకుల సమస్య మరోసారి తెరపైకి వచ్చింది. పలు సినిమాల షూటింగ్‌కు సంబంధించిన ఫొటోలు, వీడియోలు ఎప్పటికప్పుడు సోషల్ మీడియాలో ప్రత్యక్షమవుతున్నాయి. తాజాగా నాని, సుజీత్ కాంబినేషన్‌లో తెరకెక్కుతున్న ‘బ్లడీ రోమియో’కు కూడా ఇదే సమస్య ఎదురైంది. ఢిల్లీలో జరుగుతున్న ఈ సినిమా షూటింగ్‌కు సంబంధించిన వీడియోలు నెట్టింట వైరల్ అవుతున్నాయి.
‘ది ప్యారడైజ్’ తర్వాత నాని ఏమాత్రం ఆలస్యం చేయకుండా తన తదుపరి ప్రాజెక్ట్ ‘బ్లడీ రోమియో’ షూటింగ్‌లో పాల్గొంటున్నారు. ప్రస్తుతం దేశ రాజధాని ఢిల్లీలోని పలు బహిరంగ ప్రదేశాల్లో చిత్రీకరణ జరుగుతోంది. అయితే పబ్లిక్ లొకేషన్లలో షూటింగ్ నిర్వహిస్తుండటంతో స్థానికులు తమ ఫోన్లలో నాని లుక్‌ను, కొన్ని కీలక సన్నివేశాలను రికార్డ్ చేసి సోషల్ మీడియాలో పోస్ట్ చేస్తున్నారు. దీంతో ఆ వీడియోలు వైరల్‌గా మారాయి.
ఈ సినిమాలో నాని లుక్, గెటప్, బాడీ లాంగ్వేజ్‌కు సంబంధించిన విజువల్స్ బయటకు రావడం చిత్ర బృందానికి ఇబ్బందిగా మారింది. సినిమా కోసం దర్శకుడు సుజీత్ ప్రత్యేకంగా డిజైన్ చేసిన సర్‌ప్రైజ్ ఎలిమెంట్స్ ఇలా ముందుగానే బయటకు వస్తే ప్రేక్షకుల్లో ఉండే ఆసక్తి తగ్గే అవకాశం ఉంది. అందుకే రాబోయే షెడ్యూల్స్‌లో షూటింగ్ ప్రదేశాల వద్ద మరింత జాగ్రత్తలు తీసుకోవాల్సిన అవసరం ఉందనే అభిప్రాయాలు వ్యక్తమవుతున్నాయి.
‘బ్లడీ రోమియో’లో నాని చెఫ్‌తో పాటు గ్యాంగ్‌స్టర్‌ పాత్రలో కనిపించనున్నట్లు ఇప్పటికే టైటిల్ గ్లింప్స్ ద్వారా హింట్ ఇచ్చారు. ‘సాహో’, ‘ఓజీ’ చిత్రాలతో స్టైలిష్ యాక్షన్‌ను చూపించిన సుజీత్.. నాని కోసం ఎలాంటి ప్రపంచాన్ని సృష్టించారన్న ఆసక్తి నెలకొంది.
నిహారిక ఎంటర్‌టైన్‌మెంట్స్, యునానిమస్ ప్రొడక్షన్స్ సంయుక్తంగా ఈ చిత్రాన్ని నిర్మిస్తున్నాయి. ఈ చిత్రాన్ని 2027 వేసవిలో విడుదల చేయాలని మేకర్స్ ప్లాన్ చేస్తున్నట్లు సమాచారం.
ఇది కూడా చదవండి: శింబు - నయనతార.. పదేళ్ల తర్వాత కలవబోతున్న క్రేజీ జోడి.!
[Bloody Romeo Shooting Videos Leaked, Nani Bloody Romeo Movie, Nani Sujeeth Movie, Bloody Romeo Shooting, Nani, Bloody Romeo, Sujeeth, Telugu Film News]
కోలీవుడ్‌లో ఒకప్పుడు సెన్సేషన్ క్రియేట్ చేసిన జంట శింబు, నయనతార. వీరిద్దరూ ప్రేమలో ఉన్నారంటూ అప్పట్లో ఎన్నో వార్తలు వచ్చాయి. ఆ తర్వాత వ్యక్తిగత కారణాలతో విడిపోయినప్పటికీ.. సినిమాల్లో మాత్రం మంచి జోడీగా గుర్తింపు తెచ్చుకున్నారు. ఇప్పుడు దాదాపు పదేళ్ల తర్వాత ఈ జంట మరోసారి వెండితెరపై సందడి చేయబోతున్నట్లు వార్తలు వస్తున్నాయి. 'డ్యూడ్' సినిమాతో దర్శకుడిగా పరిచయమైన కీర్తీశ్వరన్ తెరకెక్కించనున్న సినిమాలో శింబుకు జోడీగా నయనతారను ఎంపిక చేసినట్లు కోలీవుడ్‌లో ప్రచారం జరుగుతోంది.
ప్రస్తుతం వెట్రిమారన్ దర్శకత్వంలో 'అరసన్' సినిమా చేస్తున్న శింబు.. ఆ తర్వాత కీర్తీశ్వరన్ దర్శకత్వంలో ఓ సినిమా చేయడానికి గ్రీన్ సిగ్నల్ ఇచ్చినట్లు సమాచారం. ఈ సినిమా పక్కా కమర్షియల్ యాక్షన్ ఎంటర్‌టైనర్‌గా ఉండబోతుందట. ఇందులో శింబు పవర్‌ఫుల్ పోలీస్ ఆఫీసర్ పాత్రలో కనిపించనున్నట్లు తెలుస్తోంది. ఈ సినిమాలో హీరోయిన్ గా నయనతారను తీసుకోవాలని దర్శకుడు భావిస్తున్నారట. ఇప్పటికే ఆమెతో సంప్రదింపులు కూడా పూర్తయ్యాయని, గ్రీన్ సిగ్నల్ ఇచ్చినట్లు ప్రచారం జరుగుతోంది.
ఒకవేళ ఈ వార్త నిజమైతే.. శింబు, నయనతార దాదాపు పదేళ్ల తర్వాత కలిసి నటించినట్లవుతుంది. గతంలో వీరిద్దరూ 'వల్లవన్' (2006), 'ఇదు నమ్మ ఆళు' (2016) సినిమాల్లో కలిసి నటించారు. ముఖ్యంగా 'ఇదు నమ్మ ఆళు' తర్వాత మళ్లీ వీరిద్దరూ జోడీ కడతారనే వార్త ఇప్పుడు కోలీవుడ్‌లో చర్చనీయాంశంగా మారింది. డిసెంబర్‌లో ఈ సినిమా షూటింగ్ ప్రారంభించే అవకాశం ఉందని సమాచారం.
ఇది కూడా చదవండి: NBK112 కోసం బాలకృష్ణ షాకింగ్ రెమ్యునరేషన్.!
