'రాధేశ్యామ్'తో పోటీ పడటం చాలా థ్రిల్గా ఉంది!
on Mar 8, 2022
కోలీవుడ్ స్టార్ సూర్య నటించిన యాక్షన్ థ్రిల్లర్ 'ఈటీ'. సన్ పిక్చర్స్ పతాకంపై కళానిధి మారన్ నిర్మించిన ఈ సినిమాకి పాండిరాజ్ దర్శకత్వం వహించారు. ఈ మూవీలో ప్రియాంకా మోహన్ హీరోయిన్ గా నటించింది. టాలీవుడ్ కు చెందిన ప్రముఖ ప్రొడక్షన్ అండ్ డిస్ట్రిబ్యూషన్ సంస్థ ఏషియన్ ఈ సినిమా తెలుగు వెర్షన్ ను విడుదల చేస్తోంది. తమిళ వెర్షన్తో పాటు తెలుగులోనూ ఈ చిత్రం మార్చి 10 న విడుదల కానుంది.
ప్రియాంకా మోహన్ తెలుగులో నానితో 'గ్యాంగ్ లీడర్', శర్వానంద్ తో శ్రీకారం సినిమాల్లో నటించింది. తమిళంలో శివకార్తికేయన్ తో చేసిన 'డాక్టర్' సినిమాతో సూపర్ హిట్ అందుకుంది. ఆ సినిమా 'వరుణ్ డాక్టర్' పేరుతో తెలుగులోనూ విడుదలైంది. ఇప్పుడు మరో తమిళ్ డబ్ మూవీ ఈటీ(ఎవరికీ తలవంచడు)తో ఈ నెల 10 న ప్రేక్షకులను పలకరించనుంది. ఈ సందర్భంగా ప్రమోషన్లో భాగంగా హైదరాబాద్ వచ్చిన ఆమె మీడియాలో పలు విషయాలు పంచుకుంది.
ఈటీ సినిమాలో మీ పాత్ర ఎలా వుంటుంది?
ఈటీలో మహిళలు నా పాత్రను స్పూర్తితీసుకుంటారని చెప్పగలను. నాది చాలా వరర్ఫుల్ రోల్. రెండు వేరియేషన్స్ నా పాత్రలో వున్నాయి. ఇంటర్వెల్కు ముందు చాలా హ్యాపీగా ఉండే పాత్ర నాది. సెకండాఫ్లో ఓ పర్పస్ కోసం తను ఏవిధంగా మారింది? అనేది పాయింట్. సూర్యకు నాకూ సమానస్థాయిలో పాత్ర వుంటుంది. కథ విన్నప్పుడే నాకు బాగా నచ్చింది.
ఈటీలో అవకాశం ఎలా వచ్చింది?
నేను తమిళంలో `డాక్టర్` సినిమా చేశాను. ఆ తర్వాత అదే హీరోతో 'డాన్' చేశాను. అప్పుడు నాకు ఈ ఆఫర్ వచ్చింది. డాక్టర్ రిజల్ట్ చూశాక ఈటీ అకాశం వచ్చింది.
ఈటీ కథలో మిమ్మల్ని అంత ఆకర్షించిన అంశం ఏమిటి?
ఇది మంచి ఫ్యామిలీ ఎంటర్టైన్మెంట్తోపాటు చక్కటి లవ్ స్టోరీ కూడా వుంది. నా పాత్ర గురించి చెప్పగానే చాలా ఇంప్రెస్ అయ్యాను. ఇప్పటి పరిస్థితులలో బాధ్యతగల పాత్ర అది. చాలామంది ఆడవాళ్ళు ఇలాంటివి ఫేస్ చేస్తున్నారు. అందుకే సొసైటీకి నా పాత్ర బాధ్యతగా భావించాను. మహిళలను ఎడ్యుకేట్ చేస్తోంది. అందుకే నా పాత్రను ప్రాపర్గా చేయాలని ముందుకు వచ్చాను. నా పాత్రకు ఓ అర్థం కూడా వుంటుంది. దర్శకుడు ఇచ్చిన అవకాశాన్ని సద్వినియోగం చేయాలని చేశాను.
