తెలుగు సినీ చరిత్రలో విలనిజానికి ఒక కొత్త అర్థాన్ని, భాషని నేర్పిన నటుడు రావు గోపాల‌రావు . ఆయన డైలాగ్ డెలివరీ, గంభీరమైన కంఠస్వరం, వ్యంగ్యంతో కూడిన మేనరిజం ప్రేక్షకులను మంత్రముగ్ధులను చేస్తాయి. కేవలం క్రూరత్వమే కాకుండా, తన మాటలతోనే విరోధులను ఉక్కిరిబిక్కిరి చేసే రావు గోపాల‌రావు స్టైల్ విలనిజం ఎప్పటికీ అజరామరం. తాజాగా 'తెలుగువన్' విడుదల చేసిన వీడియోలో ఆయన తన భార్య, కూతురు మరియు అనుచరులతో వేసే పంచ్ డైలాగులు సోషల్ మీడియాలో మళ్ళీ హల్‌చల్ చేస్తున్నాయి.

ఈ వీడియోలో రావు గోపాల‌రావు  ‘రుద్రయ్య’ అనే పాత్రలో కనిపిస్తారు. ప్రత్యర్థులపై ఆయన చూపే కోపం కూడా చాలా వెరైటీగా ఉంటుంది. తన ఇంటి మీద వాలిన కాకిని కాల్చేశానని చెప్పే సందర్భంలో "నిప్పు తెలిసి ముట్టుకున్నా తెలియక ముట్టుకున్నా కాల్త‌ది" అంటూ ఆయన చెప్పే డైలాగ్ ఆయనలోని గంభీరతను చాటుతుంది. అలాగే తన పెంపుడు కోడి బొచ్చుని ప్రత్యర్థి చంపి పంపినప్పుడు "కోడిని వండుకు తిని బొచ్చు మనకు పార్శిల్ చేశాడు" అంటూ ఆయన ప్రదర్శించే హావభావాలు అద్భుతం.

రాజకీయాల్లో ఆరితేరిన రుద్రయ్యకు సొంత ఇంట్లోనే ఎదురుగాలి తగులుతుంది. భార్య అపోజిషన్ పార్టీకి మద్దతు ఇవ్వడంపై ఆయన వేసే సెటైర్లు నవ్వులు పూయిస్తాయి. "మన హోం డిపార్ట్‌మెంట్‌లోనే అపోజిషన్.. పతివ్రతలు.. మొగుడంటే భక్తే కానీ ఓటు మాత్రం అపోజిషన్ పార్టీకే వేస్తారు" అనడం ఆయనకే చెల్లింది. పురాణ కాలం నాటి రావణాసురుడు, హిరణ్యకశిపుల భార్యలను ఉదాహరణగా తీసుకుంటూ ఆయన చేసే విశ్లేషణ అత్యంత వినోదాత్మకంగా ఉంటుంది.

తన కూతురు తను ఇష్టపడని వ్యక్తిని ప్రేమిస్తానంటే, దానికి ఆయన ఇచ్చే కౌంటర్ మాటలు అమోఘం. "ఒకరిని ప్రేమించి ఇంకొకరిని పెళ్లి చేసుకున్నా పతివ్రత క్వాలిటీకి ఏం భంగం ఉండదు" అంటూ ప్రేమను కూడా తనదైన కోణంలో ఎగతాళి చేస్తారు. అంతటితో ఆగకుండా, "నేను తీసుకొచ్చిన సంబంధం చేసుకుంటే నీకు ఒక్కడికే మొగుడు, ఆ సత్తిగాడిని చేసుకుంటే నీకూ నాకూ కలిపి మొగుడైపోతాడు" అని ఆయన చెప్పే తర్కం ఆయన పాత్రలోని కుతంత్రాన్ని, హాస్యాన్ని రెండింటినీ చూపిస్తుంది.

రావు గోపాల‌రావు డైలాగులు కేవలం మాటలు మాత్రమే కాదు, అవి ఒక ట్రెండ్ సెట్టర్స్. విలన్ పాత్రలో ఉండి కూడా ప్రేక్షకులను తన మాటలతో మెప్పించడం ఆయనకు మాత్రమే సాధ్యమైన విద్య. నేటి తరం నటులకు ఆయనొక గొప్ప పాఠశాల. ఈ వీడియోలో ఆయన ప్రదర్శించిన నటన, పలికిన డైలాగులు తెలుగు సినీ అభిమానులకు మరోసారి ఆ పాత జ్ఞాపకాలను గుర్తు చేస్తాయి. ‘రుద్రయ్య’ లాంటి పాత్రలు, రావు గోపాల‌రావు లాంటి నటులు మళ్ళీ పుట్టరనడంలో అతిశయోక్తి లేదు. ఇలాంటి వెరైటీ డైలాగుల‌తో కూడిన వీడియోల కోసం మా Teluguone youtube channelను చేసుకోండి.