కోలీవుడ్ స్టార్ సూర్య (Suriya), త్రిష కాంబినేషన్‌లో సుమారు రెండు దశాబ్దాల విరామం తర్వాత వచ్చిన భారీ ఫాంటసీ యాక్షన్ డ్రామా "కరుప్పు" (Karuppu) థియేటర్ల వద్ద కలెక్షన్ల సునామీ సృష్టిస్తోంది. ఆర్జే బాలాజీ దర్శకత్వంలో డ్రీమ్ వారియర్ పిక్చర్స్ నిర్మించిన ఈ క్రేజీ ప్రాజెక్ట్, విడుదల కంటే ముందే భారీ అంచనాలను మోసుకువచ్చింది. అయితే చివరి నిమిషంలో కొన్ని ఆర్థిక ఇబ్బందుల వల్ల ఒక రోజు ఆలస్యంగా మే 15న ప్రేక్షకుల ముందుకు వచ్చినప్పటికీ, అభిమానుల ఆదరణ ఏమాత్రం తగ్గలేదు. 

తొలి ఆట నుంచే పాజిటివ్ టాక్ సొంతం చేసుకున్న ఈ సినిమా, బాక్సాఫీస్ వద్ద భారీ వసూళ్లతో దూసుకుపోతోంది. కేవలం మూడు రోజుల్లోనే ప్రపంచవ్యాప్తంగా రూ. 120.75 కోట్ల గ్రాస్ వసూళ్లను సాధించి సరికొత్త రికార్డులను సృష్టించింది. ఒక సాధారణ చిత్రం బాక్సాఫీస్ వద్ద మూడు రోజుల్లో వంద కోట్ల క్లబ్‌లో చేరడం సూర్య మాస్ స్టామినాకు నిదర్శనంగా నిలుస్తోంది. 

మొదటి రోజు భారత్‌లో రూ. 15.50 కోట్ల నెట్ కలెక్షన్లతో నెమ్మదిగా ప్రారంభమైన ఈ చిత్రం, శని, ఆదివారాల్లో అనూహ్యంగా పుంజుకుంది. శనివారం రోజు రూ. 24.15 కోట్ల నెట్ వసూళ్లను రాబట్టగా, ఆదివారం నాడు రూ. 28.35 కోట్ల నెట్ కలెక్షన్లతో థియేటర్లు హౌస్‌ఫుల్ బోర్డులతో కళకళలాడాయి. మొత్తంగా మొదటి వీకెండ్‌లోనే భారతదేశంలో రూ. 68 కోట్ల నెట్ వసూళ్లను(రూ. 78.75 కోట్ల గ్రాస్) సాధించి ట్రేడ్ వర్గాలను సైతం ఆశ్చర్యపరిచింది.

ఓవర్సీస్ మార్కెట్లో కూడా "కరుప్పు" చిత్రానికి బ్రహ్మరథం పడుతున్నారు. విదేశాల్లో కేవలం మూడు రోజుల్లోనే రూ. 42 కోట్ల గ్రాస్ వసూళ్లను సాధించి సూర్య గ్లోబల్ మార్కెట్ సత్తాను చాటిచెప్పింది. తెలుగులో వీరభద్రుడు పేరుతో విడుదలైన ఈ సినిమాకి ఇక్కడ కూడా మంచి ఆదరణ లభిస్తోంది. 

న్యాయ వ్యవస్థ విఫలమైనప్పుడు కరుప్పుస్వామి(వీరభద్రుడు) మానవ రూపంలో వచ్చి అన్యాయాన్ని ఎలా ఎదిరించాడనే ఆసక్తికరమైన ఫాంటసీ కథాంశంతో, కోర్టు రూమ్ డ్రామా, గ్రామీణ ఆచారాల నేపథ్యంతో ఈ చిత్రాన్ని ఆర్జే బాలాజీ అద్భుతంగా తెరకెక్కించారు. సూర్య బాక్సాఫీస్ వద్ద ఘనమైన కంబ్యాక్ ఇవ్వడంతో అభిమానులు థియేటర్ల వద్ద పండగ చేసుకుంటున్నారు. 

సూర్య కెరీర్ లో ఇప్పటిదాకా రూ.120 కోట్లతో 'సింగం-2' టాప్ గ్రాసర్ గా ఉండగా, ఆ మొత్తాన్ని మూడు రోజుల్లోనే కరుప్పు రాబట్టడం విశేషం.