[Simbu Nayanthara Reunion, Simbu Nayanthara Movie, Simbu New Movie, Nayanthara New Movie, Simbu, Nayanthara, Keerthiswaran, Telugu Film News]
నందమూరి బాలకృష్ణ వరుస విజయాలతో మంచి జోష్‌లో ఉన్నారు. ఒకప్పుడు ఆయన సినిమాల బడ్జెట్, మార్కెట్ గురించి చర్చ జరిగితే.. ఇప్పుడు పారితోషికం విషయంలోనూ ఆసక్తికరమైన వార్తలు వినిపిస్తున్నాయి. ముఖ్యంగా కొరటాల శివ దర్శకత్వంలో చేయబోయే NBK112 సినిమా కోసం బాలయ్య భారీ రెమ్యునరేషన్ తీసుకోబోతున్నారనే ప్రచారం టాలీవుడ్‌లో హాట్ టాపిక్‌గా మారింది. ఈ సినిమా కోసం ఆయన ఏకంగా రూ.45 కోట్లు అందుకోనున్నట్లు సమాచారం.
గత కొన్నేళ్లుగా బాలకృష్ణ మార్కెట్ గణనీయంగా పెరిగింది. 'అఖండ', 'వీరసింహారెడ్డి', 'భగవంత్ కేసరి', 'డాకు మహారాజ్' వంటి సినిమాలతో బాక్సాఫీస్ దగ్గర తనకంటూ ప్రత్యేకమైన క్రేజ్ సంపాదించుకున్నారు. ముఖ్యంగా మాస్ ప్రేక్షకుల్లో బాలయ్య సినిమాలకు ఉండే ఆదరణ నిర్మాతలకు మంచి నమ్మకాన్ని కలిగిస్తోంది.
ఈ నేపథ్యంలోనే కొరటాల శివ సినిమాకు రూ.45 కోట్ల పారితోషికం తీసుకోబోతున్నారనే వార్త ప్రాధాన్యత సంతరించుకుంది. ఇదే నిజమైతే బాలకృష్ణ కెరీర్‌లోనే అత్యధిక పారితోషికాల్లో ఒకటిగా నిలవనుంది.
ప్రస్తుతం బాలకృష్ణ, గోపీచంద్ మలినేని దర్శకత్వంలో 'దాదా' సినిమా చేస్తున్నారు. 'వీరసింహారెడ్డి' తర్వాత వీరిద్దరి కాంబినేషన్‌లో వస్తున్న సినిమా కావడంతో దీనిపైనా అంచనాలు ఉన్నాయి. క్రిస్మస్ కానుకగా డిసెంబర్ 24, 2026న ఈ సినిమాను విడుదల చేయాలని మేకర్స్ ప్లాన్ చేశారు.
ఈ సినిమా పూర్తయిన తర్వాత కొరటాల శివ ప్రాజెక్ట్‌ను పట్టాలెక్కించనున్నారు. NBK112ను సుధాకర్ మిక్కిలినేని, సుధాకర్ చెరుకూరి సంయుక్తంగా నిర్మిస్తున్నారు. ఈ సినిమాను భారీ పొలిటికల్ యాక్షన్ డ్రామాగా రూపొందించనున్నట్లు ప్రచారం జరుగుతోంది.
ఇది కూడా చదవండి: 800 కోట్ల క్లబ్‌లో ‘జైలర్ 2’.. కోలీవుడ్ 1000 కోట్ల కల నెరవేరుతుందా.?
[Nandamuri Balakrishna Remuneration, Balakrishna 45 Crore Remuneration, NBK112 Movie Update, Nandamuri Balakrishna, Koratala Siva, Gopichand Malineni, Dada Movie, Telugu Film News]
సూపర్ స్టార్ రజినీకాంత్ నటించిన 'జైలర్ 2' బాక్సాఫీస్ దగ్గర సరికొత్త రికార్డులు సృష్టిస్తోంది. నెల్సన్ దిలీప్ కుమార్ దర్శకత్వంలో వచ్చిన ఈ సినిమా థియేటర్లలో దూసుకుపోతోంది. విడుదలైన 17 రోజుల్లోనే ప్రపంచవ్యాప్తంగా రూ.800 కోట్ల మార్క్‌కు చేరువైంది. ఇప్పటికే రజినీకాంత్ గత చిత్రం '2.0' రికార్డును కూడా అధిగమించి.. అత్యధిక వసూళ్లు సాధించిన తమిళ చిత్రంగా నిలిచింది.
ముఖ్యంగా 17వ రోజు కలెక్షన్లలోనూ ఈ సినిమా మంచి జోరు చూపించింది. శనివారం ఒక్కరోజే ఇండియాలో రూ.9.35 కోట్ల నెట్ వసూళ్లు సాధించినట్లు ట్రేడ్ అంచనాలు చెబుతున్నాయి. శుక్రవారం వచ్చిన రూ.5.50 కోట్లతో పోలిస్తే దాదాపు 70 శాతం వృద్ధి కనిపించడం విశేషం.
17 రోజుల వసూళ్లను పరిశీలిస్తే.. ఇండియాలో ఈ సినిమా మొత్తం రూ.444.75 కోట్ల నెట్, రూ.520.35 కోట్ల గ్రాస్ సాధించింది. ఓవర్సీస్‌లో రూ.270.50 కోట్ల గ్రాస్ వసూలు చేసింది. దీంతో ప్రపంచవ్యాప్తంగా మొత్తం వసూళ్లు రూ.790.85 కోట్లకు చేరుకున్నాయి. అంటే రూ.800 కోట్ల క్లబ్‌లోకి అడుగుపెట్టడానికి మరో రూ.9.15 కోట్లు మాత్రమే అవసరం.
మొత్తానికి 'జైలర్ 2' ఇప్పుడు రూ.800 కోట్ల మార్క్‌కు చేరువలో ఉంది. ఈ మైలురాయిని అందుకుంటే ప్రపంచవ్యాప్తంగా రూ.800 కోట్లు వసూలు చేసిన తొలి తమిళ సినిమాగా అరుదైన రికార్డు సృష్టించనుంది.
ఇదే జోరు కొనసాగితే 'జైలర్ 2' మూవీ ఫుల్ రన్ లో రూ.1000 కోట్ల మార్క్‌కు చేరువైనా ఆశ్చర్యంలేదు. ఇండియన్ సినీ హిస్టరీలో ఇప్పటివరకు పది సినిమాలు మాత్రమే రూ.1000 కోట్ల క్లబ్‌లో చేరాయి. అందులో తెలుగు, హిందీ, కన్నడ సినిమాలు ఉండగా.. తమిళ్ కి మాత్రం ఆ టార్గెట్ అందని ద్రాక్షలా మారింది. ఇప్పుడు 'జైలర్ 2' ఆ మార్క్‌ను అందుకుంటే హిస్టరీ అవుతుంది.
ఇది కూడా చదవండి: మోక్షజ్ఞ డెబ్యూ మూవీ.. హీరోయిన్‌గా బాలీవుడ్ యంగ్ బ్యూటీ.!
