దక్షిణాది సినీ ప్రపంచంలో అత్యంత ఘనంగా, ప్రతిష్ఠాత్మకంగా నిర్వహించే సౌత్ ఇండియన్ ఇంటర్నేషనల్ మూవీ అవార్డ్స్ (సైమా) 2026 నామినేషన్లు మొద‌ల‌య్యాయి. టాలీవుడ్ ప్రేక్షకులతో పాటు సమస్త దక్షిణాది సినీ ప్రియులు ఎంతో ఆసక్తిగా ఎదురుచూస్తున్న ఈ వేడుకకు సంబంధించిన అధికారిక నామినేషన్ల జాబితాను సైమా కమిటీ తాజాగా విడుదల చేసింది. 2025 జనవరి 1 నుండి డిసెంబర్ 31 వరకు సెన్సార్ పూర్తి చేసుకున్న సినిమాలను ఈ పురస్కారాల కోసం పరిశీలించారు. ఈ క్రమంలో టాలీవుడ్ విభాగంలో యువ కథానాయకుడు తేజ సజ్జ నటించిన 'మిరాయ్' చిత్రం ఏకంగా 11 వేర్వేరు విభాగాల్లో నామినేషన్లు సాధించి అగ్రస్థానంలో నిలిచి అందరినీ ఆశ్చర్యపరిచింది.

కార్తిక్ ఘట్టమనేని దర్శకత్వంలో తెరకెక్కిన విజువల్ వండర్ 'మిరాయ్' బాక్సాఫీస్ వద్ద సాధించిన విజయం సామాన్యమైనది కాదు. ఈ హై-వోల్టేజ్ యాక్షన్ అడ్వెంచర్ చిత్రం థియేటర్లలో విడుదలై ప్రపంచవ్యాప్తంగా రూ.140 కోట్లకు పైగా గ్రాస్ వసూళ్లను సాధించి అద్భుతమైన రికార్డులను సృష్టించింది. ఈ సినిమాలో తేజ సజ్జ తన నటనతో, సాహసోపేతమైన యాక్షన్ సన్నివేశాలతో మెప్పించగా, మంచు మనోజ్ శక్తివంతమైన ప్రతినాయకుడి పాత్రలో కనిపించి ప్రేక్షకులను కట్టిపడేశారు. ఇప్పుడు సైమా 2026 నామినేషన్లలో ఏకంగా 11 కేటగిరీల్లో పోటీపడుతూ ఈ సినిమా తన హవాను స్పష్టంగా చాటుకుంది.

మరోవైపు 'మిరాయ్' చిత్రానికి గట్టి పోటీ ఇస్తూ, 'సంక్రాంతికి వస్తున్నాం' సినిమా 10 విభాగాల్లో నామినేషన్లు సాధించి రెండో స్థానంలో నిలిచింది. 2025 సంక్రాంతి కానుకగా థియేటర్లలోకి వచ్చిన ఈ ఫ్యామిలీ ఎంటర్‌టైనర్ ప్రేక్షకులను విశేషంగా ఆకట్టుకుంది. విక్టరీ వెంకటేష్ కథానాయకుడిగా, మీనాక్షి చౌదరి మరియు ఐశ్వర్యా రాజేశ్ కథానాయికలుగా నటించిన ఈ చిత్రాన్ని దర్శకుడు అనిల్ రావిపూడి తనదైన మార్కు వినోదంతో మలచగా, బాక్సాఫీస్ వద్ద రూ.300 కోట్లకు పైగా వసూళ్లు సాధించి ఆల్ టైమ్ బ్లాక్‌బస్టర్‌గా నిలిచింది. కుటుంబ ప్రేక్షకుల ఆదరణ పొందిన ఈ చిత్రం ఇప్పుడు అవార్డుల రేసులోనూ ముందంజలో ఉంది.

వీటితో పాటు అక్కినేని నాగచైతన్య కెరీర్‌లో అత్యంత కీలకమైన మైలురాయిగా నిలిచిన 'తండేల్' చిత్రం, భావోద్వేగపూరితమైన 'కోర్ట్' చిత్రం చెరో 9 నామినేషన్లతో తర్వాతి స్థానాల్లో నిలిచాయి. యథార్థ సంఘటనల ఆధారంగా చందు మొండేటి దర్శకత్వంలో రూపుదిద్దుకున్న 'తండేల్' చిత్రంలో నాగచైతన్య సరసన సాయి పల్లవి జంటగా నటించింది. ఈ సినిమా నాగచైతన్య కెరీర్‌లోనే తొలిసారిగా రూ.100 కోట్ల క్లబ్‌లో చేరి సరికొత్త చరిత్ర సృష్టించింది. అలాగే 'కోర్ట్' చిత్రం కూడా తన ప్రత్యేక కథాంశంతో, విమర్శకుల ప్రశంసలతో పాటు 9 విభాగాల్లో నామినేషన్లను దక్కించుకోవడం విశేషం.

ఈ ప్రతిష్ఠాత్మక అవార్డుల ప్రదానోత్సవాన్ని సెప్టెంబర్ 11, 12 తేదీల్లో ఎంతో అట్టహాసంగా నిర్వహించనున్నారు. 2025 సంవత్సరంలో తెలుగుతో పాటు తమిళం, కన్నడ, మలయాళ భాషల్లో విశేష ప్రతిభను కనబరిచిన నటీనటులు, దర్శకులు, సంగీత దర్శకులు, సాంకేతిక నిపుణులకు ఈ వేదికపై పురస్కారాలను అందజేయనున్నారు. బాక్సాఫీస్ వద్ద కోట్ల వసూళ్లు సాధించిన ఈ భారీ చిత్రాలు ఇప్పుడు అవార్డుల వేదికపై కూడా పోటీపడుతుండటంతో ఏయే విభాగాల్లో ఏ నటుడికి, ఏ చిత్రానికి అవార్డు వరిస్తుందోనని అభిమానుల్లో తీవ్ర ఆసక్తి నెలకొంది.

 

SIIMA 2026 Nominations, Mirai Movie Teja Sajja, Sankranthiki Vasthunnam, Thandel Naga Chaitanya, SIIMA Awards 2026 Telugu, SIIMA Nominations List