మాస్ మహారాజా రవితేజ హీరోగా తెరకెక్కిన డివోషనల్ ఎమోషనల్ డ్రామా 'ఇరుముడి' థియేటర్ల వద్ద కలెక్షన్ల సునామీ సృష్టిస్తోంది. ఆగస్టు 21న ప్రేక్షకుల ముందుకు వచ్చిన ఈ సినిమా, బాక్సాఫీస్ దగ్గర వసూళ్ల వర్షం కురిపించడమే కాకుండా ప్రేక్షకాదరణ పొంది సరికొత్త చరిత్ర సృష్టించింది.

ప్రస్తుతం నాలుగో వారంలో విజయవంతంగా దూసుకుపోతున్న ఈ చిత్రం, తెలుగు రాష్ట్రాల్లో ఏకంగా 1.25 కోట్లకు పైగా ఫుట్‌ఫాల్స్ (ప్రేక్షకుల సంఖ్య) సాధించి ట్రేడ్ వర్గాలను ఆశ్చర్యపరిచింది. సాధారణ టికెట్ ధరలతోనే ఈ స్థాయి నంబర్స్ రాబట్టడం మాస్ రాజా క్రేజ్‌కు నిదర్శనమని చెప్పవచ్చు.

ఈ సినిమా సాధించిన మరో అరుదైన రికార్డు ఏమిటంటే.. విడుదలైన తొలి ఆదివారమే ఏకంగా 11 లక్షల టికెట్లు అమ్ముడయ్యాయి. దీంతో గతంలో 'పెద్ది' సినిమా పేరిట ఉన్న 9.47 లక్షల సింగిల్ డే టికెట్ సేల్స్ రికార్డును 'ఇరుముడి' అధిగమించి సరికొత్త బెంచ్‌మార్క్ క్రియేట్ చేసింది.

దర్శకుడు శివ నిర్వాణ డివోషనల్ టచ్‌కి తండ్రీకూతుళ్ల సెంటిమెంట్‌ను సమర్థవంతంగా జోడించి ఈ చిత్రాన్ని తెరకెక్కించారు. అయ్యప్ప దీక్ష నేపథ్యం, హృదయాన్ని హత్తుకునే భావోద్వేగాలు కనెక్ట్ అవ్వడంతో ఈ సినిమాకు ఫ్యామిలీ ఆడియన్స్ బ్రహ్మరథం పడుతున్నారు.

మైత్రీ మూవీ మేకర్స్ పతాకంపై నవీన్ యెర్నేని, వై. రవిశంకర్ ఈ చిత్రాన్ని ఎక్కడా కాంప్రమైజ్ కాకుండా నిర్మించారు. రవితేజ గత సినిమాలకు పూర్తి భిన్నమైన మేకోవర్, పవర్ ఫుల్ యాక్టింగ్ ఈ సినిమా విజయానికి ప్రధాన బలంగా నిలిచాయి.

సోషల్ మీడియాలో కూడా 'ఇరుముడి' హవా గట్టిగానే కనిపిస్తోంది. ముఖ్యంగా గ్రామీణ ప్రాంతాల నుంచి ప్రజలు ట్రాక్టర్లు వేసుకుని థియేటర్లకు తరలివస్తున్న వీడియోలు నెట్టింట వైరల్ అవుతున్నాయి. దీంతో టాక్ ఆఫ్‌ ది టౌన్‌గా మారింది ఈ సినిమా.

బాక్సాఫీస్ వద్ద సరికొత్త వసూళ్ల రికార్డులు నెలకొల్పుతున్న 'ఇరుముడి' థియేట్రికల్ రన్ ముగిసేసరికి మరిన్ని రికార్డులను తిరగ రాయడం ఖాయంగా కనిపిస్తోంది. త్వరలోనే ఈ మూవీ ఓటీటీ విశేషాలపై కూడా అధికారిక ప్రకటన వచ్చే అవకాశం ఉంది.

 

 

[Ravi Teja Irumudi, Irumudi Box Office Record, Shiva Nirvana, Mythri Movie Makers, Irumudi Movie Collection]