గ్లోబల్ స్టార్ రామ్‌చ‌ర‌ణ్‌ తాజా చిత్రం 'పెద్ది' ప్రమోషన్స్ శరవేగంగా సాగుతున్నాయి. ఇందులో భాగంగానే ఇటీవల చిత్ర యూనిట్ మధ్యప్రదేశ్‌లోని భోపాల్‌లో ఒక భారీ ఈవెంట్‌ను నిర్వహించింది. అయితే, ఈ వేడుకలో రామ్ చరణ్ నోట వచ్చిన ఒక చిన్న మాట ఇప్పుడు సోషల్ మీడియాలో హాట్ టాపిక్‌గా మారింది. టీమిండియా స్టార్ పేసర్, యార్కర్ల కింగ్ జస్‌ప్రీత్ బుమ్రాను చరణ్ పొరపాటున 'ఫుట్‌బాల్ ప్లేయర్' అని సంబోధించడంతో స్టేజ్ పైన ఉన్నవారితో పాటు అభిమానులు కూడా ఒక్కసారిగా షాక్‌కు గురయ్యారు.

ఈవెంట్‌లో యాంకర్ అడిగిన ఒక ప్రశ్నకు సమాధానమిస్తూ చరణ్ స్పందించారు. "నేను బుమ్రాకు పెద్ద ఫ్యాన్‌ని. ఆయన ఫుట్‌బాల్ ఆటను మరింత ముందుకు తీసుకెళ్తున్నారు" అంటూ చరణ్ మాట్లాడారు. క్రికెట్ ప్రపంచంలో సంచలనాలు సృష్టిస్తున్న బుమ్రాను, ఫుట్‌బాల్ ప్లేయర్ అనడంతో ఆ వీడియో కాస్తా నెట్టింట తెగ వైరల్‌గా మారింది. రామ్‌చ‌ర‌ణ్ చేసిన ఈ చిన్న పొరపాటుపై సోషల్ మీడియాలో నెటిజన్లు, మీమర్స్ రకరకాలుగా స్పందిస్తున్నారు. గతంలో 'RRR' సినిమా ప్రమోషన్స్ సమయంలో యంగ్ టైగర్ జూనియర్ ఎన్టీఆర్ చేసిన వ్యాఖ్యలను ఈ సందర్భంగా గుర్తు చేసుకుంటున్నారు.

"చరణ్‌కు పేర్లు, సందర్భాలు సరిగ్గా గుర్తుండవు. కొన్నిసార్లు కన్ఫ్యూజ్ అవుతుంటాడు" అని ఎన్టీఆర్ అప్పట్లో సరదాగా చెప్పారు. తారక్ చెప్పిన ఆ మాట, ఈ 'భోపాల్ ఈవెంట్' సాక్షిగా మరోసారి రుజువైందంటూ నెటిజన్లు చరణ్ పాత వీడియోలను, బుమ్రా ఫోటోలను జోడిస్తూ క్రేజీ మీమ్స్‌తో హల్‌చల్ చేస్తున్నారు. స్టేజ్ పైన తాను చేసిన పొరపాటును రామ్‌చ‌ర‌ణ్ చాలా త్వరగానే గ్రహించారు. వెంటనే స్పందించిన ఆయన.. అర్ధరాత్రి వేళ ఎక్స్ వేదికగా జస్‌ప్రీత్ బుమ్రాకు క్షమాపణలు చెబుతూ ఒక ఎమోషనల్ పోస్ట్ పెట్టారు.

"అబ్బా.. కొన్నిసార్లు నాకు పేర్లు అస్సలు గుర్తుండవు! అక్కడ ఉన్న భారీ జనం, ఆ ఎగ్జైట్‌మెంట్‌లో జరిగిన హ్యూమన్ ఎర్రర్ ఇది. జస్‌ప్రీత్ బుమ్రా గారు, నన్ను క్షమించండి. మీరు మన దేశ గర్వకారణం."

తప్పు ఎవరికైనా సహజమే అయినా, గ్లోబల్ స్టార్ హోదాలో ఉండి కూడా తన పొరపాటును వెంటనే ఒప్పుకుని, క్రికెట్ స్టార్‌కు క్షమాపణలు చెప్పడంపై చరణ్ అభిమానులు హర్షం వ్యక్తం చేస్తున్నారు. చరణ్ డౌన్-టు-ఎర్త్ స్వభావానికి ఇది నిదర్శనమంటూ కొనియాడుతున్నారు. ఏది ఏమైనా 'పెద్ది' మూవీ ప్రమోషన్స్ భోపాల్‌లో గ్రాండ్‌గా సాగడమే కాకుండా, ఈ చిన్న కన్ఫ్యూజన్ డ్రామాతో దేశవ్యాప్తంగా మరింత హైప్‌ను సంపాదించుకుంది.