యంగ్ టైగర్ జూనియర్ ఎన్టీఆర్ తన 30 సినిమాని కొరటాల శివ దర్శకత్వంలో చేస్తున్న సంగతి తెలిసిందే. రేపు(మే 20) ఎన్టీఆర్ పుట్టినరోజు కానుకగా తాజాగా ఈ మూవీ టైటిల్ ని, ఫస్ట్ లుక్ ని రివీల్ చేశారు. ముందు నుంచి ప్రచారం జరుగుతున్నట్లు గానే ఈ సినిమాకి 'దేవర' అనే టైటిల్ ని నిర్ణయించారు. పాన్ ఇండియా ఫిల్మ్ కి ఇది పర్ఫెక్ట్ టైటిల్ అనే అభిప్రాయాలు వ్యక్తమవుతున్నాయి. ఇదిలా ఉంటే ఈ మూవీ ఫస్ట్ లుక్ దిమ్మతిరిగేలా ఉంది. అసలిది కొరటాల సినిమానేనా అని అందరూ ఆశ్చర్యపోతున్నారు.

సాధారణంగా కొరటాల తన సినిమాలలో హీరోలను స్టైలిష్ గా చూపిస్తుంటాడు. కానీ 'దేవర'లో ఎన్టీఆర్ ని ఊర మాస్ అవతార్ లో చూపిస్తున్నాడు. తాజాగా విడుదలైన ఫస్ట్ లుక్ పోస్టర్ లో ఎన్టీఆర్ నెవెర్ బిఫోర్ లుక్ లో కనిపిస్తున్నాడు. సముద్ర తీరంలో శవాలు పడుండగా.. ఆ మారణకాండకు కారణమైన వ్యక్తిగా ఎన్టీఆర్ నల్లదుస్తుల్లో చేతిలో నెత్తురంటిన కత్తితో చాలా పవర్ ఫుల్ గా కనిపిస్తున్నాడు. ఎన్టీఆర్ గెటప్ అదిరిపోయింది. ఆయనను ఫ్యాన్స్ ఎలా చూడాలనుకుంటున్నారో, అంతకు మించిన మాస్ లుక్ లో కొరటాల చూపించాడు. ఫస్ట్ లుక్కే ఈ రేంజ్ లో ఉంటే, ఇక సినిమా ఏ రేంజ్ లో ఉంటుందో అంటూ ఫ్యాన్స్ సంబరపడుతున్నారు.

యువసుధ ఆర్ట్స్, ఎన్టీఆర్ ఆర్ట్స్ సంయుక్తంగా నిర్మిస్తున్న ఈ సినిమాలో జాన్వీ కపూర్ హీరోయిన్ కాగా, సైఫ్ అలీ ఖాన్ విలన్ గా నటిస్తున్నాడు. అనిరుధ్ ఈ చిత్రానికి సంగీతం అందిస్తున్నాడు.