ఏంటి ట్రిపుల్ ఆర్ విడుద‌లై అప్పుడే ఏడాది పూర్త‌యిందా? అని ఆశ్చ‌ర్య‌పోతున్నారు జ‌నాలు. చూస్తూ ఉండ‌గానే కాలం క‌ర‌గ‌డ‌మంటే ఇదేనా అంటూ నివ్వెర‌పోతున్నారు. మూడు, నాలుగేళ్లుగా వార్త‌ల్లోనే ఉంది ట్రిపుల్ ఆర్‌. ప్యాండ‌మిక్ స‌మ‌యంలోనూ, ఆ త‌ర్వాత‌, సినిమా విడుద‌లైన‌ప్పుడు, విశ్వ‌వ్యాప్తంగా జ‌య‌జ‌య‌ధ్వానాలు అందుకున్న‌ప్పుడు... వార్త‌ల్లో ఉంటూనే ఉంది ఈ సినిమా. అంతే సినిమా విడుద‌ల‌కు ముందు ప్ర‌చార కార్య‌క్ర‌మాల సంగ‌తి ఒక ఎత్త‌యితే, సినిమా విడుద‌ల‌య్యాక ఇంట‌ర్నేష‌న‌ల్ లెవ‌ల్లో ఢంకా భ‌జాయించి విజ‌య‌గ‌ర్వంతో వ‌చ్చిన సంగ‌తి మ‌రోతీరు. ఈ ఏడాది ఆస్కార్ వేదిక మీద నాటు ఘాటును చూపించింది ట్రిపుల్ ఆర్ సినిమా. గోల్డెన్ గ్లోబ్ అవార్డుల్లోనూ స‌త్తా చాటింది. ఎన్నో ద‌శాబ్దాలుగా ర‌జ‌నీకాంత్ పేరు మీద జ‌పాన్‌లో ఉన్న రికార్డుల దుమ్ముదులిపి కొత్త ర‌క్తం వ‌చ్చింద‌ని స‌గ‌ర్వంగా చెప్పి వ‌చ్చింది. ఒక‌టా, రెండా రాజ‌మౌళి గ‌డిపిన నిద్ర‌లేని రాత్రులు ఎన్నెన్నో. వాట‌న్నిటికీ ఫ‌లితం ద‌క్కింది. ట్రిపుల్ ఆర్ అంటే ఇప్పుడు దేశం మీసం మెలేసే విష‌యం. ఆస్కార్ క‌ల‌ల‌ను సాకారం చేసిన అంశం. ఎన్టీఆర్‌, రామ్‌చ‌ర‌ణ్‌, ఆలియా, అజ‌య్ దేవ్‌గ‌ణ్‌, శ్రియా శ‌ర‌ణ్ అంటూ స‌రిహ‌ద్దులు చెరిపేసి స్టార్లంద‌రూ యాక్ట్ చేసిన చిత్రం.

ఈ సినిమా విడుద‌లై ఏడాది అయిన సంద‌ర్భంగా అంద‌రూ ట్రిపుల్ ఆర్ సీక్వెల్ గురించి ఎదురుచూస్తున్నారు. ఆల్రెడీ ట్రిపుల్ ఆర్‌కి పాయింట్ చెప్పాను, రాజ‌మౌళి ఒప్పుకున్నారు అని హింట్ ఇచ్చారు విజ‌యేంద్ర‌ప్ర‌సాద్‌. క‌థ డ్రైవ్ ఎలా ఉంటుందో నాకు తెలుసు, కానీ నేను చెప్ప‌నోచ్ అంటూ ఊరిస్తున్నారు కాల‌భైర‌వి. స్వ‌రాల‌తో నేను సిద్ధంగానే ఉంటాన‌ని అంటున్నారు కీర‌వాణి.
మ‌రి రాజ‌మౌళి ఏమంటారు? ఇప్పుడు మ‌హేష్ సినిమా ప‌నుల‌కు శ్రీకారం చుడుతున్న జ‌క్క‌న్న ట్రిపుల్ ఆర్ రెండో భాగాన్ని ఎలా ఊహించుకుంటున్నారు? ఆ ఊహ‌ల‌ను మ‌న‌తో ఎప్పుడు షేర్ చేసుకుంటారు? ఇప్పుడు ఇండ‌స్ట్రీలో ఇదే ఇంట్ర‌స్టింగ్ డిస్క‌ష‌న్‌.