వైసీపీ అధినేత జగన్, ఆయన సోదరి, ఏపీసీసీ చీఫ్ షర్మిల మధ్య రాజకీయ, కుటుంబ వివాదాలు, విభేదాలు మరోసారి రచ్చకెక్కాయి. షర్మిల కుమార్తె వైఎస్ అంజిలి రెడ్డి వివాహం నేపథ్యంలో జగన్ను ఆమె కలిశారంటూ సోషల్ మీడియాలో, రాజకీయ వర్గాల్లో పెద్ద ఎత్తున ప్రచారం జరిగింది. వారిరువురి మధ్యా సయోధ్య కుదిరిందనీ పెద్ద ఎత్తున వార్తలు వినవచ్చాయి. అయితే వీటన్నిటినీ ఖండిస్తూ షర్మిల జగన్ తో తన విభేదాలు కొనసాగుతున్నాయని పరోక్షంగానైనా క్లారిటీ ఇచ్చారు. అదే సమయంలో తాను జగన్ ను కలిసిన మాట వాస్తవమేననీ, అయితే అది కేవలం తన కుమార్తె వివాహ ఆహ్వాన పత్రిక అందించడానికేనని విస్పష్టంగా చెప్పారు. తాను జగన్ తో భేటీకి ఎటువంటి రాజకీయ కోణం లేదని కుండబద్దలు కొట్టేశారు.
జగన్-షర్మిల మధ్య ఉన్న రాజకీయ విభేదాలు, ఆస్తుల వివాదం కారణంగా గత కొన్నేళ్లుగా ఏ సందర్భంలోనైనా ఒకే సందర్భంలో ఇరువురరూ కనిపిస్తే.. రాజకీయ అర్థాలు వెతకడం మామూలైపోయింది. వారి తండ్రి వైఎస్ జయంతి, వర్ధంతి సందర్భంగా ఇరువురూ ఇడుపుల పాయలో కలిస్తే.. ఇంకేముందు జగన్, షర్మిల మధ్య సయోధ్య అంటూ పెద్ద ఎత్తున ప్రచారం జరగడం రివాజుగా మారిపోయింది. ఈ నేపథ్యంలోనే షర్మిల తన కుమార్తె వివాహానికి జగన్ ను ఆహ్వానించడానికి వెళ్లడంతో మరోసారి ఆ ప్రాచారం ఉధృతమైంది.
ఈ నేపథ్యంలోనే షర్మిల క్లారిటీ ఇచ్చారు. జగన్ను తాను గతంలో ఎప్పుడు కలిశారు, ఇప్పుడు ఎందుకు కలిశారన్న దానిపై ఆమె పూర్తి స్పష్టత ఇచ్చారు. గతంలో తన కుమారుడు వైఎస్ రాజారెడ్డి వివాహానికి ఆహ్వానించిన సమయంలో జగన్ను కలిశాననీ, ఆ తరువాత ఇదిగో ఇప్పుడు, తన కుమార్తె వివాహానికి ఆహ్వానించడానికి కలిశాననీ విస్పష్టంగా చెప్పారు.
తమ కుటుంబంలో శుభకార్యానికి జగన్ నుఆహ్వానించడాన్ని రాజకీయ పరిణామంగా చూడకూడదన్నది షర్మిల అన్నారు. , తన కుమార్తె పెళ్లికి అన్ని రాజకీయ పార్టీల అధినేతలను ఆహ్వానిస్తానని, ఆ క్రమంలోనే జగన్ నూ ఆహ్వానించాననీ పేర్కొన్న షర్మిల ఇందులో ప్రత్యేకం ఏమీ లేదన్నారు. షర్మిల తాజాగా ఇచ్చిన క్లారిటీలో కుటుంబ శుభకార్యాన్ని రాజకీయ ప్రయోజనాల కోసం ఉపయోగించుకునే ఉద్దేశం తనకు లేదని స్పష్టం చేసినట్లైంది. తన కుమార్తె వివాహాన్ని అడ్డుపెట్టుకుని జగన్ తో సయోధ్య కోసం తెరవెనుక ప్రయత్నాలు చేస్తున్నారంటూ తనపై వచ్చిన ఆరోపణలను ఆమె నిర్ద్వంద్వంగా ఖండించారు.
[YS Sharmila, Daughter Marriege, Invitation, YS Jagan Mohan Reddy, YS Anjili Reddy wedding, APCC Chief Sharmila, TeluguOne]
.webp)
వైఎస్సార్ కాంగ్రెస్ పార్టీకి మరో ఎదురుదెబ్బ తగిలింది. కాకినాడ జిల్లాకు చెందిన వైసీపీ సీనియర్ నేత, ప్రత్తిపాడు మాజీ ఎమ్మెల్యే వరుపుల సుబ్బారావు ఆ పార్టీకి రాజీనామా చేశారు. అనంతరం జనసేన అధినేత, ఏపీ డిప్యూటీ సీఎం పవన్ కల్యాణ్ సమక్షంలో జనసేన కండువా కప్పుకుని ఆ పార్టీలో చేరారు. కాకినాడ పర్యటనలో ఉన్న పవన్ కల్యాణ్ను కలిసిన వరుపుల సుబ్బారావు.. జనసేనలో చేరుతున్నట్లు ప్రకటించారు. ఆయనతో పాటు పెద్దాపురం, సామర్లకోట ప్రాంతాలకు చెందిన పలువురు వైసీపీ మాజీ కౌన్సిలర్లు కూడా జనసేనలో చేరారు.
వైసీపీ విధానాలు తనకు నచ్చకపోవడంతోనే పార్టీని వీడినట్లు వరుపుల సుబ్బారావు తెలిపారు. పార్టీలో సీనియర్ నేతగా ఉన్నప్పటికీ తనకు తగిన గౌరవం దక్కలేదని అన్నారు. గతంలో వైఎస్ జగన్ తన వయసు ఎక్కువైందని వ్యాఖ్యానించేవారని సుబ్బారావు పేర్కొన్నారు. ప్రస్తుతం రాష్ట్రంలో కొనసాగుతున్న కూటమి ప్రభుత్వ విధానాలు నచ్చడంతోనే జనసేనలో చేరాలని నిర్ణయించుకున్నట్లు ఆయన వెల్లడించారు. అయితే జనసేనలో చేరేందుకు తాను ఎలాంటి పదవి, ప్రత్యేక హామీ లేదా కమిట్మెంట్ కోరలేదని స్పష్టం చేశారు. అన్ని రాజకీయ పార్టీలకు చెందిన నేతలతో తనకు మంచి సంబంధాలు ఉన్నాయని తెలిపారు.
వరుపుల సుబ్బారావు గతంలో ప్రత్తిపాడు నియోజకవర్గానికి ఎమ్మెల్యేగా సేవలందించారు. 2014 నుంచి 2019 వరకు ప్రత్తిపాడు ఎమ్మెల్యేగా కొనసాగారు. తాజాగా ఆయన వైసీపీకి రాజీనామా చేసి జనసేనలో చేరడం కాకినాడ జిల్లా రాజకీయాల్లో చర్చనీయాంశంగా మారింది. ఇటీవల కాకినాడ జిల్లాలో వైసీపీకి చెందిన పలువురు సీనియర్ నేతలు, మాజీ ప్రజాప్రతినిధులు పార్టీని వీడుతున్న నేపథ్యంలో వరుపుల సుబ్బారావు రాజీనామా మరింత ప్రాధాన్యం సంతరించుకుంది. మరోవైపు పెద్దాపురం ప్రాంతానికి చెందిన పలువురు వైసీపీ నేతలు కూడా త్వరలో జనసేనలో చేరనున్నట్లు ప్రకటించిన నేపథ్యంలో జిల్లాలో రాజకీయ పరిణామాలు ఆసక్తికరంగా మారాయి.
[ Big shock for YCP, Former MLA Varupula Subbarao, Deputy CM Pawan Kalyan, Kakinada District, Peddapuram, Samarlakota, YS Jagan, YSRCP, Telugu One, Telugu News ]
డిజిటల్ మీడియా వేదికగా ఇష్టానుసారంగా వ్యవహరించి, ప్రజల మనోభావాలను దెబ్బతీసే వారిపై పోలీసులు తీసుకుంటున్న చర్యలు వారిలో పశ్చాత్తాపం కలిగేలా చేస్తున్నాయి. సోషల్ మీడియాలో విద్వేషపూరిత వ్యాఖ్యలు చేస్తూ వివాదాలకు కేంద్ర బిందువుగా మారిన వివాదాస్పద యూట్యూబర్ బాచలకురి జోసెఫ్, అలియాస్ ప్రశ్న రావణ్ తాను సోషల్ మీడియా వేదికగా చేసిన వ్యాఖ్యలకు పశ్చాత్తాపం ప్రకటించడమే ఇందుకు నిదర్శనం. మతపరమైన మనోభావాలను గాయపరచడం, దేవుళ్లను దూషించడం, రాజకీయ నేతలను లక్ష్యంగా చేసుకుని అనుచిత వ్యాఖ్యలు చేయడం వంటి తీవ్రమైన అభియోగాలపై ఆంధ్రప్రదేశ్ పోలీసులు అతడిని అరెస్ట్ చేసిన విషయం తెలిసిందే. ఈ క్రమంలో పోలీసుల విచారణలో భాగంగా వెలుగుచూసిన పరిణామాలు, అతడు వ్యక్తం చేసిన పశ్చాత్తాపం డిజిటల్ మీడియాలో ఇష్టారీతిగా వ్యాఖ్యలు చేసే వారందరికీ నిస్సందేహంగా ఒక హెచ్చరిక అని చెప్పవచ్చు.
వివిధ పోలీస్ స్టేషన్లలో నమోదైన కేసుల ఆధారంగా ఏపీ పోలీసులు ప్రశ్న రావణ్ను అదుపులోకి తీసుకున్నారు. అతడి వ్యాఖ్యల తీవ్రతను బట్టి అధికారులు ఈ కేసులో కఠినమైన చట్టాలను ప్రయోగించారు. ముఖ్యంగా దేశ భద్రతకు, శాంతిభద్రతలకు భంగం కలిగించే అంశాల కింద ఉపా చట్టంతో పాటు దేశద్రోహ సెక్షన్లను కూడా అతడిపై నమోదు చేశారు. సోషల్ మీడియాలో ఇష్టానుసారంగా మాట్లాడవచ్చు అనుకున్న అతడికి, చట్టం చేతికి చిక్కిన తర్వాత వాస్తవ పరిస్థితులు ఏమిటో స్పష్టంగా అర్థమయ్యాయి.
పోలీస్ కస్టడీలో భాగంగా అధికారులు జరిపిన విచారణలో ప్రశ్న రావణ్ కన్నీటి పర్యంతమైనట్లు సమాచారం. తాను గతంలో చేసిన తప్పులకు తీవ్రంగా పశ్చాత్తాపపడుతున్నట్లు అతడు అంగీకరించినట్లు తెలుస్తోంది. అనేక సున్నితమైన అంశాలపై తాను అనవసరంగా అతిగా స్పందించానని, దానివల్ల అనూహ్య సమస్యలను కొనితెచ్చుకున్నానని విచారణాధికారుల ఎదుట అతడు వాపోయినట్లు సమాచారం. సోషల్ మీడియాలో ఇలాంటి వివాదాస్పద ధోరణులకు దూరంగా ఉండాల్సిందని, ఈ పరిణామాలు తన జీవితంలో పెద్ద గుణపాఠం నేర్పాయని ప్రశ్నరావణ్ పేర్కొన్నట్లు తెలుస్తోంది.
ముఖ్యంగా దేవుళ్లపై అభ్యంతకరమైన వీడియోలపై పోలీసుల ప్రశ్నలకు.. అతడు చేశానంటూ సమాధానం ఇచ్చినట్లు తెలుస్తోంది. అసలా విషయాల జోలికి వెళ్లకుండా ఉండాల్సిందని ప్రశ్న రావణ్ కన్ఫెస్ అయినట్లు సమాచారం. అయితే.. ఈ విచారణలో భాగంగా అధికారులు అతడి ఆర్థిక లావాదేవీలు, యూట్యూబ్ ఛానెల్ ద్వారా వచ్చిన సంపాదనపై కూపీ లాగారు. ఛానెల్ ఆదాయం, బ్యాంకు లావాదేవీల గురించి పోలీసులు అడిగిన ప్రశ్నలలో చాలా వాటికి అతడు సరైన సమాదానం ఇవ్వలేదని తెలుస్తోంది.
[Prashna Ravan, Bachalakuri Joseph, AP Police UAPA Cases, YouTube controversial videos,Social Media Misuse, Confess]
ALSO ON TELUGUONE N E W S
.WEBP)
మలయాళంతో పాటు తెలుగు, తమిళ భాషల్లోనూ గుర్తింపు తెచ్చుకున్న హీరోయిన్ ఐశ్వర్య లక్ష్మి సోషల్ మీడియాకు దూరంగా ఉంటున్న విషయం తెలిసిందే. సాధారణంగా సినీ తారలు తమ సినిమాల ప్రమోషన్స్తో పాటు వ్యక్తిగత విషయాలను అభిమానులతో పంచుకోవడానికి సోషల్ మీడియాను ఎక్కువగా ఉపయోగిస్తుంటారు. కానీ ఐశ్వర్య లక్ష్మి మాత్రం ఏడాది క్రితం ఇన్స్టాగ్రామ్కు బ్రేక్ ఇచ్చారు. తాజాగా తన నిర్ణయం వెనుక ఉన్న అసలు కారణాలను ఆమె వివరించారు.
ఇండస్ట్రీలోకి వచ్చిన తొలినాళ్లలో సోషల్ మీడియా తన కెరీర్కు చాలా అవసరమని ఐశ్వర్య లక్ష్మి భావించారట. ఎప్పటికప్పుడు ఆన్లైన్లో యాక్టివ్గా ఉండటం, పోస్టులు చేయడం ద్వారా ప్రేక్షకులతో కనెక్ట్ అయి ఉండాలని అనుకునేవారు. అయితే క్రమంగా సోషల్ మీడియా తన పని, ఆలోచనలపై ప్రభావం చూపుతోందని ఆమె గుర్తించారు. చివరకు దానికి దూరంగా ఉండాలని నిర్ణయించుకున్నారు.
ముఖ్యంగా సోషల్ మీడియాలో తన ఫొటోలను మార్ఫింగ్ చేయడం, అసభ్యకరమైన ఎడిట్స్ చేయడం తనను తీవ్రంగా బాధించాయని ఐశ్వర్య లక్ష్మి తెలిపారు. ఇలాంటి కంటెంట్ను చూసినప్పుడు షాక్కు గురయ్యానని, దాని నుంచి బయటపడటానికి చాలా సమయం పట్టిందని ఆమె గతంలో వెల్లడించారు. సోషల్ మీడియాలో వచ్చే కొన్ని కామెంట్లు కూడా తనను మానసికంగా ఇబ్బంది పెట్టాయని చెప్పారు.
అంతేకాదు.. సోషల్ మీడియా కోసం నిరంతరం ఒక ఇమేజ్ను మెయింటైన్ చేయాల్సిన పరిస్థితి కూడా తనకు నచ్చలేదని ఐశ్వర్య తెలిపారు. తాను ఏం చేస్తున్నా, అది ఇన్స్టాగ్రామ్లో ఎలా కనిపిస్తుందనే ఆలోచనలో ఉండేదానినని చెప్పారు. ఉదాహరణకు వెకేషన్కు వెళ్లినా అక్కడి ప్రకృతిని ఆస్వాదించడం కంటే ముందుగా ఏ ఫొటో పెట్టాలి, ఏ డ్రెస్లో ఫొటో తీసుకోవాలి అనే ఆలోచన వచ్చేదని పేర్కొన్నారు. ఇప్పుడు సోషల్ మీడియాకు దూరంగా ఉండటంతో క్షణాలను నేరుగా ఆస్వాదించగలుగుతున్నానని చెప్పారు.
ఇక సోషల్ మీడియాకు దూరంగా ఉండటం వల్ల కెరీర్కు నష్టం జరుగుతుందనే ఆందోళన తనకు లేదని ఐశ్వర్య స్పష్టం చేశారు. కొన్ని అవకాశాలు మిస్ కావచ్చని తెలిసినా.. తనకు లభించిన ప్రశాంతత, మానసిక స్వేచ్ఛ వాటికంటే విలువైనవని అన్నారు. తన సినిమాలే తన గురించి మాట్లాడాలని కోరుకుంటున్నట్లు తెలిపారు. సోషల్ మీడియాలో యాక్టివ్గా లేకపోయినా దర్శకులు తన నిర్ణయాన్ని అభినందిస్తున్నారని చెప్పారు.
ప్రస్తుతం తాను సోషల్ మీడియాను పూర్తిగా వదిలేయలేదని, అప్పుడప్పుడు తన పెంపుడు కుక్కకు సంబంధించిన ఇన్స్టాగ్రామ్ అకౌంట్ ద్వారా కొన్ని విషయాలు చూస్తుంటానని ఐశ్వర్య తెలిపారు. తన సినిమాలపై ప్రేక్షకుల స్పందనను తెలుసుకోవడానికి కూడా అప్పుడప్పుడు సోషల్ మీడియాను పరిశీలిస్తానని చెప్పారు. అయితే ఇకపై తన వ్యక్తిగత జీవితాన్ని మాత్రం ఆ ప్లాట్ఫామ్లో ప్రదర్శించకూడదనే నిర్ణయంలో ఉన్నారు.
మొత్తంగా.. సినీ తారలకు సోషల్ మీడియా ఎంత ముఖ్యమైనదిగా మారినా, దాని వల్ల వచ్చే ఒత్తిడి, నెగెటివిటీకి దూరంగా ఉండేందుకు ఐశ్వర్య లక్ష్మి తీసుకున్న నిర్ణయం ఇప్పుడు మరోసారి చర్చనీయాంశంగా మారింది. అభిమానులు తనను సోషల్ మీడియాలో కాకుండా సినిమాల ద్వారా గుర్తుంచుకోవాలని ఆమె కోరుకుంటున్నారు.
[Aishwarya Lekshmi, Aishwarya Lekshmi Instagram, Aishwarya Lekshmi Quits Instagram, Aishwarya Lekshmi Social Media, Aishwarya Lekshmi Latest News, Aishwarya Lekshmi Interview, Aishwarya Lekshmi Morphing Photos, Aishwarya Lekshmi Social Media Break, Aishwarya Lekshmi Movies, Malayalam Actress Aishwarya Lekshmi, Aishwarya Lekshmi Telugu News, South Indian Actress, Celebrity Social Media News]
తుపాకీ పట్టుకోడు.. శత్రువుల మీదకి దూకడు.. ఏ పబ్లిక్ ఈవెంట్లోనూ కనిపించడు. కానీ, ఒక్క యుద్ధం కూడా చేయకుండానే శత్రు దేశాన్ని రెండు ముక్కలు చేసి.. ప్రపంచ పటంలో కొత్త దేశాన్ని సృష్టించగలడు. మన భారతదేశానికి అలాంటి ఒక ‘రియల్ జేమ్స్ బాండ్’ ఉన్నాడు. ఆయన పేరు రమేశ్వర్ నాథ్ కావో.. 'ఆర్.ఎన్. కావో'.
మనం సినిమాల్లో చూసే పఠాన్, టైగర్ వంటి ఏజెంట్ క్యారెక్టర్లన్నీ గన్స్ పట్టుకుని హెలికాప్టర్ల నుంచి దూకుతుంటే థ్రిల్ అవుతుంటాం. కానీ, అసలైన స్పైమాస్టర్ గన్స్ తో కాదు.. తన బ్రెయిన్ పవర్ తో, మైండ్ గేమ్తో దేశాన్ని కాపాడతాడు. భారతదేశపు అత్యంత శక్తివంతమైన విదేశీ నిఘా సంస్థ ‘రా’ (R&AW - Research and Analysis Wing) స్థాపకుడు, మొదటి చీఫ్ ఈ ఆర్.ఎన్. కావో. ఈయన బయోపిక్ ను తాజాగా కరణ్ జోహార్ కి చెందిన ధర్మ ప్రొడక్షన్స్ ప్రకటించింది.
1918లో ఒక సాధారణ కాశ్మీరీ పండిట్ కుటుంబంలో జన్మించిన ఆర్.ఎన్. కావో, ఇండియన్ ఇంపీరియల్ పోలీస్ (IPS) ఆఫీసర్గా తన కెరీర్ ప్రారంభించారు. ఆయనలోని అద్భుతమైన తెలివితేటలు, మనుషులను అంచనా వేసే సామర్థ్యాన్ని చూసి అప్పటి ప్రధాని జవహర్లాల్ నెహ్రూ పర్సనల్ సెక్యూరిటీ టీమ్లో స్థానం లభించింది. 1955లో చైనా ప్రధాని జౌ ఎన్లై లక్ష్యంగా జరిగిన ‘కశ్మీర్ ప్రిన్సెస్’ విమాన ప్రమాద దర్యాప్తులో కావో చూపిన శ్రమ అంతర్జాతీయ స్థాయి గుర్తింపు తెచ్చిపెట్టింది.