ఎవరికీ తలవంచడు కాప్షన్ మీకా? హీరోకా?
అది హీరోకేకాదు నాకూ వర్తిస్తుంది. సినిమా చూశాక సొసైటీలో అందరికీ వర్తిస్తుందని అనిపిస్తుంది. మనం న్యాయంగా వుంటే ఎవరికీ తలవంచాల్సిన పనిలేదనే పాయింట్ ఇందులో చూపించారు. సినిమా చూస్తే ప్రతివారూ పురుషులతో సహా అందరూ కనెక్ట్ అవుతారు.
తెలుగులో రెండు సినిమాలు పరాజయం పాలయ్యాయి. మరి మీ కెరీర్ ఎలా ఉంది?
తమిళంలో ముందు డాక్టర్ చేశా. అది బ్లాక్ బస్టర్ హిట్. నా కెరీర్కు అది గుడ్ సైన్ ఇచ్చింది. ఈటీ సినిమా కూడా అంతకంటే గుర్తింపు ఇస్తుంది. ఏమంచి సినిమా చేసినా ప్రేక్షకులు ఆదరిస్తారని డాక్టర్ తెలుగులోనూ విడుదలై చూపించింది. అదేవిధంగా పుష్ప కూడా చిత్తూరు యాస నార్త్లో తెలీదు. కానీ డబ్బింగ్లో ఆకట్టుకునేలా చెప్పడంతో అక్కడ నీరాజనాలు పలికారు. ఈటీ నాకు తెలుగులోనూ గుర్తింపు తెస్తుందని నమ్ముతున్నాను.
సీనియర్ నటుడిగా సూర్య నుంచి మీరేమి గ్రహించారు?
చాలా విషయాలు ఆయన్నుంచి నేర్చుకున్నారు. తను వర్సటైల్ యాక్టర్. ప్రతిరోజూ షాట్ లో కొత్త విషయాలు చెప్పేవారు. ఆయనకు సమాజ దృక్పథం చాలా వుంది. వెరీ జంటిల్మేన్. కష్టపడే తత్వం ఆయనది. దానికితోడు అంకిత భావం వుంది. అలాగే నటనాపరంగా ఓ సీన్ వుంటే, దాని ముందుగా ఆయనతో చర్చించి ఇలా చేయవచ్చని సూచన చేశాక నటించేదాన్ని. అప్పుడు నటిగా చాలా కంఫర్టబుల్ వుంది నాకు.
పాండిరాజ్ ఫ్యామిలీ సినిమాలు తీశారు? ఆయన సినిమాలో నటించడం ఎలా అనిపించింది?
అది దర్శకుడి బలం. ఒక్కో దర్శకుడిలో ఒక్కో దృక్పోణం వుంటుంది. అలాంటిది ఆయన జోనర్ నుంచి కాస్త బయటకు వచ్చి చేసిన సినిమా ఇది. నేషనల్ అవార్డు దర్శకుడు. వారి సినిమాలో నటిండచం చాలా హ్యాపీగా వుంది.
మహిళగా సొసైటీకి ఏం చెప్పదలిచారు ఈ సినిమాలో?
ఇందులో కోర్ పాయింట్ వుంది. అది అందరికీ రిలేటెడ్ అవుతుంది.ఇప్పుడు అది చెప్పకూడదు. సినిమా చూసిన మహిళలు తప్పకుండా కనెక్ట్ అవుతారని చెప్పగలను.
'రాధేశ్యామ్' సినిమాకు ముందు రోజు ఈటీ విడుదల కావడం ఎలా అనిపిస్తుంది?
చాలా థ్రిల్గా వుంది. రెండు భిన్నమైన కథలు. ఏ భాషలో సినిమా బాగున్నా చూస్తారు. అలాగే ఆర్.ఆర్.ఆర్, మణిరత్నం సినిమాలు కూడా రాబోతున్నాయి.
Latest News
Video-Gossips
TeluguOne Service
Customer Service
Live Help 24/7Customer Care
Send your Queries to
