'టెంపర్'కి ముందు ఎన్టీఆర్ వేరు.. 'టెంపర్' తర్వాత ఎన్టీఆర్ వేరు. 2015లో వచ్చిన 'టెంపర్' మొదలుకొని, 2024లో వచ్చిన 'దేవర' వరకు.. ఏడు సినిమాలు చేశాడు ఎన్టీఆర్. అందులో ఒక్క పరాజయం కూడా లేదు. ఇటీవల కాలంలో ఇలా వరుసగా ఏడు విజయాలు అందుకున్న స్టార్స్ ఎవరూ లేరనే చెప్పాలి. అంతటి ఫామ్ లో ఉన్న ఎన్టీఆర్ కి ఇప్పుడు 'వార్-2' రూపంలో ఊహించని షాక్ తగిలింది.

ఎన్టీఆర్ నటించిన మొదటి బాలీవుడ్ ఫిల్మ్ 'వార్-2'. అయాన్ ముఖర్జీ దర్శకత్వంలో యశ్ రాజ్ ఫిలిమ్స్ నిర్మించిన ఈ యాక్షన్ థ్రిల్లర్ లో హృతిక్ రోషన్ తో కలిసి ఎన్టీఆర్ స్క్రీన్ షేర్ చేసుకున్నాడు. ఆగస్టు 14న విడుదలైన ఈ మూవీ డివైడ్ టాక్ ని సొంతం చేసుకుంది. అయినప్పటికీ మొదటి వీకెండ్ లో దాదాపు రూ.300 కోట్ల గ్రాస్ రాబట్టి సత్తా చాటింది. అయితే ఎన్టీఆర్-హృతిక్ కాంబోకి, ఆ బడ్జెట్ కి ఈ కలెక్షన్స్ తక్కువనే చెప్పాలి. ముఖ్యంగా తెలుగు రాష్ట్రాల్లో 'వార్-2' ఆశించిన స్థాయిలో పర్ఫార్మ్ చేయట్లేదు.

'వార్-2' తెలుగు థియేట్రికల్ రైట్స్ ని నిర్మాత నాగవంశీ దాదాపు రూ.80 కోట్లకు దక్కించుకున్నారు. తెలుగు రాష్ట్రాల్లో బ్రేక్ ఈవెన్ సాధించాలంటే రూ.80 కోట్లకు పైగా షేర్ రాబట్టాల్సి ఉంది. కానీ, ప్రస్తుత ట్రెండ్ చూస్తుంటే.. రూ.50 కోట్ల లోపు షేర్ కే పరిమితమవుతుందని ట్రేడ్ వర్గాలు అంచనా వేస్తున్నాయి. అదే జరిగితే భారీ నష్టాలు తప్పవు. మరి 'వార్-2' తెలుగునాట అనూహ్యంగా పుంజుకొని హిట్ అనిపించుకుంటుందో లేక పదేళ్ల తర్వాత ఎన్టీఆర్ ఖాతాలో ఫ్లాప్ పడేలా చేస్తుందో చూడాలి.