ఆ తర్వాత 1962 చైనా యుద్ధం, 1965 పాకిస్తాన్ యుద్ధాల అనుభవాలతో సరిహద్దుల అవతల ఏం జరుగుతుందో తెలుసుకోవడానికి భారత్కు ఒక ప్రత్యేక విదేశీ నిఘా సంస్థ అవసరమని ప్రభుత్వం భావించింది. 1968లో అప్పటి ప్రధాని ఇందిరా గాంధీ 'రా' (R&AW) ఏర్పాటు బాధ్యతను కావో చేతుల్లోనే పెట్టారు. కేవలం 250 మంది ఐబీ అధికారులతో ప్రారంభమైన రా సంస్థను, కొద్దికాలంలోనే మోసాద్, సీఐఏ తరహా ప్రపంచస్థాయి నిఘా వ్యవస్థగా మార్చేశారు.
ఇది కూడా చదవండి: 'ప్రాణం ఖరీదు' వెనుక ఉన్న సీక్రెట్స్.. చిరంజీవి ఫస్ట్ రెమ్యూనరేషన్ ఎంతో తెలుసా.?
కావో కెరీర్ లో మాస్టర్పీస్ ఏంటంటే.. 1971 బంగ్లాదేశ్ విముక్తి యుద్ధం. సరిహద్దు వద్ద భారత సైన్యం నేరుగా రంగంలోకి దిగకముందే, తూర్పు పాకిస్తాన్లో 'ముక్తి బాహిని'కి రహస్యంగా శిక్షణ ఇప్పించి, శత్రువుల ప్రతి కదలికను క్షణాల్లో ఢిల్లీకి చేరేలా ఇన్విజిబుల్ నెట్వర్క్ నిర్మించారు. ఫలితంగా, పాకిస్తాన్ సైన్యం లొంగిపోక తప్పలేదు. ఒక కొత్త దేశం బంగ్లాదేశ్ రూపంలో జన్మించింది.
అయితే, ఇంతటి మహా వీరుడి కథను సినిమాగా తీయడానికి బాలీవుడ్ కి ఇన్నేళ్ళు ఎందుకు పట్టింది? దీనికి ఒకే ఒక కారణం ఉంది. కమర్షియల్ సినిమాల్లో స్పై అంటే కార్ ఛేజ్లు, డిజైనర్ సూట్లు, ఫైట్లు ఉంటాయి. కానీ ఆర్.ఎన్. కావో తన జీవితంలో ఒక్కసారైనా పబ్లిక్గా ఫోటోలకు పోజివ్వలేదు. ఆయన ఫోటోలు కూడా వేళ్లమీద లెక్కపెట్టవచ్చు. బయటకు చాలా ప్రశాంతంగా, క్లాసిక్గా కనిపిస్తారు. శత్రువుల గుండెల్లో నిశ్శబ్దంగా బాంబులు పేల్చే ఒక సీక్రెట్ మాస్టర్మైండ్ను కమర్షియల్ మాస్ ఫార్మాట్లో ఎలా చూపించాలో అర్థం కాక బాలీవుడ్ రైటర్లు ఏళ్ల తరబడి స్క్రిప్ట్ వర్క్ చేస్తూనే ఉండిపోయారు.
చివరకు నితిన్ గోఖలే రాసిన "R.N. Kao: Gentleman Spymaster" పుస్తకం ఆధారంగా, ధర్మ ప్రొడక్షన్స్ అత్యంత ప్రతిష్టాత్మకంగా ఈ సినిమాను 'India's Greatest Spymaster – RN Kao' పేరుతో రూపుదిద్దుతోంది. ఆయుధం పట్టకుండా దేశ సరిహద్దులను మార్చేసిన ఈ మహా నాయకుడి కథ ప్రతి భారతీయుడూ తెలుసుకోవాల్సిన నిజమైన చరిత్ర.
మీకు నచ్చవచ్చు:
మువ్వలా నవ్వకలా ముద్దమందారమా.. ప్రభాస్ కెరీర్లో మళ్ళీ ఇలాంటి పాట రాదేమో.!
ఎన్నెన్నో అందాలు ఏవేవో రాగాలు.. అమ్మాయి అందాన్ని ప్రకృతితో పోలుస్తూ వేటూరి చేసిన మ్యాజిక్.!
[Indias Real James Bond, RN Kao Biopic, RAW Founder RN Kao, RN Kao Untold Facts, Indias Greatest Spymaster, RAW Founder Story, Research and Analysis Wing, Telugu Film News, Telugu News]
.WEBP)
పవర్ స్టార్ పవన్ కళ్యాణ్కు ఉన్న క్రేజ్ గురించి ప్రత్యేకంగా చెప్పాల్సిన అవసరం లేదు. ఆయన సినిమా వస్తుందంటే అభిమానుల్లో ఉండే సందడి మామూలుగా ఉండదు. అయితే పవన్ కళ్యాణ్ సినిమాల్లో నటించడం మాత్రమే కాకుండా.. తనతో సినిమా తీసే నిర్మాతల విషయంలోనూ ప్రత్యేకంగా ఆలోచిస్తారని తాజాగా నిర్మాత దిల్ రాజు చెప్పిన ఓ విషయం ఆసక్తిని రేకెత్తిస్తోంది.
నాని హీరోగా శ్రీకాంత్ ఓదెల దర్శకత్వంలో తెరకెక్కిన ‘ది ప్యారడైజ్’ ప్రీ రిలీజ్ వేడుక హైదరాబాద్లో ఘనంగా జరిగింది. ఈ కార్యక్రమానికి హాజరైన దిల్ రాజు తన సినీ ప్రయాణాన్ని, పవన్ కళ్యాణ్తో తనకున్న అనుబంధాన్ని గుర్తు చేసుకున్నారు. ఈ సందర్భంగా ‘వకీల్ సాబ్’ సినిమా సమయంలో జరిగిన ఓ విషయాన్ని ఆయన వెల్లడించారు.
దిల్ రాజు నిర్మాణంలో పవన్ కళ్యాణ్ హీరోగా తెరకెక్కిన ‘వకీల్ సాబ్’ 2021లో ప్రేక్షకుల ముందుకు వచ్చింది. బాలీవుడ్లో తెరకెక్కిన ‘పింక్’ చిత్రానికి ఇది తెలుగు రీమేక్. వేణు శ్రీరామ్ దర్శకత్వం వహించిన ఈ సినిమాలో నివేదా థామస్, అంజలి, అనన్య నాగళ్ల, ప్రకాశ్ రాజ్ తదితరులు కీలక పాత్రల్లో నటించారు.
అయితే ‘వకీల్ సాబ్’ విడుదల సమయంలో కరోనా సెకండ్ వేవ్ తీవ్ర ప్రభావం చూపింది. సినిమా విడుదలైన కొద్ది రోజులకే పరిస్థితులు మళ్లీ కఠినంగా మారడంతో థియేటర్లపై ఆంక్షలు వచ్చాయి. దీంతో నిర్మాతలుగా తాము ఇబ్బందులు ఎదుర్కొన్నామని దిల్ రాజు తెలిపారు.
అలాంటి సమయంలో తమ పరిస్థితిని అర్థం చేసుకున్న పవన్ కళ్యాణ్ తనకు రావాల్సిన రూ.5 కోట్ల పారితోషికాన్ని తీసుకోకుండా వదులుకున్నారని దిల్ రాజు వెల్లడించారు. నిర్మాత ఎదుర్కొంటున్న ఇబ్బందులను దృష్టిలో పెట్టుకుని పవన్ ఈ నిర్ణయం తీసుకున్నారని ఆయన చెప్పారు. ఈ విషయాన్ని గుర్తు చేసుకుంటూ దిల్ రాజు పవన్ కళ్యాణ్ వ్యక్తిత్వాన్ని ప్రశంసించారు.
నిజానికి ‘వకీల్ సాబ్’ పవన్ కళ్యాణ్ సినీ కెరీర్లో ప్రత్యేకమైన సినిమా. దాదాపు రెండేళ్ల విరామం తర్వాత ఆయన ఈ సినిమాతో తిరిగి వెండితెరపైకి వచ్చారు. కరోనా పరిస్థితులు ఉన్నప్పటికీ ఈ సినిమాకు తొలి రోజుల్లో భారీ స్పందన లభించింది.
ఇదిలా ఉంటే.. ప్రస్తుతం పవన్ కళ్యాణ్ రాజకీయ బాధ్యతల్లో కొనసాగుతూనే సినిమాల్లోనూ తన ప్రాజెక్టులను పూర్తి చేస్తున్నారు. మరోవైపు దిల్ రాజు కూడా వరుస భారీ చిత్రాలతో బిజీగా ఉన్నారు. ఈ నేపథ్యంలో ‘వకీల్ సాబ్’ సమయంలో పవన్ చేసిన త్యాగం గురించి దిల్ రాజు చెప్పిన విషయం ఇప్పుడు అభిమానులు, సినీ వర్గాల్లో చర్చనీయాంశంగా మారింది.
[Pawan Kalyan, Dil Raju, Vakeel Saab, Pawan Kalyan Rs 5 Crore, Pawan Kalyan Remuneration, Dil Raju Pawan Kalyan, Vakeel Saab Producer, Pawan Kalyan Latest News, Power Star Pawan Kalyan, Vakeel Saab Movie, Pawan Kalyan Fans, Tollywood News, Telugu Cinema News, Pawan Kalyan Dil Raju Friendship]
మెగాస్టార్ చిరంజీవికి అభిమానులతో ఉన్న అనుబంధం గురించి ప్రత్యేకంగా చెప్పాల్సిన అవసరం లేదు. దాదాపు ఐదు దశాబ్దాలుగా తెలుగు సినీ ప్రేక్షకులను అలరిస్తున్న ఆయనకు కోట్లాది మంది అభిమానులు అండగా నిలుస్తున్నారు. తాజాగా అభిమానులతో జరిగిన సమావేశంలో చిరంజీవి తన సినీ ప్రయాణాన్ని, అభిమానులతో తనకున్న అనుబంధాన్ని గుర్తు చేసుకున్నారు.
1978 సెప్టెంబర్ 22న ‘ప్రాణం ఖరీదు’ సినిమాతో మొదలైన చిరంజీవి సినీ ప్రయాణం తాజాగా 48 ఏళ్లు పూర్తి చేసుకుంది. ఈ సందర్భంగా ఆయన అభిమానులను ఉద్దేశించి మాట్లాడిన మాటలు ప్రత్యేకంగా నిలిచాయి. ఇన్నేళ్ల ప్రయాణంలో ఎన్నో పాత్రలు పోషించానని, ఎన్నో విజయాలు చూశానని, అవార్డులు, గౌరవాలు అందుకున్నానని చిరంజీవి గుర్తు చేసుకున్నారు. అయితే వీటన్నింటికంటే అభిమానులు తనపై చూపించిన ప్రేమ, ఆప్యాయతే తనకు ఎంతో విలువైనదని చెప్పారు.
అభిమానులతో తనకున్న బంధం ఎప్పటికీ ప్రత్యేకమేనని చిరంజీవి చెబుతూ వస్తున్నారు. కేవలం సినిమాలు చూసి అభిమానించడం మాత్రమే కాకుండా.. ఎన్నో సేవా కార్యక్రమాల్లో అభిమానులు భాగస్వాములు కావడం తనకు ఎంతో సంతోషాన్ని కలిగిస్తుందని ఆయన పలుమార్లు పేర్కొన్నారు. ముఖ్యంగా రక్తదాన కార్యక్రమాల్లో అభిమానుల పాత్రను చిరంజీవి ప్రత్యేకంగా గుర్తు చేసుకున్నారు. అభిమానులు స్వచ్ఛందంగా రక్తదానం చేస్తూ ఎంతోమంది ప్రాణాలను కాపాడేందుకు కారణమయ్యారని తెలిపారు.
తన అభిమానులను కేవలం అభిమానులుగా కాకుండా కుటుంబ సభ్యులుగా భావిస్తానని చిరంజీవి పేర్కొన్నారు. తాను ఏ స్థాయికి చేరుకున్నా అందుకు ప్రేక్షకుల ప్రేమ, అభిమానుల అండ ఎంతో ముఖ్యమైనదని ఆయన చెప్పారు. తనపై ఎన్ని విమర్శలు వచ్చినా వాటిని పట్టించుకోకుండా ముందుకు సాగడానికి కూడా అభిమానుల ప్రేమే తనకు బలంగా నిలిచిందని గతంలోనూ చిరంజీవి వెల్లడించారు.
ఇదిలా ఉంటే.. చిరంజీవి సినీ ప్రయాణం 48 ఏళ్లు పూర్తి చేసుకున్న సందర్భంగా సోషల్ మీడియాలో అభిమానుల నుంచి శుభాకాంక్షలు వెల్లువెత్తుతున్నాయి. ఈ సుదీర్ఘ ప్రయాణంలో తనకు అవకాశాలు ఇచ్చిన నిర్మాతలు, దర్శకులు, సహ నటీనటులు, సాంకేతిక నిపుణులతో పాటు తనను ఆదరించిన ప్రేక్షకులకు చిరంజీవి కృతజ్ఞతలు తెలిపారు.
మొత్తంగా.. నాలుగు దశాబ్దాలకు పైగా సాగుతున్న మెగాస్టార్ సినీ ప్రయాణంలో అభిమానుల పాత్ర ఎంత ప్రత్యేకమో మరోసారి స్పష్టమైంది. చిరంజీవి సినిమాలు, ఆయన వ్యక్తిత్వంతో పాటు అభిమానులతో ఆయనకున్న అనుబంధం కూడా ఈ ప్రయాణంలో ఓ ముఖ్యమైన భాగంగా నిలిచింది.
[Chiranjeevi Fans Meet, Megastar Chiranjeevi Speech, Chiranjeevi Full Speech, Chiranjeevi 48 Years Cinema, Chiranjeevi 48 Years, Chiranjeevi Fans, Mega Fans, Chiranjeevi Fan Meet, Chiranjeevi Emotional Speech, Chiranjeevi Latest News, Tollywood News, Megastar Chiranjeevi 2026]
గతంలో ప్రకటించిన 2012 నుంచి 2016 వరకు నంది ఫిల్మ్, టీవీ అవార్డులను అందించాలని కూటమి ప్రభుత్వం నిర్ణయించింది. 2017 నుంచి 2024 వరకు ప్రతి సంవత్సరానికి 4 అవార్డుల చొప్పున – 2 ప్రొడక్షన్, 2 స్పెషల్ జ్యూరీ అవార్డులు అందించేందుకు ప్రభుత్వం అంగీకరించింది. దీనికి సంబంధించిన పూర్తి వివరాలను ఎఫ్డీసీ చైర్మన్ పి. భరత్ భూషణ్ తెలియజేశారు.
‘2025 సంవత్సరానికి కూడా నంది ఫిల్మ్, టీవీ అవార్డులను అందించేందుకు నిర్ణయం తీసుకున్నాం. నంది ఫిల్మ్, జాతీయ చలనచిత్ర అవార్డులను అమరావతి లేదా విజయవాడలో నిర్వహించేందుకు నిర్ణయించాం. నంది టీవీ అవార్డులను తిరుపతి వేదికగా అందించేందుకు నిర్ణయించాం. ఈ అవార్డులన్నింటినీ డిసెంబర్ 2026లోగా ప్రదానం చేయాలని ప్రభుత్వం నిర్ణయించింది.
అవార్డుల ఎంపిక ప్రక్రియ
అక్టోబర్లో నంది ఫిల్మ్, టీవీ అవార్డుల కోసం కమిటీలను ఏర్పాటు చేస్తాం. నవంబర్లో అవార్డుల ఎంపిక ప్రక్రియను నిర్వహిస్తాం. డిసెంబర్లో నంది ఫిల్మ్, టీవీ అవార్డుల ప్రదానోత్సవ వేడుకలను నిర్వహిస్తాం.
నంది ఫిల్మ్ అవార్డులు
నంది ఫిల్మ్ అవార్డుల్లో చలనచిత్రాలు, జాతీయ సమైక్యతపై చలనచిత్రాలు, బాలల చిత్రాలు, డాక్యుమెంటరీ చిత్రాలు, విద్యా విషయక చిత్రాలు, తెలుగు సినిమాపై రచించిన ఉత్తమ రచనలు తదితర విభాగాలు ఉంటాయి. ఫిల్మ్ విభాగంలో మొత్తం 46 అవార్డులను అందించనున్నాం. ఉత్తమ ప్రదర్శన, ద్వితీయ ఉత్తమ ప్రదర్శన, తృతీయ ఉత్తమ ప్రదర్శన, ఉత్తమ నటుడు, ఉత్తమ నటి, ఉత్తమ సహాయ నటుడు, ఉత్తమ సహాయ నటి తదితర విభాగాల్లో అవార్డులు అందిస్తాం. నంది ఫిల్మ్ అవార్డు గ్రహీతలకు బంగారు, వెండి, కాంస్య, తామ్ర నందులతో పాటు ప్రశంసాపత్రం, నగదు పారితోషికం అందిస్తాం. వివిధ కేటగిరీలలో 8 గోల్డ్ మెడల్స్ కూడా అందించనున్నాం.
జాతీయ చలనచిత్ర అవార్డులు
ఎన్.టి.ఆర్. నేషనల్ ఫిల్మ్ అవార్డు – రూ.5 లక్షలు
బి.ఎన్. రెడ్డి నేషనల్ ఫిల్మ్ అవార్డు – రూ.2 లక్షలు
నాగిరెడ్డి–చక్రపాణి నేషనల్ ఫిల్మ్ అవార్డు – రూ.2 లక్షలు
రఘుపతి వెంకయ్య ఫిల్మ్ అవార్డు – రూ.2 లక్షలు
జాతీయ చలనచిత్ర అవార్డు గ్రహీతలకు జ్ఞాపిక, సన్మాన పత్రంతో పాటు నగదు పారితోషికం అందిస్తాం.
నంది టీవీ అవార్డులు
టెలి చిత్రాలు, టీవీ ఫీచర్స్, టీవీ మెగా సీరియల్స్, టీవీ డైలీ సీరియల్స్, టీవీ బాలల చిత్రాలు, టీవీ డాక్యుమెంటరీ చిత్రాలు, టీవీ సామాజిక సంబంధిత చిత్రాలు, టీవీ విద్యా విషయక చిత్రాలు తదితర విభాగాల్లో అవార్డులు అందిస్తాం. టీవీ విభాగంలో మొత్తం 48 అవార్డులను అందించనున్నాం. ప్రథమ, ద్వితీయ ఉత్తమ టెలి ఫిల్మ్, టెలి ఫీచర్స్, మెగా టీవీ సీరియల్, డైలీ టీవీ సీరియల్, టీవీ బాలల చిత్రం తదితర విభాగాల్లో అవార్డులు అందిస్తాం.
ఉత్తమ నటుడు, నటి, సహాయ నటుడు, హాస్య నటుడు, హాస్య నటి, ప్రతినాయకుడు, బాలల నటుడు, నటి, దర్శకుడు, స్క్రీన్ప్లే రచయిత తదితర విభాగాల్లో అవార్డులు అందించనున్నాం. నంది టీవీ అవార్డు గ్రహీతలకు బంగారు, వెండి, కాంస్య, తామ్ర నందులతో పాటు ప్రశంసాపత్రం, నగదు పారితోషికం అందిస్తాం. తెలుగు సినిమా, టెలివిజన్ రంగానికి చెందిన కళాకారులు, సాంకేతిక నిపుణులను గౌరవించడమే నంది అవార్డుల ప్రధాన ఉద్దేశ్యం’ అని తెలిపారు.
Ram Pothineni is making waves with his ambitious directorial debut, #RAPO23, as the film successfully completes its second schedule. The actor-turned-director is determined to present a fresh neo-noir psychological action story. The project is being mounted on a massive scale to offer a completely unique theatrical experience.
A high-intensity action sequence was the main focus of this latest filming schedule. Shot entirely at night across a sprawling one-kilometre stretch, the location was brightly illuminated to suit the film's dark and distinctive tone. The massive setup promises a visually stunning treat for the viewers.
To achieve this unique cinematic texture, the makers brought in a brilliant technical team. Action sequences are being expertly handled by Kevin Master to ensure maximum impact on screen. National Award-winning cinematographer Thirunavukarasu is providing the spectacular camera work that this genre requires.
The movie features Samyuktha sharing the screen as the leading lady in this exciting project. Produced by Krishna Pothineni under the Rapo Cinematics banner, the film is further strengthened by the music of Sam CS and the production design of AS Prakash. Fans are eagerly waiting for this grand visual spectacle to hit theaters.
Disclaimer: The news article is written based on information shared by various sources. The organisation is not responsible for the factual nature of them. While we do try to do thorough research at times people could misguide. So, we would encourage viewers' discretion before reacting to them.
