సినిమా పేరు: ఇడ్లీ కొట్టు
తారాగణం:  ధనుష్, నిత్య మీనన్, షాలిని, రాజ్ కిరణ్, సత్యరాజ్, అరుణ్ విజయ్, పార్డీ బన్,సముద్రఖని తదితరులు 
మ్యూజిక్:జీవి ప్రకాష్ కుమార్ 
ఎడిటర్: ప్రసన్న జీ కె 
రచన, దర్శకత్వం:ధనుష్ 
సినిమాటోగ్రాఫర్: కిరణ్ కౌశిక్ 
బ్యానర్స్  : శ్రీ వేదాక్షర మూవీస్, వుండర్‌బార్ ఫిల్మ్స్, డాన్ పిక్చర్స్
నిర్మాత: ధనుష్ 
విడుదల తేదీ: అక్టోబర్ 1 ,2025 

ధనుష్ స్వీయ దర్శకత్వంలో తెరకెక్కిన ఇడ్లీ కొట్టు ఈ రోజు వరల్డ్ వైడ్ గా థియేటర్స్ లో అడుగుపెట్టింది. తిరు లాంటి మూవీ తర్వాత ధనుష్, నిత్య మీనన్ మరో సారి జంటగా నటించడం, అర్జున్ రెడ్డి ఫేమ్ షాలిని తో పాటు అగ్ర నటులు సిల్వర్ స్క్రీన్ షేర్ చేసుకోవడంతో ఇడ్లీ కొట్టు ఎలా ఉండబోతుందో అనే ఆసక్తి అభిమానులతో పాటు ప్రేక్షకుల్లో ఉంది. మరి మూవీ ఎలా ఉందో చూద్దాం.

కథ
శివకేశవులు(రాజ్ కిరణ్) తన గ్రామంలో 'ఇడ్లీ కొట్టు' ని నడుపుతుంటాడు.ఆ కొట్టు శివకేశవులుకి  దైవంతో సమానం. తెల్లవారుజామున బ్రహ్మ ముహూర్తం సమయంలో మూడుగంటలకే నిద్రలేచి, చన్నీళ్లతో స్నానం చేసి తన కొట్టుకి వెళ్తుంటాడు.వంశ పారంపర్యంగా వస్తున్న రోలులో తన చేత్తో పిండి రుబ్బి ఇడ్లీ తయారు చేస్తుంటాడు. ఆ  ఇడ్లీ ఎంతో టేస్ట్ గా ఉంటుంది. తన గ్రామంతో పాటుచుట్టు పక్కల గ్రామాల్లో కూడా బాగా ఫేమస్ అవ్వడంతో పాటు, గాంధీ గారు బోధించిన అహింసో పరమో ధర్మో ని ఫాలో అవుతుంటాడు. తన తదనంతరం ఒక్కగానొక్క కొడుకు మురళి(ధనుష్) ఇడ్లీ కొట్టుని నడపాలనేది శివ శంకర్ కోరిక. కానీ హోటల్ మేనేజ్ మెంట్ చదవిన మురళి జీవితంలో మరింతగా ఎదగాలనే లక్ష్యంతో ఉంటాడు. అందులో భాగంగా విదేశాల్లో ఫుడ్ రంగంలో అంతర్జాతీయంగా పేరు గడించిన కుబేరుడు, పరువు కోసం ప్రాణమిచ్చే విష్ణు వర్ధన్(సత్య రాజ్) దగ్గర ఒక కీ పోస్ట్ లో పని చేస్తుంటాడు. విష్ణువర్ధన్ కూతురు మీరా(షాలిని పాండే)  మురళి ప్రేమించుకుంటారు. ఇద్దరికి ఎంగేజ్మెంట్ జరగడంతో పాటు,పెళ్లి డేట్ కూడా నిర్ణయిస్తారు. పెళ్ళికి సంబంధించిన ఇన్విటేషన్ కార్డ్స్ కూడా ఎంతో మంది ప్రముఖులకి పంచుతారు. కానీ విష్ణువర్ధన్ కొడుకు అశ్విన్( అరుణ్ విజయ్) కి మురళి అంటే కోపం. పైగా డబ్బు ఉన్న అహంకారం అణువణువునా ఉంటుంది. మురళి తండ్రి శివకేశవులు  చనిపోతాడు. దీంతో తన ఊరు వస్తాడు. పెళ్లి డేట్ కి రమ్మన్నా వెళ్ళడు. దీంతో పరువు కోసం ప్రాణమిచ్చే విష్ణు వర్ధన్, అశ్విన్ మురళి గ్రామం వస్తారు? మురళి ఎందుకు తిరిగి ఉన్నత జీవితం కోసం వెళ్ళలేదు? తన గ్రామంలోనే ఎందుకు ఉన్నాడు? తన తండ్రి ఇడ్లీ కొట్టు ఏమైంది? మురళి విషయంలో అహంకారులైన విష్ణువర్ధన్, అశ్విన్ ఏం చేసారు?  ఈ కథలో నిత్యామీనన్ పోషించిన కళ్యాణి క్యారక్టర్ ఏంటి? అహింసో పరమో ధర్మో అనే మాటకి ఈ కథకి ఏమైనా సంబంధం ఉందా? చివరకి ఎవరి క్యారక్టర్ ఎలా ముగిసిందనేదే  ఈ చిత్ర కథ.

