గ్లోబల్ స్టార్ రామ్ చరణ్, బుచ్చిబాబు సానా కాంబినేషన్‌లో వచ్చిన మోస్ట్ అవేటెడ్ స్పోర్ట్స్ యాక్షన్ డ్రామా 'పెద్ది' థియేటర్ల వద్ద సృష్టించిన ప్రభంజనం అంతా ఇంతా కాదు. వృద్ధి సినిమాస్ బ్యానర్‌పై అత్యంత ప్రతిష్టాత్మకంగా నిర్మితమైన ఈ చిత్రం బాక్సాఫీస్ వద్ద రికార్డుల వేట సాగించి, ప్రపంచవ్యాప్తంగా రూ. 340 కోట్లకు పైగా గ్రాస్ వసూళ్లను రాబట్టింది. ఆ విధంగా 2026 సంవత్సరానికి గాను టాలీవుడ్ ఇండస్ట్రీలో బిగ్గెస్ట్ బ్లాక్‌బస్టర్ హిట్స్‌లలో ఒకటిగా నిలిచింది. ఓ సామాన్య కార్మికుడు తన అసాధారణ క్రీడా నైపుణ్యంతో, తన సొంత గ్రామ హక్కుల కోసం సాగించిన భావోద్వేగ పోరాటం ప్రేక్షకులను ఎంతగానో కట్టిపడేసింది. ఈ వెండితెర అద్భుతం ఇప్పుడు డిజిటల్ ప్లాట్‌ఫామ్‌పై కూడా అదే స్థాయి సంచలనాలను సృష్టిస్తూ దూసుకుపోతోంది.

నెట్‌ఫ్లిక్స్‌లో జూలై 9 నుంచి స్ట్రీమింగ్ అవుతున్న 'పెద్ది' చిత్రానికి డిజిటల్ ప్రేక్షకుల నుంచి ఊహించని స్థాయిలో అద్భుతమైన రెస్పాన్స్ లభిస్తోంది. కేవలం థియేటర్లలోనే కాకుండా, ఓటీటీ స్క్రీన్లపై కూడా రామ్ చరణ్ తన బాక్సాఫీస్ స్టామినాను నిరూపించుకుంటున్నారు. ముఖ్యంగా దక్షిణాది రాష్ట్రాల్లో ఈ చిత్రం హోల్డ్‌ను చూపిస్తూ, భారతీయ ఓటీటీ స్ట్రీమింగ్ ర్యాంకింగ్స్‌లో నంబర్ వన్ స్థానంలో దూసుకుపోతోందని ప్రముఖ ఇండస్ట్రీ నివేదికలు స్పష్టం చేస్తున్నాయి. అందాల నటి జాన్వీ కపూర్ కథానాయికగా నటించిన ఈ సినిమాలో కన్నడ సూపర్ స్టార్ శివ రాజ్‌కుమార్, సీనియర్ నటుడు జగపతి బాబు, దివ్యేందు వంటి భారీ తారాగణం కీలక పాత్రలు పోషించడం సినిమాకు మరింత బలాన్ని చేకూర్చింది.

ప్రస్తుతం ఈ సినిమా ప్రాంతీయ సరిహద్దులను దాటి అంతర్జాతీయ స్థాయిలో నెట్‌ఫ్లిక్స్ గ్లోబల్ టాప్ 10 నాన్-ఇంగ్లీష్ చిత్రాల జాబితాలో ఏకంగా ఐదో స్థానాన్ని కైవసం చేసుకుని సరికొత్త చరిత్ర సృష్టించింది. కేవలం విడుదలైన తొలి నాలుగు రోజుల్లోనే ఈ సినిమా గ్లోబల్ వైడ్‌గా ఏకంగా 1.9 మిలియన్ల వ్యూస్‌ను నమోదు చేయడం విశేషం. ప్రస్తుతం నెట్‌ఫ్లిక్స్‌లో తెలుగు, తమిళం, కన్నడ, మలయాళ భాషల్లో అందుబాటులో ఉన్న ఈ చిత్రం సౌత్ ఆడియన్స్‌ను విపరీతంగా ఆకట్టుకుంటోంది. అయితే అసలైన ఊచకోత ముందుందని చెప్పాలి. ఎందుకంటే ఈ చిత్రానికి సంబంధించిన మోస్ట్ అవేటెడ్ హిందీ వెర్షన్ జూలై 30న విడుదల కానుంది. దాంతో ఉత్తరాది ప్రేక్షకులకు కూడా ఈ సినిమా అందుబాటులోకి రానుండటంతో వ్యూస్‌ మరింత పెరిగే అవకాశం ఉంది. మెగా పవర్ స్టార్ రామ్ చరణ్ గ్లోబల్ క్రేజ్‌కు ఈ నెట్‌ఫ్లిక్స్ రికార్డులే అసలైన నిదర్శనమని చెప్పవచ్చు.

 

 

Ram Charan, Peddi, Netflix OTT, Janhvi Kapoor