దర్శకధీరుడు ఎస్.ఎస్. రాజమౌళి ప్రస్తుతం మహేశ్ బాబుతో తెరకెక్కిస్తున్న భారీ చిత్రంతో బిజీగా ఉన్నారు. సినిమాలకు సంబంధించిన విషయాలతో తరచూ వార్తల్లో నిలిచే రాజమౌళి.. తాజాగా ఓ ఆసక్తికరమైన కారణంతో మరోసారి వార్తల్లోకి వచ్చారు. వినాయకుడి లడ్డూ వేలంలో ఆయన ఏకంగా రూ.కోటి వరకు బిడ్ వేసినట్లు సమాచారం.
వినాయక చవితి సందర్భంగా తెలుగు రాష్ట్రాల్లోని పలు ప్రాంతాల్లో గణేశ్ నవరాత్రి ఉత్సవాలు ఘనంగా జరుగుతుంటాయి. ఉత్సవాల ముగింపు సమయంలో భారీ వినాయక విగ్రహాల వద్ద లడ్డూ వేలం నిర్వహించడం కూడా ఆనవాయితీగా వస్తోంది. ఈ వేలంలో భక్తులు, ప్రముఖులు పెద్ద మొత్తంలో పాల్గొంటూ లడ్డూను సొంతం చేసుకుంటుంటారు. తాజాగా అలాంటి ఓ కార్యక్రమంలో రాజమౌళి పాల్గొన్నట్లు సాక్షి కథనం పేర్కొంది.
ఈ సందర్భంగా వినాయకుడి లడ్డూ కోసం రాజమౌళి ఏకంగా రూ.కోటి బిడ్ వేసినట్లు తెలుస్తోంది. సాధారణంగా లడ్డూ వేలంలో కొంతమంది భక్తులు లక్షల రూపాయల వరకు పోటీ పడుతుంటారు. అయితే రాజమౌళి వంటి ప్రముఖ దర్శకుడు కోటి రూపాయల బిడ్ వేయడం ఇప్పుడు సినీ వర్గాల్లో ఆసక్తిని కలిగిస్తోంది.
రాజమౌళి ప్రస్తుతం మహేశ్ బాబుతో తెరకెక్కిస్తున్న సినిమాపై భారీ అంచనాలు ఉన్నాయి. అంతర్జాతీయ స్థాయిలో రూపొందుతున్న ఈ ప్రాజెక్ట్కు సంబంధించిన ప్రతి చిన్న విషయం కూడా అభిమానుల్లో ఆసక్తిని రేకెత్తిస్తోంది. ఈ నేపథ్యంలో ఆయన వ్యక్తిగతంగా పాల్గొన్న ఈ గణేశ్ లడ్డూ వేలం విషయం కూడా సోషల్ మీడియాలో చర్చనీయాంశంగా మారింది.
మరోవైపు వినాయకుడి లడ్డూ వేలం ద్వారా వచ్చిన మొత్తాన్ని సాధారణంగా ఉత్సవాల నిర్వహణ, ఆలయ లేదా స్థానిక సేవా కార్యక్రమాలకు వినియోగించే సందర్భాలు ఉంటాయి. అందుకే భక్తులు ఈ వేలంలో పోటీగా పాల్గొంటుంటారు. రాజమౌళి కూడా భారీ మొత్తానికి బిడ్ వేయడం ద్వారా ఈ కార్యక్రమంపై అందరి దృష్టిని ఆకర్షించారు.
ఇదిలా ఉంటే.. రాజమౌళి ప్రస్తుతం మహేశ్ బాబుతో చేస్తున్న సినిమాకు సంబంధించిన మరిన్ని అప్డేట్స్ కోసం అభిమానులు ఆసక్తిగా ఎదురుచూస్తున్నారు. సినిమాల విషయాల్లోనే కాకుండా, ఇలా ఆధ్యాత్మిక కార్యక్రమంలోనూ రాజమౌళి పేరు వినిపించడంతో ఈ వార్త ఇప్పుడు ప్రత్యేకంగా మారింది.
[SS Rajamouli, SS Rajamouli Ganesh Laddu, Rajamouli One Crore Bid, Rajamouli Ganesh Chaturthi, Ganesh Laddu Auction, Vinayaka Laddu Auction, SS Rajamouli News, Rajamouli Mahesh Babu Movie, Mahesh Babu Rajamouli Movie, Tollywood News, Telugu Cinema News, Ganesh Festival 2026]
తమిళ స్టార్ హీరో ధనుష్ గురించి ప్రత్యేకంగా పరిచయం అవసరం లేదు. నటుడిగా, దర్శకుడిగా, నిర్మాతగా తనకంటూ ప్రత్యేక గుర్తింపు తెచ్చుకున్న ఆయన కుటుంబం నుంచి వచ్చిన మరో ఆసక్తికరమైన సినిమా ఇప్పుడు ఓటీటీ ప్రేక్షకులను పలకరించేందుకు సిద్ధమైంది. ధనుష్ తండ్రి, ప్రముఖ దర్శకుడు కస్తూరి రాజా తెరకెక్కించిన ‘హబీబీ’ సినిమా ఓటీటీలో స్ట్రీమింగ్కు రాబోతోంది.
కస్తూరి రాజా తమిళంలో ఎన్నో సినిమాలకు దర్శకత్వం వహించారు. కుటుంబ కథలు, ప్రేమకథలను తనదైన శైలిలో తెరకెక్కించిన ఆయన.. ఈసారి కూడా ఒక భిన్నమైన కథాంశాన్ని ఎంచుకున్నారు. ‘హబీబీ’ని పీరియాడిక్ రొమాంటిక్ డ్రామాగా రూపొందించారు. పాత కాలం నాటి వాతావరణం, ప్రేమ, భావోద్వేగాలను కలిపి ఈ సినిమాను తెరకెక్కించినట్లు తెలుస్తోంది.
ఇప్పటికే థియేటర్లలో విడుదలైన ఈ సినిమా ఇప్పుడు ఓటీటీ ప్రేక్షకుల ముందుకు వస్తోంది. దీంతో థియేటర్లలో మిస్ అయిన వారు ఇంట్లోనే ఈ సినిమాను చూసే అవకాశం దక్కనుంది. ముఖ్యంగా పీరియాడిక్ బ్యాక్డ్రాప్లో సాగే ప్రేమకథలను ఇష్టపడే ప్రేక్షకులకు ఈ సినిమా ఆసక్తిని కలిగించే అవకాశం ఉంది.
కస్తూరి రాజా పేరు ధనుష్ తండ్రిగా మాత్రమే కాకుండా దర్శకుడిగా కూడా కోలీవుడ్లో ప్రత్యేకమైనది. ఆయన దర్శకత్వంలో తెరకెక్కిన పలు సినిమాలు అప్పట్లో ప్రేక్షకులను ఆకట్టుకున్నాయి. ఇక ఆయన కుమారుడు ధనుష్ ప్రస్తుతం నటుడిగానే కాకుండా దర్శకుడిగానూ తన ప్రతిభను చూపిస్తున్నారు. దీంతో ధనుష్ తండ్రి తెరకెక్కించిన ‘హబీబీ’పై కూడా సహజంగానే ఆసక్తి ఏర్పడుతోంది.
ఇదిలా ఉంటే.. ఇటీవల పాత సినిమాల్లోని పాటలను కొత్త చిత్రాల్లో ఉపయోగించడంపై కస్తూరి రాజా అభ్యంతరం వ్యక్తం చేసిన విషయం కూడా తెలిసిందే. తన సినిమాల్లోని పాటలను అనుమతి లేకుండా ఉపయోగించారంటూ ‘గుడ్ బ్యాడ్ అగ్లీ’ చిత్ర బృందంపై ఆయన అసంతృప్తి వ్యక్తం చేశారు.
మొత్తంగా ఇప్పుడు ‘హబీబీ’ ఓటీటీలోకి రావడంతో కస్తూరి రాజా దర్శకత్వంలో వచ్చిన ఈ పీరియాడిక్ ప్రేమకథను డిజిటల్ ప్రేక్షకులు మరోసారి చూసే అవకాశం ఏర్పడింది. సినిమా కథ, పాతకాలపు నేపథ్యం, రొమాంటిక్ అంశాలు ప్రేక్షకులను ఎలా ఆకట్టుకుంటాయో చూడాలి.
[Dhanush Father Kasthuri Raja, Kasthuri Raja Habibi Movie, Habibi OTT Release, Habibi Movie OTT, Dhanush Father Movie, Kasthuri Raja Movies, Habibi Telugu OTT, Periodic Romantic Drama, Tamil OTT Movies, New OTT Releases, Dhanush Family, Kollywood OTT Movies]
మెగా పవర్ స్టార్ రామ్ చరణ్ సతీమణి ఉపాసన కొణిదెల ఆధ్యాత్మికతకు ఎంతో ప్రాధాన్యత ఇస్తుంటారు. ముఖ్యంగా శ్రీరాముడు, హనుమంతుడిపై తనకున్న భక్తిని తరచూ సోషల్ మీడియా వేదికగా పంచుకుంటూ ఉంటారు. తాజాగా ఆమె చేసిన ఓ ప్రత్యేకమైన పని అందరి దృష్టిని ఆకర్షిస్తోంది. తన తాతయ్య, అపోలో హాస్పిటల్స్ వ్యవస్థాపకుడు డాక్టర్ ప్రతాప్ సి. రెడ్డికి ఉపాసన అరుదైన శ్రీరాముడి విగ్రహాన్ని కానుకగా అందించారు.
ఉపాసన ఇటీవల 21 రోజుల పాటు సుందరకాండ పారాయణం చేయాలని సంకల్పించారు. ఆ పారాయణాన్ని విజయవంతంగా పూర్తి చేసిన సందర్భంగా తాతయ్యకు ఈ ప్రత్యేకమైన బహుమతిని అందించారు. ఈ కానుక వెనుక ఉన్న మరో విశేషం ఏంటంటే.. ఈ శ్రీరాముడి విగ్రహాన్ని సాధారణ శిల్పి తయారు చేయలేదు. అయోధ్య రామ మందిరంలో ప్రతిష్ఠించిన రామలల్లా విగ్రహాన్ని మలిచిన ప్రముఖ శిల్పి అరుణ్ యోగిరాజ్ చేతుల మీదుగా దీనిని ప్రత్యేకంగా తయారు చేయించారు.
నిజానికి ఈ విగ్రహాన్ని ఉపాసన ఏడాది క్రితమే తన తాతయ్య కోసం ప్రత్యేకంగా తయారు చేయించేందుకు ఆర్డర్ ఇచ్చినట్లు సమాచారం. సుందరకాండ పారాయణం పూర్తయిన 21వ రోజునే ఈ విగ్రహం కూడా సిద్ధం కావడం విశేషంగా మారింది. ఈ విషయం తనకు కేవలం యాదృచ్ఛికంగా అనిపించడం లేదని, దైవ నిర్ణయంగా భావిస్తున్నానని ఉపాసన పేర్కొన్నారు. తన తాతయ్యకు శ్రీరాముడిపై ఉన్న భక్తి, సుందరకాండ పారాయణంపై ఆయనకున్న ఆసక్తి తనను ఎంతగానో ప్రభావితం చేశాయని ఆమె తెలిపారు.
అయోధ్యలోని రామ మందిరం కోసం అరుణ్ యోగిరాజ్ రూపొందించిన రామలల్లా విగ్రహం దేశవ్యాప్తంగా ప్రత్యేక గుర్తింపు తెచ్చుకుంది. కర్ణాటకలోని మైసూర్కు చెందిన అరుణ్ యోగిరాజ్ కుటుంబం ఐదు తరాలుగా శిల్పకళను కొనసాగిస్తోంది. రామలల్లా విగ్రహంతో పాటు నేతాజీ సుభాష్ చంద్రబోస్, ఆదిశంకరాచార్య విగ్రహాలను కూడా ఆయన రూపొందించారు.
ఇలాంటి ప్రముఖ శిల్పి చేతుల మీదుగా తన తాతయ్య కోసం ప్రత్యేకంగా తయారు చేయించిన శ్రీరాముడి విగ్రహాన్ని అందించడం ద్వారా ఉపాసన ఈ కానుకను మరింత ప్రత్యేకంగా మార్చారు. కుటుంబ బంధం, ఆధ్యాత్మిక విశ్వాసం కలిసిన ఈ సందర్భాన్ని ఆమె సోషల్ మీడియాలో పంచుకోవడంతో అభిమానులు, నెటిజన్లు కూడా స్పందిస్తున్నారు.
[Upasana Konidela, Ram Charan Wife Upasana, Upasana Sri Rama Idol, Prathap C Reddy, Arun Yogiraj, Ram Lalla Sculptor, Ayodhya Ram Idol, Sundarakandam Parayana, Upasana Spiritual Journey, Mega Family, Ram Charan, Lord Rama Idol, Tollywood News]
.WEBP)
నలుగురు స్నేహితులు కలిస్తే సినిమాల గురించి మాట్లాడుకోవడం ఒకప్పుడు చాలా సహజంగా ఉండేది. ఏ హీరో సినిమా వస్తోంది? టికెట్లు ఎప్పుడు వస్తాయి? ఫస్ట్ డే ఫస్ట్ షో ఎక్కడ చూడాలి? అనే చర్చలు సినిమా విడుదలకు కొన్ని రోజుల ముందే మొదలయ్యేవి. ముఖ్యంగా స్టార్ హీరోల సినిమాల విషయంలో అభిమానుల హంగామా వేరే స్థాయిలో ఉండేది.
ఒకప్పుడు సినిమా విడుదల రోజు థియేటర్ల దగ్గర కనిపించే దృశ్యాలు ఇప్పుడు ఊహించుకోవడం కూడా కష్టమే. థియేటర్ గేట్లు తెరవకముందే అభిమానులు భారీ సంఖ్యలో క్యూ కట్టేవారు. తమ అభిమాన హీరో సినిమా మొదటి రోజు మొదటి ఆట చూడాలన్న పట్టుదలతో గంటల తరబడి ఎదురు చూసేవారు. టికెట్ దొరికితే అదొక గొప్ప విజయంగా భావించేవారు. కొంతమంది అభిమానులు టికెట్ కోసం ఎంత కష్టమైనా వెనక్కి తగ్గేవారు కాదు.
అభిమానుల ఉత్సాహం అక్కడితో ఆగేది కాదు. తమ హీరో సినిమా తెరపై కనిపించగానే థియేటర్లలో సందడి మొదలయ్యేది. విజిల్స్, కేకలు, పేపర్లు ఎగరేయడం, పాలాభిషేకాలు.. ఇలా అభిమానుల హడావుడితో థియేటర్లు పండుగ వాతావరణాన్ని తలపించేవి. కొన్ని సందర్భాల్లో అభిమానులు వరుసగా నాలుగు షోలు కూడా చూసిన సందర్భాలు ఉండేవి.
అప్పట్లో సినిమా టికెట్లను పొందడం కూడా ఒక పెద్ద ప్రక్రియ. ఆన్లైన్ బుకింగ్ సౌకర్యం లేదు. ఫోన్లో కూర్చొని టికెట్ బుక్ చేసుకునే అవకాశం లేదు. థియేటర్కి వెళ్లి క్యూలో నిలబడాలి. స్టార్ హీరో సినిమా అయితే టికెట్ల కోసం మరింత పోటీ ఉండేది. అందుకే మొదటి రోజు మొదటి షో టికెట్ సంపాదించిన వ్యక్తిని మిగతావాళ్లు గొప్పగా చూసేవారు.
అయితే ఇప్పుడు పరిస్థితి పూర్తిగా మారిపోయింది. ఆన్లైన్ టికెట్ బుకింగ్ అందుబాటులోకి రావడంతో ఇంట్లో నుంచే కొన్ని నిమిషాల్లో టికెట్ బుక్ చేసుకోవచ్చు. థియేటర్ దగ్గర గంటల తరబడి క్యూ కట్టాల్సిన అవసరం లేకుండా పోయింది. దీంతో ఒకప్పుడు కనిపించిన ఫస్ట్ డే ఫస్ట్ షో హడావుడి చాలా వరకు తగ్గిపోయింది.
ఇక సినిమాలకు సంబంధించిన చర్చల విషయంలోనూ చాలా మార్పు వచ్చింది. అప్పట్లో సోషల్ మీడియా ఇంత విస్తృతంగా లేదు. సినిమా చూసి బయటకు వచ్చిన ప్రేక్షకుల మాటే మరో ప్రేక్షకుడికి రివ్యూగా మారేది. మౌత్ పబ్లిసిటీకి చాలా ప్రాధాన్యత ఉండేది. సినిమా బాగుందని ఎవరో చెప్పారంటే.. ఆ మాట విని మరొకరు థియేటర్కు వెళ్లేవారు. అలా మంచి సినిమాలు స్టార్ క్యాస్టింగ్ పెద్దగా లేకపోయినా ప్రేక్షకుల ఆదరణతో ఎక్కువ రోజులు ఆడేవి.
ఇప్పుడు మాత్రం సినిమా విడుదలైన రోజే సోషల్ మీడియాలో రివ్యూలు, రేటింగ్స్, ప్రేక్షకుల స్పందనలు బయటకు వచ్చేస్తున్నాయి. మొదటి వారంలోనే సినిమా పరిస్థితి ఏంటనేది దాదాపుగా తెలిసిపోతోంది. కొన్ని సినిమాలు రెండో వారానికి వచ్చేసరికి థియేటర్ల నుంచి తప్పుకుంటున్నాయి.
దీనికి తోడు ఇప్పుడు ప్రతి ఒక్కరూ తమ తమ ఉద్యోగాలు, వ్యక్తిగత పనులతో బిజీగా ఉంటున్నారు. సినిమాను థియేటర్లోనే చూడాలన్న పరిస్థితి కూడా మారిపోయింది. ఓటీటీలు, ఇతర డిజిటల్ ప్లాట్ఫామ్లు అందుబాటులోకి రావడంతో థియేటర్కు వెళ్లకుండా సినిమా చూసే అవకాశం ఏర్పడింది.
అయితే మంచి సినిమా వస్తే ఇప్పటికీ ప్రేక్షకులు థియేటర్లకు వస్తూనే ఉన్నారు. కంటెంట్ బాగుంటే స్టార్ హీరో సినిమా అయినా, చిన్న సినిమా అయినా ప్రేక్షకులు ఆదరిస్తున్నారు. కాకపోతే ఒకప్పుడు సినిమా చుట్టూ ఏర్పడిన ఆ సామూహిక ఉత్సాహం, ఫస్ట్ డే ఫస్ట్ షో కోసం అభిమానులు పడే తాపత్రయం మాత్రం ఇప్పుడు చాలా వరకు తగ్గిపోయింది.
ఒకప్పుడు సినిమా అనేది కేవలం వినోదం మాత్రమే కాదు.. అభిమానులకు ఒక పండుగ. హీరో సినిమా విడుదలైతే థియేటర్ దగ్గర మొదలైన సందడి.. సినిమా పూర్తయ్యే వరకు కొనసాగేది. ఇప్పుడు కాలం మారింది, ప్రేక్షకుల జీవనశైలి మారింది, సినిమా చూసే విధానం కూడా మారింది. అయినప్పటికీ అప్పటి ఫస్ట్ డే ఫస్ట్ షో రోజుల్ని అనుభవించిన అభిమానులకు మాత్రం ఆ థియేటర్ సందడి, టికెట్ కోసం పడిన కష్టం, తెరపై హీరో కనిపించినప్పుడు వచ్చిన ఆనందం ఎప్పటికీ ప్రత్యేకమే.
[First Day First Show, FDFS, Telugu Cinema, Tollywood, Star Hero Movies, Theatre Culture, Movie Fans, First Day First Show Craze, Telugu Movie Fans, Star Hero Fan Craze, Movie Theatre Culture, Old Telugu Cinema, Telugu Cinema Fans, Movie Ticket Booking, Tollywood Fans]
ఎన్నికల వేళ జగన్ కు షాకుల మీద షాకులు తగులుతున్నాయి. ఇన్నాళ్లే జగన్ మాటే శాసనం అన్నట్లుగా అణిగిమణిగి ఉన్న వారంతా సరిగ్గా ఎన్నికల ముంగిట ధిక్కార స్వరం వినిపిస్తున్నారు. పార్టీపై తిరుగులేని పట్టు ఉందని భావిస్తున్న జగన్ కు ఆ పట్టు జారిపోవడం కళ్లముందు కనిపించేలా చేస్తున్నారు.
టికెట్ నిరాకరించిన, సిట్టింగ్ స్థానాన్ని మార్చిన ఎమ్మెల్యేలు, ఎంపీలు ఇప్పటికే పార్టీని వీడి వలసబాట పట్టారు. వారితో పాటు పెద్ద సంఖ్యలో క్యాడర్ కూడా పార్టీని వీడుతున్నారు. ఇక ఇప్పుడు నామినేటెడ్ పదవులలో ఉన్న వారి వంతు మొదలైనట్లు కనిపిస్తోంది. తనకు కానీ తన భర్తకు కానీ వచ్చే ఎన్నికలలో పోటీ చేసేందుకు టికెట్ ఇవ్వాలంటూ గత కొంత కాలంగా కోరుతూ వస్తున్న మహిళా కమిషన్ చైర్ పర్సన్ వాసిరెడ్డి పద్మ వంతు వచ్చింది. ఆమె కూడా రాజీనామా అస్త్రం సంధించారు.
