అందాల పోటీల్లో పాల్గొనాలంటే అందం ఒక్కటే ఉంటే సరిపోదు.. ఆత్మవిశ్వాసం కూడా ఉండాలి. ఎంత అందంగా ఉన్నప్పటికీ, తమకంటే అందంగా మరొకరు ఉన్నారని తెలిస్తే కొందరిలో ఆత్మన్యూనత మొదలవుతుంది. సరిగ్గా ఇలాంటి అనుభవమే ఒకప్పుడు బాలీవుడ్ నటి సుస్మితా సేన్‌కు ఎదురైంది. ప్రపంచ సుందరిగా గుర్తింపు తెచ్చుకున్న ఐశ్వర్యారాయ్ అందాన్ని చూసి ఆమె కూడా భయపడ్డారు. అంతేకాదు.. మిస్ ఇండియా పోటీల నుంచి తప్పుకోవాలని కూడా నిర్ణయించుకున్నారు.

1994లో జరిగిన మిస్ ఇండియా పోటీల్లో సుస్మితా సేన్, ఐశ్వర్యారాయ్ ఇద్దరూ పాల్గొన్నారు. అయితే ఈ పోటీల కోసం దరఖాస్తు చేయడానికి వెళ్లిన సమయంలోనే ఐశ్వర్య కూడా పోటీలో ఉన్నారని సుస్మితకు తెలిసింది. అప్పటికే ఐశ్వర్య అందం గురించి దేశవ్యాప్తంగా చర్చ జరుగుతోంది. ఆమె పోటీలో పాల్గొంటున్నారని తెలిసి ఏకంగా 25 మంది అమ్మాయిలు తమ దరఖాస్తులను వెనక్కి తీసుకున్నారని నిర్వాహకులు చెప్పారు. ఈ విషయం విన్న సుస్మిత కూడా ఆందోళనకు గురయ్యారు.

ఐశ్వర్య అందం ముందు తాను నిలబడలేనని భావించిన సుస్మిత, పోటీ నుంచి తప్పుకోవాలని నిర్ణయించుకున్నారు. ఇంటికి వెళ్లి తన తల్లికి ఈ విషయం చెప్పారు. అయితే ఆమె తల్లి మాత్రం అందుకు అంగీకరించలేదు. ప్రయత్నం చేయకుండానే ఓటమిని అంగీకరిస్తావా? అని ప్రశ్నించారు. ఐశ్వర్య ప్రపంచంలోనే అత్యంత అందమైన అమ్మాయి అని అనుకుంటే, ఆమె చేతిలోనే ఓడిపో.. అంతేకానీ పోటీ నుంచి పారిపోవద్దు. నీ శక్తిమేరకు ప్రయత్నించు అని ధైర్యం చెప్పారు.

ఇది కూడా చదవండి: ‘DNK’ మూవీ రివ్యూ

తల్లి చెప్పిన మాటలు సుస్మితలో ఆత్మవిశ్వాసాన్ని నింపాయి. దాంతో తన నిర్ణయాన్ని మార్చుకొని మిస్ ఇండియా పోటీల్లో కొనసాగారు. చివరికి ఐశ్వర్యారాయ్‌ను వెనక్కి నెట్టి మిస్ ఇండియా కిరీటాన్ని సొంతం చేసుకున్నారు. ఆ తర్వాత అదే ఏడాది మిస్ యూనివర్స్ పోటీల్లో విజేతగా నిలిచి, ఈ ఘనత సాధించిన తొలి భారతీయురాలిగా చరిత్ర సృష్టించారు. మరోవైపు ఐశ్వర్యారాయ్ మిస్ వరల్డ్ కిరీటాన్ని గెలుచుకున్నారు.

ఆ తర్వాత సుస్మితా సేన్ నటిగా కూడా మంచి గుర్తింపు తెచ్చుకున్నారు. 'బీవీ నెం.1', 'మై హూ నా' వంటి సినిమాలతో ప్రేక్షకులకు దగ్గరయ్యారు. 'ఆర్య', 'తాలీ' వంటి వెబ్ సిరీస్‌లతోనూ తన నటనతో ఆకట్టుకున్నారు. ఒకప్పుడు ఐశ్వర్య అందాన్ని చూసి పోటీ నుంచి తప్పుకోవాలనుకున్న సుస్మిత, అదే పోటీలో విజేతగా నిలిచి ప్రపంచ వేదికపై భారతదేశానికి తొలి మిస్ యూనివర్స్ కిరీటాన్ని అందించడం విశేషం.

మీకు నచ్చవచ్చు:

‘ఇట్లు అర్జున’ మూవీ రివ్యూ

నిర్మాతగా మారుతున్న బాలయ్య కుమార్తె.. హీరో, డైరెక్టర్ ఎవరో తెలుసా.?

 

 

[SushmitaSen, AishwaryaRai, MissIndia, MissWorld1994, MissUniverse1994]