టాలీవుడ్ లో నటసామ్రాట్ అన్న పదం చాలా బరువైంది. విలువైనది కూడా. ఎందుకంటే ఆ బిరుదు అక్కినేని నాగేశ్వరరావు గారిది. తిరుగులేని నటనా చక్రవర్తిగా ఇండస్ట్రీని ఏలి, చివరి శ్వాస వరకూ నటనే జీవితంగా గడిపిన అక్కినేని వారి పేరు ముందు చేరి నటసామ్రాట్ బిరుదు ఎనలేని విలువను సొంతం చేసుకుంది. తాజాగా ఆ పేరుతో ప్రేక్షకుల ముందుకు వచ్చే ప్రయత్నం చేస్తున్నారు విలక్షణ నటుడు ప్రకాష్ రాజ్.
మరాఠీలో, మహేష్ మంజ్రేకర్ డైరెక్షన్లో వచ్చి సూపర్ హిట్టయింది నటసామ్రాట్. నానా పటేకర్ ఇందులో లీడ్ రోల్ చేశారు. యాక్టర్ గా ఒక వెలుగు వెలిగి, రిటైరైన ఒక నటుడిపై తన నట ప్రయాణం ఎలాంటి ప్రభావం చూపిస్తుంది, రిటైరైన తర్వాత అతని జీవితంలో ఎలాంటి మార్పులు చోటు చేసుకున్నాయి అన్న కాన్సెప్ట్ తో ఈ సినిమా తెరకెక్కింది. దీన్ని ఇప్పుడు సౌత్ ఇండియా భాషల్లో రీమేక్ చేయాలనుకుంటున్నాడు ప్రకాష్ రాజ్. గతంలో ప్రకాష్ తీసిన రీమేక్ సినిమా ధోని మాతృక కూడా మహేష్ మంజ్రేకర్ సినిమాయే కావడం విశేషం. తన సొంత నిర్మాణ సంస్థలో, తానే నటిస్తూ, దర్శకత్వం చేస్తూ నటసామ్రాట్ ను ఆవిష్కరించబోతున్నాడని సమాచారం. కానీ మరాఠీ వాళ్లకు అక్కినేని బిరుదుతో సంబంధం లేదు కాబట్టి పర్లేదు. మరి టాలీవుడ్ లో కూడా అదే టైటిల్ ను ప్రకాష్ పెడతాడా అనేది ఇప్పుడు ఆసక్తికరంగా మారింది.