జగన్ కు నమ్మిన బంటుగా గుర్తింపు పొందిన మహిళాకమిషన్ చైర్ పర్సన్ వాసి రెడ్డి పద్మ తన పదవికి రాజీనామా చేశారు. ఉరుములేని పిడుగులా, ఎటువంటి ముందస్తు సమాచారం లేకుండా తన రాజీనామా లేఖను సీఎం జగన్ కు పంపేశారు. పేరుకు తాను పార్టీకి కాదు, కేవలం మహిళా కమిషన్ చైర్మన్ పదవికి మాత్రమే రాజీనామా చేశాననీ, ఇక నుంచి వైసీపీ కోసం పని చేస్తాననీ వాసిరెడ్డి పద్మ చెబుతున్నప్పటికీ, ఆమె రాజీనామాకు కారణం అసంతృప్తేనని పార్టీ వర్గాలు బాహాటంగానే చెబుతున్నాయి.
చాలా కాలంగా వాసిరెడ్డి పద్మ వచ్చే ఎన్నికలలో పోటీ చేసేందుకు తనకు కానీ తన భక్తకు కానీ పార్టీ టికెట్ ఇవ్వాలని జగన్ ను కోరుతూ వస్తున్నారు. అయితే ఇప్పటి వరకూ జగన్ చూద్దాం.. చేద్దాం అన్నట్లుగా దాట వేస్తూనే వచ్చారు. ఇప్పుడిక వరుసగా అభ్యర్థల జాబితాలను జగన్ ప్రకటించేస్తుండటం, తనకు గానీ తన భర్తకు కానీ పార్టీ టికెట్ విషయంలో ఎటువంటి స్పస్టత ఇవ్వకపోవడంతో ఆమె మనస్తాపం చెంది పదవికి రాజీనామా చేసేశారని పార్టీ వర్గాలు చెబుతున్నాయి.
వాసిరెడ్డి పద్మ రాజకీయ ప్రవేశం ప్రజారాజ్యం పార్టీతో జరిగింది. 2009లో ఆమె ప్రజారాజ్యం పార్టీలో చేరారు. ఇలా చేరడంతోనే ఆమె ప్రజారాజ్యం అధికార ప్రతినిథిగా పదవి దక్కించుకున్నారు. ప్రజారాజ్యం కాంగ్రెస్ పార్టీలో విలీనం కావడంతో ఆమె 2012లో జగన్ పార్టీలో చేరారు. జగన్ కూడా ఆమెకు అధికార ప్రతినిథి పదవి ఇచ్చారు. 2019లో వైసీపీ అధికారంలోకి వచ్చిన తరువాత ఆమెను రాష్ట్ర మహిళా కమిషన్ చైర్ పర్సన్ గా నియమించారు. చైర్ పర్సన్ హోదాలో ఆమె జగన్ మెప్పు పొందేందుకు చేయగలిగినంతా చేశారు. ప్రతిపక్ష పార్టీ నేతలకు నోటీసులు ఇచ్చారు. ఏకంగా జనసేన అధినేత పవన్ కల్యాణ్ కు సైతం నోటీసులు జారీ చేశారు. వార్డు వలంటీర్లపై పవన్ కల్యాణ్ చేసిన వ్యాఖ్యలకు కమిషన్ ముందు హాజరై వివరణ ఇవ్వాలంటూ ఆమె పవన్ కు నోటీసులు జారీ చేసిన సంగతి తెలిసిందే. పవన్ హాజరు కాకపోవడంతో పోలీసులకు ఫిర్యాదు చేసి కేసు నమోదు చేయాలని ఆదేశించారు. ఇన్ని చేసినా వాసిరెడ్డి పద్మకు ఆమె కోరినట్లుగా పార్టీ టికెట్ లభించకపోవడంతో అలిగి పదవికి రాజీనామా చేశారని, ఇది జగన్ కు షాకేననీ పరిశీలకులు విశ్లేషిస్తున్నారు.
.webp)
సంసారంలో నిస్సంగత్వంతో ఎలా జీవించాలో గురువు బోధిస్తాడు. మనల్ని సంసారబంధాల నుండి విముక్తుల్ని చేయడానికి తోడ్పడతాడు. కానీ అనేక జన్మల సంస్కారాల వల్ల మనలో సంసారాసక్తి సన్నగిల్లకపోవడంతో గురుబోధ అవగాహన చేసుకొనే మనోపరిపక్వత కలగదు. ఒకరైతు తనకు చేసిన సేవలకు ప్రీతి చెందిన గురువు అతడికి స్వర్గ ప్రాప్తిని కలగజేయాలని అనుకుంటాడు. కానీ సంసారాసక్తి వల్ల ఆ రైతు ఆ అవకాశాన్ని వాయిదా వేసుకుంటూ వస్తాడు. చివరికి గురుకృప వల్ల ఆ రైతు స్వర్గ ప్రాప్తిని ఎలా పొందాడో ఈ కథ తెలియజేస్తుంది.
"ఒక మహాపురుషుడు ప్రయాణం చేస్తూ, డస్సిపోయాడు. గొంతు ఎండిపోయింది. దారిలో ఒక రైతు కనపడితే నీళ్ళు అర్థించాడు. ఆ రైతు మహాత్మునికి సకల ఉపచారాలూ చేశాడు. చిరిగిపోయిన ఆయన ఉత్తరీయాన్ని రైతు జాగ్రత్తగా కుట్టి బాగుచేశాడు. రైతు పరిచర్యలకు సంతసించిన ఆ మహాత్ముడు శాంతి, ఆనందాలకు నిలయమైన స్వర్గానికి తనతోపాటు రమ్మని అంటాడు. అందుకు ఆ రైతు 'గురువుగారూ! మీరు నా మీద చూపిన దయకు కృతజ్ఞుణ్ణి. కానీ నా పిల్లలు ఇంకా చిన్నవాళ్ళు. ఓ ఏడేళ్ళ వ్యవధి ఇవ్వండి' అని అడుగుతాడు. అందుకు గురువు అంగీకరించాడు.
సరిగ్గా ఏడేళ్ళ తర్వాత గురువు రైతును స్వర్గానికి తీసుకువెళ్ళడానికి వచ్చాడు. అప్పుడు రైతు 'అయ్యా! కడపటి కొడుకు కష్టాలకు అంతు లేదు. అన్ని జంఝాటాలనూ ఒక్కడే సంబాళించుకోలేకపోతున్నాడు. కాబట్టి మరో ఏడేళ్ళు గడువు ఇవ్వండి' అని గురువుని అడిగాడు. మరో ఏడేళ్ళ తరువాత గురువు వచ్చాడు. కానీ రైతు చనిపోయాడని తెలిసింది. చనిపోయిన ఆ రైతు ఎద్దుగా పుట్టాడని ఆ గురువు తన దివ్య దృష్టితో తెలుసుకున్నాడు. ఎద్దుగా పుట్టిన ఆ రైతు తన కొడుకు పొలాన్నే దున్నుతున్నాడు. అప్పుడు గురువు ఆ ఎద్దుపై మంత్ర జలం చిలకరించగానే ఎద్దు జన్మనెత్తిన రైతు 'నా కొడుకు పరిస్థితి మరి కాస్త మెరుగు పడనీయండి స్వామీ! మరో ఏడేళ్ళు గడువు ఇవ్వండి' అని అన్నాడు. ఇక చేసేది లేక వెనుదిరిగాడు గురువు. మరలా ఏడేళ్ళ తర్వాత వచ్చిన గురువుకు ఎద్దు చనిపోయిందని తెలిసింది. అది కుక్కగా పుట్టి కొడుకు ఇంటినీ, ఆస్తినీ కాపలా కాస్తోందని తన దివ్యదృష్టి ద్వారా తెలుసుకున్నాడు. గురువు. కుక్కగా పుట్టిన ఆ రైతు 'స్వామీ! నేను ఎంత దౌర్భాగ్యుణ్ణి. మీరు ఇంత దయ చూపుతున్నప్పటికీ మీతో స్వర్గమానం చేయలేకున్నాను. వీడికి ఆస్తిని కాపాడుకొనే దక్షత ఇంకా రాలేదు. కాబట్టి దయ చేసి మరో ఏడేళ్ళు వ్యవధి ఇవ్వండి' అని వేడుకున్నాడు.
గురువు ఏడేళ్ళ తరువాత మళ్ళీ వచ్చేసరికి కుక్క మరణించింది. అది త్రాచుపాముగా జన్మనెత్తి, ఇప్పుడు కొడుకు భూమిలో ఉన్న లంకెబిందెలకు పడగెత్తి కాపలా కాస్తోంది. గుప్త ధనం ఇక్కడ ఉందని కొడుకుకి ఎలా తెలియజేయాలా అని పాము ఆలోచిస్తున్నప్పుడు గురువు ఆ రైతుకొడుకును పిలుచుకు వచ్చి లంకె బిందెలు ఉన్న చోట తవ్వమన్నాడు. లంకె బిందెలు బయటపడ్డాయి. ఆ పైన ఆ పామును చంపమన్నాడు. అనంతరం శిష్యుణ్ణి తీసుకొని స్వర్గారోహణం చేశాడు గురువు. సంసారంలోని ఈతి బాధల నుండి శిష్యుణ్ణి ఉద్ధరిస్తాడు సద్గురువు. అలాంటి గురువు అందరికీ అవసరం.
*నిశ్శబ్ద.
ఏదయినా ఒక వస్తువు ఇంట్లోంచి పోయిందంటేనే ఎంతో బాధగా వుంటుంది. ఎంతో ఇష్టపడి కొనుక్కున్న వస్తువు చేజారి పడి పగిలిపోయినా, దొంగతనం జరిగినా, ఎక్కడో మర్చిపోయినా చాలా బాధేస్తుంది. దాన్ని తిరిగి పొందలేమని దిగులు పట్టుకుం టుంది. కానీ 101 ఏళ్ల చార్లెటి బిషాఫ్ కు ఎంతో ఇష్టమయిన పెయింటింగ్ రెండో ప్రపంచ యుద్ధ సమయంలో దూరమయింది. 80 ఏళ్లు దాని కోసం ఎదురు చూడగలి గింది.
అదంటే మరి ఆమెకు ప్రాణ సమానం. చాలా కాలం దొరుకుతుందని, తర్వాత ఇక దొరకదేమో అనీ ఎంతో బాధపడింది. ఫిదా సినిమాలో హీరోయిన్ చెప్పినట్లు ఆమె గట్టిగా అనుకుని ఉంటుంది. అందుకే కాస్త ఆలస్యమైనా.. కాస్తేంటి ఎనిమిది దశాబ్దాలు ఆలస్యమైనా ఆమె పెయింటింగ్ ఆమెకు దక్కింది. ఆ పెయింటింగ్ గతేడాది ఆమెను చేరింది. ఆమెది నెదర్లాండ్స్. ఆమె తండ్రి నెదర్లాండ్స్లోని ఆర్నెహెమ్లో చిన్నపిల్లల ఆస్పత్రి డైరెక్టర్. పోయి దొరికిన ఆ పెయింటింగ్ విషయానికి వస్తే.. అది 1683లో కాస్పర్ నెషర్ వేసిన స్టీవెన్ ఓల్టర్స్ పెయింటింగ్.
రెండో ప్రపంచ యుద్ధ సమయంలో నాజీల ఆదేశాలను చార్లెట్ తండ్రి వ్యతిరేకించారు. ఆయన రహస్య జీవనం సాగించేడు. కానీ ఈ పెయింటింగ్ని మాత్రం తన నగరంలోని ఒక బ్యాంక్లో భద్ర పరచమని ఇచ్చారట. 1940లో నాజీలు నెదర్లాండ్ పై దాడులు చేసినపుడు ఆ బ్యాంక్ మీద పడి దోచుకున్నా రు. అప్పుడు ఈ పెయింటింగ్ కూడా తీసుకెళ్లారు. యుద్ధం అయిపోయిన తర్వాత ఈ పెయింటింగ్ ఎక్కడున్నదీ ఎవరికీ తెలియలేదు. చిత్రంగా 1950ల్లో డసల్డార్ష్ ఆర్ట్ గ్యాలరీలో అది ప్రత్యక్షమయింది. 1969లో ఆమ్స్టర్డామ్లో దాన్ని వేలానికి తీసికెళ్లే ముందు దాన్ని ఆ ఆర్ట్ గ్యాలరీలో వుందని చూసినవారు చెప్పారు. వేలంపాట తర్వాత మొత్తానికి ఆ పెయింటింగ్ను 1971లో ఒక కళాపిపాసి తన దగ్గర పెట్టుకున్నాడు. ఆ తర్వాత 2021లో అది చార్లెటీని చేరింది.
మొత్తానికి వూహించని విధంగా ఎంతో కాలం దూరమయిన గొప్ప కళాఖండం తిరిగి తన వద్దకు చేరడంలో చార్లెటీ ఆనందానికి అంతేలేదు. అంతే కదా.. పోయిందనుకున్న గొప్ప వస్తువు తిరిగి చేరితే ఆ ఆనందమే వేరు! అయితే చార్లెటీకి ఇపుడు ఆ పెయిం టింగ్ను భద్రంగా చూసుకునే ఆసక్తి వున్నప్పటికీ శక్తి సామర్ధ్యాలు లేవు. అందుకనే త్వరలో ఎవరికయినా అమ్మేసీ వచ్చిన సొమ్మును పిల్లలకు పంచుదామనుకుంటోందిట! చార్లెటీ కుటుంబంలో అయిదుగురు అన్నదమ్ములు అక్కచెల్లెళ్లు వున్నారు. అలాగే ఇరవై మంది పిల్లలు ఉన్నారు. అందరూ ఆమె అంటే ఎంతో ప్రేమ చూపుతున్నారు. అందరం ఒకే కుటుంబం, చాలాకాలం తర్వాత ఇల్లు చేరిన కళాఖండం మా కుటుంబానిది అన్నది చార్లెటీ!
.JPG)
ఓ వంక ఐదు రాష్ట్రాల అసెంబ్లీ ఎన్నికలు జరుగుతుంటే, మరో వంక జాతీయ స్థాయిలో, బీజేపీ, కాంగ్రెస్ పార్టీలకు తృతీయ ప్రత్యాన్మాయంగా థర్డ్ ఫ్రంట్ ఏర్పాటు ఆలోచనలు జోరందుకున్నాయి. ఇటీవల కాంగ్రెస్ పార్టీకి రాజీనామా చేసిన ఆ పార్టీ సీనియర్ నాయకుడు, పీసీ చాకో, నేషనలిస్ట్ కాంగ్రెస్ పార్టీ(ఎన్సీపీ)లో చేరారు.
చాకోను పార్టీలోకి ఆహ్వానిస్తూ, ఎన్సీపీ అధినేత శరద్ పవార్’ ఫ్రంట్ ఏర్పాటు గురించి ప్రత్యేకించి ఎలాంటి వ్యాఖ్యలు చేయలేదు కానీ, చాకో అలాంటి సంకేతాలు ఇచ్చారు. ప్రస్తుతం దేశంలో ఉన్న ఏ ఒక్కపార్టీ కూడా బీజేపీకి ప్రత్యాన్మాయం కాదని,సమీప భవిష్యత్ కాంగ్రెస్ సహా ఏ పార్టీ కూడా ఆ స్థాయికి ఎదిగే అవకాశాలు కూడా కనిపించడంలేదని అన్నారు. ఈ పరిస్థితుల్లో దేశంలోని బీజేపీ వ్యతిరేక పార్టీలన్నీ, ఏకమై, ఒకే గొడుగు కిందకు రావలసిన అవసరం ఉందని చాకో అన్నారు. అదే సమయంలో ప్రతిపక్షాలను ఏక తాటిపైకి తెచ్చే బాధ్యతను పవార్ తీసుకోవాలని సంకేత మాత్రంగా చెప్పారు. అంతే కాకుండా కాంగ్రెస్ పేరు ఎత్తకుండా బీజేపీ వ్యతిరేక శక్తులను ఏకం చేసే ఆలోచన ఆ పార్టీ నాయకత్వానికి లేదని నెహ్రూ గాంధీ ఫ్యామిలీ (సోనియా, రాహుల్, ప్రియాంక)ఆలోచనా ధోరణిని పరోక్షంగానే అయినా ఎండ కట్టారు.ఆ విధంగా పవార్ ఆ బాధ్యత తీసుకోవాలని చాకో సూచించారు. ఇందుకు సంబంధించి, పవార్ బహిరంగంగా ఎలాంటి వ్యాఖ్య చేయలేదు. అయితే, చాకో సహా మరికొందరు ‘సీనియర్’ కాంగ్రెస్ నాయకులు, అలాగే సిపిఎం, సిపిఐ నాయకులు కూడా పవార్’తో చాలా కాలంగా థర్డ్ ఫ్రంట్ విషయంగా చర్చలు జరుపుతున్నట్లు సమాచారం.
అయితే మహారాష్ట్రలో సంకీర్ణం మనుగడను దృష్టిలో ఉంచుకుని పవార్ ఆచితూచి అడుగులేస్తున్నట్లు తెలుస్తోంది. అందుకే చాకో పార్టీలో చేరిన సందర్భంలో కూడా ‘చాకో చేరికతో మహారాష్ట్రలోని మహా వికాస్ అగాడీ ప్రభుత్వానికి ఎలాంటి నష్టం జరగదని, పవార్ మహారాష్ట్ర సంకీర్ణ సర్కార్ ప్రస్తావన చేశారని విశ్లేషకులు పేర్కొంటున్నారు. మహారాష్ట్ర సంకీర్ణ ప్రభుత్వ మనుగడ గురించ్బి పవార్ ప్రత్యేకంగా పేర్కొనడం ద్వారా, ఆయన థర్డ్ ఫ్రంట్ విషయంలో వేచి చూసే ఆలోచనలో ఉన్నట్లు అర్థమవుతోందని కూడా రాజకీయ విశ్లేషకులు భావిస్తున్నారు. అయితే అదే ఎన్సీపీ అసెంబ్లీ ఎన్నికల జరుగతున్న కేరళలో, పశ్చిమ బెంగాల్లో కాంగ్రెస్ వ్యతిరేక పార్టీలకు మద్దతు ఇస్తోంది. దీన్ని బట్టి చూస్తే, ఎన్సీపీ - కాంగ్రెస్ మధ్య దూరం పెరుగుతోందని స్పష్టమవుతోంది. అయితే, థర్డ్ ఫ్రంట్ ఏర్పాటు ఏ రకంగా ముడి పడుతుంది అనే విషయంలో ఇంకా స్పష్టత రావలసి ఉంది. అలాగే, కాంగ్రెస్ లేకుండా జాతీయ స్త్గాయిలో బీజేపీ వ్యతిరేక కూటమిని ఏర్పాటు చేయడం వలన, వ్యతిరేక ఓటు చీలి అది మళ్ళీ బీజేపీకే మేలు చేస్తుందని, కాబట్టి, ప్రస్తుతం కాంగ్రెస్ సారధ్యంలోని యూపీఏని బలోపేతం చేయడమే ఉత్తమమనే అలోచన కూడా విపక్ష శిబిరం నుంచి వినవస్తోంది.
ఈ నేపధ్యంలోనే, ప్రస్తుతం యూపీఏ ఛైర్పర్సన్’గా ఉన్న సోనియా గాంధీ వయసు, అనారోగ్యం కారణంగా బాధ్యతల నుంచి తప్పుకుని పవార్’కు బాద్యతలు అప్పగించాలనే ప్రతిపాదన వచ్చిందని అంటున్నారు. అలాగే, ఇతర పార్టీలను, ముఖ్యంగా కాంగ్రెస్ నుంచి విడిపోయి సొంత కుంపటి పెట్టుకున్న మమతా బెనర్జీ సారధ్యంలోని తృణమూల్, జగన్మోహన్ రెడ్డి సారధ్యంలోని వైసీపీలను కలుపుకుని కూటమిని బలోపేతం చేయడం ద్వారా బీజేపీని దీటుగా ఎదుర్కోవచ్చనే ఆలోచనలు కూడా సాగుతున్నాయి. అయితే, ఇటు థర్డ్ ఫ్రంట్ ఏర్పాటు అయినా, యూపీఏని బలోపేతం చేయడమే అయినా, పవారే .. కేంద్ర బిందువు. ఆయన సారధ్యంలోనే ప్రత్యాన్మాయం అనేది విపక్ష శిభిరం నుంచి వినవస్తున్న ప్రస్తుత సమాచారం. మరి అదే జరిగితే రాహుల గాంధీ పరిస్థితి ఏమిటి ? గాంధీ నెహ్రూ కుటుంబం పరిస్థితి ఏమిటి? ఏ ప్రత్యేక ప్రాధాన్యత లేకుండా అందరిలో ఒకరిగా ఫస్ట్ ఫ్యామిలీ సర్దుకు పోతుందా? అంటే..చివరకు ఏమవుతుందో .. ఇప్పుడే చెప్పలేమని రాజకీయ విశ్లేషకులు భావిస్తున్నారు.
