బుల్లితెరపై అత్యధిక రేటింగులతో నెంబర్ వన్ స్థానంలో దూసుకుపోతోంది 'కార్తీకదీపం' సీరియల్. ఈ సీరియల్ లో హీరోగా నటిస్తోన్న డాక్టర్ బాబు అలియాస్ నిరుపమ్ పరిటాలకు బీభత్సమైన క్రేజ్ వచ్చింది. సినిమా హీరోలనైనా గుర్తు పడతారో లేదో కానీ డాక్టర్ బాబుకి మాత్రం చిన్న పిల్లల దగ్గర నుండి ముసలివాళ్ల వరకు అందరూ అభిమానులే. ఎందుకంటే ప్రతీ ఇంట్లో 'కార్తీకదీపం' సీరియల్ ను చూసేవాళ్లు ఉన్నారు.

బుల్లితెరపై స్టార్ అనిపించుకున్న డాక్టర్ బాబు.. త్వరలోనే వెండితెరపై అడుగుపెట్టబోతున్నారు. తాజాగా ఓ ఇంటర్వ్యూలో పాల్గొన్న నిరుపమ్ టాలీవుడ్ ఎంట్రీపై క్లారిటీ ఇచ్చారు. సినిమాల్లో చేయాలనే ఉందని.. 'కార్తీకదీపం' సీరియల్ వచ్చినట్లే.. సినిమాల్లో మంచి పాత్రలు వస్తే తప్పకుండా చేస్తానని అన్నారు. కొన్ని క్యారెక్టర్లు వస్తున్నాయని.. కానీ తనకు సరిపోయే పాత్రను ఎంపిక చేసుకోవడానికి కాస్త టైం పడుతుందని అన్నారు.

ఎలాంటి పాత్రలను ఎన్నుకోవాలనే విషయంలో డైలమాలో ఉన్నానని చెప్పారు. ఇప్పటివరకు తనను సీరియల్స్ లో ఫ్యామిలీ ఓరియెంటెడ్ హీరోగానే చూశారని, ఇక సినిమాలంటే దానికి ఫిట్ అవుతానో లేదో ఆలోచించి అడుగులువేస్తున్నట్లు చెప్పారు. కమర్షియల్ సినిమాలు కాకుండా.. సబ్జెక్ట్ ఓరియెంటెడ్ కథల్లో చేయాలని ఉందని తెలిపారు. ఇక హీరోల్లో మహేష్ బాబు అంటే చాలా ఇష్టమని.. అలానే వెంకటేష్ గారి సినిమాలు ఎక్కువగా చూస్తుంటానని అన్నారు. కానీ తన ఆల్ టైం ఫేవరెట్ మాత్రం చిరంజీవి గారే అని చెప్పుకొచ్చారు.