[Jailer 2 800 Crore Club, Jailer 2 Day 17 Collection, Jailer 2 Box Office Collection, Jailer 2 1000 Crore Club, Jailer 2 Worldwide Gross, Jailer 2 Movie, Rajinikanth, Nelson Dilipkumar, Anirudh Ravichander]
నందమూరి బాలకృష్ణ తనయుడు మోక్షజ్ఞ సినీ ఎంట్రీ కోసం అభిమానులు చాలాకాలంగా ఎదురుచూస్తున్నారు. ఎట్టకేలకు ఇటీవల మోక్షజ్ఞ డెబ్యూ సినిమాపై అధికారిక ప్రకటన రావడంతో నందమూరి అభిమానుల్లో ఆసక్తి మొదలైంది. బింబిసార ఫేమ్ మల్లిడి వశిష్ఠ ఈ సినిమాకు దర్శకత్వం వహించనుండగా.. మైత్రీ మూవీ మేకర్స్ నిర్మాణ బాధ్యతలు చేపట్టింది.
అయితే ఇప్పుడు ఈ సినిమాలో నటించబోయే హీరోయిన్ విషయంలో ఓ ఆసక్తికరమైన వార్త వినిపిస్తోంది. బాలీవుడ్ నటి రవీనా టాండన్ కూతురు రాషా తడానీని మోక్షజ్ఞకు జోడీగా ఎంపిక చేసే అవకాశాలున్నాయని ప్రచారం జరుగుతోంది.
రాషా తడానీ బాలీవుడ్‌తో పాటు తెలుగు సినిమాలపైనా దృష్టి పెట్టారు. ఇప్పటికే తెలుగులో సూపర్ స్టార్ కృష్ణ మనవడు జయకృష్ణ ఘట్టమనేనితో కలిసి 'శ్రీనివాస మంగాపురం' సినిమాలో నటించారు. ఇప్పుడు మోక్షజ్ఞ సినిమా కోసం కూడా రాషా పేరు వినిపిస్తుండటం ఆసక్తికరంగా మారింది.
నిజానికి మోక్షజ్ఞ డెబ్యూ మూవీ మొదట హనుమాన్ ఫేమ్ ప్రశాంత్ వర్మ దర్శకత్వంలో అనౌన్స్ అయ్యి ఆగిపోయింది. ఆ సమయంలో కూడా హీరోయిన్‌గా రాషా తడానీ పేరు వినిపించడం విశేషం.
ఇక మోక్షజ్ఞ-వశిష్ట సినిమాకు సంబంధించి మరో ఆసక్తికరమైన గాసిప్ కూడా వినిపిస్తోంది. బాలీవుడ్ సీనియర్ నటి కాజోల్ ఈ సినిమాలో కీలక పాత్రలో కనిపించనున్నారట. ముఖ్యంగా ఫ్లాష్‌బ్యాక్ ఎపిసోడ్‌లో ఆమె పాత్ర చాలా కీలకంగా ఉంటుందని టాక్. బాలకృష్ణ కూడా ఈ చిత్రంలో ఓ కీలక పాత్రలో కనిపించనున్నట్లు వార్తలు వస్తున్నాయి. బాలకృష్ణతో కలిసి ఆమె సన్నివేశాలు ఉండే అవకాశముందని ప్రచారం జరుగుతోంది.
ఇది కూడా చదవండి: అర్జున.. పవన్ కళ్యాణ్‌తో దిల్ రాజు భారీ పాన్ ఇండియా మూవీ.!
[Mokshagna Debut Movie Heroine, Raveena Tandon Daughter, Rasha Thadani, Nandamuri Mokshagna, Nandamuri Balakrishna, Mallidi Vassishta, Kajol, Telugu Film News]
పవర్ స్టార్ పవన్ కళ్యాణ్‌తో మరో సినిమా చేయాలని ఎప్పటి నుంచో ఎదురుచూస్తున్న నిర్మాత దిల్ రాజుకు ఇప్పుడు ఆ అవకాశం రాబోతున్నట్లు తెలుస్తోంది. గతంలో వీరిద్దరి కాంబినేషన్‌లో వచ్చిన 'వకీల్ సాబ్' మంచి విజయాన్ని అందుకుంది. ఇప్పుడు మరోసారి ఈ కాంబినేషన్ రిపీట్ కాబోతోందనే వార్త ఫిలింనగర్‌లో ఆసక్తికరంగా మారింది. అంతేకాదు.. ఈసారి ఏకంగా పాన్ ఇండియా స్థాయిలో భారీ మూవీ ప్లాన్ చేస్తున్నారట. ఈ సినిమాకు 'అర్జున' అనే టైటిల్ కూడా పరిశీలనలో ఉన్నట్లు ప్రచారం జరుగుతోంది.
తాజా సమాచారం ప్రకారం.. పవన్ కళ్యాణ్‌తో చేయబోయే సినిమా కోసం దిల్ రాజు 'అర్జున' అనే టైటిల్‌ను రిజిస్టర్ చేయించినట్లు టాక్ వినిపిస్తోంది. మహాభారతంలోని అర్జునుడి పాత్రను గుర్తు చేసేలా ఈ టైటిల్ ఉండటంతో.. పవన్ ఇమేజ్‌కు బాగా సరిపోతుందని అభిమానులు భావిస్తున్నారు. ఇందులో పవన్ ఒక బలమైన లక్ష్యంతో పోరాడే యోధుడి తరహా పాత్రలో కనిపించబోతున్నారనే ప్రచారం కూడా జరుగుతోంది.
ఈ ప్రాజెక్ట్‌కు వంశీ పైడిపల్లి దర్శకత్వం వహించే అవకాశముందని వినికిడి. ప్రస్తుతం దిల్ రాజు.. బాలీవుడ్ స్టార్ సల్మాన్ ఖాన్‌, వంశీ పైడిపల్లి కాంబో ఓ భారీ చిత్రాన్ని నిర్మిస్తున్నారు. ఆ సినిమా పనులు పూర్తయిన తర్వాత పవన్ కళ్యాణ్ ప్రాజెక్ట్‌పై దృష్టి పెట్టాలని భావిస్తున్నట్లు సమాచారం. అయితే పవన్ రాజకీయ బాధ్యతలతో బిజీగా ఉండటంతో ఆయన అందుబాటులో ఉండే షెడ్యూల్స్‌ను బట్టి ఈ సినిమా కార్యాచరణ ముందుకు వెళ్లే అవకాశం ఉందని టాక్.
ఇది కూడా చదవండి: ఫౌజీ సెట్స్‌లోకి ప్రభాస్ రీఎంట్రీ.. క్లైమాక్స్ కోసం హను రాఘవపూడి భారీ ప్లాన్.!