.JPG)
తెలంగాణ రాష్ట్ర బడ్జెట్ 2021-22ను ఆర్థిక మంత్రి హరీష్ రావు, ఈ నెల18న సభలో ప్రవేశ పెడతారు.కరోనా కారణంగా, ప్రస్తుత ఆర్థిక సంవత్సరం (2020-21)లో ఎదురైన ఆర్థిక ఇబ్బందుల నేపధ్యంగా ప్రవేశపెడుతున్న బడ్జెట్ కావడంతో సహజంగానే అందరిలోనూ ఆసక్తి నెలకొంది.
గతంలో అనేక సందర్భాలలో ముఖ్యమంత్రి కేసీఆర్,ఆర్థిక మంత్రి హరీశ రావు, కరోనా కారణంగా రాష్ట్ర ఆదాయం గణనీయంగా తగ్గిందని, పేర్కొన్నారు. అయితే, కరోనా నుంచి వేగంగా కోలుకుని, ఆర్థికంగా అంతే వేగంగా పుంజుకున్న రాష్ట్రాలలో తెలంగాణ ప్రధమ స్థానంలో ఉందని కేంద్ర ప్రభుత్వ ఆర్థిక సర్వే 2020-21 నివేదిక పేర్కొంది. పడిలేచిన కెరటంలా, తెలంగాణ ‘వీ’ ఆకారంలో ఆర్థికంగా నిలతొక్కుందని కేంద్రం జనవరి చివరి వారంలో విడుదల చేసిన ఆర్థిక సర్వేలో పేర్కొంది. అలాగే, రెవిన్యూ వసూళ్ళలో రాష్ట్రం కరోనా పూర్వస్థితికి చేరిందని కూడా సర్వే చెప్పింది.
అలాగే,రాష్ట్ర ఆర్థిక మంత్రి హరీష్ రావు కూడా ఈ మధ్య కాలంలో రాష్ట్ర ఆర్థిక పరిస్థితి పై సంతృప్తిని వ్యక్త పరిచారు. గత సంవత్సరమ జనవరి,ఫిబ్రవరి, మార్చి నెలలతో పోలిస్తే ఈ సంవత్సరం ఈ మూడు నెలల కాలంలో రాష్ట్ర ఆర్థిక వృద్ది రేటు 10 నుంచి 15 శాతం మెరుగ్గా ఉందని హరీష్ రావు ఒకటి రెండు ఇంటర్వ్యూలలో పేర్కొన్నారు.అలాగే, బడ్జెట్ విషయంలోనూ ఆయన చాల ఆశావహ దృక్పథంతోనే ఉన్నారు. బడ్జెట్ పాజిటివ్’గా ఉంటుదని, ఎవ్వరూ ఎలాంటి ఆందోళన చెందవలసిన అవసరం లేదని, సంక్షేమ పథకాలలో,ఇతరత్రా బడ్జెట్ కేటాయింపులలో ఎలాంటి కోతలు ఉండవని కూడా హరీష్ హామీ ఇచ్చారు. గత సంవత్సరంలో కొంత మేర హామీ ఇచ్చిన మేరకు అమలు చేయలేక పోయిన సొంత జాగాలలో డబల్ బెడ్ రూమ్ ఇళ్ళ నిర్మాణం, రుణ మాఫీ వంటి పథకాలను ఈ బడ్జెట్ ద్వారా అమలు చేస్తామని చెప్పారు.
అలాగే, అసెంబ్లీ బడ్జెట్ సమావేశాల సందర్భంగా గవర్నర్ తమిళి సై చేసిన ప్రసంగంలోనూ ఆశావహ దృక్పధమే వ్యక్తమైంది. ఆమె తమ ప్రసంగంలో, ప్రభుత్వం సంక్షేమ పథకాలకు పెద్ద పీట వేసిందని అన్నారు. ‘సంపద పంచాలి ,పేదలకు పంచాలి’ అనేది తమ ప్రభుత్వ విధానమని స్పష్టం చేశారు. అలాగే, పెరుగతున్న ఆదాయంలో అధికశాతం సంక్షేమానికే వెచ్చిస్తున్నామని స్పష్టం చేశారు. దీంతో బడ్జెట్’లో కొత్త పథకాలకు శ్రీకారం చుట్టే అవకాశం ఉంటుందా అన్న చర్చ జరుగుతోంది.
మరో వంక ఉద్యోగ వర్గాల్లో పీఆర్సీకి సంబంధించి ఆర్థిక మంత్రి తమ ప్రసంగంలో ప్రకటన చేస్తారా లేదా అనే ఆసక్తి నెలకొంది. అలాగే, సామాన్య ప్రజలు ఇటీవల పెరిగిన పెట్రోల్, డీజిల్, వంటగ్యాస్ ధరల భారం నుంచి మంత్రి హరీష్, ఏదైనా ఉపసమనం కలిపిస్తారా అని ఎదురు చూస్తున్నారు. గతంలో వైఎస్సార్ ముఖ్యమంత్రిగా ఉన్న సమయంలో సామాన్య ప్రజలపై వంటగ్యాస్ ధర భారాన్ని తగ్గించేందుకు కొంత మొత్తాన్ని, రూ.50(?) రాష్ట్ర ప్రభుత్వం తరపున సబ్సిడీగా ఇచ్చిన విషయాన్ని, అదే విధంగా అసెంబ్లీ ఎన్నికలు జరుగతున్న తమిళనాడులో డిఎంకే పార్టీ,తమ పార్టీని అధికారంలోకి వస్తే గ్యాస్ బండపై వంద రూపాయల సబ్సిడీ ఇస్తామని చేసిన వాగ్దానాన్ని గుర్తు చేస్తున్నారు.
ఇదిలా ఉంటే, ముఖ్యమంత్రి చంద్రశేఖర రావు, సోమవారం ఆర్థిక మంత్రి హరీష్ రావు, రాష్ట్ర ప్రభుత్వ ప్రధాన కార్యదర్శి సోమేశ్ కుమార్, ఆర్థిక శాఖ ముఖ్య కార్యదర్శి రామ కృష్ణా రావు,సలహాదారు జీఆర్ రెడ్డితో బడ్జెట్ పద్దులఫై సుదీర్ఘంగా చర్చించి తుది మెరుగులు దిద్దారు. బడ్జెట్ తుది రూపం సిద్దమైన నేపధ్యంలో ఆర్థిక శాఖ ప్రింటింగ్ ఏర్పాట్లు చేస్తోంది. ఈ నెల 18 ఉదయం మంత్రి వర్గం ఆమోదం పొందిన అనంతరం ఆర్థికమంత్రి హరీష్ రావు అదే రోజు రాష్ట్ర బడ్జెట్ 2021-22ను సభలో ప్రవేశ పెడతారు. 20, 22 తేదీల్లో బడ్జెట్పై సాధారణ చర్చ,23, 24, 25 తేదీల్లో బడ్జెట్ పద్దులపై చర్చ ఉంటుంది 26న ద్రవ్యవినిమయ బిల్లు (బడ్జెట్)పై చర్చ, సభామోదం ఉంటాయి.
అబద్ధాలు, అర్థ సత్యాలు, వ్యక్తిగత దూషణలు, అర్ధంపర్ధం లేని ఆరోపణలతో సుమారు నెలరోజులకు పైగా తెలంగాణలో సాగుతున్న పట్టభద్రుల ఎమ్మెల్సీ ఎన్నికల ప్రచారానికి శుక్రవారం సాయంత్రంతో తెర పడింది.రాష్ట్రంలోని మహబూబ్నగర్-హైదరాబాద్-రంగారెడ్డి పట్టభద్రుల నియోజకవర్గంతో పాటుగా,నల్లగొండ-ఖమ్మం-వరంగల్ స్థానానికి ఫిబ్రవరి 16 తేదీన నోటిఫికేషన్ వెలువడినా, ఎన్నికల ప్రచారం మాత్రం అంతకు చాలా ముందే అభ్యర్ధుల స్థాయిలో స్థానికంగా ఎన్నికల ప్రచారం ప్రారంభమైంది.
అధికార తెరాస, ఖమ్మం స్థానానికి సిట్టింగ్ ఎమ్మెల్సీ పల్లా రాజేశ్వర రెడ్డి పేరును ప్రకటించడంలో కొంచెం జాప్యం చేయడంతో పాటుగా, హైదరాబాద్ స్థానం నుంచి , పీవీ కుమార్తె వాణీ దేవి పేరును చివరి క్షణంలో తెరమీదకు తేవడంతో అంత వరకు కొంత స్తబ్దుగా సాగిన ప్రచారం ఆ తర్వాత వేడెక్కింది. ఉద్యోగ నియామకాల విషయంలో తెరాస కార్యనిర్వాహక అధ్యక్షుడు, మంత్రి కేటీఆర్ తప్పులో కాలేయడంతో విపక్షాలు, పోటీలో ఉన్న ప్రత్యర్ధులు, నిరుద్యోగ యువత, విద్యార్ధి సంఘాలు ఒకే సారి ఆయన మీద విరుచుకు పడ్డారు. ఆయన లెక్క తప్పని నిరుపిస్తం రమ్మని వరస సవాళ్ళు విసిరారు. దీంతో, మంత్రి నియామకా ఇష్యూని పక్కకు తప్పించేందుకు , ఐటీఐఆర్, వరంగల్ రైల్వే ఫ్యాక్టరీ వంటి సెంటిమెంటల్ ఇష్యూస్’ను తెరపైకి తెచ్చారు. అలాగే, కేంద్ర ప్రభుత్వంపై విమర్శల దాడిని పెంచారు. చివరకు పొరుగు రాష్ట్రానికి చెందిన విశాఖ ఉక్కు ఆందోళన కూడా ఎమ్మెల్సీ ఎన్నికల ప్రచారంలో భాగమైంది.
రెండు నియోజక వర్గాలలో గతంతో పోలిస్తే ఈసారి ఓటర్ల సంఖ్య రెట్టింపు అయింది. ఈసారి రెండు నియోజక వర్గాలలో కలిపి 10 లక్ష 36 వేల మంది తమ ఓటు హక్కును వినియోగించుకుంటారు. అలాగే, రెండు పట్ట భద్రుల నియోజక వర్గాల్లో 164 మంది అభ్యర్ధులు పోటీలో ఉన్నారు. గత ఎన్నికలతో పోలిస్తే ఇటు ఓటర్ల సంఖ్య, అటు అభ్యర్థుల సంఖ్యా రెట్టింపునకు పైగానే పెరగడంతో ఎన్నికలలో జోష్ పెరిగింది. దీనికితోడు అధికార, ప్రతిపక్ష పార్టీలు ప్రతిష్ఠాత్మకంగా తీసుకోవడంతో సాధారణ ఎన్నికలను తలపించే రీతిలో ప్రచారం సాగింది. ఎక్కువమంది అభ్యర్ధులు బరిలో ఉండడంతో, ప్రభుత్వ వ్యతిరేక ఓటు చీలి తమకే ప్రయోజనం జరుగుతుందని అధికార పార్టీ ఆశపడుతోంది .
దుబ్బాక, జీహెచ్ఎంసీ ఎన్నికల్లో చేదు ఫలితాలను చవిచూసిన టీఆర్ఎస్ పార్టీ ఎమ్మెల్సీ ఎన్నికలను అత్యంత ప్రతిష్ఠాత్మకంగా తీసుకుంది. ముఖ్యమంత్రి కేసీఆర్ స్వయంగా వ్యూహ రచన చేసి కేటీఆర్, హరీష్ సహా మంత్రులు,ఎమ్మెల్యేలకు స్పెసిఫిక్ బాధ్యతలు అప్పగించారు. అలాగే,కాంగ్రెస్ అభ్యర్థులు చిన్నారెడ్డి, రాములునాయక్లకు మద్దతుగా ఉత్తమ్, భట్టి, రేవంత్రెడ్డి, కోమటిరెడ్డి వెంకట్రెడ్డి తదితరులు విస్తృతంగా ప్రచారం చేశారు. బీజేపీ అభ్యర్థులు ఎన్.రాంచందర్రావు, ప్రేమేందర్రెడ్డిల తరఫున ఆ పార్టీ రాష్ట్ర అధ్యక్షుడు బండి సంజయ్, ఎంపీ అరవింద్ తదితరులు ప్రచారాన్ని వేడెక్కించారు.
ఖమ్మం స్థానం నుంచి ప్రత్యక్ష ఎన్నికల్లో తొలిసారి పోటీకి దిగిన కోదండరాంకు, టీజేఎస్ పార్టీకీ ఈ ఎన్నికలు కీలకంగా మారాయి. ఖమ్మ స్థానం నుంచి పోటీ చేస్తున్న తీన్మార్ మల్లన్న ముందస్తు వ్యూహంతో ప్రధాన పార్టీల అభ్యర్ధులకు ధీటుగా ప్రచారం సాగించారు. వామపక్షాల మద్దతుతో జయసారథి, తెలంగాణ ఇంటి పార్టీ అధ్యక్షుడు చెరుకు సుధాకర్, యువతెలంగాణ కార్యనిర్వాహక అధ్యక్షురాలు రాణీ రుద్రమ తదితరులు పోటీలో ఖమ్మం సీటును పట్టభద్రులు ఎవరికి పట్టం కడతారు అన్నది ప్రశ్నార్థకంగా మారింది. హైదరాబాద్ సీటు కూడా ఇటు అధికార తెరాసకు అటు సిట్టింగ్ సీటును నిలుపుకోవడం తో పాటుగా దుబ్బాక , జీహెచ్ఎంసి జోష్ ను కొనసాగించాలని ఆశ పడుతున్నబీజేలకే కూడా ఇజ్జత్ కీ సవాల్ గా మారింది. కాంగ్రెస్ అభ్యర్ధి పార్టీ సీనియర్ నాయకుడు సౌమ్యుడు, మాజీ మంత్రి చిన్నారెడ్డి, వామ పక్షాల మద్దతుతో పోటీ చేస్తున్న మాజీ ఎమ్మెల్సీ ప్రొఫెసర్ నాగేశ్వర్ కూడా గట్టి పోటీ ఇస్తున్నారు. సో.. చివరకు ఏమి జరుగుతుంది అంటే ఏదైనా జరగవచ్చును. ఈ నెల 14 వ తేదీన పోలింగ్ జరుగుతుంది.17 ఫలితాలు వస్తాయి .. అంతవరకు వెయిట్ అండ్ వాచ్ .
సహజంగా కష్టాల్లో ఉన్నపుడు ఎవరికైనా దేవుడు గుర్తు వస్తారు. లౌకిక వాద రాజకీయ నాయకులకు అయితే హటాత్తుగా తాము హిందువులం అనే విషయం జ్ఞప్తికి వస్తుంది. పశ్చిమ బెంగాల్ ముఖ్యమంత్రి, తృణమూల్ పార్టీ అధినాయకురాలు మమతా బెనర్జీకి కూడా తానూ హిందువును అనే విషయం ఇప్పుడు గుర్తుకొచ్చింది.
ఒకప్పుడు ఎర్ర జెండాను దిగ్విజయంగా ఎదిరించి, మార్క్సిస్టులను మట్టి కరిపించిన మమతా దీదీ ప్రస్తుతం, కాషాయ కూటమి నుంచి గట్టి సవాలును ఎదుర్కుంటున్నారు. వరసగా పదేళ్ళు పాలించడం వలన సహజంగా వచ్చిన ప్రభుత్వ వ్యతిరేకత కంటే, హిందూ ఓటు పోలరైజేషన్ ఆమెను మరింతగా భయపెడుతోంది. నిజానికి ఐదేళ్ళ క్రితం జరిగిన అసెంబ్లీ ఎన్నికల్లో కేవలం ఐదు శాతం కంటే తక్కువ ఓట్లు, మూడంటే మూడు అసెంబ్లీ సీట్లు మాత్రమే గెలుచుకున్న బీజేపీ.. 2019 లోక్ సభ ఎన్నికల్లో ఏకంగా 40 శాతం ఓట్లతో 18 స్థానాలు గెలుచుకుంది. ఈ మార్పు ఇంకా కొన్ని కారణాలు ఉంటే ఉండవచ్చును కానీ.. హిందువుల ఓటు పోలరైజ్ కావడమే ప్రధాన కారణం.
ఈ నేపధ్యంలోనే కాంగ్రెస్, తృణమూల్ కాంగ్రెస్ చివరకు కమ్యూనిస్టులు కూడా బీజేపీలో చేరారు. ఎన్నికల ప్రకటన వెలువడిన తర్వాత కూడా సిట్టింగ్ ఎమ్మెల్ల్యేలు సహా తృణమూల్ టికెట్ వచ్చిన నాయకులు కూడా బీజేపీలో చేరుతున్నారు. అనేక మంది ఇతర రంగాల ప్రముఖులు, ముఖ్యంగా ఇంతకాలం, బీజేపీని హిదుత్వ అనుకూల ‘అచ్చుత్’ (అంటారని) పార్టీగా చూసిన ‘సెక్యులర్’ ప్రముఖులు కాషాయం కప్పుకోవడంతో మమతా బెనర్జీకి కొంచెం అలస్యంగానే అయినా, తత్త్వం బోధపడింది. అందుకే ఆమె ఇప్పుడు గుళ్ళూ,గోపురాలకు తిరుగుతున్నారు. కార్యకర్తల సమావేశాల్లో తానూ హిందువునేనని, చెప్పుకుంటున్నారు.
నిజానికి ఇలా నేనూ హిందువునే అని సెక్యులర్ నేతలు బహిరంగంగా ప్రకటించుకోవడం మమతా బెనర్జీతోనే మొదలు కాలేదు. రాహుల్ గాంధీ తాను హిందువునని, జన్యుధారీ కశ్మీరీ బ్రాహ్మణుని అనీ.. తమ గోత్రం, ‘దత్తాత్రేయ’ గోత్రమని బహిరంగంగా ప్రకటించుకున్నారు. అలాగే కొద్ది రోజుల క్రితం ప్రియాంకా గాంధీ తానూ హిందువునని చెప్పుకునేందుకు ‘మౌని అమావాస్య’ సందర్భంగా అలహాబాద్ లో గంగా స్నానం చేశారు. గతంలోనూ ఆమె ఎన్నికలకు ముందు గంగా యాత్ర చేశారు. అంతవరకు ఎందుకు కొద్దిరోజుల క్రితం సిపిఐ నారాయణ విశాఖ స్వామి ఆశీస్సులు తీసుకున్నారు. చంద్రబాబు, జగన్ రెడ్డి, కేసీఆర్ ఇలా తెలుగు నేతలు అనేక మంది లౌకిక వాదానికి కాలం చెల్లిందన్న సత్యాన్ని గ్రహించి కావచ్చు ‘నేనూ హిందువును’ అంటూ ప్రకటించుకునేందుకు పోటీ పడుతున్నారు. రాముడిని తలచుకున్నా, జై శ్రీరామ్ అన్నా తమ లౌకిక వాదం మయలపడి పోతుందని భయపడిన నాయకులు ఇప్పుడు .. జై శ్రీరామ్ అనేందుకు కూడా వెనకాడడం లేదు.
దేశంలోని ఉత్తరాది రాష్ట్రాలలో అటు కాంగ్రెస్ ఇటు స్థానికంగా ఉన్న ప్రాంతీయ పార్టీలను మట్టి కరిపిస్తూ అధికారాన్ని కైవసం చేసుకుంటున్న బీజేపీ.. దక్షిణాదికి వచ్చేసరికి ఒక్క కర్ణాటకలో తప్ప ఇతర రాష్ట్రాలలో ఎన్ని ప్రయత్నాలు చేసినా ఏమాత్రం సక్సెస్ కాలేకపోతోంది. గత కొంత కాలంగా సబర్మలతో సహా అనేక అంశాలపై స్పందిస్తూ.. కేరళను టార్గెట్ చేస్తున్న బీజేపీ నాయకులు అక్కడ తమ జెండా ఎగరేయడానికి అన్ని ప్రయత్నాలు చేస్తున్నారు. తాజాగా పార్టీ పాలసీని కూడా పక్కన పెట్టి మెట్రో మ్యాన్ శ్రీధరన్ ను పార్టీలో చేర్చుకుని ఆయనే తమ సీఎం అభ్యర్థి అని ప్రకటించిన 24 గంటలలో యూ టర్న్ తీసుకున్నారు.
