సంగీత ప్రపంచంలో తీవ్ర విషాదం అలముకుంది. ప్రముఖ పంజాబీ గాయని ఇందర్ కౌర్ ఘోర హత్యకు గురికావడం యావత్ సినీ, సంగీత వర్గాలను తీవ్ర దిగ్భ్రాంతికి గురిచేసింది. గత కొన్ని రోజులుగా కనిపించకుండా పోయిన ఈ యువ సింగర్, చివరకు ఒక నీటి కాలువలో శవమై తేలడం ఇండస్ట్రీలో తీవ్ర కలకలం రేపుతోంది.
అసలు వివరాల్లోకి వెళితే.. 29 ఏళ్ల యశిందర్ కౌర్ అలియాస్ ఇందర్ కౌర్ మే 13వ తేదీ రాత్రి నిత్యావసర సరుకులు కొనేందుకు తన కారులో బయటకు వెళ్లారు. అయితే రాత్రి ఎంతైనా ఆమె తిరిగి ఇంటికి రాకపోవడంతో ఆందోళన చెందిన కుటుంబ సభ్యులు పోలీసులకు ఫిర్యాదు చేశారు. రంగంలోకి దిగిన పోలీసులు ఆరు రోజుల తర్వాత ఒక కాలువలో ఆమె మృతదేహాన్ని గుర్తించడంతో ఈ ఘోరం వెలుగుచూసింది.
ఈ దారుణ హత్య వెనుక సుఖ్విందర్ సింగ్ అలియాస్ సుఖా అనే వ్యక్తి ఉన్నట్లు పోలీసులు బలంగా అనుమానిస్తున్నారు. మూడేళ్ల క్రితం ఇన్స్టాగ్రామ్ ద్వారా ఇందర్కు ఇతగాడితో పరిచయం ఏర్పడింది. అది కాస్తా ప్రేమగా మారగా, తనను పెళ్లి చేసుకోవాలని సుఖ్విందర్ ఒత్తిడి తెచ్చాడు. అయితే అతడికి ఇదివరకే వివాహమైందనే నిజాన్ని తెలుసుకున్న ఇందర్, అతడిని పూర్తిగా దూరం పెట్టింది.
దీంతో కక్ష పెంచుకున్న సుఖ్విందర్ ఆమెను అంతమొందించాలని ప్లాన్ వేశాడు. ప్రస్తుతం కెనడాలో ఉంటున్న అతడు, ఎవరికీ అనుమానం రాకుండా నేపాల్ మీదుగా పంజాబ్ చేరుకున్నాడు. మే 13న ఇందర్ ఒంటరిగా వెళ్తున్న సమయంలో తన అనుచరులతో కలిసి తుపాకీతో బెదిరించి ఆమెను కిడ్నాప్ చేశాడు. అనంతరం దారుణంగా హత్య చేసి కాలువలో పడేసి, వెంటనే మళ్లీ నేపాల్ మార్గంలో కెనడాకు పారిపోయినట్లు విచారణలో తేలింది.
ఈ విషాద వార్తతో పంజాబీ మ్యూజిక్ ఇండస్ట్రీ ఒక్కసారిగా షాక్కు గురైంది. సోషల్ మీడియా వేదికగా పలువురు ప్రముఖులు, అభిమానులు ఇందర్ కౌర్ మృతికి సంతాపం ప్రకటిస్తున్నారు. ఒక ప్రతిభావంతురాలైన యువ గాయని ఇలా అర్ధాంతరంగా ప్రాణాలు కోల్పోవడం అత్యంత బాధాకరమని నెటిజన్లు ఆవేదన వ్యక్తం చేస్తున్నారు.
మరోవైపు పోలీసుల తీరుపై ఇందర్ కుటుంబ సభ్యులు తీవ్ర ఆగ్రహం వ్యక్తం చేస్తున్నారు. తాము ముందే ఫిర్యాదు చేసినా పోలీసులు సకాలంలో స్పందించలేదని ఆరోపిస్తున్నారు. ప్రస్తుతం నిందితులను పట్టుకునేందుకు ప్రత్యేక పోలీసు బృందాలు గాలింపు చర్యలు ముమ్మరం చేశాయి. ఈ కేసులో తదుపరి పరిణామాలు ఎలా ఉండబోతున్నాయనేది ఇప్పుడు ఇండస్ట్రీ వర్గాల్లో హాట్ టాపిక్గా మారింది.
