టాలీవుడ్ లో విలక్షణ నటనతో తనకంటూ ప్రత్యేకమైన గుర్తింపును సంపాదించుకున్న టాలెంటెడ్ హీరో సత్యదేవ్ (Satya Dev) ప్రధాన పాత్రలో నటిస్తున్న చిత్రం 'రావు బహదూర్' (Rao Bahadur). 'కేరాఫ్ కంచరపాలెం', 'ఉమామహేశ్వర ఉగ్రరూపస్య' వంటి క్లాసిక్ చిత్రాలతో విమర్శకుల ప్రశంసలు అందుకున్న దర్శకుడు వెంకటేష్ మహా ఈ చిత్రానికి కథ, స్క్రీన్‌ప్లే, ఎడిటింగ్ బాధ్యతలతో పాటు దర్శకత్వం వహిస్తున్నారు. ఈ క్రేజీ ప్రాజెక్ట్‌ను సూపర్ స్టార్ మహేష్ బాబుకు చెందిన జిఎమ్‌బి ఎంటర్‌టైన్‌మెంట్ (GMB Entertainment) సమర్పిస్తుండటం విశేషం. తాజాగా విడుదలైన ఈ సినిమా టీజర్ సోషల్ మీడియాలో విపరీతమైన సంచలనం సృష్టిస్తోంది.

ఈ టీజర్ ప్రేక్షకులను సరికొత్త ప్రపంచంలోకి తీసుకెళ్లేలా ఉంది. సినిమాలో సత్యదేవ్ 'రామప్ప' అనే ఒక వృద్ధ రాజవంశీకుడి (Aristocrat) పాత్రలో కనిపిస్తున్నారు. కాలంతో పాటు మారుతున్న సమాజంలో, పాతకాలపు జ్ఞాపకాల్లోనే ఉండిపోయే ఒక విచిత్రమైన వ్యక్తి కథాంశంతో ఈ సైకలాజికల్ డ్రామా తెరకెక్కుతోంది. టీజర్ ప్రారంభంలోనే రామప్ప అనే వ్యక్తికి లివర్ క్యాన్సర్ సోకిందని, అతడు కొద్ది రోజులు మాత్రమే బతుకుతాడని వైద్యులు చెబుతారు. కానీ, వైద్యుల అంచనాలను తలకిందులు చేస్తూ అతడు చావు నీడలోనే జీవిస్తూ మృత్యువును ఎదిరించి ఎలా నిలబడ్డాడు అనే ఆసక్తికరమైన పాయింట్‌తో టీజర్ సాగింది. టైమ్‌లైన్ మారుతూ హీరో గత జీవితం, ఒక అందమైన యువతితో నడిచే లవ్ స్టోరీ, ప్రస్తుత జీవితంలోని ఒంటరితనం, మానసిక సంఘర్షణలను చాలా అద్భుతంగా చూపించారు.

ఈ సినిమాలో సత్యదేవ్ మేకోవర్ మరియు నటన నెక్స్ట్ లెవెల్‌లో ఉన్నాయి. రోజూ ఏకంగా 5 గంటల పాటు ప్రాస్థెటిక్ మేకప్ వేసుకుని, మొత్తం 85 రోజుల పాటు జరిగిన షూటింగ్‌లో ఆయన పాల్గొనడం విశేషం. ఈ అద్భుతమైన ట్రాన్స్‌ఫర్మేషన్ టీజర్‌లోని ప్రతి ఫ్రేమ్‌లోనూ కనిపిస్తోంది. భ్రమలకు, నిజ జీవితానికి మధ్య కొట్టుమిట్టాడే ఒక విచిత్రమైన వ్యక్తిగా సత్యదేవ్ పలికించిన హావభావాలు అద్భుతం. సైకలాజికల్ టెన్షన్, సస్పెన్స్, డార్క్ కామెడీ మరియు మ్యాజికల్ రియలిజం వంటి విభిన్నమైన ఎలిమెంట్స్‌ను ఈ కథలో జోడించినట్లు దర్శకుడు వెంకటేష్ మహా స్పష్టం చేశారు. "జీవితం సంకనాకిపోయినప్పుడు ఆటోమేటిక్‌గా ఆ శక్తులు సిద్ధిస్తాయి" అంటూ టీజర్ చివర్లో సత్యదేవ్ చెప్పే పవర్‌ఫుల్ డైలాగ్ థియేటర్లలో ప్రేక్షకులకు పూనకాలు తెప్పించడం ఖాయం. కార్తీక్ పర్మార్ అద్భుతమైన సినిమాటోగ్రఫీ, స్మరన్ సాయి అందించిన విలక్షణమైన బ్యాక్‌గ్రౌండ్ స్కోర్ సినిమా మూడ్‌ను మరింత ఎలివేట్ చేశాయి.

ఈ టీజర్ చూసిన సూపర్ స్టార్ మహేష్ బాబు సోషల్ మీడియా వేదికగా స్పందిస్తూ "ఇది కేవలం టీజర్ మాత్రమే కాదు.. ఒక వండర్" అంటూ చిత్ర బృందాన్ని ఆకాశానికెత్తారు. మహేష్ బాబు ఇచ్చిన ఈ ప్రశంసలతో సినిమాపై అంచనాలు ఒక్కసారిగా ఆకాశాన్ని తాకాయి. ఎంతో ఉత్కంఠను రేపుతున్న ఈ విజువల్ వండర్ జూలై 3న థియేటర్లలో గ్రాండ్‌గా విడుదల కాబోతోంది. బాక్సాఫీస్ వద్ద ఈ సైకలాజికల్ థ్రిల్లర్ ఎలాంటి సంచలనాలు సృష్టించబోతుందో చూడాలి.