టాలీవుడ్లో మాస్ యాక్షన్ హీరోగా తనదైన ముద్ర వేసుకున్న నటుడు మాచో స్టార్ గోపీచంద్ (Gopichand). జూన్ 12న గోపీచంద్ పుట్టినరోజు సందర్భంగా ఆయన అభిమానులకు ఒక అదిరిపోయే గిఫ్ట్ అందనుంది. టాలీవుడ్ లోనే వన్ ఆఫ్ ది బెస్ట్ కల్ట్ యాక్షన్ ఎంటర్టైనర్గా నిలిచిన గోపీచంద్ సూపర్ హిట్ చిత్రం 'గోలీమార్' (Golimaar) స్పెషల్ షోను ఆయన బర్త్డే కానుకగా ప్రదర్శించబోతున్నారు. పూరీ జగన్నాథ్ (Puri Jagannadh) దర్శకత్వంలో ఎంతో పవర్ఫుల్గా తెరకెక్కిన ఈ చిత్రం అప్పట్లో బాక్సాఫీస్ వద్ద భారీ విజయాన్ని అందుకోవడమే కాకుండా, గోపీచంద్ కెరీర్లో ఒక మైలురాయిగా నిలిచింది.
ఈ ప్రతిష్టాత్మక బర్త్డే స్పెషల్ షో కోసం హైదరాబాద్లోనే అత్యంత పేరుగాంచిన అతిపెద్ద సింగిల్ స్క్రీన్ థియేటర్ అయిన బాలానగర్లోని మైత్రి విమల్ (Mythri Vimal) వేదికగా నిలవనుంది. గోపీచంద్ పుట్టినరోజు రోజైన జూన్ 12 ఉదయం 8:00 గంటలకు ఈ స్పెషల్ షో ప్రారంభం కానుంది. ఇందుకు సంబంధించిన అధికారిక ప్రకటనతో పాటు ఒక అద్భుతమైన స్పెషల్ పోస్టర్ను కూడా విడుదల చేశారు. ఈ పోస్టర్లో గోపీచంద్ చేతిలో గన్ పట్టుకుని పవర్ఫుల్ పోలీస్ ఆఫీసర్ గంగారాం లుక్లో ఎంతో అగ్రెసివ్గా కనిపిస్తున్నారు. ఈ పోస్టర్ చూస్తుంటేనే థియేటర్లలో అభిమానుల హంగామా మరియు ఈలలు ఏ రేంజ్లో ఉండబోతున్నాయో అర్థమవుతోంది.
పూరీ జగన్నాథ్ మార్క్ డైలాగ్స్, గోపీచంద్ నటన, చక్రి అందించిన అద్భుతమైన సంగీతం ఈ సినిమాను అప్పట్లో వన్ ఆఫ్ ది బెస్ట్ యాక్షన్ డ్రామాగా నిలబెట్టాయి. ఒక నిజాయితీ గల పోలీస్ ఆఫీసర్ సొసైటీలోని గ్యాంగ్స్టర్లను ఏరిపారేయడానికి ఎన్కౌంటర్ స్పెషలిస్ట్గా ఎలా మారాడనే పాయింట్తో ఈ సినిమా సాగుతుంది. ఈ కల్ట్ క్లాసిక్ యాక్షన్ మూవీని మళ్లీ బిగ్ స్క్రీన్పై చూసేందుకు నగరంలోని సినీ ప్రేమికులు, అభిమానులు ఎంతో ఆసక్తిగా ఎదురుచూస్తున్నారు. ఇప్పటికే ఈ బర్త్డే సెలబ్రేషన్ షోకి సంబంధించిన ఆన్లైన్ టికెట్ బుకింగ్స్ కూడా ఓపెన్ అయ్యాయి.
