కన్నడ ఇండస్ట్రీ నుంచి వచ్చి పాన్-ఇండియా రేంజ్లో తిరుగులేని ఇమేజ్ సొంతం చేసుకున్న రాకింగ్ స్టార్ యశ్, నేషనల్ క్రష్ రష్మిక మందన్న గతంలో చేసిన ఓ వివాదాస్పద కామెంట్పై తాజాగా నోరు విప్పారు. గతంలో రష్మిక తనను ఉద్దేశించి చేసిన వ్యాఖ్యలపై ఓ జాతీయ టీవీ ఛానెల్ ఇంటర్వ్యూలో స్పందిస్తూ యశ్ తనదైన శైలిలో మెచ్యూర్డ్గా బదులిచ్చారు.
2017లో ఇండస్ట్రీకి కొత్తగా వచ్చిన సమయంలో రష్మిక ఒక టీవీ షో ర్యాపిడ్ ఫైర్ రౌండ్లో కన్నడ ఇండస్ట్రీలో ‘మిస్టర్ షో ఆఫ్’ ఎవరు అనే ప్రశ్నకు యశ్ పేరు చెప్పారు. ఈ వ్యాఖ్యలపై అప్పట్లో యశ్ అభిమానులు రష్మికపై తీవ్రస్థాయిలో ఆగ్రహం వ్యక్తం చేయడంతో పాటు సోషల్ మీడియాలో భారీగా ట్రోల్ చేశారు. దీంతో పరిస్థితి తీవ్రతను గ్రహించిన రష్మిక బహిరంగంగా క్షమాపణలు కూడా చెప్పిన సంగతి తెలిసిందే.
ఈ వివాదంపై సుదీర్ఘ కాలం తర్వాత స్పందించిన యశ్, "ఆమె ఏ ఉద్దేశంతో అలా మాట్లాడిందో నాకు తెలియదు. అప్పట్లో రష్మిక ఇండస్ట్రీకి చాలా కొత్త. కొన్ని టీవీ షోలలో యాంకర్లు ఆప్షన్లు ఇచ్చి ఏదో ఒకటి ఎంచుకోమంటారు, ఆ క్రమంలోనే ఆమె అలా చెప్పి ఉండవచ్చు. అయినా ఎవరి అభిప్రాయం వారిది, ఒకరి ఆలోచన లేదా దృష్టికోణం నా నిజమైన వ్యక్తిత్వాన్ని ఎప్పటికీ మార్చలేదు" అని చాలా కూల్గా తేల్చి చెప్పారు.
అంతేకాకుండా తన అభిమానులను ఉద్దేశించి యశ్ ఒక స్పష్టమైన సందేశాన్ని ఇచ్చారు. "ఇతర నటీనటులను గౌరవించకుండా వారిపై వ్యక్తిగత దాడులు చేసేవారు, అభ్యంతరకరంగా మాట్లాడేవారు నా అభిమానులు కానే కారు" అని యశ్ తేల్చి చెప్పారు. తోటి కళాకారుల అభిప్రాయాలను గౌరవించాలని ఆయన తన ఫ్యాన్స్కు పిలుపునిచ్చారు.
ప్రస్తుతం యశ్ చేసిన ఈ సంచలన కామెంట్స్ సోషల్ మీడియాలో నెటిజన్లు, మూవీ లవర్స్ మధ్య తీవ్రంగా చర్చనీయాంశమయ్యాయి. వివాదాలకు దూరంగా ఉంటూ, పక్కటింటి హీరోలా స్పందించిన యశ్ మెచ్యూరిటీకి అంతా హ్యాట్సాఫ్ చెబుతున్నారు.
భారీ అంచనాల నడుమ రూపొందుతున్న యశ్ ‘టాక్సిక్’ చిత్రం ఆగస్టు 26న ప్రపంచవ్యాప్తంగా థియేటర్లలో విడుదల కానుంది. మరోవైపు నితీష్ తివారీ ప్రతిష్టాత్మక ప్రాజెక్ట్ ‘రామాయణ’లో యశ్ రావణుడి పాత్రలో మెరవనుండటంతో అభిమానులు ఈ ప్రాజెక్టుల కోసం ఎంతో ఆసక్తిగా ఎదురుచూస్తున్నారు.
.WEBP)
