'స్వయంవరం', 'నువ్వే కావాలి', 'నువ్వు నాకు నచ్చావ్', 'మన్మథుడు', 'మల్లీశ్వరి' లాంటి బ్లాక్‌బస్టర్‌ చిత్రాల దర్శకుడు కె.విజయ్ భాస్కర్ కొంత విరామం తర్వాత మెగాఫోన్ పడుతున్నారు. ఎస్ఆర్కే ఆర్ట్స్ బ్యానర్ పై ప్రొడక్షన్ నంబర్ 1 గా ప్రముఖ పారిశ్రామికవేత్త గుంటూరు రామకృష్ణ ఈ చిత్రాన్ని నిర్మించనున్నారు. తాజాగా ఈ చిత్రాన్ని అధికారికంగా ప్రకటించారు.
విజయ భాస్కర్ దర్శకత్వంలో వస్తున్న 13వ చిత్రమిది. 2013లో వచ్చిన 'మసాలా' మూవీ అనంతరం విరామం తీసుకున్న ఆయన ఏకంగా తొమ్మిదేళ్ల తర్వాత మెగా ఫోన్ పడుతుండటం విశేషం. ఈ చిత్రానికి సంబధించిన నూతన కార్యాలయ ప్రారంభోత్సవం ఈ రోజు హైదరాబాద్‌లోని మణికొండలో ఘనంగా జరిగింది. విజయ భాస్కర్, జీవిత రాజశేఖర్, కార్తికేయ నిర్మాత బొగ్గరం వెంకట శ్రీనివాస్, పారిశ్రామికవేత్త, నిర్మాత వంకాయలపాటి మురళీకృష్ణ ఈ వేడుకకు హాజరై నిర్మాతకు శుభాకాంక్షలు తెలిపారు.
ఈ సందర్భంగా నిర్మాత రామకృష్ణ మాట్లాడుతూ.. రాబోవు విజయదశమి రోజున ఈ చిత్రం షూటింగ్ అన్నపూర్ణ స్టూడియోలో చలనచిత్ర ప్రముఖుల సమక్షంలో గ్రాండ్ గా ప్రారంభమౌతుందని, నటీనటులు, సాంకేతిక నిపుణుల వివరాలను ఆ రోజు వెల్లడిస్తామని తెలిపారు.