[Pawan Kalyan Pan India Movie, Arjuna Movie, Pawan Kalyan Dil Raju Movie, Pawan Kalyan Vamshi Paidipally, Pawan Kalyan, Dil Raju, Vamshi Paidipally, Telugu Film News]
పాన్ ఇండియా స్టార్ ప్రభాస్ ప్రస్తుతం వరుస సినిమాలతో బిజీగా ఉన్నారు. ఒకవైపు సందీప్ రెడ్డి వంగా దర్శకత్వంలో 'స్పిరిట్', మరోవైపు హను రాఘవపూడి తెరకెక్కిస్తున్న 'ఫౌజీ' సినిమాలతో ప్రేక్షకులను అలరించేందుకు సిద్ధమవుతున్నారు. అయితే ప్రస్తుతం ప్రభాస్ ప్రాధాన్యత అంతా 'ఫౌజీ' సినిమాపైనే ఉన్నట్లు తెలుస్తోంది. తాజాగా ఈ సినిమాకు సంబంధించి మరో ఆసక్తికరమైన అప్‌డేట్ బయటకు వచ్చింది. నవంబర్ 3 నుంచి ఈ మూవీ కొత్త షెడ్యూల్ ప్రారంభం కానున్నట్లు సమాచారం.
తాజా గ్లింప్స్‌తో ఇప్పటికే సినిమాపై అంచనాలు పెరిగిపోయాయి. ఈ నేపథ్యంలో ప్రభాస్ రీ ఎంట్రీ ఇవ్వనున్న షెడ్యూల్‌లో కీలక సన్నివేశాలను తెరకెక్కించనున్నట్లు తెలుస్తోంది. సుమారు రూ.700 కోట్లకు పైగా భారీ బడ్జెట్‌తో మైత్రీ మూవీ మేకర్స్ ఈ చిత్రాన్ని నిర్మిస్తున్నట్లు సమాచారం.
'ఫౌజీ' షూటింగ్ ఇప్పటికే చివరి దశకు చేరుకున్నట్లు ఇండస్ట్రీ వర్గాల్లో టాక్ వినిపిస్తోంది. సినిమాలో రెండు భారీ యాక్షన్ ఎపిసోడ్స్ మాత్రమే పెండింగ్‌లో ఉన్నాయని గతంలో వార్తలు వచ్చాయి. ముఖ్యంగా నవంబర్ 15 నుంచి డిసెంబర్ 15 వరకు నెల రోజుల పాటు క్లైమాక్స్ వార్ ఎపిసోడ్‌ను చిత్రీకరించేందుకు హను రాఘవపూడి ప్లాన్ చేసినట్లు సమాచారం. ఈ షెడ్యూల్ పూర్తయితే సినిమా ప్రధాన చిత్రీకరణ ముగిసే అవకాశముంది.
'ఫౌజీ' మూవీ 2027 మార్చి 19న విడుదల కానుంది. హను రాఘవపూడి దర్శకత్వంలో తెరకెక్కుతున్న ఈ పీరియాడిక్ యాక్షన్ డ్రామాలో ప్రభాస్‌కు జోడీగా ఇమాన్వి నటిస్తున్నారు. మిథున్ చక్రవర్తి, అనుపమ్ ఖేర్, జయప్రద వంటి ప్రముఖ నటీనటులు కీలక పాత్రలు పోషిస్తున్నారు. విశాల్ చంద్రశేఖర్ సంగీతం అందిస్తున్నారు. మైత్రీ మూవీ మేకర్స్ నిర్మిస్తుండగా, టీ-సిరీస్ ఈ చిత్రాన్ని సమర్పిస్తోంది.
ఇది కూడా చదవండి: రెజీనా సంచలన నిర్ణయం.. దాని వెనుక అసలు కారణమేంటి.?
[Fauzi Shooting Update, Prabhas Fauzi Movie, Fauzi Climax, Fauzi Movie Update, Fauzi Release Date, Prabhas, Hanu Raghavapudi, Immanvi, Mythri Movie Makers]
టాలీవుడ్ హీరోయిన్ రెజీనా కసాండ్రా మరోసారి వార్తల్లో నిలిచారు. సినిమాలతో పాటు సామాజిక సేవా కార్యక్రమాల్లోనూ చురుగ్గా పాల్గొనే ఆమె.. తాజాగా ఓ కీలక నిర్ణయం తీసుకున్నారు. హైదరాబాద్ కేంద్రంగా పనిచేస్తున్న 'డెమోక్రటిక్ సంఘ' అనే స్వచ్ఛంద సంస్థ నుంచి పూర్తిగా తప్పుకుంటున్నట్లు ప్రకటించారు. సహ వ్యవస్థాపకురాలిగా, సభ్యురాలిగా కూడా ఇకపై ఆ సంస్థతో తనకు ఎలాంటి సంబంధం ఉండదని స్పష్టం చేశారు.
సోషల్ మీడియా వేదికగా రెజీనా ఈ విషయాన్ని వెల్లడించారు. చాలా కాలంగా ఆలోచించి, ఆత్మపరిశీలన చేసుకున్న తర్వాతే ఈ నిర్ణయం తీసుకున్నట్లు తెలిపారు. తన జీవితంలో డెమోక్రటిక్ సంఘ ప్రయాణం ఎంతో అర్థవంతమైనదని, ఈ సంస్థ ద్వారా ఎన్నో అనుభవాలు, స్నేహాలు, మధుర జ్ఞాపకాలు సంపాదించుకున్నానని పేర్కొన్నారు.
అయితే ఈ సంస్థ నుంచి ఎందుకు తప్పుకుంటున్నారనే విషయంపై మాత్రం రెజీనా స్పష్టమైన కారణాన్ని వెల్లడించలేదు. జీవితంలో ముందుకు సాగుతున్న క్రమంలో కొత్త మార్గాన్ని ఎంచుకోవడానికి, ఇతర ప్రాధాన్యతలపై దృష్టి పెట్టడానికి ఇదే సరైన సమయమని భావిస్తున్నట్లు తన ప్రకటనలో పేర్కొన్నారు.
సినిమాల్లో నటిస్తూనే సామాజిక సేవపై కూడా ఆసక్తి చూపించే రెజీనా.. 2023లో డెమోక్రటిక్ సంఘతో తన ప్రయాణాన్ని ప్రారంభించారు. ఈ సంస్థకు సహ వ్యవస్థాపకురాలిగా బాధ్యతలు చేపట్టారు. గ్రామీణ ప్రాంతాల్లో మహిళలకు నాయకత్వ లక్షణాలు పెంపొందించడం, ప్రజాస్వామ్యంపై అవగాహన కల్పించడం, మహిళల హక్కుల గురించి తెలియజేయడం వంటి కార్యక్రమాల్లో భాగమయ్యారు.
డెమోక్రటిక్ సంఘతో తన ప్రయాణంలో భాగమైన ప్రతి ఒక్కరికీ రెజీనా కృతజ్ఞతలు తెలిపారు. సంస్థ ఆశయాల కోసం పనిచేసే అవకాశం రావడం తనకు గర్వకారణమని పేర్కొన్నారు. తనకు అండగా నిలిచిన సహచరులు, స్నేహితులు, శ్రేయోభిలాషుల మద్దతును ఎప్పటికీ మర్చిపోలేనని చెప్పారు. సంస్థ భవిష్యత్తులో మరింత అభివృద్ధి చెందాలని ఆకాంక్షించారు.