ఇది ఇలా ఉండగా ప్రస్తుతం సీఎంగా ఉన్న కమ్యూనిస్ట్ నేత పినరై విజయన్ పై గోల్డ్ స్మగ్లింగ్ ఆరోపణలు రావడంతో.. ఈ ఎన్నికలలో ఎల్డిఎఫ్ భవిష్యత్తుపై ప్రజలు ఏ తీర్పు ఇవ్వబోతున్నారనే ఉత్కంఠ సర్వత్రా నెలకొంది ఈ నేపథ్యంలో అక్షరాస్యతలో దేశంలోనే మొదటి స్థానంలో ఉన్న ఆ రాష్ట్ర ప్రజలు ఎవరిని ఆశీర్వదిస్తారు అనే అంశంపై ప్రముఖ మీడియా సంస్థ టైమ్స్ నౌ, సీ ఓటరుతో కలిసి ఒక సర్వేను నిర్వహించారు. ఈ సర్వే ప్రకారం చూస్తే పాపం కమలనాథులు అక్కడ పవర్ చేతికి రావటం అటుంచి కనీసం రెండు మూడు అసెంబ్లీ స్థానాల్లో గెలవటం కూడా కష్టమేనని ఆ సర్వే తేల్చి చెబుతోంది.
కేరళలో ఈసారి జరిగే అసెంబ్లీ ఎన్నికలలో బీజేపీ తన హవా చాటుతుందన్న ఆ పార్టీ నేతల మాటలలో ఎలాంటి నిజం లేదని.. ప్రస్తుతానికి అది ఏమాత్రం సాధ్యం కాదని ఈ తాజా సర్వే తేల్చి చెప్పింది. అంతేకాకుండా మొత్తం 140 స్థానాలు ఉన్న కేరళలో.. ప్రస్తుత సీఎం పినరయి విజయన్ నేతృత్వంలోని లెఫ్ట్డ్ డెమొక్రటిక్ ఫ్రంట్ కు 82 సీట్లు పక్కా అని.. ఆయనే తిరిగి అధికారాన్ని నిలబెట్టుకుంటాడని సర్వే చెపుతోంది. అదే సమయంలో కాంగ్రెస్ నేతృత్వంలోని యూనైటెడ్ డెమొక్రాటిక్ ఫ్రంట్ కు 56 నుంచి 60 వరకు సీట్లు వచ్చే అవకాశం ఉందని ఈ సర్వేలో తేలింది.
అంతేకాకుండా 2016 ఎన్నికలతో పోలిస్తే ఎల్ డీఎఫ్ ఓటింగ్ శాతం కూడా కొంత పెరగటం ఇక్కడ గమనార్హం. ప్రస్తుతం సీఎంగా ఉన్న విజయన్ మరోసారి సీఎం కావాలని 43.34 శాతం మంది మొగ్గు చూపినట్లుగా సర్వేలో తేలింది. కరోనా సమయంలో విజయన్ సీఎంగా బాగా పని చేసారని ఈ సర్వే పేర్కొంది. మరోపక్క దేశ ప్రధానిగా రాహుల్ గాంధీ ఉండాలని కేరళ ప్రజల్లో 55.84 శాతం మంది కోరుకుంటున్నట్లుగా ఈ సర్వే;లో తేలింది. అయితే కేరళలో ఎలాగైనా పాగా వేయాలని పట్టుదలతో కృషి చేస్తున్న బీజేపీకి ఈసారి కూడా నిరాశ తప్పదని ఈ సర్వేలో స్పష్టం అయింది. ఈ ఎన్నికలలో బీజేపీకి రెండు సీట్లు కూడా రావటం కూడా కష్టమేనని ఈ సర్వే తేల్చింది. అయితే ఎన్నికలకు ముందు ఇలాంటి సర్వేలు బయటకు రావడం.. తరువాత అందులో కొన్ని చతికిల పడడం మనం చూస్తూనే ఉన్నాం. మరి ఈ సర్వే ఫలితాలు నిజామా అవుతాయో లేదో తేలాలంటే కొద్దీ రోజులు వెయిట్ చేయాల్సిందే.
.jpg)
రాజకీయాలు అంటేనే అదో జూదం. పూలమ్మిన చోటనే కట్టెలు అమ్మవలసి రావచ్చును. అలాంటి పరిస్థితే వచ్చినా, తలవంచుకుని పోగలిగితేనే, ఎవరైనా రాజకీయాలలో రాణించగలరు. అలాకాదని, అలిమి కానిచోట, కూడా తామే అధికులమని భావిస్తే, ఎందుకూ కాకుండా పోతారు. అలాంటి వారు ఇద్దరూ కూడా ఇప్పుడు మన కళ్ళముందే ఉన్నారు.
జయలలిత జీవించి ఉన్నత కాలం, ఆమె నెచ్చలిగా పేరొందిన శశికళ, తమిళ రాజకీయాల్లో ఓ వెలుగువెలిగారు. కొన్ని విషయాల్లో జయలలిత కంటే, ఆమె మోర్ పవర్ఫుల్ లేడీ అనిపించుకున్నారు. ముఖ్యమంత్రులు, మంత్రులు కూడా ఆమె ముందు చేతులు కట్టుకుని నిలుచున్నారు.ఆమెకు పాదాభివందనాలు చేశారు. అలాగే జయ మరణం తర్వాత ఆమె పరిస్థితి ఏమిటో కూడా వేరే చెప్పవలసిన, అవసరం లేదు. జైలు పాలయ్యారు. సర్వం తానై నడిపించిన పార్టీ నుంచి బహిష్కరణకు గురయ్యారు. జయ ఉన్నంత వరకు తన వారుగా ఉన్న వారందరూ కానివారయ్యారు. ఒంటరిగా మిగిలారు.
నిజానికి నాలుగేళ్ళు జైలు జీవితం గడిపిన తర్వాత కూడా ఆమె తలచుకుంటే.. రాష్ట్ర రాజకీయాలలో, ముఖ్యంగా అధికారంలో ఉన్న డిఎంకే కూటమిలో అలజడి సృష్టించగలరు. ఎన్నికలలో ఆమె గెలవక పోవచ్చును కానీ.. తనను కాదన్న అన్నాడిఎంకేను ఓడించగలరు. అయిన ఆమె అందుకు విరుద్ధంగా రాజకీయాలకు వీడ్కోలు పలికి మౌనంగా పక్కకు తప్పుకున్నారు. రాజకీయ సన్యాసం ప్రకటించారు. ఉమ్మడి శతృవు డిఎంకే ను ఓడించేందుకు అన్నా డిఎంకే కూటమి పోటీ చేయాలని, కూటమి ఐక్యతను దెబ్బతీయరాదనే ఉద్దేశంతోనే ఆమె రాజకీయ సన్యాసం ప్రకటించారు.
శశికళ మౌనంగా వెళ్లి పోవడం వెనక ఇంకా అనేక కారణాలున్నా ,అసలు కారణం ఆమె, రాజకీయ విజ్ఞత, వివేకం. ఆమె జైలుకు వెళ్ళిన సమయంలో జయలలిత సమాధి వద్ద ఎంత కసిగా, కోపంగా ‘మౌన’ ప్రతిజ్ఞ చేశారో చూశా. అలాంటి ఆమె ఇప్పుడు ఇలా ‘మౌనం’గా వెనకడుగు వేశారంటే, అది ఆలోచించ వలసిన విషయమే.ఆమె వ్యుహతంకంగానే సంచలన నిర్ణయం తీసుకున్నారు. ఇప్పటికే అనేక మంది అనేక కోణాల్లో శశికళ సంచలన నిర్ణయాన్ని విశ్లేషించారు.జైలు జీవితం తర్వాత కూడా అన్నా డిఎంకే నాయకులు తనను అగ్రనేతగా అంగీకరించక పోవడం, అమిత్ షా చెప్పినా.. అన్నా డిఎంకే నాయకులు ఆమెను, మేనల్లుడు దినకరన్’ను కులం పేరున, కుటుంబం పేరున దూరం చేయడం, తిరిగి పార్టీలోకి తీసుకోకపోవడంతో ఆమె మనసు కష్టపెట్టుకుని, సన్యాస నిర్ణయం తీసుకున్నారని కొందరంటున్నారు. పార్టీ మీద పట్టు లేదని, చరిష్మా అసలే లేదని, అందుకే ఆమె అలా నిశ్శబ్ధంగా రాజకీయ సన్యాసం స్వీకరించారని ఇంకొందరు విశ్లేషించారు. ఈ విశ్లేషణలో కొంత నిజం ఉంటే ఉండవచ్చును.. కానీ ఆమె గతాన్ని, నైజాన్ని గుర్తు చేసుకుంటే ఆమె స్ట్రైక్ బ్యాక్ వ్యూహంతోనే ఒకడుగు వెనక్కివేశారని ఆమెతో సన్నిహితంగా మెలిగినవారు, ఆమె రాజకీయ చాణక్యం తెలిసిన వారు అంటారు.
నిజానికి జైలులో ఉన్న కాలంలో కానీ, జైలు నుంచి విడుదలై వచ్చిన తర్వాత కానీ, ఆమె రాజకీయ సన్యాసం వైపు అడుగులు వేస్తున్నట్లు కనిపించలేదు. బెంగుళూరు జైలు నుంచి విడుదలై చెన్నైలో ప్రవేశించిన నప్పుడు ఆమె పెద్ద కాన్వాయ్ తో తమ కారుకు అన్నాడిఎంకే జెండాతోనే ఎంటరయ్యారు. అలా ఎంట్రీలోనే రాజకీయ ఆకాంక్షను వెంట తెచ్చుకున్నారు. చివరకు ‘సన్యాస’ ప్రకట చేసే వరకు కూడా ఆమె రాజకీయ కార్యకలాపాలు సాగిస్తూనే ఉన్నారు. అటు ఢిల్లీని ఇటు చెన్నైనికూడా కదిల్చారు. అంతేకాదు, రాజకీయాలపై విరక్తితో కాదు, రాజకీయ కసితో, ఉమ్మడి శత్రువు (డిఎంకే) ను ఓడించేందుకే తాను రాజకీయాలనుంచి తపుకుంటున్నట్లు చెప్పారు.
సో .. సన్యాసం తీసుకోవాలనే ఆలోచన, రాజకీయవ్యూహం లోంచి పుట్టిందే కానీ,వైరాగ్యంతో పుట్టింది కాదు ,అన్నవిశ్లేషణ వాస్తవానికి ఇంకొంత దగ్గరగా ఉందని అనుకోవచ్చును. ఇది ‘కామా’నే కాని ‘ఫుల్స్టాప్’ కాదని అంటున్నారు. ముఖ్యమంత్రి ఎడప్పాడి కే. పళని స్వామి (ఈపీఎస్) ఆమెను పార్టీలోకి అనుమతిస్తే తన కుర్చికీ ఎసరు పెడతారనే భయంతోనే,, ఆమె ఎంట్రీని అడ్డుకున్నారు. ఉప ముఖ్యమంత్రి పన్నీర్ సెల్వం, శశికళ ఒకే సామజిక వర్గానికి చెందిన వారు కావడం కూడా, ముఖ్యమంత్రి ఈపీఎస్’ భయానికి కారణంగా పేర్కొంటారు. అందుకే ఆయన, ‘మన్నార్గుడి’ ఫ్యామిలీని బూచిగా చూపించి, ఆమెను దూరంగా ఉంచారని పార్టీలో ఒక వర్గం గట్టిగా విశ్వసిస్తుంది. అయితే ఆమె శక్తియుక్తులను కూడతీసుకుని పులిలా పంజా విసిరేందుకే ఆమె వ్యూహాత్మకంగా ఒక అడుగు వెనక్కి వేశారు కావచ్చును అని కూడా, తమిళ రాజకీయ వర్గాల్లో ఒక చర్చ జరుగుతోంది.
గతంలో ఆమె జయలలితతో విబేధాలు వచ్చిన సమయంలో కూడా ఇలాగే కొద్ది కాలం మౌనంగా తెర చాటుకు వెళ్లి పోయారు. కొద్ది కాలంలోనే మళ్ళీ ‘పోయస్ గార్డెన్’లో ప్రత్యక్షమయ్యారు. జయలలిత స్వయంగా ఆమెను వెనక్కి పిలుపించుకోవలసిన పరిస్థితులను సృష్టించారు. అలా మళ్ళీ చక్రం తిప్పారు. జయలలిత మరణం వరకు ఆమె అందరికీ చిన్నమ్మగా అమ్మకు పెద్దమ్మగా సర్వం తానై నిలిచారు. చివరకు జయ అంత్యక్రియల్లో కూడా ఆమెదే పై చేయిగా కనిపించింది.
జయలలిత చనిపోయిన సందర్భంలోనే అన్నా డిఎంకే ఎమ్మెల్ల్యేలో సుమారు 30 మంది వరకు ఆమెకు మద్దతుగా ఉన్నారన్న వార్తలొచ్చాయి. నిజానికి,ఇప్పటికి కూడా ఒక్క అన్నా డిఎంకే లోనేకాదు,డిఎంకే ఇతర పార్టీలలో కూడా ఆమె అవసరం ఉన్న వాళ్ళు ఉన్నారు. కొన్ని కొన్ని నియోజకవర్గాల్లో ‘మన్నార్గుడి’ ఫ్యామిలీ మద్దతు లేకుండా గెలిచే అవకాశం లేదు.
ఇవ్వన్నీ నిజమే అయినా.. అన్నీ ఉండి, ఎవరు లేని శశికళలో, ఇంకా ఎవరి కోసం తాపత్రయ పడాలి? అనే ప్రశ్న జనించి ఉంటే, ఆమె రాజకీయ సన్యాసం నిజం కావచ్చును. ఎందుకంటే ఆమె నెచ్చలి, జయలిత లేరు, భర్త అంతకంటే ముందే చనిపోయారు, పిల్లలు లేరు... పైగా నాలుగేళ్ళ జైలు జీవితం ఆమెలో మార్పు తెచ్చి ఉండవచ్చును. ఈ వయస్సులో తనవారంటూ ఎవరు లేని తనకు రాజకీయాలు ఎందుకు ? శేష జీవితాన్ని ఇలా సాగిద్దామనే ఆలోచన నిజంగా వచ్చి ఉంటే, ఆమె సన్యాసం సత్యం అయినా కావచ్చును, కాకపోనూ వచ్చును. కానీ శశికళ... ఆమెను అర్థం చేసుకోవడం, అంచనా వేయడం , అంత తేలిగ్గా అయ్యే పని కాదు..
కాంగ్రెస్ పార్టీలో రగులుతున్న అంతర్యుద్ధం కొత్త పుంతలు తొక్కుతోంది. మరిన్ని మలుపులు తిరుగుతోంది.ఇటీవల జమ్మూలో సమావేసమైన జీ 23 నాయకులు అసమ్మతి స్వరాన్ని పెంచారు. కాంగ్రెస్ అధినాయకత్వం పై నేరుగా అస్త్రాలు సంధించారు. రాహుల్ గాంధీ పేరు చెప్పకుండానే, ఆయన నాయకత్వానికి పనికిరాడని తేల్చి చెప్పారు. ఎవరైనా పార్టీ అధ్యక్షుడు అయితే కావచ్చును, కానీ, ప్రజానాయకుడు కాలేడని, రాహుల గాంధీ ప్రజానాయకుడు కాదు కాలేరు,అని ప్రధానమంత్రి నరేంద్ర మోదీ తరచూ రాహుల్ గాంధీని ఉద్దేశించి చేసే ‘నామ్’ధారీ వ్యంగ్యాస్త్రాన్నే కాంగ్రెస్ సీనియర్ నాయకులు కూడా సందించారు.
ఇక అక్కడి నుంచి విధేయ, అసమ్మతి వర్గాల మధ్య మాటల యుద్ధం ఎదో ఒక రూపంలో సాగుతూనే వుంది. అదే క్రమంలో పశ్చిమ బెంగాల్ అసెంబ్లీ ఎన్నికల్లో కాంగ్రెస్ పార్టీ, కరుడు కట్టిన ముస్లిం మతోన్మాది, అబ్బాస్ సిద్దిఖీతో కాంగ్రెస్ పార్టీ చేతులు కలపడం అసమ్మతి నాయకులకు మరో అస్త్రాన్ని అందించింది. విషయంలోకి వెళితే, ఇటీవల పశ్చిమ బెంగాల్ అసెంబ్లీ ఎన్నికల ప్రచారంలో భాగంగా లోక్’సభలో కాంగ్రెస్ పక్ష నాయకుడు, పశ్చిమ బెంగాల్ పీసీసీ అధ్యక్షుడు అధీర్’రంజన్ చౌదరి, ముస్లిం మత ప్రచారకుడు, అబ్బాస్ సిద్దిఖీతో వేదిక పంచుకున్నారు.అంతకు ముందే వామ పక్ష కూటమితో పొత్తు కుదుర్చుకున్న కాంగ్రెస్ పార్టీ, సిద్ధిఖీ సారధ్యంలోని ఇండియన్ సెక్యులర్ ఫ్రంట్ (ఐఎస్ఎఫ్)ను కూటమిలో చేర్చుకుంది. ఇలా కాంగ్రెస్ వర్కింగ్ కమిటీ (సీడబ్ల్యూసీ) అమోదం లేకుండా మతోన్మాద ఐఎస్ఎఫ్’ తో ఎన్నికల పొత్తు పెట్టుకోవడం ఆ పార్టీ నాయకుడు,సిద్ధిఖీతో పీసీసీ చీఫ్ వేదిక పంచుకోవడం పై అసమ్మతి నేతలు మండి పడుతున్నారు.
ఇలా సిద్దిఖీతో వేదిక పంచుకోవడం పార్టీ మౌలిక సిద్ధాంతాలకు వ్యతిరేకం అంటూ అసమ్మతి వర్గానికి చెందిన కీలక నేత, రాజ్యసభ సభ్యుడు,ఆనంద్ శర్మ మండిపడ్డారు. అంతే కాదు, సిద్ధిఖీ సారధ్యంలోని ఇండియన్ సెక్యులర్ ఫ్రంట్ (ఐఎస్ఎఫ్)తో జనవరిలో కుదుర్చుకున్న పొత్తుకు కాంగ్రెస్ వర్కింగ్ కమిటీ (సీడబ్ల్యూసీ)అమోదం లేదని ఆనంద్ శర్మ, అభ్యంతరం వ్యక్త చేశారు. పార్టీ విశ్వసించే లౌకిక వాదానికి కాంగ్రెస్ అధిష్టానం తీసుకున్న నిర్ణయం గొడ్డలి పెట్టని ఆయన తీవ్రంగా స్పందించారు.
శర్మ వ్యాఖ్యలపై అధీర్ రంజన్ చౌదరి అంతే ఘాటుగా ప్రతిస్పందించారు. “నిజాలు తెలుసుకోండి ఆనంద్ శర్మ జీ” అంటూ ఆయన వరుస ట్వీట్లు చేశారు. వ్యక్తిగత ప్రయోజనాలు పక్కనపెట్టి, ప్రధానిని పొగిడి టైమ్ వేస్ట్ చేయకండంటూ ఆయన ఓ ట్వీట్లో అన్నారు. ఆనంద్ శర్మ అనవసరంగా కాంగ్రెస్ను లక్ష్యంగా చేసుకుంటున్నారని, ఈ అంశాన్ని పెద్దది చేసి చూపిస్తున్నారని విమర్శించారు. ఆయన ఉద్దేశాలు సరైనవే అయితే నేరుగా తనతో మాట్లాడ వలసిందని అన్నారు. బెంగాల్లో సీపీఐ(ఎం) కూటమికి నేతృత్వం వహిస్తోంది. అందులో కాంగ్రెస్ ఓ భాగం. మతతత్వ, విభజన రాజకీయాలు చేస్తున్న బీజేపీకి చెక్ పెట్టడానికే ఈ కూటమి అని మరో ట్వీట్లో అధిర్ రంజన్ అన్నారు. అక్కడతోనూ ఆగలేదు ... ట్వీట్ల మీద ట్వీట్లు సంధిస్తూ, ఆనంద్ శర్మ, బీజేపీ మత విభజన, అజెండాను బలపరుస్తున్నారని, పరోక్షంగా జీ23 నాయకులు బీజేపీకి ప్రయోజనం చేకూరుస్తున్నారని ఆరోపించారు.అంతే కాదు, క్షేత్ర స్థాయి వాస్తవ పరిస్థితులు తెలియకుండా, ఆనంద్ శర్మ పార్టీ మీద దండెత్తడం ఉచితం కాదని చౌదరి ఎదురుదాడి చేశారు.
