మెగా పవర్‌స్టార్ రామ్ చరణ్ సతీమణి, కొణిదెల కోడలు ఉపాసన కామినేని తాజాగా ఒక థియేటర్ స్క్రీనింగ్‌లో తీవ్ర అసహనానికి గురయ్యారు. సాధారణంగా ఎంతో హుందాగా, ప్రశాంతంగా కనిపించే ఉపాసన.. అభిమానుల అతి ప్రవర్తన కారణంగా ఒక్కసారిగా కోపాన్ని ప్రదర్శించాల్సి వచ్చింది. ప్రస్తుతం దీనికి సంబంధించిన ఒక వీడియో నెట్టింట విపరీతంగా హల్ చల్ చేస్తోంది.

అసలు విషయానికి వస్తే.. మెగా అభిమానులు ఎంతో ఆసక్తిగా ఎదురుచూస్తున్న సరికొత్త చిత్రం ‘పెద్ది’. ఈ సినిమాకు సంబంధించిన ఒక ప్రత్యేక ప్రదర్శనను వీక్షించడానికి ఉపాసన థియేటర్‌కు విచ్చేశారు. ఆమెను చూడగానే అక్కడున్న అభిమానులు ఒక్కసారిగా ఎగబడ్డారు. కొందరు ఫ్యాన్స్ హద్దులు దాటి ప్రవర్తించడంతో అక్కడ తీవ్ర గందరగోళ వాతావరణం నెలకొంది.

ఈ క్రమంలోనే తోపులాట జరగడం, సెక్యూరిటీని దాటుకుని మరీ కొందరు అభిమానులు ఓవరాక్షన్ చేయడంతో ఉపాసన తన నియంత్రణ కోల్పోయారు. బాధ్యతారాహిత్యంగా వ్యవహరిస్తున్న సదరు వ్యక్తులపై ఆమె అక్కడికక్కడే తీవ్ర ఆగ్రహం వ్యక్తం చేశారు. శాంతంగా ఉండే మెగా కోడలు అలా సీరియస్ అవ్వడంతో చుట్టుపక్కల వారు ఒక్కసారిగా అవాక్కయ్యారు.

ఈ వైరల్ వీడియోపై సోషల్ మీడియా వేదికగా నెటిజన్లు, సినీ ప్రియులు రకరకాలుగా స్పందిస్తున్నారు. స్టార్ సెలబ్రిటీలు థియేటర్లకు వచ్చినప్పుడు అభిమానులు కాస్త సంయమనం పాటించాలని, వారి వ్యక్తిగత స్వేచ్ఛకు భంగం కలిగించకూడదని ఎక్కువ మంది అభిప్రాయపడుతున్నారు. ఉపాసన కోపం తెచ్చుకోవ‌డంలో ఎలాంటి తప్పు లేదంటూ ఆమెకు మద్దతుగా కామెంట్లు పెడుతున్నారు.