ఫిబ్రవరి 28 సోమ ప్రదోషం… చాలా ప్రత్యేకం!

శివుడు సృష్టిని నడిపించే లయకారుడు. చెడును అంతం చేసే ప్రళయకారుడు. శివుని అనుగ్రహంతో సాధ్యం కానిదంటూ లేదు. అకాల మృత్యువును సైతం గడ్డిపోచలా దహించివేయగల దైవం తను. ఆ పరమేశ్వరుని పూజించేందుకు అనువైన సమయం ప్రదోష కాలం.

ప్రతి రోజూ సూర్యాస్తమయానికి ముందు, తర్వాత కాలాన్ని ప్రదోషంగా పేర్కొంటారు. కాలాన్ని బట్టి, సంప్రదాయాలను బట్టి… ఈ ప్రదోష సమయం వేర్వేరు విధాలుగా ఉంటుంది. వీటిలో ఏది సరైంది అని తర్జనభర్జన పడేకంటే… సూర్యాస్తమయానికి ఒక అరగంట నుంచి తర్వాత అరగంట వరకు ప్రదోషంగా భావిస్తే ఎలాంటి ధర్మసందేహం కలగదు. ఈ గంట సమయంలో శివుని ఆరాధిస్తే మంచి ఫలితం ఉంటుందని చెబుతారు.

ప్రదోషకాలంలో శివుడు ఆనంద తాండవం చేస్తాడని ప్రతీతి. ఆ మైమరపును చూసేందుకు సకల దేవతలూ కైలాసాన్ని చేరుకుంటారట. ప్రమథ గణాలు సైతం ఈ కాలంలో చురుగ్గా ఉంటాయని నమ్మకం. ఇలాంటి అరుదైన సమయంలో… శివుని అర్చించుకోవడం, ఆయనకు ఇష్టమైన రుద్రాన్ని చదవడం, తనను ప్రసన్నం చేసుకునేందుకు శివస్తోత్రాలను పఠించడం లాంటి పనులు చేయవచ్చు. ఇవేవీ కుదరకపోయినా… ఆ కాసేపు ‘ఓం నమః శివాయ’ అనే పంచాక్షరిని జపించినా విశేషమైన ఫలితం ఉంటుంది.

ప్రతి త్రయోదశి రోజున వచ్చే ప్రదోష కాలం మరింత ప్రత్యేకం. ఆ రోజును మహా ప్రదోషంగా భావించి… ప్రదోష వ్రతాన్ని ఆచరిస్తారు. ఆ రోజు అంతా నిరాహారంగా ఉండి, సాయం వేళ శివ పూజ చేసిన తర్వాత ఉపవాసాన్ని విరమిస్తారు. ఈ త్రయోదశి ప్రదోష కాలంలోనే పరమేశ్వరుడు హాలాహలాన్ని స్వీకరించి… లోకాన్ని ఆ విషం నుంచి కాపాడని పురాణకథనం. హాలాహలం అంటే చెడుకు, కష్టానికీ, అడ్డంకులకూ, అనారోగ్యానికీ, పాపాలకూ సూచన. కాబట్టి ఆ రోజున శివుని ఆరాధిస్తే… మన లౌకిక జీవితంలో ఉండే ప్రతికూలతలన్నింటినీ కూడా ఆయన తొలగించివేస్తాడని నమ్మకం.

ఇక ఈ ఫిబ్రవరి 28న మహాప్రదోషం సోమవారం నాడు వచ్చింది. ఇలా వచ్చే ప్రదోషాన్ని సోమ ప్రదోషం అంటారు. దీనికి రెండు ప్రత్యేకతలు ఉన్నాయి. సోమవారం శివుడికి ప్రీతికరమైన రోజు. పైగా సోమవారానికి చంద్రుడు అధిపతి. జాతకరీత్యా చంద్రడు మన మనఃస్థితిని శాసిస్తాడు. కాబట్టి ఈ రోజున కనుక శివుని ఆరాధించి, మరీ ముఖ్యంగా ప్రదోష సమయంలో ఆయన్ను కొలుచుకుంటే… జీవితంలో ఉన్న కష్టాలన్నీ తీరి, ప్రశాంతత ఏర్పడుతుంది!

- నిర్జర.