మలయాళ చిత్రపరిశ్రమ నుంచి వచ్చే క్రైమ్, సైకలాజికల్ థ్రిల్లర్ సినిమాలకు తెలుగు డిజిటల్ ఆడియన్స్లో ఉండే క్రేజ్ ప్రత్యేకమైనది. విభిన్నమైన కథాంశాలతో ఉత్కంత రేపే కంటెంట్ను ఇష్టపడే సినీ ప్రియుల కోసం మరొక ఆసక్తికర చిత్రం డిజిటల్ ప్లాట్ఫామ్పైకి అడుగుపెట్టేందుకు సిద్ధమైంది. స్టార్ హీరో కుంచాకో బోబన్ ప్రధాన పాత్రలో నటించిన సైకలాజికల్ థ్రిల్లర్ 'ఉన్మాదం' త్వరలోనే ఓటీటీ ప్రేక్షకులను అలరించబోతోంది.
వైవిధ్యమైన పాత్రలు ఎంచుకుంటూ ప్రేక్షకుల్లో తనదైన ముద్ర వేసుకున్న కుంచాకో బోబన్, ఈ చిత్రంలో పవర్ ఫుల్ పోలీస్ ఆఫీసర్ పాత్రలో మెప్పించారు. ఎడిటింగ్ రంగంలో ఎంతో అనుభవం ఉన్న కిరణ్ దాస్ ఈ సినిమాతో దర్శకుడిగా మారి ఈ చిత్రాన్ని మలిచారు. జులై 31న థియేటర్లలో విడుదలైన ఈ సస్పెన్స్ డ్రామా, త్వరలోనే ప్రముఖ ఓటీటీ ప్లాట్ఫామ్ 'సోనీ లివ్' (Sony LIV) లో ప్రసారం కానున్నట్లు అధికారికంగా వెల్లడించారు.
ఈ చిత్రంలో 'జై భీమ్' ఫేమ్ లిజోమోల్ జోస్ కథానాయికగా నటించి తన నటనతో అలరించారు. అలాగే సిద్ధుఖీ, కృష్ణప్రభ, విశాఖ్ నాయర్, సుధీశ్, కొట్టాయం నజీర్ వంటి బలమైన నటీనటుల తారాగణం ఈ సినిమాలో కీలక పాత్రలు పోషించారు. ముజీబ్ మజీద్ స్వరాలు సమకూర్చగా, జస్టీన్ వర్గీస్ అందించిన బ్యాక్గ్రౌండ్ స్కోర్ సినిమాలోని థ్రిల్లింగ్ ఎలిమెంట్స్ను మరింత పెంచిందని ప్రశంసలు దక్కాయి.
సినిమా కథాంశానికి వస్తే.. షెల్లీ అనే పోలీస్ ఆఫీసర్ తన విధులను సమర్థవంతంగా నిర్వర్తిస్తుంటాడు. అయితే అతని అంతరంగంలో ఓ మంచి సినిమా రచయితగా మారాలనే బలమైన ఆకాంక్ష ఉంటుంది. ఈ క్రమంలో ఒక పాత కేసుకు సంబంధించిన ఫైల్ అతని చేతికి చిక్కుతుంది. ఆ కేసులో ఉన్న చిక్కుముడులు, ఊహించని మలుపులు షెల్లీని అమితంగా ఆకట్టుకోవడంతో దాని ఆధారంగానే కథ రాయాలని నిర్ణయించుకుంటాడు. ఆ ఇన్వెస్టిగేషన్ ప్రయాణంలో అతనికి ఎదురైన సవాళ్లు ఏమిటి అనేదే ఈ చిత్ర ముఖ్యాంశం.
కుంచాకో బోబన్ గతంలో నటించిన 'అంజామ్ పతిరా' (Anjaam Pathiraa) వంటి ఇన్వెస్టిగేషన్ థ్రిల్లర్లు దక్షిణాది అంతటా ఘన విజయాన్ని సాధించాయి. ఆ క్రమంలోనే 'ఉన్మాదం' సినిమాపై కూడా ఓటీటీ ప్రియుల్లో విపరీతమైన ఆసక్తి నెలకొంది. సీట్ ఎడ్జ్ థ్రిల్లర్లను ఆస్వాదించే నెటిజన్లు ఈ సినిమా డిజిటల్ విడుదల కోసం సోషల్ మీడియాలో ఆసక్తిగా చర్చించుకుంటున్నారు.
థియేటర్లలో మంచి థ్రిల్లింగ్ ఎక్స్పీరియన్స్ అందించిన ఈ చిత్రం, సోనీ లివ్ ద్వారా డిజిటల్ వీక్షకులను ఏ స్థాయిలో ఆకట్టుకుంటుందో వేచి చూడాలి.