ఇది కూడా చదవండి: RC17 ఎవరి ఊహలకు అందదు.. ఏం ప్లాన్ చేశావయ్యా సుకుమార్.!
https://www.instagram.com/p/DfJZ7UtoWke/
[Regina Democratic Sangha, Regina Cassandra, Regina Cassandra Latest News, Democratic Sangha, Regina Cassandra NGO, Regina Cassandra Social Work, Telugu Film News]
.webp)
జీవితంలో ఎదగాలన్నా, శత్రువులను చిత్తు చేయాలన్నా..చాణక్యుడు చెప్పినట్టు ఇలా చేయండి..!
జీవితంలో ప్రశాంతంగా ముందుకు సాగాలని ప్రతి ఒక్కరూ కోరుకుంటారు. కానీ సమాజంలో లేదా పని చేసే చోట కొందరు వ్యక్తులు మన ఎదుగుదలను చూసి ఓర్వలేక శత్రువులుగా మారుతుంటారు. అలాంటి వారిని ఎదుర్కొనేందుకు కేవలం శారీరక బలం లేదా కక్ష సాధింపు సరిపోవని ఆచార్య చాణక్యుడు ఎప్పుడో చెప్పాడు. శత్రువులను శాశ్వతంగా ఓడించాలంటే శారీరక శక్తి కంటే మానసిక పరిపక్వత, చాతుర్యం చాలా ముఖ్యం. జీవితంలో ఎదురయ్యే ఛాలెంజ్ లను, శత్రువులను ఎలా ఎదుర్కోవాలో ఆచార్య చాణక్యుడు తన చాణక్య నీతిలో అద్బుతంగా వివరించాడు. వాటిని మన దైనందిన జీవితానికి అన్వయించుకుంటే ఎలాంటి క్లిష్ట పరిస్థితులనైనా సులభంగా జయించవచ్చు. అవేంటో తెలుసుకుంటే..
ప్రవర్తన..
మనం నడుచుకునే తీరు, మాట్లాడే విధానం , పరిస్థితులను అంచనా వేసే పద్ధతే మనల్ని విజేతగా నిలబెడుతుంది. శత్రువులు మనపై ఆధిపత్యం చెలాయించాలని చూసినప్పుడు మనం కోపం చేసుకోకుండా వ్యూహాత్మకంగా వ్యవహరించాలి.
మౌనం..
మౌనం అనేది అన్ని సమయాలలోనూ బలహీనత కాదు. ఎవరైనా మనల్ని కవ్విస్తున్నప్పుడు లేదా మనకు వ్యతిరేకంగా మాట్లాడుతున్నప్పుడు ప్రతిసారీ వెంటనే రెస్పాండ్ కావాల్సిన అవసరం లేదు. కొన్నిసార్లు మనం మౌనంగా ఉండటమే శత్రువుకు అతిపెద్ద సమాధానం అవుతుంది. మనం వెంటనే బదులు ఇవ్వకపోతే, అవతలి వ్యక్తికి మన తర్వాత ఆలోచన ఏమిటో, ఏం చేస్తామో అనేది అంతుచిక్కదు. దీనివల్ల వారు గందరగోళానికి గురవుతారు. కాబట్టి అనవసరమైన వాదనలకు దిగి శక్తిని వృథా చేసుకునే బదులు నిశ్శబ్దంగా ఉండి సరైన సమయం కోసం వేచి చూడటం మంచిది.
అజాగ్రత్త..
ఎవరినైనా ఎదుర్కొనేటప్పుడు లేదా పోటీ పడేటప్పుడు వారిని ఎప్పుడూ తక్కువ అంచనా వేయకూడదు. అవతలి వ్యక్తి ఎంత చిన్నవాడైనా, బలహీనుడైనా సరే వారిలో ఉండే ప్రత్యేక నైపుణ్యాలు లేదా వారి ప్రణాళికలు ప్రమాదకరంగా మారవచ్చు. శత్రువును బలహీనుడిగా భావించి అజాగ్రత్తగా ఉంటే అది మనకే నష్టాన్ని తెస్తుంది. కాబట్టి ఎల్లప్పుడూ అప్రమత్తంగా ఉండటం చాలా అవసరం.
గోప్యత..
మన జీవితానికి లేదా భవిష్యత్తుకు సంబంధించిన ముఖ్యమైన ప్రణాళికలను ఎవరితోనూ పంచుకోకూడదు. మన ఆలోచనలు, చేసే పనులు ముందుగానే ఇతరులకు తెలిస్తే , మన మంచి ఓర్వలేని వారు వాటిని దెబ్బతీసేందుకు ప్రయత్నిస్తారు. అందుకే మన విజయానికి బాటలు వేసే ప్రణాళికలు పూర్తిగా అమలయ్యే వరకు వాటిని గోప్యంగా ఉంచడమే అత్యంత సురక్షితమైన మార్గం.
తొందరపాటు..
ఏదైనా రంగంలో ముందుకు వెళ్లాలంటే ముందుగా మన చుట్టూ ఉన్న పరిస్థితులను, మనుషులను సరిగ్గా అర్థం చేసుకోవాలి. శత్రువు బలాలు ఏమిటి, వారి బలహీనతలు ఏమిటి అనే విషయాలపై స్పష్టత ఉండాలి. వారి ఆలోచనా విధానాన్ని బట్టి మనం ఎలాంటి నిర్ణయం తీసుకోవాలో అంచనా వేయవచ్చు. ఆలోచించకుండా తొందరపాటుతో అడుగులు వేసే బదులు ఆచి తూచి అడుగు వేయడం ఎప్పుడూ మంచిది.
కోపం..
కోపం అనేది మనిషిలో ఉన్న విచక్షణా జ్ఞానాన్ని పూర్తిగా నాశనం చేస్తుంది. కోపంతో తీసుకునే ఏ నిర్ణయమైనా భవిష్యత్తులో తీవ్ర నష్టాన్ని కలిగిస్తుంది. శత్రువులు మిమ్మల్ని రెచ్చగొట్టడానికి ప్రయత్నించినప్పటికీ మీ భావోద్వేరాల నియంత్రణ కోల్పోకూడదు. ప్రశాంతమైన మనసుతో ఆలోచించి తీసుకునే నిర్ణయాలే ఎప్పుడూ సరైన ఫలితాలను ఇస్తాయి.
మెరుగవ్వాలి..
