అమ్మాయశోధరామ్మా

    అమ్మా ! యశోధరమ్మా!
    ఏమమ్మా! యశోధరమ్మా!        ||అమ్మా||

    ఎంత అమాయిక వయినావమ్మా
    ఎందుకు నిద్దురపోయినావమ్మా        ||అమ్మా||

    కలయే నిజమై నిజమే కలయై
    కల నిజముల కలగలుపే బ్రతుకై
    ప్రణయ భరిత ప్రార్ధనా గీతమై
    ప్రభాత వికసిత పారిజాతమై         ||అమ్మా||

    లోకం కోసం నాధుని పంపీ
    శోకాశ్రులతో బ్రతుకుని నింపీ
    నీకై నీవే నిలువరించుకొని
    ఏకాకినివై పోయితివమ్మా!        ||అమ్మా||

    యౌవనమంతా ఏకతారగా
    జీవనమొక కన్నీటిధారగా
    భావనలోనే కరగిపోదువా
    శ్రావణమాసపు జలదమాలగా         ||అమ్మా||

    
                                                   ఇంతేనమ్మా

    ఇంతేనమ్మా జీవిత మింతేనమ్మా                          ||ఇంతే||

    అంతులేని ఆశలు గల్లంతేనమ్మా
    చివరకు మిగిలేది మనకు చింతేనమ్మా                     ||ఇంతే||

    జంట విడని క్రౌంచపక్షి వింటిదెబ్బ తిన్నది
    అది కనుగొని వాల్మీకుల మది బావురుమన్నది
    ఆ చిందిన రుధిరధార ఈ పొంగిన అశ్రుధార
    రామాయణ కావ్యంబై రసం నింపుకొన్నది                    ||ఇంతే||

    రాలుతున్న పూలగుత్తి జాలిబాధ జీవితం
    కాలుతున్న అగరువత్తి కరుణగాధ జీవితం
    అమృతం వెన్నంటియున్న హాలాహలం జీవితం
    హాలాహలం దాచుకొన్న హరుని గళం జీవితం                 ||ఇంతే||

    
                                 నాన్నకోసం

    
    నాన్న యేడే అమ్మ! నాన్న యేడే?                ||నాన్న||

    రేపు వస్తాడంటూ మాపు వస్తాడంటు
    చూచి చూచీ కళ్ళు వాచిపోతున్నాయి
    గోల చేస్తాననీ కోపమొచ్చిందిటే
    అల్లరబాయినని అలిగిపోయాడుటే                   ||నాన్న||

    రేపులెన్నో పోయె బాపూజీ రాడాయె
    మాయమాటలు చెప్పి మరపించుతున్నావు
    నన్నయిన పంపవే నాన్న దగ్గరకెళ్ళి
    అమ్మ యేడుస్తున్నదని పిల్చుకొస్తాను               ||నాన్న||

    నీ కళ్ళలో ఇన్ని నీటిముత్యాలేమె!
    గుండె టకటక యిట్లు కొట్టుకుంటుందెమే!
    వెక్కెక్కి యేడుస్తూ యేమి లేదంటావు
    చేతు లివి చూడవే చిక్కిపోయాయెంతో               ||నాన్న||

    అందరబ్బాయిలతో ఆడుకోబోతేను
    జనమంత నావైపు జాలిగా చూస్తారే
    నాన్నలేకేడ్చేటి నావంటి పసివాళ్ళ
    కన్నీళ్ళు తుడిచి ఓదార్చి వస్తాడుటే                  ||నాన్న||

    
                            ఆచార్య దేవో భవ

    స్వాగతం స్వాగతం స
    మాగత గురువర్యులార!
    జయం జయం జయం నీకు
    ప్రియతమ ఆచార్యులార!                                   ||స్వాగతం||

    విశ్వకళాక్షేత్రంలో విజ్ఞానం నిండించిరి
    బాలబాలికల గుండెల బంగారం పండించిరి
    జగతి ప్రగతి మార్గంలో జైత్రయాత్ర సాగించిరి    
    ప్రజాహృదయ వీధులలో విజయభేరి మ్రోగించిరి               ||స్వాగతం||

    నాలందా తక్షశిలా నాగార్జునకొండ కాంచి
    అమరావతి విక్రమశిల లేమన్నవి ఏమన్నవి
    ఉర్వికెల్ల కాంతిదూత ఉపాధ్యాయుడే నన్నవి
    అచ్చమైన శాంతిదూత అధ్యాపకుడే నన్నవి                    ||స్వాగతం||

    వికసించిన అరవిందం విరజిమ్మెను మకరందం
    వెలిగించిన కళాజ్యోతి కలిగించెను అనందం
    అయ్యవార లన్నమాట వెయ్యారు వరాలమూట
    ఆచార్యుల సన్నిధి విద్యార్ధులంధరకు పెన్నిధి                   ||స్వాగతం||