అసమ్మతిలో అసమ్మతి. ఇదలా ఉంటే, కాంగ్రెస్ పార్టీ సమూల పక్షాళన కోరుతూ సోనియా గాంధీకి,గత సంవత్సరం జీ 23గా ప్రాచుర్యం పొందిన సీనియర్ నాయకులు రాసిన లేఖపై సంతకాలు చేసిన నాయకుల్లో నలుగురు,జమ్మూలోసమావేసమైన నాయకుల తాజా నిర్ణయాలు, వ్యాఖ్యలు,విమర్శల పట్ల అసంతృప్తిని వ్యక్త పరిచారు. గత సంవత్సరం సోనియా గాంధీకి రాసిన లేఖలో ప్రస్తావించిన అంశాలకు కట్టుబడి ఉన్నామని, అయితే, జీ 23లోని కొందరు సహచరులు, ఇటీవల గీతదాటి చేస్తున్న వ్యాఖ్యలు, విమర్శలను తాము సమర్ధించడం లేదని ఆ నలుగురు పేర్కొన్నారు. ఇందులో ముఖ్యంగా, రాజ్యసభ మాజీ డిప్యూటీ చైర్మన్, పీజే కురియన్ అయితే, “కాంగ్రెస్ పార్టీని బలోపేతం చేసేందుకు అవసరమైన సంస్కరణలు తెచ్చేందుకు చేసే ప్రయత్నాలను పూర్తిగా సమర్దిస్తాను, కానీ, ‘లక్ష్మణ రేఖ’ దాటితే ఒప్పుకునేది లేదు”అని అసమ్మతిలో అసమ్మతికి తెర తీశారు.అలాగే, ఢిల్లీ మాజీ ముఖ్యమంత్రి షీలా దీక్షిత్ కుమారడు, మాజీ ఎంపీ సందీప్ దీక్షిత్,మధ్య ప్రదేశ్ సీనియర్ కాంగ్రెస్ నాయకుడు అజయ్ సింగ్’ కూడా గులాం నబీ ఆజాద్, కపిల్ సిబల్, ఆనంద్ శర్మ, మనీష్ తివారీ వంటి జీ 23 కీలక నేతలు అధినాయకత్వంపై చేసిన వ్యాఖ్యలను తప్పు పట్టారు. అలాగే, పార్టీ సీనియర్ నాయకుడు కేంద్ర మాజీమంత్రి వీరప్ప మొయిలీ కూడా,గత సంవత్సరం పార్టీ సీనియర్ నాయకులు ఒక పరిమిత లక్ష్యంతో సోనియా గాంధీకి లేఖ రాయడం జరిగిందని, ఆ పేరున జరుగతున్న కార్యక్రమాలు లేఖ సంకల్పానికి విరుద్ధమని అన్నారు.
జీ 23 కార్యకలాపాలపై రాహుల్ గాంధీ కూడా పరోక్షగా స్పందించారు, ఒకప్పుడు ఎన్ఎస్’యుఐ, యూత్ కాంగ్రెస్’ కు సంస్థాగత ఎన్నికలు వద్దన్న వారే ఇప్పుడు ఇంకోలా మాట్లాడుతున్నారని పరోక్షంగానే అయినా సంస్థాగత ఎన్నికలు నిర్వహించడంతో పాటుగా, పార్టీ పక్షాలనకు తమ కుటుంబం వ్యతిరేకం కాదని, అందుకు సిద్ధంగా ఉన్నామని చెప్పారు. ఈ నేపధ్యంలో కాంగ్రెస్ పార్టీలో చెలరిగిన కలకలం ఇక ముందు ఏమవుతుందో .. ఇంకెన్ని మలుపులు తిరుగుతోందో ..చూడవలసిందే కానీ ఉహించలేము.
పంచతంత్రంగా పిలుచుకుంటున్న ఐదు రాష్టాల అసెంబ్లీ ఎన్నికల్లో అద్భతం జరగబోతోంది. కేంద్ర ఎన్నికల సంఘం నాలుగు రాష్ట్రాలు, కేంద్రపాలిత ప్రాంతం పుదుచ్చేరి అసెంబ్లీ ఎన్నికల షెడ్యూలు ప్రకటించిన వెంటనే, వివిధ సంస్థలు అసెంబ్లీ ఎన్నికలు జరిగే అస్సాం. పశ్చిమబెంగాల్, తమిళనాడు రాష్ట్రాలతో పాటుగా కేరళలోనూ ఒపీనియన్ పోల్స్ నిర్వహించాయి. ఆ ఒపీనియన్ పోల్ ఫలితాలు నిజంగా నిజం అయితే, కేరళలో మళ్ళీ సీపీఎం సారధ్యంలోని వామపక్ష కూటమి అధికారంలోకి వస్తుంది. ఇదే ఆ అద్భుతం.
ఎందుకంటే, గత నాలుగు దశాబ్దాలలో కేరళ అసెంబ్లీ ఎన్నికల్లో ఒకే కూటమి వరసగా రెండవసారి అధికారంలోకి వచ్చిన చరిత్ర లేనే లేదు. ఒక సారి ఎల్డీఎఫ్ అధికారంలోకి వస్తే ఐదేళ్ళ తర్వాత కాంగ్రెస్ సారధ్యంలోని ఐక్య ప్రజాస్వామ్య కూటమి(యూడీఎఫ్) అధికారంలోకి రావడం, దేవభుమిలో దైవ నిర్ణయమా అన్నట్లుగా ప్రతి ఎన్నికల్లోనూ అధికారం చేతులు మారుతూ వస్తోంది. అలాంటిది, ఈసారి ఒపీనియన్ పోల్స్ నిజమై వరసగా రెండవసారి వామపక్ష కూటమి అధికారంలోకి వస్తే, అది చరిత్రే అవుతుంది.
ఇక ఒపీనియన్ పోల్స్ విషయానికి వస్తే, జాతీయ న్యూస్ ఛానెల్ ఏబీపీ, సీ ఓటర్ సంస్థలు సంయుక్తంగా ఒపీనియన్ పోల్స్ నిర్వహించాయి. ఈ సర్వే ప్రకారం, 140 స్థానాలున్న కేరళ అసెంబ్లీలో వామపక్ష కూటమికి 83 నుంచి 91 స్థానాలు, యూడీఎఫ్ కూటమికి 47 నుంచి 55 స్థానాలు మాత్రమే దక్కుతాయని తెలుస్తోంది. కాంగ్రెస్ అగ్రనేత రాహుల్ గాంధీ ప్రాతినిధ్యం వహిస్తున్న రాష్ట్రంలో ఇలా జాతకాలు తిరగబడడంపై సోషల్ మీడియాలో,’లెగ్ మహిమ’ లాంటి జోక్స్ ట్రోలవుతున్నాయి. అయితే 2016లో జరిగిన ఎన్నికల్లో కేవలం 47 సీట్లకే పరిమితం అయిన కాంగ్రెస్’కు ఈసారి ఒకటీ అరా సీట్లు ఎక్కువస్తే, రావచ్చును. అదే కాంగ్రెస్’కు కాసింత ఊరట. అదలా ఉంటే, పశ్చిమ బెంగాల్లో సైతం పట్టు సాధించిన బీజేపే, కేరళలో మాత్రం పట్టు కాదు కదా, పట్టుమని పది సీట్లు తెచ్చుకునే స్థితిలో లేదు. నిజానికి, దేశంలో బీజేపీకి అసలు ఏ మాత్రం మింగుడు పడని రాష్ట్రాలు ఎవైన ఉన్నాయంటే కేరళ, ఆంధ్ర ప్రదేశ్ రాష్ట్రాల పేర్లే ప్రముఖంగా వినిపిస్తాయి. ఈ సారి కూడా కమల దళం కేరళలో కాలు పెట్టె పరిస్తి లేదని సర్వే ఫలితాలు చెపుతున్నారు. ఎప్పటిలానే ఇప్పడు కూడా బీజేపీకి సున్నా నుంచి రెండు సీట్లు వచ్చే అవకాశం ఉందని, సర్వేస్వరుల అభిప్రాయంగా ఉంది. కేరళలో మొత్తం 140 స్థానాలకు ఏప్రిల్ 6 తేదీన ఒకే విడతలో పోలింగ్ జరుగుతుంది. మే 2 తేదీన ఫలితాలు వెలువడతాయి. కేరళ ఎలక్షన్ పై యావత్ దేశం ఆసక్తి కనబరుస్తోంది.
కేంద్ర ఎన్నికలసంఘం ‘పాంచ్ పటాక’ గంట కొట్టింది. అస్సాం, పశ్చిమ బెంగాల్, కేరళ, తమిళనాడు రాష్ట్రాలు, పుదుచ్చేరి కేంద్ర పాలిత ప్రాంతాల అసెంబ్లీ ఎన్నికల షెడ్యూలును కేంద్ర ఎన్నికల సంఘం విడుదలచేసింది. ఎన్నికల గంట మోగడంతో మొదలైన మరో భారత ‘మినీ’ సంగ్రామానికి మే 12 తేదీన జరిగే ఓట్ల లెక్కింపుతో తెర పడుతుంది.ఈలోగా వివిధ అంచల్లో పోలింగ్ జరుగుతుంది. నాలుగు రాష్ట్రాలు, ఒక కేంద్ర పాలిత ప్రాంతం ఓటరు తీర్పుకు వెళుతున్నా, అందరి దృష్టి, ముఖ్యంగా ప్రాంతీయ పార్టీల ఏలుబడిలో ఉన్న ఉభయ తెలుగు రాష్ట్రాలు, మరీ ముఖ్యంగా ఇప్పటికే బీజేపీ కన్నుపడిన తెలంగాణ రాష్ట్ర ప్రజలు, రాజకీయ పార్టీల దుష్టి మాత్రం పశ్చిమ బెంగాల్ పైనే వుంది.
పశ్చిమ బెంగాల్లో ‘అద్భుతం’ జరిగి బీజేపీ విజయం సాధిస్తే, ఇక కమల దళం ఫోకస్, తెలంగాణకు షిఫ్ట్ అవుతుంది. ఇది అందరికీ తెలిసిన బహిరంగ రహస్యం. ఈ నేపధ్యంలో బెంగాల్ అసెంబ్లీ ఎన్నికల ఫలితాలు ఎలా ఉంటాయి అనే విషయంలో రాష్ట్ర రాజకీయ వర్గాల్లో జోరుగా చర్చ జరుగుతోంది. బెంగాల్లో బీజేపీ గెలిస్తే, ఇప్పటికే అంతర్గత కుటుంబ కలహాలతో సతమతవుతున్న తెరాస నాయకత్వానికి మరిన్నితిప్పలు తప్పవన్న మాట అంతఃపుర వర్గాలలో సైతం వినవస్తోంది.
పశ్చిమ బెంగాల్’లో ఎలాగైతే కమలదళం ఓ వంక తమ ట్రేడ్ మార్క్, హిందుత్వ రాజకీయాలు సాగిస్తూ, మరో వైపు నుంచి ‘ఆకర్ష్’ అస్త్రంతో అధికార పార్టీని నిర్వీర్యం చేసిన విధంగానే, ఇక్కడ కూడా ఫిరాయింపులను ప్రోత్సహింఛి పార్టీని నిట్టనిలువునా చీల్చే ప్రమాదాన్ని కొట్టివేయలేమని పార్టీ వర్గాలు కూడా అనుమానం వ్యక్త పరుస్తున్నాయి.
ఇప్పటికే తెలంగాణ బీజేపీ నాయకులు 30 మంది తెరాస ఎమ్మెల్యేలు తమ టచ్ లో ఉన్నారని బెదిరిస్తున్నారు.అది నిజం అయినా కాకపోయినా..తెరాసలో అసంతృప్తి అగ్గి రగులుతోందనేది మాత్రం ఎవరూ కాదనలేని నిజం. అంతే కాకుండా రాష్ట్రానికి వచ్చిన కేంద్రనాయకులు ఎవరిని పలకరించినా, నెక్స్ట్ టార్గెట్ తెలంగాణ అని ఎలాంటి సషబిషలు లేకుండా కుండబద్దలు కొడుతున్నారు.అందుకే, బెంగాల్లో బీజేపీ గెలిస్తే.. అనే ఊహా కూడా గులాబీ గూటిలో గుబులు పుట్టిస్తోంది. అయితే, బెగాల్’లో బీజేపీ గెలిస్తే ఒక్క తెలంగాణలోనే కాదు, దేశ రాజకీయ వాతావరణంలోనే పెను మార్పులు చోటు చేసుకుంటున్నాయని రాజకీయ విశ్లేషకులు భావిస్తున్నారు. అలాగే, దేశ ముఖ చిత్రంలో కూడా పెను మార్పులు తప్పవని అంటున్నారు. అయితే రాజకీయాలలో ఎప్పుడు ఏం జరుగుతుందో.. ఎవరూహించెదరు..
మన వంటింట్లో ఎక్కువగా ఉపయోగించే కూరగాయల్లో బంగాళాదుంప (ఆలూ) మొదటి వరుసలో ఉంటుంది. వేపుడు, కుర్మా, ఫ్రైస్ లేదా సమోసాలు.. వంటకం ఏదైనా సరే ఆలూ ఉంటే ఆ రుచే వేరు. అయితే ఇల్లాళ్లకు, వంట ప్రియులకు నిత్యం ఎదురయ్యే ఒక పెద్ద సమస్య ఏమిటంటే.. బంగాళాదుంపల పొట్టు తీసి ముక్కలుగా కోసి పక్కన పెట్టగానే అవి కొద్ది నిమిషాల్లోనే నల్లగా లేదా గోధుమ రంగులోకి మారిపోతుంటాయి. అలా రంగు మారిన దుంపలను చూస్తే వంట చేయాలనే ఉత్సాహం తగ్గడమే కాకుండా, అవి పాడైపోయాయేమోననే అనుమానం కూడా వస్తుంది. సాధారణంగా ఉదయం పూట ఆఫీసులకు, పిల్లల స్కూల్ బాక్సులకు త్వరగా వంట పూర్తి చేయాలని ముందుగానే ఆలూ ముక్కలను కోసి పెట్టుకునే వారికి ఈ సమస్య మరింత చిరాకు కలిగిస్తుంది. అసలు బంగాళాదుంప ముక్కలు అంత వేగంగా ఎందుకు నల్లగా మారతాయి? దాని వెనుక ఉన్న సైన్స్ ఏంటి? మరియు అలా మారకుండా ఎల్లప్పుడూ తెల్లగా, ఫ్రెష్గా ఉంచడానికి ఉపయోగపడే కిచెన్ సీక్రెట్స్ ఏంటో ఇప్పుడు వివరంగా తెలుసుకుందాం.
బంగాళాదుంపలు నల్లగా మారడానికి ప్రధాన కారణం ఎంజైమాటిక్ బ్రౌనింగ్ (Enzymatic Browning) అనే సహజమైన రసాయన చర్య. బంగాళాదుంపల్లో పాలీఫెనాల్ ఆక్సిడేస్ (Polyphenol Oxidase) అనే ప్రత్యేకమైన ఎంజైమ్తో పాటు ఫినోలిక్ సమ్మేళనాలు సమృద్ధిగా ఉంటాయి. మనం దుంపను చాకుతో కోసినప్పుడు, దానిలోని కణాలు దెబ్బతిని లోపలి భాగం నేరుగా గాలిలోని ఆక్సిజన్తో స్పర్శలోకి వస్తుంది. ఈ ఆక్సిజన్, ఎంజైమ్లతో చర్య జరపడం వల్ల మెలనిన్ (Melanin) అనే నల్లటి వర్ణద్రవ్యం ఉత్పత్తి అవుతుంది. ఇదే ఆలూ ముక్కలు రంగు మారడానికి అసలు కారణం. ఈ మార్పు వల్ల రుచిలో పెద్దగా తేడా రాకపోయినా, చూడటానికి అస్సలు బాగుండవు. పైగా ఇలా గాలికి ఎక్కువసేపు ఉంచడం వల్ల అందులోని కొన్ని నీటిలో కరిగే పోషకాలు కూడా నశించే అవకాశం ఉంది.
ఈ సమస్య నుంచి బయటపడటానికి మన వంటింట్లోనే దొరికే కొన్ని సులువైన పదార్థాలతో అద్భుతమైన పరిష్కారాలు కనుగొనవచ్చు. మొదటిది మరియు అత్యంత ప్రభావవంతమైన పద్ధతి చల్లని నీటి చిట్కా . బంగాళాదుంపలను కోసిన వెంటనే గాలి తగలకుండా ఐస్ వాటర్ లేదా చల్లని నీళ్లు ఉన్న గిన్నెలో మునిగేలా వేయాలి. నీరు ఆక్సిజన్కు, ఆలూ ముక్కలకు మధ్య ఒక కవచంలా పనిచేసి ఆక్సీకరణ ప్రక్రియను అడ్డుకుంటుంది. నీటిలో 10 నుంచి 15 నిమిషాల పాటు నానబెట్టడం వల్ల ముక్కలలో ఉండే అదనపు స్టార్చ్ బయటకు వచ్చి, ఫ్రైస్ చేసినప్పుడు అవి మరింత క్రిస్పీగా వస్తాయి. ఇంకా ఎక్కువ సమయం అంటే 4 నుంచి 5 గంటల పాటు నిల్వ ఉంచాలనుకుంటే, ఆ నీటిలో అర టీస్పూన్ నిమ్మరసం లేదా కొద్దిగా తెల్ల వెనిగర్ (White Vinegar) కలపాలి. నిమ్మరసంలోని విటమిన్ సి (ఆస్కార్బిక్ యాసిడ్) మరియు వెనిగర్లోని అసిడిటీ ఎంజైమ్ల పనితీరును పూర్తిగా నిరోధించి ముక్కలు గంటల తరబడి తెల్లగా మెరిసేలా చేస్తాయి.
మరొక అద్భుతమైన మార్గం ఉప్పు నీటి శుద్ధి . ఒక లీటర్ నీటిలో ఒక టీస్పూన్ ఉప్పు కలిపి అందులో కోసిన బంగాళాదుంప ముక్కలను వేసి ఉంచడం వల్ల అవి రంగు మారవు. ఉప్పు నీరు ఎంజైమాటిక్ చర్యను మందగించేలా చేస్తుంది. అలాగే, వంటను మరుసటి రోజుకి ప్లాన్ చేసుకుంటుంటే, ముక్కలను నీటిలో వేసి గాలి చొరబడని ఎయిర్ టైట్ కంటైనర్లో ఉంచి ఫ్రిజ్లో పెడితే 24 గంటల పాటు అవి ఏమాత్రం రంగు మారకుండా తాజాగా ఉంటాయి. ఒకవేళ మీరు ముక్కలను నీటిలో వేయకూడదు అనుకుంటే, వాటిపై కొద్దిగా వంటనూనె (Cooking Oil) రాసి గాలి తగలకుండా ఉంచవచ్చు. ఈ చిన్న చిన్న కిచెన్ హాక్స్ పాటించడం వల్ల వంటగదిలో మీ సమయం ఆదా అవ్వడమే కాకుండా, బంగాళాదుంపలతో చేసే ప్రతి వంటకం ఎంతో రుచిగా, ఆకర్షణీయంగా మారుతుంది.
[ Potatoes, Potato Browning, Enzymatic Browning, Polyphenol Oxidase, Potato Storage, Kitchen Hacks, Prevent Potato Browning, Cold Water Soak, Lemon Juice, White Vinegar ]
మనం రోజూ ఉదయాన్నే నిమ్మరసం తాగుతున్నప్పుడు లేదా నిమ్మకాయతో చేసిన వంటకాలను తింటున్నప్పుడు ఎప్పుడో ఒకసారి పొరపాటున నిమ్మ విత్తనం (నిమ్మ గింజ) నోట్లోకి వెళ్లడం, దాన్ని అనుకోకుండా మింగేయడం మనందరికీ ఏదో ఒక సందర్భంలో జరిగే సాధారణ విషయమే. అయితే, అలా గింజ లోపలికి వెళ్లగానే చాలామందిలో ఒకరకమైన అపరిమితమైన భయం, ఆందోళన మొదలవుతాయి. చిన్నప్పుడు సరదాగా విన్నట్లు కడుపులో చెట్టు మొలుస్తుందేమోననే అమాయకపు ఆలోచన నుంచి, ఆ గింజ కడుపులోని ప్రేగుల్లో ఎక్కడైనా అడ్డుపడి తీవ్రమైన ప్రమాదానికి దారితీస్తుందేమోననే ఆరోగ్య భయాల వరకు మనస్సును ఎన్నో ప్రశ్నలు చుట్టుముడతాయి. కానీ, నిజంగానే మన జీర్ణవ్యవస్థలోకి నిమ్మ గింజ వెళ్లినప్పుడు మన శరీరంలో అసలు ఏం జరుగుతుంది? దానివల్ల ఆరోగ్యానికి ఏమైనా ముప్పు ఉందా లేదా అనేది సైన్స్ ఆధారంగా క్షుణ్ణంగా తెలుసుకోవడం ఎంతైనా అవసరం.