ప్రతి రోజూ ఏదో ఒక విషయం నేర్చుకుని మెరుగవుతూ ఉండాలి. మన విద్య, జ్ఞానం, నైపుణ్యాలు , అనుభవాన్ని పెంచుకోవడం ద్వారా మానసికంగా బలపడవచ్చు. మెంటల్ గా బలవతులుగా ఉన్నప్పుడు ఎలాంటి శత్రువులైనా మనల్ని సులభంగా ఓడించలేరు. ప్రతి వ్యక్తికి కష్టపడే తత్వమే వారి బలానికి అసలుసిసలైన ఆధారం అవుతుంది.
భయాన్ని వదిలిపెట్టాలి..
అన్నింటికంటే ముఖ్యంగా మన మనసులో ఉండే భయమే మన అతిపెద్ద శత్రువు. భయం కారణంగా మనిషి సరైన నిర్ణయాలు తీసుకోలేడు. ఏ సవాల్‌నైనా ఎదుర్కొనే ముందు మనసులో ఆత్మవిశ్వాసాన్ని నింపుకోవాలి. భయాన్ని వీడి ధైర్యంగా అడుగు ముందుకు వేస్తే జీవితంలో ఎదురయ్యే ప్రతి అడ్డంకి దానంతట అదే తొలగిపోతుంది.
*రూపశ్రీ.
.webp)
పండుగ అనగానే మన ఇళ్లలో పిండి వంటలు, ఘుమఘుమలాడే కారపు పదార్థాలు, నోరూరించే తీపి పదార్థాల హోరు మొదలవుతుంది. అయితే ఈ పండుగ వేడుకల్లో ఆనందంగా తిన్న ఆహారమే కొన్నిసార్లు తీవ్రమైన ఎసిడిటీ, ఛాతీలో మంట, కడుపులో అసౌకర్యానికి దారితీస్తుంది. పండుగ సమయాల్లో మన చేసే కొన్ని చిన్న ఆహార పొరపాట్లు జీర్ణవ్యవస్థపై తీవ్రమైన ప్రభావాన్ని చూపుతాయి. చాలామంది ఉదయం పూట పండుగ పనుల బిజీలో లేదా విందు కోసం కడుపు ఖాళీగా ఉంచుకోవాలనే ఉద్దేశంతో ఎక్కువ సేపు ఏమీ తినకుండా ఉంటారు. ఇలా దీర్ఘకాలం పాటు ఖాళీ కడుపుతో ఉండి, ఆ తర్వాత ఒకేసారి భారీ విందు భోజనం చేయడం వల్ల కడుపుపై తీవ్రమైన ఒత్తిడి పడి ఆమ్లాలు (Acids) అధికంగా ఉత్పత్తి అవుతాయి. ఇది కడుపును సాగదీసి యాసిడ్ రిఫ్లక్స్ ప్రమాదాన్ని గణనీయంగా పెంచుతుంది.
ఇక పండుగ విందులలో సమోసాలు, పకోడీలు, పూరీలు మరియు క్రీమీ గ్రేవీలతో కూడిన వేయించిన పదార్థాలు ఉండాల్సిందే. అయితే రీసెర్చ్ గేట్ (ResearchGate) అధ్యయనం ప్రకారం, ఇలాంటి అధిక కొవ్వు ఉండే వేయించిన ఆహారాలు జీర్ణమಾಗడానికి చాలా ఎక్కువ సమయం పడుతుంది. ఇవి కడుపు ఖాళీ అయ్యే ప్రక్రియను మందగించి, ఛాతీలో మంట లక్షణాలను మరింత తీవ్రం చేస్తాయి. వీటితో పాటు అత్యంత కారంగా ఉండే కూరలు, పచ్చళ్లు మరియు మసాలా పదార్థాలు జీర్ణకోశ గోడలను చికాకు పెట్టి తీవ్రమైన ఇబ్బందిని కలిగిస్తాయి. అయితే అందరికీ అన్ని మసాలాలు పడాలని లేదు, కొందరిలో మిరపకాయల కారం తక్షణమే ఎసిడిటీని ట్రిగ్గర్ చేస్తుంది. కాబట్టి మీ శరీర తత్వానికి సరిపడే మోతాదులో మాత్రమే వీటిని తీసుకోవడం మంచిది.
పండుగ పూట పిండివంటలు, చాక్లెట్లు, కేకులు మరియు రిచ్ డెజర్ట్‌లను పెద్ద మొత్తంలో లాగించేయడం మరో పెద్ద పొరపాటని నిపుణులు హెచ్చరిస్తున్నారు. ముఖ్యంగా చాక్లెట్లు తీసుకోవడం వల్ల కొందరిలో రిఫ్లక్స్ సమస్య తీవ్రమవుతుంది. అలాగే విందు సమయంలో లేదా ఆ వెంటనే టీ, కాఫీలు లేదా కార్బోనేటెడ్ శీతల పానీయాలు అధికంగా సేవించడం వల్ల కడుపులో గ్యాస్, ఉబ్బరం మరియు తేన్పులు విపరీతంగా పెరుగుతాయి. ముఖ్యంగా ఖాళీ కడుపుతో లేదా భోజనం చేసిన వెంటనే కెఫిన్ పానీయాలు తీసుకోవడం యాసిడ్ ఉత్పత్తిని వేగవంతం చేస్తుంది.
అన్నింటికంటే ముఖ్యంగా, రాత్రి పూట ఆలస్యంగా భారీ విందు ముగించిన వెంటనే నిద్రపోవడం లేదా విశ్రాంతి తీసుకోవడం వల్ల తిన్న ఆహారం తిరిగి అన్నవాహికలోకి (Oesophagus) తన్నేసే ప్రమాదం ఉంది. అమెరికన్ కాలేజ్ ఆఫ్ గ్యాస్ట్రోఎంటాలజీ జర్నల్ నివేదిక ప్రకారం, భోజనానికి మరియు నిద్రపోవడానికి మధ్య కనీసం 3 గంటల వ్యవధి ఉండాలి. రాత్రి వేళల్లో ఈ చిన్న నియమం పాటించకపోతే తీవ్రమైన ఎసిడిటీ నిద్రను భగ్నం చేస్తుంది. అందువల్ల పండుగ రుచులను ఆస్వాదిస్తూనే, మితంగా తింటూ, ఆరోగ్యకరమైన జీవనశైలిని పాటిస్తే ఎసిడిటీ జోలికిపోకుండా పండుగను ఆనందంగా జరుపుకోవచ్చు.
Festival Indigestion Causes, Holiday Acidity And Bloating, Prevent Acid Reflux Festivals, Festive Diet Mistakes, Heartburn Food Triggers, Digestive Health Tips, Wellness Tips In Telugu.
