త్రిసూత్రం
    ఎన్ని బాధలు ఎన్ని గాధలు
    తలుచుకుంటే గుండె గాయం
    తలవకుంటే లేదు మార్గం
    కాలచక్రం కదిపి చూస్తే
    కలికి కధలను తరచి చూస్తే
    కతలు ఎన్నో వెతలు ఎన్నో
    కన్నీటి చారల పొరలు ఎన్నో!
    పుట్టగానే ఆడపిల్లని
    కన్నవారే ఉస్సురంటే
    చూడవచ్చిన చుట్టపక్కాల్
    జాలి చూపి ఊరడించి
    హెచ్చవేతలు తీసివేతలు
    లెక్కలన్నీ చేసి చూపి
    గుండె మీది కుంపటంటూ
    గుబులు పుట్టే కబుర్లు చెప్పి
    హడల గొట్టి వెళ్లుతారు
    ఆరోజు మొదలు అన్నింటా
    అబలవూ అరిటాకువంటూ
    చదువు నీకు దండగంటూ
    వంటపనికీ ఇంటి పనికీ
    ఒంటెద్దులాగా తిరుగుపనికీ
    అన్ని ఆమెకే అంటగట్టిరి
    పనిజేసే యంత్రంలాగా
    నోరులేని మూగలాగా
    మొండిగా తయారు చేసిరి
    పుట్టినింట్లో మెట్టినింట్లో
    అన్నదమ్ములు మొగుడు మరుదులు
    అయినవారు కానివారు
    అందరూ బహుగొప్పవారే
    ఆడదొక్కటే అలుసు ఎందుకో?
    కన్యాశుల్కం మహాఘోరం
    అది కాదట పెద్దల నేరం
    మూడు కాళ్ళ ముసలివాడు
    ఉన్నపాటునే ఊపిరొదిలితే
    అది మాత్రం ఆమె ఖర్మం!
    పాలు గారే పసిడి బుగ్గల
    చిన్నారుల సింగారించి
    పెళ్ళితంతూ జరిపించేసి
    ఆయువు తీరి అతడు చస్తే
    సమిధలల్లే పసిడిబొమ్మల
    మంటవేసి తృప్తి చెందే
    ఘోరమైన నీతి శాస్త్రం
    ఆడపిల్లకే ఎందుకంట?
    అడగలేదు ఆడవారు
    కాలి నుసిగ మిగిలిపోయిరి
    కాస్తకాస్త కళ్ళు తెరిచి
    వొళ్లు విరిచి నిద్ర లేచిరి
    ఇప్పుడిప్పుడే మేల్కొనిరి
    లోకరీతిని తెలుసుకొనిరి
    మనిషిగా తల ఎత్తుకొనిరి!
    ఆమె చదవని చదువులేదు
    చేయలేని ఉద్యోగం లేదు
    సమానత్వం నిరూపిస్తే
    సహించలేని పెద్ద మనుషులు
    గుటకవేస్తూ గింజుకుంటూ
    నోరుతెరిచి మిన్నకుంటిరి!
    అయినా ఏదో ఆమెకి శాపం
    వరకట్నం మరో ఘోరం
    అన్నీ వుండీ ఆరడిపడుతూ
    ఆత్మహత్యకూ ఘోరహత్యకూ
    బలైపోతున్నారు మహిళలు
    నడిబజారున పడుతున్నారు
    తల్లి ఆమె చెల్లి ఆమె
    ఇల్లు నడిపే ఇలవేల్పు ఆమె
    ఆమె పైననే అత్యాచారమా?
    ఆమె మీదనే అఘాయిత్యమా?
    కలిసికట్టుగా ఇంతులందరు
    కొద్దిసేపు కళ్లుమూసుకు
    సమస్యలను తిరగవేస్తే?
    అత్యాచారం అఘాయిత్యం
    వీళ్లు చేస్తే ఏమవుతుంది?
    ఎదురుకట్నం పతీ సహగమనం
    వీరు కోరితే ఏం జరుగుతుంది?
    అందుకే యోచించి అందరు
    సమానత్వం పెంచుకుంటూ
    ఆడమగ తేడా లేక
    ఒకే నీతి -ఒకే భీతి - ఒకే సూక్తిగా నడిచేలాగా
    కొత్త చరిత్ర సృష్టించాలి
    ఈ త్రిసూత్రం పాటించాలి.
               * * *
    ఒంటరితనం
    ఒంటరితనాన్ని ఒక్కక్షణమైనా భరించలేను
    తుంటరుల మధ్య అంతకన్నా మనగలుగుతాను
    ఒంటరితనం రాక్షసి మనస్సుని గాలమేసి పట్టేసి
    పిచ్చి పిచ్చి జ్ఞాపకాల ఊబిలోకి లాగేస్తుంది
    నా నీడని చూసి నేనే భయపడేట్టు భ్రమింపజేస్తుంది
    అంతటితో ఊరుకోదు ఒకపట్టున ఒదిలిపెట్టడు
    గింజుకున్నా జుట్టుపీక్కున్నా
    ఎంత నిభాయించుకున్నా!
    వర్తమానపు ఆలోచనలని 'స్కాన్' చేసి పరీక్షించినట్టు
    మండుతున్న గుండెకి సమిధల్లా వాడుతుంది
    గజిబిజి ఊహలతో గందరగోళం సృష్టిస్తుంది
    భయ పెడుతుంది బతుకుభారం చేస్తుంది
    ఇంత చేసే ఒంటరితనం ఎంతపిరికిదో
    నలుగురినీ చూస్తే చాలు
    ఇసుకతిన్నెల మీద రాసుకున్నరాతల్లా
    నామ రూపాల్లేకుండా పోతుంది

              * * *