Home

»

Latest News

జూలై బాక్సాఫీస్ః ఆ ద‌ర్శ‌కుల‌కి ప‌రీక్షా కాలమే!

Jun 21, 2022 5:45PM

2022 జూలైలో ప‌లు ఆస‌క్తిక‌ర‌మైన చిత్రాలు సంద‌డి చేయ‌బోతున్నాయి. వీటిలో కొన్ని సినిమాలు ఆయా ద‌ర్శ‌కుల‌కు ప‌రీక్ష అనే చెప్పాలి. ఆ వివ‌రాల్లోకి వెళితే..

మారుతిః- ఈ త‌రం ద‌ర్శ‌కుల్లో మారుతి ట్రాక్ రికార్డే వేరు. త‌న కెరీర్ లో సింహ‌భాగం విజ‌యాలే చూశారాయ‌న‌. అయితే, త‌న గ‌త చిత్రం `మంచి రోజులు వ‌చ్చాయి`(2021) మాత్రం ఆశించిన ఫ‌లితం అందుకోలేక‌పోయింది. ఈ నేప‌థ్యంలో.. జూలై 1న రాబోతున్న `ప‌క్కా క‌మ‌ర్షియ‌ల్`పైనే త‌న ఆశ‌లు పెట్టుకున్నారు మారుతి. ఇందులో గోపీచంద్, రాశీ ఖ‌న్నా, స‌త్య‌రాజ్ ప్ర‌ధాన పాత్ర‌ల్లో న‌టించారు.

విక్ర‌మ్ కె. కుమార్ః- `ఇష్క్` (2012), `మ‌నం` (2014) చిత్రాల‌తో తెలుగువారిని విశేషంగా ఆక‌ట్టుకున్నారు ద‌ర్శ‌కుడు విక్ర‌మ్ కె. కుమార్. అయితే, రీసెంట్ టైమ్స్ లో `హ‌లో` (2017), `గ్యాంగ్ లీడ‌ర్` (2019) - ఇలా విక్ర‌మ్ తీసిన చిత్రాలు నిరాశ‌ప‌రిచాయి. ఈ క్ర‌మంలో.. జూలై 8న‌ తెర‌పైకి రానున్న `థాంక్ యూ`పైనే త‌న ఆశ‌లు ఉన్నాయి. ఇందులో నాగ‌చైత‌న్య‌, రాశీ ఖ‌న్నా, అవికా గోర్, మాళ‌వికా నాయ‌ర్ ముఖ్య పాత్ర‌ల్లో క‌నిపించ‌నున్నారు.

ఎన్. లింగుస్వామిః- ర‌న్ (2003), `పందెం కోడి` (2006), `ఆవారా` (2010) వంటి విజ‌య‌వంత‌మైన‌ త‌మిళ అనువాదాల‌తో లింగుస్వామి తెలుగు ప్రేక్ష‌కుల‌ను సుప‌రిచిత‌మే. అయితే, రీసెంట్ టైమ్స్ లో త‌న ట్రాక్ రికార్డ్ అంత బాగోలేదు. అందుకే.. జూలై 14న రానున్న `ద వారియ‌ర్` ఫ‌లితం త‌న‌కి ఎంతో కీల‌కంగా మారింది. రామ్, కృతి శెట్టి జంట‌గా న‌టించిన ఈ కాప్ డ్రామా.. తెలుగు, త‌మిళ భాష‌ల్లో ఒకేరోజున‌ రిలీజ్ కానుంది.

చందు మొండేటిః- `కార్తికేయ‌` (2014), `ప్రేమ‌మ్` (2016)తో బ్యాక్ టు బ్యాక్ హిట్స్ చూసిన చందు మొండేటి.. `స‌వ్య‌సాచి` (2018), `బ్ల‌డీ మేరీ` (2022)తో ట్రాక్ త‌ప్పారు. ఈ నేప‌థ్యంలో.. జూలై 22న రానున్న `కార్తికేయ 2` రిజ‌ల్ట్ త‌న‌కి ఎంతో ముఖ్యం. ఇందులో నిఖిల్, అనుప‌మ ప‌ర‌మేశ్వ‌ర‌న్ జోడీగా సంద‌డి చేయ‌నున్నారు.

మ‌రి.. జూలై మాసంలో వ‌రుస వారాల్లో అదృష్టాన్ని ప‌రీక్షించుకోనున్న మారుతి, విక్ర‌మ్, లింగుస్వామి, చందు మొండేటి.. మ‌ళ్ళీ స‌క్సెస్ ట్రాక్ లోకి వ‌స్తారేమో చూడాలి.

google-ad-img

Customer Service

For support : teluguone.teluguone@gmail.com | For Queries : support@teluguone.com