స్వకీయపురాణం
ఏం చేస్తాడు పాపం
కెరటం మీద కెరటం మీద కెరటం లాగ
కష్టం మీద కష్టం మీద కష్టం
కరుపు మీద మిరప్పొడి మీద
రోకటి పోటులాగ
వాటాల ప్రకారం గూటాయిస్తున్నప్పుడు
ఏం చేస్తాడు పాపం వాడు
ఎన్నింటికని ఏడుస్తాడు
ఇందిరమ్మ కొడుకు చనిపోయాడని
ఇన్ స్పెక్టర్ని నక్సలైటు చంపేశాడని
ఎక్కడో ఎప్పుడో ఎవడో
ఇస్పేటు జాకీలను చింపేశాడని
ఎక్కడో ఎప్పుడో ఎవడో
ఇస్పేటు జాకీలను చింపేశాడని
ఎంతసేపని ఏడుస్తాడు
కొడవటిగంటి1 గుండెలాగిపోయాయని
సూర్యుడు చెప్పకుండా చెయ్యకుండా
చప్పచప్పగా చల్లారి పోతున్నాడని
భావాల పరుగుల వేగం అందుకోవడానికి
భాషకి ఊపిరి చాలడం లేదని
ఎంత సేపని ఏడుస్తాడు
ఏం చేస్తాడు పాపం వాడు?
అంచేత ఆ దుఃఖంలో వాడో
ఆనపకాయలో దూరిపోయాడు
కాయని కొనుక్కున్న ఓ యిల్లాలు
దాన్ని మధ్యకి రెండుగా తరిగింది
ఇల్లాలు కత్తిపీటని తీసినప్పుడే
ప్రమాదాన్ని పసి కట్టి
నేర్పుగా వాడు తన సైజు తగ్గించుకుని
ముచ్చికలో దాక్కున్నాడు
కూర తరిగి ముచ్చికను ఇల్లాలు
పెంటకుప్ప మీద పారేసింది.
దాన్నో ఆవు మింగింది.
ఆవు ఆనప ముచ్చికను తింటుందా
అని అనుమానం అక్కర్లేదు
ఆకలేస్తే ఆంధ్రుల పత్రికలన్నింటినీ
అమాంతంగా తినేస్తుంది.
ఆవు ఆహారకోశాల్లో
నిరాఘాటంగా విహరిస్తున్నాడు
తన శరీరాన్ని రసాయనిక
ద్రవ్యాలలోనికి మార్చేసుకున్నాడు
ఆహా! ఆవు జీర్ణకోశాల్లో విహారం
అయిదు నక్షత్రాల హోటేల్లో చరిస్తున్నట్టుందతనికి!
ఇంతట్లోనే "ఇదేమిటి! ఇక్కడున్నా" ననుకున్నాడు
"నా మానవ లోకానికి నేను పోవా" లనుకున్నాడు
అనుకోవడమే తడువుగా ఆవు మూత్ర పురీషాల ద్వారా
బైటికి వచ్చేశాడు
మళ్ళీ మనుష్యుల్లో పడ్డాడు.
రసాయనాలను తిరగీ తన రూపానికి మార్చుకున్నాడు.
బంగాళాఖాతంలో ప్రవేశించి బాగా స్నానం చేశాడు.
కల్మషమంతా కడుక్కుపోయింది
నిటారుగా నిలుచున్నాడు.
గాలిలో చెయ్యి ఊపి కావలసిన
దుస్తులు తెప్పించుకున్నాడు
(ఆమాత్రం కసాయి బాబుల
గజకర్ణ గోకర్ణ విద్యలు వాడికి కూడా తెలుసు)
ప్రపంచాన్ని సవాలు చేస్తూ
"నువ్వు పెట్టే కష్టాలకి
నేను లొంగి పోన"న్నాడు
ఎవడువాడు? మరెవడో కాడు శ్రీశ్రీ
రచన: 27-9-1980
ముద్రణ: మరో ఝంఝ విరసం కవితా- సంకలనం అక్టోబరు,1980
పునర్ముద్రణ: స్వాతి వారపత్రిక5సెప్టెంబర్, 1986
1.కొడవటిగంటి: కొడవటిగంటి కుటుంబరావు(1909-1980) సుప్రసిద్ధ తెలుగు కథ, నవలా రచయిత, విమర్శకుడు, మేధావి. ఆగస్టు17వ తేదీ చనిపోయారు.