    
                          కన్నెమబ్బు మెరిసింది
    
    కన్నెమబ్బు మెరిసింది
    పోన్నమాను విరిసింది
    పూలవాన కురిసింది
    పుడమితల్లి మురిసింది                   ||కన్నెమబ్బు||

    కోకిలమ్మ పాడింది
    కేకి నాట్య మాడింది
    మందారం కులికింది
    మకరందం చిలికింది                      ||కన్నెమబ్బు||

    పైరగాలి క్రొవ్వింది
    పంటచేను నవ్వింది
    ప్రకృతి కాంత తన ఓడిలోపలి
    ప్రగతికి తల దువ్వింది                      ||కన్నెమబ్బు||

    హృదయం పులకించింది
    ఉదయం తిలకించింది
    చైతన్యం విశ్వవీణపై
    గీతం పలికించింది                            ||కన్నెమబ్బు||

    
                       అందాలు చిందేటి చందమామ

    అందాలు చిందేటి చందమామా ఆడు
    కుందాము రావోయి చందమామా                 ||అందాలు||

    మల్లెపందిరి కింద బుల్లి బుజ్జాయుంది
    బుజ్జినాన్నకు లాలపోసి పొదువుగాని
    చల్లంగ రావోయి చందమామా మెల్ల
    మెల్లంగ రావోయి చందమామా                     ||అందాలు||

    వెండిగిన్నెలోన వేడిబువ్వెట్టుకొని
    బంగారుగిన్నెలో పాయసం పోసుకొని
    తిందాము రావోయి చందమామా నవ్వు
    కుందాము రావోయి చందమామా                    ||అందాలు||

    చక్కన్ని చుక్కల్తో సయ్యాటలాడుతూ
    మబ్బు గుర్రా లెక్కి దబ్బున్న పొయ్యేవు
    మాట విని పోవోయి చందమామా ఒక్క
    మాటు దిగి రావోయి చందమామా                     ||అందాలు||

    
                          యువజగతికి స్వాగతం
    
    యువ జగతికి స్వాగతం
    యువ ప్రగతికి స్వాగతం
    నవతను పండించే మా
    నవతకు సుస్వాగతం                     ||యువ జగతికి ||

    హర్షం కొనితెచ్చే నవ
    వర్షానికి స్వాగతం
    కర్షక కార్మిక విజయో
    త్కర్షానికి స్వాగతం                         ||యువ జగతికి||

    అరుణారుణ నవదినకర
    కిరణాలకు స్వాగతం
    నరనారీ పురోగమన
    చరణాలకు స్వాగతం                          ||యువ జగతికి||

    అరవిచ్చిన విరజాజికి
    చిరునవ్వుల స్వాగతం
    మధులక్ష్మీ మాధవులకు
    మధుర మధుర స్వాగతం                      ||యువ జగతికి||

    కవికోకిల కంఠాలకు
    నవరసాల స్వాగతం
    మన తెలుగు ఉగాదికి సిరి
    మల్లెపూల స్వాగతం                             ||యువ జగతికి||

                           కదలిరావే కృష్ణవేణి

    కదలి రావే కృష్ణవేణి!
    కదలి రా లోకకల్యాణీ!
    కదలి రా కదలి రా కడుపు చల్లని తల్లి
    జలజలా పొంగుతూ కిలకిలా నవ్వుతూ     ||కదలిరావే||

    కోటి తీర్దాలు నీ నీటిలో దాచి - ము
    క్కోటి వేలుపుల నీ పైతలో ముడివైచి
    కదలి రా కదలి రా కదలిరాయని రాణి
    ఎదురు చూచుచు నున్నదీ తెల్గుమాగాణి     ||కదలిరావే||

    శ్రీశైల మల్లయ్య ఆశీస్సుధలు చిలుక
    నాగార్జునులు నీకు స్వాగతమ్మును పలుక
    వేదాద్రి నరసింహు పాదాలు స్పర్శించి
    అమరేశ్వరస్వామి ఆలయము దర్శించి     ||కదలిరావే||

    గణగణా మ్రోగేటి మణిమేఖల ధరించి
    కనకదుర్గమ్మ గుడిగంటలకు పులకించి
    చిరునవ్వు పొరలలో సిరులు నిండించుకొని
    అలలలో బంగారు కలలు పండించుకొని     ||కదలిరావే||

    గురుడు కన్యరాశి కరుదేంచు శుభవేళ
    విరబూచునంట పుష్కరము నీ కెరటాల
    నీ వారిలో మునుగు మా వారి కరుణింప
    దేవతలు నీ మహిమ కైవార మొనరింప     ||కదలిరావే||

    అంధ్రవిష్ణువు హేతి అరామముల ఖ్యాతి
    ఉభయ రామేశ్వరము లుద్భవించిన రీతి
    గళమెత్తి పాడుతూ నలుదెసల చాటుతూ
    కలహంస గమనవై! కలికలుష దమనవై!    ||కదలిరావే||