'దాస్ కా ధమ్కీ'తో యంగ్ హీరో విశ్వక్ సేన్ మరో హిట్ ని తన ఖాతాలో వేసుకున్నాడు. విశ్వక్ హీరోగా నటించి దర్శకత్వం వహించిన ఈ మూవీ మంచి అంచనాలతో మార్చి 22న విడుదలైంది. డివైడ్ టాక్ తెచ్చుకున్నప్పటికీ మొదటి రోజు కలెక్షన్స్ పరంగా విశ్వక్ కెరీర్ లోనే అత్యధిక ఓపెనింగ్స్ ని సొంతం చేసుకుంది. ఆ తరువాత కూడా అదే జోరుని కొనసాగిస్తున్న ఈ చిత్రం నాలుగు రోజుల్లోనే బ్రేక్ ఈవెన్ సాధించి క్లీన్ హిట్ గా నిలిచింది.

'దాస్ కా ధమ్కీ' మూవీ ఓవరాల్ థియేట్రికల్ బిజినెస్ వాల్యూ రూ.7.5 కోట్లు కాగా మొదటి రోజే సగానికి పైగా రాబట్టడం విశేషం. ప్రపంచవ్యాప్తంగా మొదటి రోజు రూ.4.08 కోట్ల షేర్, రెండో రోజు రూ.1.45 కోట్ల షేర్, మూడో రోజు రూ.1.33 కోట్ల షేర్, నాలుగో రోజు రూ.1.54 కోట్ల షేర్ వసూలు చేసిందని ట్రేడ్ వర్గాల సమాచారం. రూ.8 కోట్ల బ్రేక్ ఈవెన్ టార్గెట్ తో బరిలోకి దిగిన ఈ మూవీ.. నాలుగు రోజుల్లోనే రూ.8.37 కోట్ల షేర్ రాబట్టి సత్తా చాటింది.

తెలుగు రాష్ట్రాల వసూళ్లను పరిశీలిస్తే.. నైజాంలో రూ.2.69 కోట్ల షేర్(బిజినెస్ రూ.3 కోట్లు), సీడెడ్ లో రూ.91 లక్షల షేర్(బిజినెస్ రూ.1 కోట్లు), ఆంధ్రాలో రూ.2.75 కోట్ల షేర్(బిజినెస్ రూ.2.8 కోట్లు)గా ఉన్నాయి. రెస్టాఫ్ ఇండియా రూ.92 లక్షల షేర్, ఓవర్సీస్ లో రూ.1.10 కోట్ల షేర్ రాబట్టిన ఈ మూవీ.. ఇప్పటిదాకా వరల్డ్ వైడ్ గా రూ.8.37 కోట్ల షేర్ వసూలు చేసింది. ఐదో రోజు ఆదివారం కావడంతో మరో కోటిన్నరకు పైగా షేర్ రాబట్టి.. పది కోట్ల షేర్ క్లబ్ లో చేరే అవకాశముంది.