జూలై 9 న "అహ నా పెళ్ళంట" 100 డేస్ ఫంక్షన్ ఘనంగా జరపనున్నారు. వివరాల్లోకి వెళితే ఎటివి సమర్పణలో, ఎకెఎంటర్ టైన్ మెంట్స్ పతాకంపై, నవ్వుల హీరో అల్లరి నరేష్ హీరోగా, రీతూ బర్మేచ అనే కొత్తమ్మాయిని హీరోయిన్ గా పరిచయం చేస్తూ, వీరభద్రం చౌదరి అనే నూతన యువకుణ్ణి దర్శకుడిగా పరిచయం చేస్తూ, అనీల్ సుంకర నిర్మించిన పూర్తి హాస్యరస, రొమాంటిక్ కుటుంబకథా చిత్రం "ఆహ నా పెళ్ళం". ఈ సినిమాని ప్రముఖ దర్శకులు స్వర్గీయ ఇవివి సత్యన్నారాయణగారికి అంకితమిచ్చారు. ఇక్కడ విశేషమేమిటంటే ఆయన జయంతికి సరిగ్గా ఒక్కరోజు ముందు, అంటే జూన్ 9 వ తేదీన "అహ నా పెళ్ళంట" 22 కేంద్రాలలో 100 రోజులు పూర్తి చేసుకుంది.

అంతేకాకుండా ఈ చిత్ర దర్శకుడు వీరభద్రం చౌదరి కూడా ఇ.వి.వి.సత్యన్నారాయణగారి శిష్యుడే కావటం విశేషం. ఈ సినిమా శతదినోత్సవాన్ని జూలై 9వ తేదీన హైదరాబాద్ లో అత్యంత వైభవంగా నిర్వహించటానికి ఈ చిత్ర నిర్మాత సన్నాహాలు చేస్తున్నారు. ఈ విషయాలన్నీ తెలియజేయటానికి ఈ చిత్రం యూనిట్ ఫిలిం ఛాంబర్ లో ఒక ప్రెస్ మీట్ ను ఏర్పాటు చేసింది. ఈ సమావేశంలో హీరో అల్లరి నరేష్, దర్శకుడు వీరభద్రం చౌదరి, సంగీత దర్శకుడు రఘుకుంచె, నటుడు నాగినీడు, ఎగ్జిక్యూటీవ్ నిర్మాత కిషోర్ లు పాల్గొన్నారు. ఈ సందర్భంగా వీరంతా ఈ చిత్ర విజయానికి సహకరించిన ప్రతిఒక్కరికీ, ముఖ్యంగా ప్రేక్షకులకూ తమ ధన్యవాదాలు తెలిపారు. దివి నుంచి ఇవివి, జంధ్యాల గార్ల ఆశీర్వాదం తమపై ఉండబట్టే ఈ చిత్రం ఇంతటి ఘనవిజయం సాధించిందని వారు అభిప్రాయపడ్డారు. ఈ సందర్భంగా తమ చిత్ర విజయానికి కారకులైన అందరికీ కృతజ్ఞతలు తెలుపుతూ ఈ చిత్ర నిర్మాత అనీల్ సుంకర

పంపిన ఫ్యాక్స్ సందేశాన్ని రఘుకుంచె చదివి వినిపించారు.