మన మానవ జీర్ణవ్యవస్థ చాలా శక్తివంతమైనది, అద్భుతమైనది. నిమ్మ గింజ పరిమాణం సాధారణంగా చాలా చిన్నదిగా, మృదువైన లేదా సులభంగా జారే ఆకారంలో ఉంటుంది. మనం దాన్ని మింగిన వెంటనే అది అన్నవాహిక గుండా ప్రయాణించి నేరుగా జీర్ణాశయంలోకి చేరుకుంటుంది. మన జీర్ణాశయం (Stomach) లో అత్యంత శక్తివంతమైన హైడ్రోక్లోరిక్ ఆసిడ్ (HCl) ఉత్పత్తి అవుతుంది. ఈ ఆమ్లం జీర్ణక్రియలో కీలక పాత్ర పోషిస్తుంది. నిమ్మ గింజ పైన గట్టి పొర (Seed Coat) ఉన్నప్పటికీ, కడుపులోని శక్తివంతమైన ఆమ్లాలు దాని తీవ్రతను తగ్గిస్తాయి. నిజానికి నిమ్మ గింజలు విషపూరితమైనవి కావు. వాటిలో సెల్యులోజ్ అధికంగా ఉంటుంది. మానవ శరీరం సెల్యులోజ్ను సంపూర్ణంగా అరిగించుకోలేకపోయినప్పటికీ, మన జీర్ణనాళం ఆ గింజను ఒక వ్యర్థ పదార్థంగా భావించి ప్రేగుల ద్వారా ముందుకు నెట్టివేస్తుంది.
అనుకోకుండా ఒకటి లేదా రెండు నిమ్మ గింజలను మింగడం వల్ల శరీరానికి ఎలాంటి హాని జరగదు. 99 శాతం సందర్భాల్లో ఈ గింజలు జీర్ణనాళం గుండా సురక్షితంగా ప్రయాణించి, మనకు తెలియకుండానే మలం రూపంలో శరీరం నుంచి బయటకు విసర్జించబడతాయి. వీటివల్ల కడుపులో చెట్లు మొలవడం అనేది కేవలం ఒక అపోహ మాత్రమే, ఎందుకంటే కడుపులోని ఆమ్ల వాతావరణం, ఆక్సిజన్ లేకపోవడం వల్ల ఏ విత్తనం కూడా లోపల మొలకెత్తలేదు. పైగా, నిమ్మ గింజల్లో కొద్ది మొత్తంలో యాంటీఆక్సిడెంట్లు, సాలిసిలిక్ యాసిడ్ వంటి సహజ మూలకాలు ఉంటాయి. కాబట్టి పొరపాటున ఒక చిన్న గింజ పొట్టలోకి వెళ్లినా అది ఎటువంటి విషపూరిత రసాయనాలను విడుదల చేయదు.
అయితే, కొన్ని అరుదైన మినహాయింపులను మనం ఖచ్చితంగా గమనించాలి. చాలా చిన్న పిల్లలు లేదా జీర్ణ సంబంధిత తీవ్ర సమస్యలు ఉన్నవారు ఒకేసారి ఎక్కువ సంఖ్యలో నిమ్మ గింజలను నమలకుండా మింగితే, అవి ప్రేగుల్లో అడ్డుపడే (Intestinal Obstruction) స్వల్ప అవకాశం ఉంటుంది. అలాగే, నిమ్మ గింజను మింగేటప్పుడు అది జీర్ణనాళానికి బదులుగా శ్వాసనాళంలోకి వెళ్తే (Aspiration) తీవ్రమైన దగ్గు, ఊపిరి ఆడకపోవడం వంటి సమస్యలు తలెత్తుతాయి. మింగిన తర్వాత తీవ్రమైన కడుపునొప్పి, వాంతులు, లేదా మింగడంలో ఇబ్బందిగా అనిపిస్తే మాత్రం వెంటనే వైద్యులను సంప్రదించడం మంచిది. కానీ, సాధారణ పరిస్థితుల్లో ఒకటి లేదా రెండు నిమ్మ గింజలను మింగడం వల్ల ఎలాంటి భయం అవసరం లేదు. మీ శరీరం దానిని సహజంగానే బయటకు పంపించేస్తుంది.
[ Lemon Seeds, Swallowed Lemon Seed, Digestive System, Stomach Acid, HCl, Seed Digestion, Intestinal Health, Aspiration Risk, Intestinal Obstruction, Health Myths ]
మన భారతీయ సంప్రదాయ వంటకాల్లో నల్ల శనగలకు (నల్ల శనగలు / కాలా చనా) అత్యంత విశిష్టమైన స్థానం ఉంది. గుడి ప్రసాదాల నుంచి ఉదయం పూట తినే మొలకెత్తిన విత్తనాల వరకు ప్రతికూల వాతావరణంలో సైతం శరీరానికి అపరిమితమైన శక్తిని ఇచ్చే సూపర్ఫుడ్గా నల్ల శనగలు నిలుస్తాయి. పోషకాల గనిగా పిలువబడే ఈ శనగలను మన దైనందిన ఆహారంలో భాగం చేసుకోవడం వల్ల శరీరానికి లభించే ఆరోగ్య ప్రయోజనాలు అపారం. మనలో చాలామంది చికెన్, మటన్ లేదా ఇతర నాన్ వెజ్ ఆహారాల ద్వారానే ఎక్కువ ప్రోటీన్ లభిస్తుందని భావిస్తుంటారు. కానీ, శాకాహారులకు అత్యధిక స్థాయిలో ప్రొటీన్ అందించే అత్యుత్తమ ప్రత్యామ్నాయం ఈ నల్ల శనగలేనని పోషకాహార నిపుణులు స్పష్టం చేస్తున్నారు. రోజూ ఒక గుప్పెడు నల్ల శనగలను నానబెట్టి లేదా ఉడకబెట్టి తినడం ద్వారా మన ఆరోగ్యంలో ఎలాంటి విప్లవాత్మక మార్పులు వస్తాయో తెలుసుకోవడం ఎంతైనా అవసరం.
నల్ల శనగల్లో లభించే ప్రధానమైన పోషకం వృక్ష ఆధారిత ప్రోటీన్ (Plant based Protein) మరియు అధిక మొత్తంలో ఉండే పీచు పదార్థం (Dietary Fiber). నానబెట్టిన లేదా ఉడకబెట్టిన 100 గ్రాముల నల్ల శనగలను తీసుకుంటే అందులో సుమారు 15 గ్రాముల వరకు నాణ్యమైన ప్రోటీన్, దాదాపు 12 గ్రాముల పీచు పదార్థం లభిస్తాయి. ఇవి కండరాల బలానికి, శరీర కణాల పునర్నిర్మాణానికి ఎంతో సహాయపడతాయి. ముఖ్యంగా బరువు తగ్గాలనుకునే వారికి నల్ల శనగలు ఒక అద్భుతమైన వరం లాంటివి. వీటిలో ఉండే సంక్లిష్టమైన కార్బోహైడ్రేట్లు మరియు పీచు పదార్థం జీర్ణక్రియను మందగించేలా చేసి, కడుపు ఎక్కువ సమయం నిండుగా ఉన్న భావనను కలిగిస్తాయి. ఫలితంగా అకారణంగా కలిగే ఆకలి కోరికలు (Food Cravings) తగ్గి, క్యాలరీల వినియోగం నియంత్రణలోకి వస్తుంది.
రెండవ అత్యంత కీలకమైన ప్రయోజనం మధుమేహం లేదా షుగర్ వ్యాధి నివారణ. నల్ల శనగల గ్లైసేమిక్ ఇండెక్స్ (GI) చాలా తక్కువగా ఉంటుంది. సాధారణంగా తక్కువ గ్లైసేమిక్ ఇండెక్స్ ఉన్న ఆహారాలు రక్తంలో గ్లూకోజ్ స్థాయిలను ఒకేసారి పెంచకుండా, నిదానంగా శోషించబడేలా చేస్తాయి. దీనివల్ల టైప్ 2 డయాబెటిస్ ఉన్నవారిలో రక్తంలో చక్కెర స్థాయిలు అకస్మాత్తుగా పెరగకుండా క్రమబద్ధీకరించబడతాయి. అంతేకాకుండా, నల్ల శనగలు గుండె ఆరోగ్యానికి ఎంతో మేలు చేస్తాయి. వీటిలో సమృద్ధిగా లభించే మెగ్నీషియం మరియు పొటాషియం రక్తపోటును సమతుల్యంలో ఉంచడానికి తోడ్పడతాయి. అలాగే, ఇందులో ఉండే కరిగే పీచు పదార్థం శరీరం నుంచి చెడు కొలెస్ట్రాల్ (LDL) ను తొలగించడంలో సహాయపడి, గుండెపోటు మరియు పక్షవాతం వంటి తీవ్రమైన సమస్యల ముప్పును గణనీయంగా తగ్గిస్తుంది.
జీర్ణవ్యవస్థ పనితీరును మెరుగుపరచడంలో కూడా నల్ల శనగలు ప్రధాన పాత్ర పోషిస్తాయి. వీటిలో ఉండే ఫైబర్ జీర్ణనాళంలో మంచి బాక్టీరియా పెరుగుదలకు దోహదపడి, ప్రేగుల కదలికలను సులభతరం చేస్తుంది. దీనివల్ల దీర్ఘకాలిక మలబద్ధకం, గ్యాస్ మరియు కడుపు ఉబ్బరం వంటి జీర్ణ సమస్యలకు త్వరగా చెక్ పెట్టవచ్చు. ఇక మహిళల్లో మరియు పిల్లల్లో ఎక్కువగా కనిపించే రక్తహీనత (Anemia) సమస్యకు నల్ల శనగలు ఒక అద్భుతమైన సహజ నివారణి. వీటిలో ఐరన్ (L Iron) అధిక స్థాయిలో ఉంటుంది. క్రమం తప్పకుండా వీటిని తీసుకోవడం వల్ల రక్తంలో హిమోగ్లోబిన్ శాతం వేగంగా పెరిగి, శరీరం రోజంతా ఉత్సాహంగా, చైతన్యవంతంగా ఉంటుంది. నిత్యం ఉదయాన్నే మొలకెత్తిన నల్ల శనగలను తినడం వల్ల చర్మం కూడా కాంతివంతంగా మారి యవ్వనంగా కనిపిస్తారు. ఇంతటి దివ్యమైన పోషకాలు ఉన్న నల్ల శనగలను ప్రతిరోజూ మన ఆహారంలో భాగం చేసుకుని సంపూర్ణ ఆరోగ్యాన్ని పొందుదాం.
[ Chukkakura, Chukkakura Benefits, Sorrel Leaves, Vitamin A, Vitamin C, Iron Rich Foods, Eye Health, Immunity, Digestive Health, Heart Health ]
క్రియాటినిన్ అంటే ఏమిటి? మన శరీరంలో క్రియాటినిన్ స్థాయిలు ఎందుకు పెరుగుతాయి? క్రియాటినిన్ ఎక్కువగా ఉంటే కిడ్నీల పనితీరుపై ఎలాంటి ప్రభావం ఉంటుంది? గుండె సమస్యలు, కిడ్నీ సమస్యలకు దీనికి ఉన్న సంబంధం ఏమిటి?
ఈ వీడియోలో Creatinine Test, Creatinine Levels, Kidney Functionగురించి ప్రముఖ నెఫ్రాలజిస్ట్ Dr. Sree Bhushan Raju, MD, Nephrology వివరంగా తెలియజేస్తున్నారు. రక్తంలో క్రియాటినిన్ స్థాయిని ఎలా పరీక్షిస్తారు, రిపోర్టులో వచ్చే ఫలితాలను ఎలా అర్థం చేసుకోవాలి వంటి ముఖ్యమైన విషయాలను తెలుసుకోవచ్చు.
క్రియాటినిన్ స్థాయి పెరగడానికి కిడ్నీ సమస్యలతో పాటు డీహైడ్రేషన్, కండరాలకు సంబంధించిన సమస్యలు, అధిక శారీరక శ్రమ వంటి ఇతర కారణాలు కూడా ఉండవచ్చు. అందుకే ఒకసారి క్రియాటినిన్ ఎక్కువగా వచ్చిందని మాత్రమే కిడ్నీ ఫెయిల్యూర్ అని భావించకూడదు. అవసరమైన ఇతర పరీక్షలతో పాటు వైద్యుల సలహా తీసుకోవడం ముఖ్యం.
కిడ్నీల ఆరోగ్యం, క్రియాటినిన్ స్థాయిలు, కిడ్నీ ఫిల్టరింగ్ సామర్థ్యం, గుండె ఆరోగ్యంతో ఉన్న సంబంధం గురించి ఈ వీడియోలో మరిన్ని ముఖ్యమైన విషయాలను తెలుసుకోండి.
మీ ఆరోగ్య సమస్య ఏదైనా... మా హెల్త్ యూట్యూబ్ ఛానల్లో సీనియర్ డాక్టర్స్ చెప్పిన సలహాలు... సూచనలు ఉన్నాయి. మా యూట్యూబ్ ఛానల్ కోసం ఇక్కడ క్లిక్ చేయండి 👉 TeluguOne Health (సబ్స్క్రైబ్ చేయడం మర్చిపోకండి!)
.webp)
మెడలో గడ్డ లేదా వాపు కనిపించగానే చాలామందికి క్యాన్సర్ గురించి భయం మొదలవుతుంది. కానీ మెడలో వచ్చే ప్రతి గడ్డ క్యాన్సర్ కావాల్సిన అవసరం లేదు. థైరాయిడ్ సమస్యలు, లింఫ్ నోడ్స్ వాపు, ఇన్ఫెక్షన్లు తదితర కారణాల వల్ల కూడా మెడలో గడ్డలు ఏర్పడవచ్చు.
మెడలో గడ్డలు ఎందుకు వస్తాయి? థైరాయిడ్ వాపు ఎలా ఉంటుంది? లింఫ్ నోడ్స్ ఎందుకు పెరుగుతాయి? మెడలో గడ్డ కనిపిస్తే ఎప్పుడు వైద్యులను సంప్రదించాలి? సమస్యను గుర్తించడానికి ఎలాంటి పరీక్షలు అవసరం? వంటి ముఖ్యమైన విషయాలను
సీనియర్ ENT, హెడ్ & నెక్ సర్జన్ డాక్టర్ అశోక్ పృథ్వీరాజ్ మొగంటి ఈ వీడియోలో సులభంగా వివరిస్తున్నారు.
మెడలో గడ్డను నిర్లక్ష్యం చేయకుండా, దాని కారణాన్ని వైద్యుల సలహాతో తెలుసుకోవడం చాలా ముఖ్యం. ఈ వీడియోలో మెడలో గడ్డలు, థైరాయిడ్ సమస్యలు, లింఫ్ నోడ్స్ వాపు మరియు అవసరమైన వైద్య పరీక్షల గురించి పూర్తి వివరాలు తెలుసుకోండి.
గమనిక:
మెడలో గడ్డ లేదా వాపు ఉంటే స్వయంగా నిర్ధారణ చేసుకోకుండా వైద్య నిపుణులను సంప్రదించండి.
మీ ఆరోగ్య సమస్య ఏదైనా... మా హెల్త్ యూట్యూబ్ ఛానల్లో సీనియర్ డాక్టర్స్ చెప్పిన సలహాలు... సూచనలు ఉన్నాయి. మా యూట్యూబ్ ఛానల్ కోసం ఇక్కడ క్లిక్ చేయండి 👉 TeluguOne Health (సబ్స్క్రైబ్ చేయడం మర్చిపోకండి!)
ఎర్ర గోంగూర.. కేవలం తెలుగు రాష్ట్రాల రుచుల్లోనే కాదు, ఆరోగ్య ప్రయోజనాల్లోనూ ప్రత్యేక స్థానాన్ని సంపాదిచుకుంది. ఆకుకూరల్లో గోంగూరకు ఉన్న క్రేజ్ గురించి ప్రత్యేకంగా చెప్పాల్సిన పనిలేదు. అయితే తెల్ల గోంగూరతో పోలిస్తే ఎర్ర గోంగూరలో ఆరోగ్య గుణాలు, పోషక విలువలు చాలా ఎక్కువగా ఉంటాయి. చాలామంది దీని పులుపుదనం వల్ల లేదా పులుపు ఎక్కువైతే ఏమన్నా సమస్యలు వస్తాయేమోనని కాస్త దూరంగా ఉంటారు. కానీ, ఎర్ర గోంగూర రోజూ లేదా వారానికి రెండు మూడు సార్లు తింటే శరీరంలో జరిగే అద్భుతమైన మార్పులు ఉంటాయని ఆరోగ్య నిపుణులు చెబుతున్నారు. అసలు ఎర్ర గోంగూరలో ఉండే పోషకాలు ఏమిటి? ఎర్ర గోంగూర తినడం వల్ల కలిగే ప్రయోజనాలు ఏమిటి? ఈ విషయాలు తెలుసుకుంటే ఎర్ర గోంగూరను అస్సలు వదిలిపెట్టరు. ఎర్ర గోంగూర గురించి వివరంగా తెలుసుకుంటే..
ఎర్ర గోంగూర అందించే అద్భుతమైన ఆరోగ్య ప్రయోజనాలు..
రక్తహీనతకు చెక్ పెడుతుంది:
నేటి కాలంలో చాలామంది ఎదుర్కొంటున్న ప్రధాన సమస్య రక్తహీనత. ఎర్ర గోంగూరలో ఐరన్, ఫోలిక్ యాసిడ్ పుష్కలంగా ఉంటాయి. ఇవి శరీరంలో ఎర్ర రక్తకణాల ఉత్పత్తిని వేగవంతం చేస్తాయి. హిమోగ్లోబిన్ శాతాన్ని పెంచడంలో ఎర్ర గోంగూర ఒక సహజసిద్ధమైన ఔషధంగా పనిచేస్తుంది.
ఎముకలకు బలాన్ని ఇస్తుంది:
వయసు పెరిగే కొద్దీ ఎముకల బలహీనత, కీళ్ల నొప్పులు సహజంగా వస్తుంటాయి. ఎర్ర గోంగూరలో ఉండే క్యాల్షియం, మెగ్నీషియం, భాస్వరం ఎముకలను దృఢంగా ఉంచడానికి ఎంతగానో తోడ్పడతాయి. చిన్నపిల్లల పెరుగుదలకు, ఎముకల ఎదగడానికి ఇది చాలా మంచిది.
జీర్ణక్రియను మెరుగుపరుస్తుంది:
ఎర్ర గోంగూరలో పీచు పదార్థం చాలా ఎక్కువగా ఉంటుంది. ఇది జీర్ణ వ్యవస్థ పనితీరును వేగవంతం చేసి, మలబద్ధకం సమస్యను నివారిస్తుంది. తిన్న ఆహారం త్వరగా అరగడానికి, పేగుల్లో ఉన్న వ్యర్థాలను బయటకు పంపడానికి ఇది సహాయపడుతుంది.
రోగనిరోధక శక్తిని పెంచుతుంది:
ఈ ఆకుకూరలో విటమిన్ సి సమృద్ధిగా ఉంటుంది. ఇది శరీరంలోని వ్యాధి నిరోధక వ్యవస్థను బలోపేతం చేస్తుంది. సీజనల్ గా వచ్చే జలుబు, దగ్గు, జ్వరం వంటి ఇన్ఫెక్షన్లతో పోరాడే శక్తినందిస్తుంది.
కంటి చూపు పెరిగేందుకు దోహదం చేస్తుంది:
ఎర్ర గోంగూరలో విటమిన్ ఏ తగినంత ఉంటుంది. ఇది కంటి ఆరోగ్యానికి ఎంతో మేలు చేస్తుంది. రేచీకటి, కళ్ళు పొడిబారడం వంటి సమస్యల నుంచి ఉపశమనం కలిగిస్తూ, దృష్టి లోపాలు రాకుండా కాపాడుతుంది.
గుండె ఆరోగ్యానికి రక్షణ:
ఇందులో ఉండే పొటాషియం రక్తపోటును నియంత్రణలో ఉంచడానికి ఎంతగానో ఉపయోగపడుతుంది. చెడు కొలెస్ట్రాల్ ను తగ్గించి, గుండె సంబంధిత సమస్యలు రాకుండా నిరోధించడంలో ఎర్ర గోంగూర కీలకంగా పనిచేస్తుంది.
చర్మం, జుట్టు ఆరోగ్యానికి మేలు:
యాంటీ ఆక్సిడెంట్లు పుష్కలంగా ఉండటం వల్ల చర్మాన్ని యవ్వనంగా ఉంచడానికి, ముడతలు పడకుండా చూడటానికి ఇది దోహదపడుతుంది. అలాగే తలకు అవసరమైన పోషకాలను అందించి జుట్టు రాలడాన్ని తగ్గిస్తుంది.
బరువు తగ్గాలనుకునే వారికి:
ఎర్ర గోంగూరలో క్యాలరీలు చాలా తక్కువగా ఉంటాయి, పీచు పదార్థం ఎక్కువ. ఇది తిన్న తర్వాత కడుపు నిండిన భావన ఎక్కువ సేపు ఉంటుంది. దీంతో అతిగా తినే అలవాటు తగ్గి సులభంగా బరువు తగ్గొచ్చు.
ఇన్ని రకాల ఔషధ గుణాలు ఉన్న ఎర్ర గోంగూరను దైనందిన ఆహారంలో పప్పు రూపంలోనో, పచ్చడి రూపంలోనో లేదా ఇతర కూరల్లో కలిపి తీసుకుంటే ఆరోగ్యానికి ఎంతో మేలు జరుగుతుంది.
*రూపశ్రీ.