(18).webp)
ప్రస్తుతం మన దైనందిన జీవితంలో స్మార్ట్‌వాచ్‌లు ఒక అత్యవసర ఆరోగ్య భాగస్వామిగా మారిపోయాయి. మణికట్టుపై ధరించే ఈ చిన్న పరికరం గుండె వేగం ఎంత ఉంది, ఎన్ని అడుగులు నడిచాం, ఎంతసేపు గాఢంగా నిద్రపోయాం, రక్తంలో ఆక్సిజన్ స్థాయి ఎంత ఉందనే వివరాలను ఎప్పటికప్పుడు అంచనా వేస్తూ మనకు తెలపడంలో కీలకపాత్ర పోషిస్తోంది. ముఖ్యంగా ప్రతి సంవత్సరం అక్టోబర్ 29న ప్రపంచ స్ట్రోక్ దినోత్సవాన్ని జరుపుకోవడం ద్వారా పక్షవాతంపై ప్రజల్లో అవగాహన పెంచాలని, సకాలంలో ప్రాణాలను కాపాడుకునేలా ప్రోత్సహించాలని వైద్య నిపుణులు ఎల్లప్పుడూ హెచ్చరిస్తుంటారు. అయితే చాలామంది తమ స్మార్ట్‌వాచ్‌లో హార్ట్‌బీట్ నిమిషానికి 72 సార్లు సాధారణంగా కనిపిస్తుంటే చాలు, తమకు ఎటువంటి ప్రాణాపాయం లేదని, స్ట్రోక్ వచ్చే ప్రమాదం లేదని చాలా పొరపడుతుంటారు. గురుగ్రామ్‌లోని ప్రముఖ సీకే బిర్లా ఆసుపత్రి న్యూరాలజీ సీనియర్ కన్సల్టెంట్ డాక్టర్ మోహిత్ ఆనంద్ ప్రకారం.. స్మార్ట్‌వాచ్‌లను ఎట్టిపరిస్థితుల్లోనూ పూర్తి స్థాయి వైద్య పరీక్షా పరికరాలుగా భావించకూడదు. ఇవి కేవలం గుండె వేగం, గుండె లయ వంటి కొన్ని ప్రాథమిక అంశాలను మాత్రమే గమనిస్తాయి. కొన్ని అత్యాధునిక పరికరాలు ఏట్రియల్ ఫిబ్రిలేషన్ (AFib) వంటి అసాధారణ గుండె లయలను గుర్తించే సూచనలు ఇవ్వగలవు, ఇది భవిష్యత్తులో స్ట్రోక్ ప్రమాదాన్ని తీవ్రంగా పెంచుతుంది.
అయితే, అసలు విషయం ఏమిటంటే, స్ట్రోక్ అనేది కేవలం గుండె వేగానికి మాత్రమే సంబంధించిన సమస్య కాదు. మెదడుకు ఆక్సిజన్‌ను, రక్తాన్ని సక్రమంగా సరఫరా చేసే రక్తనాళంలో రక్తం గడ్డకట్టడం, లేదా రక్తనాళం చిట్లిపోయి తీవ్రమైన రక్తస్రావం జరగడం వల్ల అకస్మాత్తుగా స్ట్రోక్ సంభవిస్తుంది. కాబట్టి మీ స్మార్ట్‌వాచ్ స్క్రీన్‌పై గుండె నిమిషానికి సరిగ్గా సాధారణ రీడింగ్‌లో కొట్టుకుంటున్నట్లు కనిపించినా, మెదడులో జరిగే అంతర్గత రక్తనాళాల సమస్యల వల్ల స్ట్రోక్ వచ్చే అవకాశాన్ని పూర్తిగా కొట్టిపారేయలేమని వైద్య నిపుణులు స్పష్టం చేస్తున్నారు. స్ట్రోక్ ముప్పు ముంచుకొస్తున్నప్పుడు శరీరం కొన్ని కీలకమైన హెచ్చరిక సంకేతాలను అకస్మాత్తుగా ఇస్తుంది. ముఖం ఒకవైపు అకస్మాత్తుగా వాలిపోవడం, చేతులు లేదా కాళ్లలో ఒకవైపు తీవ్రమైన బలహీనత లేదా తిమ్మిరి ఆవరించడం, మాట్లాడటంలో ఇబ్బంది తడబడటం లేదా ఎదుటివారు చెప్పేది అసలు అర్థం చేసుకోలేకపోవడం, అకస్మాత్తుగా చూపు మందగించడం లేదా దృష్టి పూర్తిగా కోల్పోవడం, నడవడంలో ఇబ్బంది కలగడం, సమతుల్యత దెబ్బతినడం, ఎటువంటి స్పష్టమైన కారణం తెలియకుండా విపరీతమైన తలనొప్పి రావడం వంటి ప్రమాదకర లక్షణాలు కనిపిస్తాయి.
ఈ లక్షణాల్లో ఏ ఒక్కటి కనిపించినా వెంటనే అత్యవసర వైద్య సహాయం తీసుకోవాలి తప్ప, స్మార్ట్‌వాచ్ సాధారణ రీడింగ్ చూపిస్తోందన్న ధీమాతో ఆసుపత్రికి వెళ్లడం ఆలస్యం చేయకూడదు. లక్షణాలు ప్రారంభమైన సమయాన్ని కచ్చితంగా గుర్తుంచుకోవడం వైద్య చికిత్సలో అత్యంత కీలకం. కొన్ని నిమిషాల్లో ఆ లక్షణాలు అంతగా అనిపించకపోయినా వాటిని తేలికగా తీసుకోకూడదు. అది తాత్కాలిక ఇస్కీమిక్ దాడి (TIA) లేదా మినీ స్ట్రోక్ కావడానికి పూర్తి అవకాశం ఉంది. సెన్సార్లు కదలికల వల్ల, పరికరాన్ని సరిగ్గా ధరించకపోవడం వల్ల కొన్నిసార్లు తప్పు రీడింగ్స్ ఇచ్చే సాంకేతిక పరిమితులు స్మార్ట్‌వాచ్‌లకు ఉంటాయి. కాబట్టి రక్తంలో ఆక్సిజన్ స్థాయి సాధారణంగా ఉన్నా, మెదడుకు రక్త సరఫరా సక్రమంగా జరుగుతోందని ఎప్పుడూ గుడ్డిగా నమ్మకూడదు. క్రమమైన వ్యాయామం, సమతుల్య ఆహారం, రక్తపోటు, కొలెస్ట్రాల్, మధుమేహాన్ని ఎప్పుడూ అదుపులో ఉంచుకోవడం ద్వారా స్ట్రోక్ ముప్పును గణనీయంగా తగ్గించుకోవచ్చు.
Stroke With Normal Heart Rate, Hidden Stroke Risks, Doctors Warnings On Stroke, Cardiovascular Health Facts, Silent Stroke Causes, Medical Advice In Telugu, Heart And Brain Health
.webp)
ఉపవాసం అనగానే మనలో చాలామందికి ముందుగా గుర్తువచ్చేది ఏదో ఒక పూట భోజనం మానివేయడం లేదా దేవుడి పేరుతో చేసే పూజా కార్యక్రమాలు. అయితే ఆధునిక వైద్య శాస్త్రం , మన పురాతన కాలం నాటి ఆచారాలు కూడా ఉపవాసం వల్ల కలిగే అద్భుతమైన ఆరోగ్య ప్రయోజనాలను చాలా స్పష్టంగా చెబుతున్నాయి. ఎటువంటి ఖర్చు లేకుండా, మనం పాటించే చిన్న ఉపవాస పద్ధతి శరీరం లోపల ఎన్నో అద్బుతమైన మార్పులకు కారణమవుతుంది. ఉపవాసం గురించి మూర్ఖంగా వాదించే వారు కూడా ఉంటారు. అలాంటి వారు ఉపవాసం వల్ల కలిగే ప్రయోజనాల గురించి పూర్తీగా అర్థం చేసుకోవాలి. దీని గురించి వివరంగా తెలుసుకుంటే..
