టాలీవుడ్ ప్రొడ్యూసర్ బండ్ల గణేష్ (Bandla Ganesh) మరోసారి వార్తల్లో నిలిచారు. యంగ్ టైగర్ ఎన్టీఆర్ (NTR), డైరెక్టర్ పూరీ జగన్నాథ్ కాంబినేషన్లో వచ్చిన పవర్ ఫుల్ పోలీస్ డ్రామా ‘టెంపర్’ (Temper) గురించి ఆయన చేసిన వ్యాఖ్యలు ప్రస్తుతం సోషల్ మీడియాలో వైరల్ అవుతున్నాయి.
ఒకప్పుడు ఎన్టీఆర్ కెరీర్ను మలుపు తిప్పిన ఈ చిత్రం, ప్రస్తుతమున్న పాన్-ఇండియా మార్కెట్ పరిస్థితుల్లో విడుదలై ఉంటే ఏకంగా రూ.1000 కోట్ల వసూళ్లను సాధించి ఉండేదని బండ్ల గణేష్ అన్నారు. ఇటీవల ఒక ఇంటర్వ్యూలో ఆయన పంచుకున్న ఈ ఆసక్తికర విశేషాలు సినీ వర్గాల్లో హాట్ టాపిక్గా మారాయి.
ఇంటర్వ్యూలో బండ్ల గణేష్ మాట్లాడుతూ.. "ఎన్టీఆర్ గారి కెరీర్లో నేను రెండు సూపర్ హిట్ సినిమాలు ఇచ్చాను. ‘బాద్షా’ సినిమాకు ముందు ఆయన వరుస ఫ్లాపులతో ఇబ్బంది పడుతున్నారు. ఆ సమయంలో వచ్చిన బాద్షా అప్పటివరకు తారక్ కెరీర్లోనే బిగ్గెస్ట్ గ్రాసర్గా నిలిచింది. అయితే ఆ తర్వాత మళ్లీ ఆయనకు రామయ్యా వస్తావయ్యా, రభస రూపంలో రెండు పరాజయాలు ఎదురయ్యాయి. ఆ సమయంలో మేము ‘టెంపర్’ సినిమాతో ప్రేక్షకుల ముందుకు వచ్చాం" అని బండ్ల గణేష్ చెప్పుకొచ్చారు.
రచయిత వక్కంతం వంశీ ఈ సినిమా లైన్ చెప్పినప్పుడే ఇది ఒక ఇండస్ట్రీ హిట్ రేంజ్ సబ్జెక్ట్ అని తాను నమ్మానని బండ్ల గణేష్ తెలిపారు. ‘దయా’ పాత్రలో ఎన్టీఆర్ చూపించిన యాక్టింగ్ ఈ చిత్రానికి ప్రాణం పోసిందని కొనియాడారు. "టెంపర్ లాంటి అద్భుతమైన కంటెంట్ ఉన్న సినిమాను గాని ఇప్పుడు కనుక థియేటర్లలోకి తెస్తే, ఈ రోజున్న మార్కెట్ రేంజ్కు సులువుగా రూ.1000 కోట్ల వసూళ్లు రాబట్టేది" అంటూ బండ్ల గణేష్ తనదైన శైలిలో స్టేట్మెంట్ ఇచ్చారు.
బండ్ల గణేష్ చేసిన ఈ వ్యాఖ్యలపై సోషల్ మీడియాలో ఎన్టీఆర్ అభిమానులు ఫుల్ ఖుషీ అవుతున్నారు. ‘టెంపర్’ సినిమాలో తారక్ పెర్ఫార్మెన్స్ నెక్స్ట్ లెవల్ అని, ఇప్పుడున్న పాన్ ఇండియా క్రేజ్ ప్రకారం ఆ సినిమాకు రూ.1000 కోట్లు రావడం పెద్ద విషయం ఏమీ కాదని సపోర్ట్ చేస్తున్నారు.
