క్రేజ్, మార్కెట్ ని బట్టి హీరోలు స్టార్లుగా పరిగణించబడతారు. కంటెంట్ తో సంబంధం లేకుండా భారీ ఓపెనింగ్స్ రాబట్టగల సత్తా స్టార్స్ కి ఉంటుంది. నెగటివ్ టాక్ వచ్చినా కూడా.. స్టార్ల సినిమాలకు కనీస వసూళ్లు వస్తుంటాయి. అందుకే నిర్మాతలు వారికి భారీ రెమ్యూనరేషన్లు ఇవ్వడానికి వెనకాడరు. అయితే రాబోయే రోజుల్లో ఈ స్టార్డం అనే మబ్బులు తొలిగిపోయే పరిస్థితులు కనిపిస్తున్నాయి.

ఒకప్పుడు స్టార్లకు వీరాభిమానులు ఉండేవారు. తమ హీరో సినిమా ఎలా ఉన్నా.. దానిని భుజాన వేసుకొని ఎంతో కొంత గట్టుకి చేర్చే ప్రయత్నం చేసేవారు. కానీ ఇప్పుడు ఆ పరిస్థితి మారుతోంది. అభిమానులు కూడా సినిమా బాగుంటేనే చూస్తున్నారు. బాలేదంటే దానిని భుజాన మోసే ప్రయత్నం చెయ్యట్లేదు. ఇది చాలదు అన్నట్టు.. సోషల్ మీడియా గొడవల వల్ల ఒక స్టార్ హీరో అభిమాని, మరో స్టార్ హీరో సినిమా చూడటానికి ఇష్టపడట్లేదు. ఇక న్యూట్రల్ ఆడియన్స్ సంగతి సరే సరి. ఎంత పెద్ద స్టార్ ఉన్నప్పటికీ.. సినిమా బాలేదంటే కనీసం థియేటర్ వంక కూడా చూడట్లేదు.

ఈ ఏడాది వరుసగా స్టార్లకు చేదు అనుభవాలు ఎదురవుతున్నాయి. రామ్ చరణ్ 'గేమ్ ఛేంజర్', పవన్ కళ్యాణ్ 'హరి హర వీరమల్లు' సినిమాలను ప్రేక్షకులను నిర్మొహమాటంగా రిజెక్ట్ చేశారు. ఇటీవల విడుదలైన జూనియర్ ఎన్టీఆర్ 'వార్-2' సైతం పెద్దగా ప్రభావం చూపలేకపోతోంది.

ఎంత స్టార్ ఉన్నప్పటికీ, కంటెంట్ బాలేకపోతే ప్రేక్షకులు సినిమా చూసే పరిస్థితి ఇప్పుడు లేదు. అభిమానుల పుణ్యమా అని ఇప్పటికైతే మొదటిరోజు స్టార్ల సినిమాలు చెప్పుకోదగ్గ వసూళ్లు రాబడుతున్నాయి. కానీ, నెగటివ్ టాక్ వస్తే.. రెండో రోజు నుంచే వసూళ్లు పడిపోతున్నాయి. దాంతో భారీ నష్టాలు వస్తున్నాయి.

రానురాను ప్రేక్షకులు సినిమా చూసే విధానం పూర్తిగా మారిపోతోంది. వారికి స్టార్స్ తో సంబంధం లేదు. సినిమాలో కంటెంట్ ఉండాలి. అప్పుడే థియేటర్ల బాట పడుతున్నారు. ఇటీవల విడుదలైన 'మహావతార్ నరసింహ'నే ఉదాహరణగా తీసుకుంటే.. నటీనటులు లేని ఈ యానిమేటెడ్ ఫిల్మ్ కేవలం మౌత్ టాక్ తోనే దాదాపు రూ.300 కోట్ల గ్రాస్ కొల్లగొట్టింది.

ప్రేక్షకులకు తగ్గట్టుగా స్టార్లు కూడా మారాలి. కంటెంట్ మీద ఫోకస్ పెట్టాలి. భారీతనం అనేది బడ్జెట్ లో కాదు.. కంటెంట్ లో కనపడేలా చూసుకోవాలి. అప్పుడే ప్రేక్షకులు థియేటర్లకు క్యూ కడతారు. లేదంటే రెండో రోజే సినిమాని ఇంటికి పంపుతారు. 

ప్రస్తుత పరిస్థితి చూస్తుంటే.. రాబోయే సంవత్సరాల్లో స్టార్లు అనే మాటే వినపడకుండా పోయినా ఆశ్చర్యంలేదు. ఎందుకంటే హీరోలను అభిమానించే వారి సంఖ్య రోజురోజుకి తగ్గుతోంది. కంటెంటే కింగ్ అని ప్రేక్షకుడు ఫిక్స్ అయితే.. ఎంతటి స్టార్ అయినా సాధారణ నటుడిగానే మిగిలిపోతాడు.