జీర్ణవ్యవస్థకు విశ్రాంతి..
శరీరానికి ఎప్పుడూ ఆహారాన్ని అందిస్తూనే ఉంటే జీర్ణవ్యవస్థ విశ్రాంతి లేకుండా పనిచేయాల్సి వస్తుంది. దీనివల్ల కాలక్రమేణా శరీరంలో వ్యర్థాలు పేరుకుపోవడం, కణాల పనితీరు మందగించడం జరుగుతుంది. అదే మనం ఉపవాసం ఉన్నప్పుడు జీర్ణక్రియకు కాస్త విరామం దొరుకుతుంది. ఈ సమయంలో శరీరం తనను తాను శుభ్రం చేసుకునే ప్రక్రియపై పూర్తిగా దృష్టి పెడుతుంది.
ఉపవాసం వల్ల శరీరానికి కలిగే ముఖ్యమైన ప్రయోజనాలు..
బరువు నియంత్రణ..
మనం తినడం ఆపినప్పుడు శరీరం శక్తి కోసం మొదట గ్లూకోజ్ ను, ఆ తర్వాత నిల్వ ఉన్న కొవ్వును కరిగించడం మొదలుపెడుతుంది. దీనివల్ల అనవసరమైన కొవ్వు సులభంగా కరిగిపోయి బరువు అదుపులోకి వస్తుంది.
రోగనిరోధక శక్తి పెరుగుదల..
ఉపవాస సమయాల్లో శరీరం పాత , దెబ్బతిన్న కణాలను తొలగించి కొత్త కణాల ఉత్పత్తికి పెద్దపీట వేస్తుంది. దీనివల్ల రోగనిరోధక వ్యవస్థ మరింత బలంగా తయారవుతుంది.
రక్తంలో చక్కెర స్థాయిల నియంత్రణ..
కొద్దిసేపు ఆహారానికి దూరంగా ఉండటం వల్ల శరీరంలో ఇన్సులిన్ నిరోధకత తగ్గి, మధుమేహం అదుపులో ఉండేందుకు చక్కటి అవకాశం లభిస్తుంది.
మెదడు చురుకుదనం..
ఉపవాసం ఉన్న సమయంలో మెదడుకు రక్తప్రసరణ మెరుగవుతుంది. జ్ఞాపకశక్తి పెరగడానికి , ఏకాగ్రత మెరుగుపడటానికి ఇది ఎంతో ఉపయోగపడుతుంది.
ఈ నిజం తెలుసుకోవాలి..
అయితే ఉపవాసం అంటే రోజంతా పస్తులు ఉండమని కాదు. మన శరీర తత్వానికి తగినట్లుగా, నీళ్లు లేదా పండ్ల రసాలు తాగుతూ తేలికపాటి పద్ధతిలో ఉపవాసం ఉండటం మంచిది. ఒకసారి ఈ చిన్న అలవాటును మన దినచర్యలో భాగం చేసుకుంటే, అనారోగ్యాలొచ్చే అవకాశాలు చాలావరకు తగ్గిపోయి నిత్యం ఉత్సాహంగా ఉండవచ్చు. కాబట్టి ఉపవాసాన్ని కేవలం ఆచారంలా కాకుండా ఆరోగ్య రహస్యంగా భావించి పాటించడం వల్ల మరింత స్పష్టత వస్తుంది.
*రూపశ్రీ.
.webp)
రక్తనాళాల్లో బ్లాకులు ఉన్నాయా? రక్త ప్రసరణ సరిగా జరగడం లేదా? రక్తనాళాల్లో బ్లాకులు ఎందుకు ఏర్పడతాయి? వాటి వల్ల ఎలాంటి ఆరోగ్య సమస్యలు వస్తాయి? రక్తనాళాల్లో కొవ్వు, కొలెస్ట్రాల్ పేరుకుపోవడం వల్ల రక్త ప్రసరణకు ఆటంకం కలుగుతుందా?
మన వంటింట్లోనే దొరికే నాలుగు దినుసులతో ఆయుర్వేద చూర్ణాన్ని ఎలా తయారు చేసుకోవచ్చు? ఈ చూర్ణంలో ఉపయోగించే దినుసులు ఏమిటి? వాటిని ఎంత మోతాదులో తీసుకోవాలి? ఎలా ఉపయోగించాలి? అనే విషయాలను ఆయుర్వేద, వంటింటి వైద్య నిపుణులు డాక్టర్ చిట్టిబొట్ల మధుసూదన శర్మ గారు ఈ వీడియోలో వివరించారు.
రక్తనాళాల్లో బ్లాకులు ఏర్పడటానికి గల కారణాలు, కొలెస్ట్రాల్ సమస్యలు, రక్త ప్రసరణకు సంబంధించిన విషయాలు, నాలుగు దినుసులతో ఆయుర్వేద చూర్ణం తయారీ విధానం గురించి డాక్టర్ మధుసూదన శర్మ గారి వివరణను ఈ వీడియోలో తెలుసుకోవచ్చు.
రక్తనాళాల ఆరోగ్యంపై శ్రద్ధ వహించే వారు, కొలెస్ట్రాల్ సమస్యతో బాధపడుతున్న వారు, రక్త ప్రసరణ గురించి తెలుసుకోవాలనుకునే వారు ఈ వీడియోను చూడండి.
ముఖ్య గమనిక: రక్తనాళాల్లో బ్లాకులు ఉన్నవారు వైద్యుల సూచనల మేరకు చికిత్స తీసుకోవాలి. ఆయుర్వేద చూర్ణం లేదా ఇతర ఇంటి వైద్యాలను ఉపయోగించే ముందు వైద్యులను సంప్రదించాలి. డాక్టర్ సూచించిన మందులను స్వయంగా ఆపకూడదు. రక్తనాళాల్లోని బ్లాకులకు మందులు లేదా స్టెంట్ అవసరమా అనే విషయాన్ని వైద్యులే నిర్ణయించాలి.
మీ ఆరోగ్య సమస్య ఏదైనా... మా హెల్త్ యూట్యూబ్ ఛానల్‌లో సీనియర్ డాక్టర్స్ చెప్పిన సలహాలు... సూచనలు ఉన్నాయి. మా యూట్యూబ్ ఛానల్ కోసం ఇక్కడ క్లిక్ చేయండి 👉 TeluguOne Health (సబ్‌స్క్రైబ్ చేయడం మర్చిపోకండి!)