ఎనాలసిస్ 
చెప్పుకోవడానికి చిన్నకథే అయినా, తెరకెక్కించిన విధానం చాలా బాగుంది. ఎన్నో సన్నివేశాలు మన మనసుని కదిలిస్తాయి. కొన్ని సన్నివేశాల్లో మన తల్లితండ్రులు   గుర్తుకు రావడంతో, తెలియకుండానే కన్నీళ్లు వస్తాయి. ముఖ్యంగా మురళి తండ్రి చనిపోగానే తల్లి ఇడ్లి కొట్టుకి వచ్చి యుక్త వయసులో తన భర్త తాను కలిసి ఇడ్లీ కొట్టు ని ఎలా కట్టుకున్నారనే సన్నివేశాల్లో ఒళ్ళు జలదరిస్తుంది. వంశ పారంపర్యంగా తాము చేసే వ్యాపారాన్ని దైవంగా కొలుచుకునే వాళ్ళైతే,వెంటనే తేరుకోవడం చాలా కష్టం. ఫస్ట్ హాఫ్ స్టార్టింగ్ లోనే ఈ కథ ఉద్దేశ్యం అర్ధమవుతుంది. కానీ కథనాన్ని మలిచిన తీరుతో సినిమాలో లీనమైపోతాం. ఈ ప్రాసెస్ లో ఎన్నో జీవిత సత్యాలని కూడా ఇడ్లీ కొట్టు  చెప్తుంది. కాకపోతే మురళి సినిమా ప్రారంభం నుంచే ఏదో కోల్పోయిన వాడిలా డల్ గా ఉంటాడు. తన  మనసులో ఉన్న ఊరిని, కొట్టుని వదిలి వెళ్లవద్దని తండ్రి చెప్పిన మాటల వల్ల ఆ విధంగా ఉండి ఉండవచ్చు. కానీ కథనాల్లో అన్ని అంశాలు ఉండాలి కాబట్టి, విదేశాల్లో మురళి ఎంజాయ్ చేస్తున్నట్టుగా ఎస్టాబ్లిష్ చేసి ఉండాల్సింది. మురళి తన ఊరు రావడం,ఇడ్లీ కొట్టుని తన తండ్రిగా  భావించి, తన గ్రామంలోనే ఉండాలని అనుకోవడం, ఈ సందర్భంగా వచ్చే సన్నివేశాలు చాలా బాగున్నాయి. మురళి అంతు చూడాలని విష్ణు వర్ధన్, అశ్విన్ రావడంతో నెక్స్ట్ ఏం జరుగుతుందనే ఆసక్తి కలిగింది. కళ్యాణి, మురళి ఎనిమిద క్లాస్ లోనే ప్రేమించుకున్నారని, మురళి ప్రేమ కోసం కళ్యాణి ఎదురుచూడటం, ఆ ఇద్దరి మధ్య వచ్చిన సీన్స్ కూడా, ఆడవాళ్లు తమకి నచ్చిన వాడిపై ఎంతగా  ప్రేమని పెంచుకుంటారో చెప్పినట్లయింది. కాకపోతే  మురళి విదేశాల్లో ఉన్నప్పుడు, అతని తల్లితండ్రుల్ని కళ్యాణి చూసుకోవడాన్ని సన్నివేశాలుగా చూపిస్తే బాగుండేది. ఇడ్లీ కొట్టు లో నడిచే  సన్నివేశాలు బాగా వచ్చాయి. ఇంటర్వెల్ ట్విస్ట్ కూడా బాగుంది. సెకండ్ హాఫ్ లో చూసుకుంటే  ప్రారంభంలో చాలా వేగంగానే కదిలింది.  మురళిని అశ్విన్. విష్ణువర్ధన్ దెబ్బ కొట్టాలనుకునే  ప్లాన్ లో కళ్యాణి ని ఉపయోంచుకుంటే బాగుండేది. కళ్యాణి, మురళి మధ్య లవ్, ఫ్యామిలీ డ్రామాని మిక్స్ చేయడంతో పాటు కళ్యాణి క్యారక్టర్ ని మరింతగా ఉపయోగించుకొవాల్సింది ఆ దిశగా సీన్స్ వస్తే కథ పరిధి పెరిగేది. మురళిని కాల్చినప్పుడు వచ్చిన సీన్స్ మాత్రం హాట్స్ ఆఫ్. తమ ఊరు వాడి కోసం ఊరు మొత్తం ఏకమైతే ఎలా ఉంటుందో చూపించారు. మీరా ని పాజిటివ్ గా చూపించడం బాగుంది.  ఇక్కడ్నుంచి ప్రీ క్లైమాక్స్ వరకు కళ్యాణి, ధనుష్ ల పెళ్లి కి సంబంధించిన కథనాల్ని అల్లాల్సింది. అలాగే  ధనుష్ ని యాక్టీవ్ చెయ్యాల్సింది. తాను నమ్మిన అహింసో పరమో ధర్మ ని కాసేపు పక్కన పెట్టి, చెడ్డవాళ్ల విషయంలో అహింసో పరమో ధర్మ ని పక్కన పెట్టడం కూడా అహింసో పరమో ధర్మ లాంటిదే అని ఎస్టాబ్లిష్ చెయ్యాల్సింది.  క్లైమాక్స్  బాగున్నా, చివరకి వరకు సెంటిమెంట్ తో నడవాల్సిన అవసరం లేదోమో అని అనిపిస్తుంది.

