నటసింహం నందమూరి బాలకృష్ణ, మాస్ డైరెక్టర్ గోపీచంద్ మలినేని కాంబినేషన్‌లో వస్తున్న క్రేజీ ప్రాజెక్ట్ ‘NBK 111’ నుంచి ఒక అదిరిపోయే అప్‌డేట్ వచ్చేసింది. ఇప్పటికే శరవేగంగా షూటింగ్ జరుపుకుంటున్న ఈ భారీ మాస్ ఎంటర్‌టైనర్‌లో మరో స్టార్ హీరోయిన్ ఎంట్రీ ఇచ్చింది. టాలీవుడ్ చందమామ కాజల్ అగర్వాల్ ఈ ప్రతిష్టాత్మక చిత్రంలో ఒక ముఖ్యమైన పాత్ర పోషిస్తున్నట్లు చిత్ర యూనిట్ అధికారికంగా ప్రకటించింది.

నేడు కాజల్ అగర్వాల్ పుట్టినరోజు కావడంతో, ఆమెకు శుభాకాంక్షలు తెలుపుతూ మేకర్స్ ఒక సర్‌ప్రైజింగ్ ఫస్ట్ లుక్ పోస్టర్‌ను విడుదల చేశారు. ఈ పోస్టర్‌లో కాజల్ సాంప్రదాయబద్ధంగా చీరకట్టులో, కళ్ళజోడు ధరించి ఎంతో హుందాగా కనిపిస్తోంది. ఆమె వెనుక ఉన్న ఆఫీస్ సెటప్ చూస్తుంటే.. ఈ సినిమాలో కాజల్ ఒక పవర్‌ఫుల్ గవర్నమెంట్ ఆఫీసర్ లేదా ఐఏఎస్ (IAS) అధికారిణిగా కనిపించబోతున్నట్లు సోషల్ మీడియాలో గట్టిగా ప్రచారం సాగుతోంది.

ఇప్పటికే ఈ సినిమాలో లేడీ సూపర్ స్టార్ నయనతార కథానాయికగా నటిస్తున్నట్లు గతంలోనే ప్రకటించారు. నయన్ పుట్టినరోజున ప్రత్యేక గ్లింప్స్ కూడా రిలీజ్ చేశారు. ఇప్పుడు నయనతారతో పాటు కాజల్ అగర్వాల్ కూడా తోడవడంతో సినిమాపై అంచనాలు రెట్టింపయ్యాయి. గోపీచంద్ మలినేని తన చిత్రాల్లో హీరోయిన్ల పాత్రలకు మంచి ప్రాధాన్యత ఇస్తారు కాబట్టి, కాజల్ రోల్ కూడా కథను మలుపు తిప్పే విధంగా బలంగా ఉంటుందని ఇండస్ట్రీ వర్గాలు అంటున్నాయి.

గతంలో బాలకృష్ణ, గోపీచంద్ మలినేని కాంబినేషన్‌లో వచ్చిన ‘వీరసింహారెడ్డి’ బాక్సాఫీస్ వద్ద భారీ విజయాన్ని నమోదు చేసింది. అటు బాలయ్య, కాజల్ అగర్వాల్ కలిసి నటించిన ‘భగవంత్ కేసరి’ సైతం సూపర్ హిట్ గా నిలిచింది. దీంతో ఈ సక్సెస్‌ఫుల్ కాంబినేషన్లు మళ్లీ రిపీట్ అవుతుండటంతో నందమూరి అభిమానుల్లో పూనకాలు మొదలయ్యాయి. బాలయ్య పుట్టినరోజున విడుదలైన గ్లింప్స్‌కు ఇప్పటికే సోషల్ మీడియాలో విపరీతమైన రెస్పాన్స్ వచ్చింది.

ఈ భారీ యాక్షన్ ఎంటర్‌టైనర్‌ను నిర్మాత వెంకట సతీష్ కిలారు అత్యంత ప్రతిష్టాత్మకంగా, భారీ బడ్జెట్‌తో నిర్మిస్తున్నారు. ఈ చిత్రానికి ప్రముఖ సంగీత దర్శకుడు ఎస్.ఎస్. థమన్ స్వరాలు సమకూరుస్తున్నారు. ప్రస్తుతం శరవేగంగా ముస్తాబవుతున్న ఈ సినిమాకు సంబంధించిన మరిన్ని అప్‌డేట్స్ కోసం, టీజర్ అండ్ ట్రైలర్ లాంచ్‌ల కోసం ప్రేక్షకులు ఎంతగానో ఎదురుచూస్తున్నారు.