చిత్ర పరిశ్రమలో గ్లామర్ ప్రపంచం ఎంత కలర్‌ఫుల్‌గా ఉంటుందో, దాని వెనుక ఉండే చీకటి కోణాలు కూడా అంతే షాకింగ్‌గా ఉంటాయి. ముఖ్యంగా సోషల్ మీడియా విస్తృతి పెరిగిన తర్వాత సెలబ్రిటీలపై ట్రోలింగ్ చేయడం సర్వసాధారణంగా మారింది. అయితే, తాజాగా టాలీవుడ్ బుట్టబొమ్మ, స్టార్ హీరోయిన్ పూజా హెగ్డే తనకు ఎదురైన నెగెటివ్ పీఆర్, సోషల్ మీడియా ట్రోల్స్ వెనుక ఉన్న ఒక నమ్మలేని నిజంపై నోరు విప్పారు. తనపై జరుగుతున్న వరుస దాడులు యాదృచ్ఛికంగా జరుగుతున్నవి కావని, కావాలనే డబ్బులిచ్చి చేయిస్తున్న పక్కా ప్లాన్ అని ఆమె సంచలన వ్యాఖ్యలు చేశారు.

ఇటీవల ఇచ్చిన ఒక ఇంటర్వ్యూలో పూజా హెగ్డే మాట్లాడుతూ.. పబ్లిక్ రిలేషన్స్ మేనేజ్‌మెంట్‌లో తాను చాలా బలహీనమని అంగీకరించారు. గత కొంతకాలంగా సోషల్ మీడియాలోని కొన్ని మీమ్ పేజీలు తనను నిరంతరం టార్గెట్ చేస్తూ, కేవలం నెగెటివ్ కంటెంట్‌ను మాత్రమే ప్రచారం చేయడం గమనించానని చెప్పారు. మొదట్లో దీన్ని లైట్ తీసుకున్నప్పటికీ.. రోజురోజుకూ హద్దులు దాటిపోవడంతో, అసలు తనపైనే ఎందుకు ఇంతలా విషప్రచారం జరుగుతోందనే విషయంపై నిఘా పెట్టాల్సిందిగా తన టీమ్‌ను కోరినట్లు వెల్లడించారు.

ఆ సమయంలో బయటపడిన నిజాలు పూజా హెగ్డేతో పాటు ఆమె కుటుంబ సభ్యులను సైతం తీవ్ర దిగ్భ్రాంతికి గురిచేశాయి. కొందరు వ్యక్తులు తనను మానసికంగా దెబ్బతీయడానికి, ఇండస్ట్రీలో తన ఇమేజ్‌ను తగ్గించడానికి లక్షల రూపాయల డబ్బును నీళ్లలా ఖర్చు పెడుతున్నారని ఆమె తెలుసుకున్నారు. పాపులర్ మీమ్ పేజీలను కాంటాక్ట్ చేసినప్పుడు.. ఒక పెద్ద నెట్‌వర్క్ దీని వెనుక ఉందని, తనపై నెగెటివిటీని స్ప్రెడ్ చేయడానికి వాళ్లకు భారీగా అమౌంట్ అందుతోందని నిర్ధారణ అయిందని స్పష్టం చేశారు.

అంతేకాదు, ఒకవేళ ఆ నెగెటివ్ పోస్టులను ఆపించాలన్నా.. లేదా ఇతరులపై రివర్స్ ట్రోలింగ్ చేయాలన్నా తమకు కూడా ఇంత మొత్తం చెల్లించాలంటూ సదరు మీమ్స్ నిర్వాహకులు ఆఫర్ ఇచ్చారని పూజ పేర్కొన్నారు. ఈ విధమైన సైబర్ ప్లానింగ్ చూసి తాను షాక్ అయ్యానని, సాధారణ నెటిజన్లు నిజానిజాలు తెలియక ఆ తప్పుడు ప్రచారాన్ని నమ్ముతుంటారని ఆవేదన వ్యక్తం చేశారు. ప్రస్తుతం తన కామెంట్స్ బాక్సుల్లో కనిపించే అత్యంత ఘోరమైన విమర్శలన్నీ ఎలాంటి డీపీ, పోస్టులు లేని పేయిడ్ బాట్ల ద్వారా సృష్టించబడుతున్నవేనని ఆమె వివరించారు.

అయితే, తనను కిందకు లాగాలని చూస్తున్నారంటే తాను వారి కంటే చాలా ఉన్నతమైన స్థానంలో ఉన్నానని అర్థమని, అందుకే దీన్ని ఒక కాంప్లిమెంట్‌గా భావిస్తున్నానని ఈ బ్యూటీ ధీటుగా బదులిచ్చారు. థియేటర్లలో సామాన్య ప్రేక్షకులు చూపించే ఆదరణ, ఎయిర్‌పోర్టుల్లో అభిమానులు అడిగే సెల్ఫీలే తనకు నిజమైన విజయమని నమ్ముతున్నట్లు తెలిపారు. పూజా హెగ్డే చేసిన ఈ ఘాటు వ్యాఖ్యలు ప్రస్తుతం సినీ వర్గాల్లో తీవ్ర సంచలనంగా మారాయి. హీరోయిన్లను తొక్కేయడానికి ఇండస్ట్రీలోనే ఇలాంటి నెగెటివ్ గ్రూపులు ఉన్నాయా అంటూ నెటిజన్లు సైతం చర్చించుకుంటున్నారు.