ప్రస్తుత ప్రస్థావన!
    పోరా దండుకు పోరా ముందుకు
    పోరా తోసుకు వడివడిగా
    దోచుకుపోరా దాటుకుపోరా
    దూసుకుపోరా తోసుకుపోరా
    పోరా పోరా వేగంగా!
    దాడులు చేసి దోపిడి చేసి
    కత్తి కటార్లతో తలనరికేసి
    మొగాడినైతే ప్రాణం తీసి
    ఆడది అయితే మానం తీసి
    తేరగ దొరికిన సొమ్మును తీసి
    బ్యాంకులో ఖాతా ఓపెన్ చేసి
    బీదా బిక్కీ చచ్చేలాగా
    చిన్నా పెద్దా ఏడ్చేలాగా
    దొరికిన సరుకును కొనిపారేసి
    బ్లాకులో డబ్బులు సంపాదించి
    మేడలు మిద్దెలు కట్టిపడేసి
    కార్లూ బార్లూ నడుపుతుపోతూ
    పోరాడేందుకు పోరాముందుకు
    పోరా దూసుకు పోరా తోసుకు
    పోరా పోరా వేగంగా!
    అప్పుడు చూడర నీ తడాఖా
    చూస్తూ పో ఆ తమాషా
    సలాములు నీకే సన్మానాల్ నీకే
    గులాములు చేసే హంగామా నీకే
    రాజకీయ రంగప్రవేశానికి
    టిక్కెట్టులు నీకే బంగారపు బిస్కెట్టులు నీకే
    పట్టుదలతో సాధిస్తే మెట్టు మెట్టు
    అంతస్థులు నీకే!
    అప్పుడు
    దంచేసెయ్ ఉపన్యాసాల్
    చించేసెయ్ నీతి శాస్త్రాల్
    దేశమంటే మనుషులు కాదని
    దేశమంటే మట్టి ముద్దలని
    తేల్చేసెయ్ ఒక్క మాటలో
    చచ్చు జనాభా చావనీయమని
    పుచు సమాజం పుచ్చనీయమని
    కాల్చేసెయ్ కసితీరా తోటివారిని
    కూల్చేసెయ్ పూరికొంపలని
    పీకేసెయ్ చెట్టూ చేమను
    పెంచేసెయ్ ఆస్థీ పాస్థీ!
    అయితే,
    ఇంత తతంగం చేసేశాక
    ఇసుమంతైనా పొక్కనీయక
    నీలోనే అన్నీ ఇముడ్చుకుని
    సిగ్గూ ఎగ్గూ ఒదిలేసి
    పట్టేసెయ్ అందరి కాళ్లూ వేళ్లూ
    బతికేసెయ్ ఎలాగో ఓలాగు
    అంతకన్నా ఎందుకు నీతులు
    నీకెందుకు నీతులు
    గోతులు తీసి గొంతులు పిసికే
    నీ కెందుకు సూక్తులు.
    చరిత్రవొద్దు మనుషులు వొద్దు
    మనిషిగ బతికే మార్గం వొద్దు
    పద్దులు వొద్దు హద్దులు వొద్దు
    నువ్వంటే నీకే ముద్దు
    అందుకే లేదేదీ అడ్డు
    పోరాదండుకు పోరా ముందుకు
    పోరా పోరా ఎదుగుతుపో!
    అయితే,
    ఒక్కటి మాత్రం మరువకురా
    ఎప్పటికీ అది సత్యంరా
    ఎంతదోచినా ఎంత దాచినా
    నువ్వూ చావక తప్పదురా
    మణిమాణిక్యాలెన్నున్నా
    మట్టిలోనే నువు కలియుటరా
    మంటలోనే నువు మాడుటరా
    వెంటరారు నీ వాళ్లెవరూ
    జంట గూడరు నీ స్నేహితులు
    గడపదాటదు నీ సతి
    కాటి దాటరు నీ సుతులు
    అంతకాడికి ఎందుకు మోసం
    మెలేయుట మీసం పట్టరాని పౌరుషం
    ఎందుకురా ఒడిగట్టుట పాపం
    ముడిగట్టుట పైకం
    అందరి మేలూ కోరే విధముగ
    బతికేమార్గం చూడగలేవా
    మానవత్వం మంట గలపక
    మనిషిలాగా బతక నేర్వర
    రారాముందుకు రారా తోసుకు
    రారా దూసుకు రా...రా...రా...!
    పైసా నిలవదు ఎల్లకాలము
    పదవులు కావు శాశ్వతమ్ము
    మనుషుల్లాగా బతికేటందుకు
    మానవతను పెంచేటందుకు
    మారణహోమం మానేటందుకు
    కుల మత బేధం కూల్చేటందుకు
    భాషా భేదం మాపేటందుకు
    ప్రాంతీయ తత్వం పారద్రోలగ
    హద్దులు చెరిపి ఎల్లలు తుడిపి
    సమ సమాజం నిర్మించేందుకు
    నవ భారతం సృస్టించేందుకు
    దూసుకురారా దాటుకురారా
    తోసుకురారా రా...రా...రా...   
    రారా రారా వేగంగా
    రారా రారా ధైర్యంగా!

            * * *

    ఎదురు చూపులు చూడకు!

    నీ కన్నీటిని ఎదుటి వారి మనసు
    కరిగిపోతుందనుకోకు
    నీ కష్టాలను చూసి వాళ్ళ గుండె
    బద్దలయిపోతుందని అపోహపడకు
    నీబాధలకు ఈజనం చలించిపోతారనుకోకు
    నువ్వు చస్తే ఈ ప్రపంచం ఆగిపోతుందనుకోకు
    నీ కష్టం నీదే
    నీ బాధ నీదే
    నీ బతుకు నీదే!
    కన్నీటిలో మునిగి జాలిపాట పాడకు
    ఎవరో ఒచ్చి నిన్ను ఉద్ధరించాలని
    ఎదురుచూపులు చూడకు
    దగాపడినా దిగులు చెందకు
    దీనంగా బతకకు
    ఉత్తేజం నీవై ఉద్వేగం నీవై
    ఉరిమే మేఘం నీవై మెరిసే మెరుపువు నీవై
    నీ వ్యక్తిత్వానికి నవ్వే నాయకురాలివై
    నీ శక్తికి నీవే మహారాణివై
    స్వేచ్చ ఏ ఒక్కరి సొంతం కాదని
    బతికే హక్కు అందరికీ వుందని
    సబలవు నీవై సర్వము నీవై వ్యాపించు !
    ప్రపంచానికి చాటించు !
              * * *