తెలుగు సినీ ప్రేక్షకులను భావోద్వేగాల ప్రయాణంలో ముంచెత్తిన అరుదైన చిత్రాల్లో మాస్ మహారాజా రవితేజ నటించిన 'నా ఆటోగ్రాఫ్ స్వీట్ మెమొరీస్' ఒకటి. రవితేజ కెరీర్లోనే అత్యంత వైవిధ్యమైన, విలక్షణమైన సినిమాగా ఇది నిలిచిపోయింది. కమర్షియల్ హంగులకు దూరంగా, జీవితంలోని విభిన్న దశలను, ఆయా దశల్లో ఎదురయ్యే ప్రేమలను ఎంతో హృద్యంగా ఆవిష్కరించిన ఈ సినిమాలోని పాటలు ఇప్పటికీ శ్రోతలను అలరిస్తూనే ఉన్నాయి. తాజాగా ఈ చిత్రంలోని క్లాసిక్ లవ్ ఫెయిల్యూర్ సాంగ్ 'నువ్వంటే ప్రాణమని' సోషల్ మీడియాలో మరోసారి వైరల్ అవుతూ అందరినీ నోస్టాల్జియాలోకి తీసుకెళ్తోంది.
సినిమాలో లవ్ ఫెయిల్యూర్ నేపథ్యంలో వచ్చే ఈ సాంగ్, ఒక ప్రేమికుడి గుండె కోతను కళ్లకు కట్టినట్లు చూపిస్తుంది. మొదటి ప్రేమ విఫలమై, ఆ బాధ నుంచి కోలుకోలేక రూమ్లోనే ఉండిపోయే ‘శీను’ పాత్రలో రవితేజ అద్భుతమైన నటనను కనబరిచారు. అప్పటివరకు మాస్ రోల్స్ తో అలరించిన రవితేజ, ఈ సాంగ్లో ఎంతో సటిల్ గా, అత్యంత సహజంగా జీవించేసి అందరినీ ఆశ్చర్యపరిచారు. అన్నయ్య, వదినలు తమ్ముడి పరిస్థితిని చూసి బాధపడే సన్నివేశం, దానికి తోడుగా వచ్చే ఈ బ్యాక్గ్రౌండ్ సాంగ్ థియేటర్ లో ప్రతి ఒక్కరినీ కదిలించింది.
ఈ రొమాంటిక్ ట్రాజెడీ మెలోడీని ప్రముఖ గాయకుడు విజయ్ ఏసుదాస్ తన అద్భుతమైన గొంతుతో పాడారు. సంగీత దర్శకుడు భరద్వాజ్ అందించిన హృదయానికి హత్తుకునే స్వరాలు ఈ పాటకు ప్రాణం పోశాయి. "కన్నులకి కలలు లేవు నీరు తప్ప", "ప్రేమంటేనే శాశ్వత విరహం అంతేనా.. ప్రేమిస్తేనే సుదీర్ఘ నరకం నిజమేనా" అంటూ చంద్రబోస్ రాసిన లోతైన సాహిత్యం విరహ వేదనను అనుభవిస్తున్న ప్రతి ఒక్కరి గుండెలను తాకుతుంది. ద్రోహం చేసిన ప్రియురాలిని నిందించలేక, తనలో తానే నలిగిపోయే ప్రేమికుడి ఆవేదన ఈ లిరిక్స్ లో స్పష్టంగా కనిపిస్తుంది.
ఎస్. గోపాల్ రెడ్డి దర్శకత్వంలో రూపుదిద్దుకున్న ఈ చిత్రం తమిళ 'ఆటోగ్రాఫ్' కు రీమేక్ అయినప్పటికీ, తెలుగు నేటివిటీకి తగ్గట్టుగా అద్భుతంగా తెరకెక్కించారు. ఈ చిత్రంలో రవితేజ సరసన భూమిక, గోపిక, మల్లిక కథానాయికలుగా నటించి మెప్పించారు. సినిమా బాక్సాఫీస్ వద్ద ఆశించిన స్థాయి కమర్షియల్ విజయాన్ని అందుకోలేకపోయినా, ఒక క్లాసిక్ చిత్రంగా మాత్రం ప్రేక్షకుల గుండెల్లో సుస్థిర స్థానాన్ని సంపాదించుకుంది.
ప్రస్తుతం యూట్యూబ్లో ఈ వీడియో సాంగ్ మిలియన్ల కొద్దీ వ్యూస్ సాధిస్తూ దూసుకుపోతోంది. ఈ పాట కింద నెటిజన్లు తమ పాత జ్ఞాపకాలను, కాలేజీ రోజులను గుర్తు చేసుకుంటూ ఎమోషనల్ కామెంట్లు పెడుతున్నారు. "ఈ రోజుల్లో ఎన్నో లవ్ బ్రేకప్ సాంగ్స్ వస్తున్నా.. ఈ పాట ఇచ్చే పెయిన్, ఫీల్ మరే పాటలోనూ రాదు" అంటూ సంగీత ప్రియులు తమ అప్రిసియేషన్ను కామెంట్ల రూపంలో తెలియజేస్తున్నారు. గుండె లోతులను తాకే ఈ మ్యాజికల్ మెలోడీని మీరు కూడా మరోసారి విని ఆస్వాదించండి. ఇలాంటి మంచి ఎమోషనల్ సాంగ్స్ కోసం మా Teluguone youtube channelను Subscribe చేసుకోండి.
