ఇటీవల మూవీ పైరసీ గ్యాంగ్ ను హైదరాబాద్‌ సైబర్‌క్రైమ్‌ పోలీసులు పట్టుకున్న సంగతి తెలిసిందే. ఈ కేసుని పోలీసులు సీరియస్ గా తీసుకున్నారు. పైరసీ సినిమాలకు అప్లోడ్ చేసే ఐబొమ్మ వెబ్ సైట్ నిర్వాహకులను కూడా త్వరలోనే పట్టుకుంటామని పోలీసులు హెచ్చరించారు. అయితే ఐబొమ్మ నిర్వాహకులు భయపడకపోగా.. రివర్స్ లో వాళ్ళే వార్నింగ్ ఇవ్వడం ఇప్పుడు హాట్ టాపిక్ గా మారింది. 

"మీరు ఐబొమ్మ మీద ఫోకస్ చేస్తే మేము ఎక్కడ ఫోకస్ చేయాలో అక్కడ చేస్తాం" అంటూ ఐబొమ్మ పేరుతో ఓ వార్నింగ్ లెటర్ ప్రస్తుతం సోషల్ మీడియాలో చక్కర్లు కొడుతోంది. ఓటీటీ రెవెన్యూ కోసం ఆలోచిస్తూ మీరు మా మీద ఫోకస్ పెట్టడం ఆపేసి.. థియేటర్లలో సినిమాలని కెమెరాతో రికార్డు చేసి, రిలీజ్ చేసే వెబ్ సైట్స్ పై దృష్టి పెట్టండని ఐబొమ్మ రాసుకొచ్చింది. హీరోలకు అంతంత రెమ్యూనరేషన్స్ ఇస్తుంటారు, సినీ కార్మికులకు మాత్రం కూలి పనులను వెళ్ళినా వచ్చే అంత ఇస్తారని నిర్మాతలకి చురకలు వేసింది. అనవసరమైన బడ్జెట్ పెట్టి, దానిని రికవర్ చేసుకోవడానికి టికెట్ రెట్లు పెంచి సామాన్యులపై భారం వేస్తున్నారని ఐబొమ్మ పేర్కొంది. ఐబొమ్మ అనేది సిగరెట్ నుంచి ఈసిగరెట్ కి యూజర్స్ ని మళ్లించే ప్రక్రియ. బురదలో రాయి వేయకండి. మేము ఏ దేశంలో ఉన్నా.. భారతదేశం, అందులో తెలుగువారి కోసం ఆలోచిస్తాము అంటూ ఐబొమ్మ రాసుకొచ్చింది. 

ఐబొమ్మ వార్నింగ్ నేపథ్యంలో పోలీసులు ఈ కేసుని మరింత సీరియస్ గా తీసుకునే అవకాశముంది.