సర్దార్ టార్గెట్... శ్రీమంతుడే!
on Apr 2, 2016
టాలీవుడ్ స్థాయిని పెంచిన సినిమా... బాహుబలి. ఒకటా రెండా ఏకంగా ఆరువందల కోట్లు సాధించి.. అద్భుతం సృష్టించింది. సాధారణంగా ఏ పెద్ద హీరో సినిమా వచ్చినా.. గత సినిమాల రికార్డులు బద్దలు కొట్టేయడం ఖాయం అంటూ ఆయా హీరోల అభిమానులు ఆశ పడుతుంటారు. కానీ... ఆ ఆశలకూ అందనంత ఎత్తుకు నిలిచింది బాహుబలి. ఎలాగూ ఆ సినిమాని కొట్టలేం, కనీసం రెండో స్థానంలో అయినా సంతృప్తి పడదాం...అని హీరోల ఫ్యాన్సూ ఫిక్సయిపోయారు. ఆ రెండో సినిమా.. శ్రీమంతుడు.
మహేష్ - కొరటాల శివ కాంబినేషన్లో వచ్చిన శ్రీమంతుడు బాహుబలి తరువాతి రెండో స్థానంలో నిలిచింది.రూ.150 కోట్ల వసూళ్లతో టాలీవుడ్ టాప్ 2గా నిలచింది. శ్రీమంతుడుని కొడితే.. బాహుబలి తరువాతి స్థానంలో అయినా నిలబడొచ్చన్న పాయింట్కొచ్చేశారు దర్శక నిర్మాతలు. ఇప్పుడు సర్దార్ టార్గెట్ కూడా శ్రీమంతుడే కావడం విశేషం. పవన్ - బాబి కలయికలో రూపుదిద్దుకొన్న సర్దార్పై ఇటు టాలీవుడ్లోనూ, అటు ఫిల్మ్ ఇండ్రస్ట్రీలోనూ భారీ అంచనాలే ఉన్నాయి. ఇప్పటికే సర్దార్పై భయంకరమైన బజ్ ఉంది. ఏకంగా 42 దేశాల్లో సర్దార్ సినిమా విడుదల అవుతోంది. బాలీవుడ్లోనూ 800 థియేటర్లు సర్దార్ కోసం అట్టిపెట్టారు. ఆంధ్ర, తెలంగాణల్లో దొరికిన ప్రతీ థియేటర్లోనూ సర్దార్ బొమ్మే పడబోతోంది. సినిమా కాస్త నిలబడినా.. పోటీ ఇచ్చే మరో సినిమానే లేదు. యావరేజ్ టాక్ వచ్చినా... సర్దార్ వసూళ్ల సునామి సృష్టించడం ఖాయం. ఇక గబ్బర్ సింగ్లాంటి హిట్టయిపోతే చెప్పక్కర్లెద్దు. శ్రీమంతుడు రికార్డులన్నీ తిరగరాడం గ్యారెంటీ. ఇప్పుడు ఆ నమ్మకంతోనే చిత్రబృందం ఉంది. శ్రీమంతుడ్ని క్రాస్ చేసి బాహుబలి తరువాతి స్థానంలో నిలబడాలని చూస్తోంది. మరి సర్దార్ ఆశలు నెరవేరతాయా? శ్రీమంతుడ్ని కొట్టేస్తుందా? తెలియాలంటే మరో వారం రోజులు ఆగాలి.