తెలుగు నేర్చుకుంటున్న హీరోయిన్స్.. చిక్కుల్లో సుమ
on Apr 15, 2016
సుమ కనకాల..హీరోయిన్ల కంటే ఎక్కువ క్రేజ్తో స్టార్డమ్ తో దూసుకుపోతున్న స్టార్ యాంకర్. తన చలాకితనంతో అందరికి వినోదాన్ని పంచుతూ టీవీ షోలు, మెగా ఈవెంట్లు ఏదైనా సరే సుమ ఉండాల్సిందే. కేరళ అమ్మాయి అయినా సరే కష్టపడి తెలుగు నేర్చుకుని అచ్చ తెలుగుమ్మాయిలా తెలుగుతో చెడుగుడు ఆడుకుంటుంది. తన స్పాన్ టేనియస్తో ఎక్కడుంటే అక్కడ నవ్వులు పూయిస్తుంది. ఒక్క ఇద్దరు ముగ్గురు హీరోలకు తప్ప మిగిలిన స్టార్లందరికీ సుమే కావాలి. అలా ఒంటి చేత్తో షోని నడిపించే సత్తా ఉన్న స్టార్ మహిళ సుమ.
తెలుగు తెరపై తెలుగు హీరోయిన్లు కనపడటం లేదు. ముంబై నుంచో మంగుళూరు నుంచో కొచ్చి నుంచో నాయికలను అప్పు తెచ్చుకుంటుంది తెలుగు చిత్ర పరిశ్రమ. వారి మాతృభాష వేరుకావడం తెలుగులో ఇబ్బందిగా ఉండటంతో చాలా మంది కథానాయికలు కష్టపడి తెలుగు నేర్చుకుంటున్నారు. ఇప్పుడు అదే సుమకు ప్రాబ్లమ్ తెచ్చిపెట్టబోతుందట..ఇది ఎవరో అన్న మాట కాదు. స్వయంగా సుమ తన నోటితో చెప్పిన మాట.
సాయిధరమ్ తేజ్ నటించిన సుప్రీమ్ ఆడియో రిలీజ్ ఫంక్షన్లో అందరి మీద జోకులు వేస్తూ స్టేజ్ను హుషారెత్తిస్తోంది సుమ. ఆ టైంలో రాశిఖన్నా మాట్లాడుతున్నప్పుడు నా ప్రక్కన నుంచోకు రాశి..నీ చెక్కు చెదరని అందం చూస్తే..నాది మేకప్ అని తెలిసిపోతుంది. అనడంతో అందరూ ఫక్కున నవ్వేశారు. దీనికి రాశి ఏమైనా తక్కువ తిందా..తెలుగులో కౌంటర్ ఇచ్చి దెబ్బకు దెబ్బ తీసింది. ఎలా రాశి?ఎలా? నువ్వు..తమన్నా..మీరందరూ తెలుగులో మాట్లాడేస్తే..రేపు మా యాంకర్ల పరిస్థితి ఏంటి? మీరే యాంకరింగులు కూడా చేసేస్తారేమో అంటూ జోకేయడంతో మళ్లీ నవ్వులే నవ్వులు. ఇలా తన మీద తనే సెటైర్లు వేసుకుంటూ అమ్మడు యాంకరింగ్ అంటే ఇదే అన్నట్లు ప్రేక్షకులను మెస్మరైజ్ చేసింది. ఎంత హీరోయిన్లు తెలుగు మాట్లాడిన సుమకి పోటీ వచ్చేవారే లేరు. సుమ సుమే...నో డౌట్.