- ఎస్క్వైర్ ఇండియా కవర్‌పై మెగా పవర్ స్టార్ 
- స్టైలిష్ అవతార్‌లో రామ్ చరణ్ రచ్చ

'ఆర్ఆర్ఆర్' సినిమాతో గ్లోబల్ స్టార్‌గా ఎదిగిన రామ్ చరణ్.. ఇప్పుడు అంతర్జాతీయ స్థాయిలో తన ముద్ర వేస్తున్నారు. తాజాగా ఆయన ప్రముఖ అంతర్జాతీయ ఫ్యాషన్ మ్యాగజైన్ 'ఎస్క్వైర్ ఇండియా' (Esquire India) కవర్ ఫోటోపై మెరిశారు. ఈ మ్యాగజైన్ కోసం చరణ్ చేసిన ఫోటోషూట్ ఇప్పుడు సోషల్ మీడియాలో సెన్సేషన్ క్రియేట్ చేస్తోంది. మునుపెన్నడూ చూడని విధంగా చాలా క్లాసీగా, స్టైలిష్‌గా కనిపిస్తున్న చరణ్ ని చూసి అభిమానులు మురిసిపోతున్నారు.

ఈ కవర్ ఫోటోలో రామ్ చరణ్ ధరించిన అవుట్‌ఫిట్స్‌, ఆయన బాడీ లాంగ్వేజ్ ఒక ఇంటర్నేషనల్ ఐకాన్ లా ఉన్నాయని ఫ్యాషన్ నిపుణులు ప్రశంసిస్తున్నారు. ముఖ్యంగా ఆయన కళ్ళలో కనిపిస్తున్న ఆ ఇంటెన్సిటీ, రాయల్ లుక్ మెగా అభిమానులకు పూనకాలు తెప్పిస్తోంది. ఈ షూట్ కోసం ఆయన ఎంచుకున్న రంగులు, డిజైన్లు చరణ్ పర్సనాలిటీని మరింత ఎలివేట్ చేశాయి. "గ్లోబల్ ఐకాన్ ఇన్ ది మేకింగ్" అంటూ ఈ మ్యాగజైన్ చరణ్‌ను అభివర్ణించడం విశేషం.

ఈ ఘనత సాధించిన రెండవ తెలుగు హీరోగా రామ్ చరణ్ రికార్డ్ సృష్టించారు. గతంలో టాలీవుడ్ నుంచి యంగ్ టైగర్ ఎన్టీఆర్ మాత్రమే ఈ ఇంటర్నేషనల్ మ్యాగజైన్ కవర్ పేజీపై మెరిశారు. ఇప్పుడు చరణ్ కూడా అదే జాబితాలో చేరడంతో 'ఆర్ఆర్ఆర్' హీరోలిద్దరూ గ్లోబల్ వేదికలపై తెలుగు సినిమా సత్తాను చాటుతున్నారని అభిమానులు గర్వంగా చెప్పుకుంటున్నారు.

ఈ ఫోటోషూట్ సందర్భంగా ఇచ్చిన ఇంటర్వ్యూలో చరణ్ తన కెరీర్, వ్యక్తిగత జీవితం గురించి ఆసక్తికర విషయాలను పంచుకున్నారు. అంతర్జాతీయ స్థాయిలో గుర్తింపు రావడం సంతోషంగా ఉందని, అయితే అది తన బాధ్యతను మరింత పెంచిందని ఆయన పేర్కొన్నారు. తండ్రిగా తన బిడ్డలతో గడిపే సమయాన్ని తాను ఎంతో ఎంజాయ్ చేస్తున్నానని చరణ్ తెలిపారు.

రామ్ చరణ్ కెరీర్ విషయానికి వస్తే..  త్వరలో ఆయన 'పెద్ది' (Peddi) సినిమాతో అలరించడానికి సిద్ధమవుతున్నారు. ఉప్పెన ఫేమ్ బుచ్చిబాబు దర్శకత్వంలో తెరకెక్కుతున్న ఈ స్పోర్ట్స్ డ్రామాపై భారీ అంచనాలు ఉన్నాయి. జాన్వీ కపూర్ హీరోయిన్‌గా నటిస్తున్న ఈ సినిమాకు ఏఆర్ రెహమాన్ సంగీతం అందిస్తున్నారు.