నటీనటులు సాంకేతిక నిపుణుల పనితీరు 
మురళి క్యారక్టర్ లో ధనుష్(Dhanush)మరోసారి అద్భుతమైన పెర్ఫార్మ్ ని ప్రదర్శించడంతో పాటు, సదరు క్యారక్టర్ తన కోసమే పుట్టిందనేలా విజృంభించాడు. తన క్యారక్టర్ లో భిన్న కోణాలు లేకపోయినా, ఆ లోటు తెలియకుండా చెయ్యడంలో సక్సెస్ అయ్యాడు.  దర్శకుడిగా, రచయితగా కూడా ధనుష్ ఇంకో మెట్టు పైకి ఎక్కడమే కాకుండా, కొన్ని డైలాగుల ద్వారా జీవిత సత్యాన్ని చెప్పాడు. కళ్యాణి గా ఎలాంటి కల్మషం, కల్లాకపటం లేని అమ్మాయిగా నిత్యామీనన్(Nithya Menen)మరో సారి అద్దుతుమైన పెర్ఫార్మ్ ని ప్రదర్శించింది. ముఖ్యంగా సత్యరాజ్, అరుణ్ విజయ్ ప్రదర్శించిన నటన, ఆ ఇద్దరి కెరీర్ లో మరుపురాని మెమొరీబుల్ ని ఇడ్లీ కొట్టు ఇచ్చిందని చెప్పవచ్చు.  డబ్బు ఉన్న అహంకారాన్ని తమ క్యారక్టర్ ల ద్వారా పర్ఫెక్ట్ గా చూపించారు. షాలిని పాండే కూడా తన పరిధి మేరకు సూపర్ గా చేసింది. శివకేశవులుగా సీనియర్ యాక్టర్ రాజ్ కిరణ్ గారు కూడా తన ఎంటైర్ సినీ జీవితంలో మరో మరుపురాని నటనతో మెస్మరైజ్ చేసాడు. జీవి ప్రకాష్ కుమార్ మ్యూజిక్, బ్యాక్ గ్రౌండ్ మ్యూజిక్, కిరణ్ కౌశిక్ ఫొటోగ్రఫీ చాలా ప్లస్ గా నిలిచాయి . నిర్మాణ విలువలు కూడా కథ పరిధి మేరకు బాగున్నాయి.  

ఫైనల్ గా చెప్పాలంటే కథ చిన్నదే అయినా, కథనాలతో పాటు నటీనటుల పెర్ఫార్మెన్సు ఇడ్లీ కొట్టుకి ప్రధాన బలంగా నిలిచాయి. సెకండ్ ఆఫ్ కొంచం లాగ్ గా అనిపించినా, క్లైమాక్స్ జీవిత సత్యాన్ని చెప్పింది.

రేటింగ్ 2 .5 /5

                                                                                                            అరుణాచలం