నందమూరి కళ్యాణ్‌ రామ్‌ హీరోగా వస్తున్న కొత్త సినిమా ‘డెవిల్‌’. ఈ సినిమా డిసెంబర్‌ 29న వరల్డ్‌వైడ్‌గా రిలీజ్‌ కాబోతోంది. అభిషేక్‌ అగర్వాల్‌ ఆర్ట్స్‌ బ్యానర్‌పై అభిషేక్‌ నామా ఈ చిత్రాన్ని నిర్మించారు. అయితే ఈ సినిమాకి దర్శకుడిగా కూడా తన పేరే వేసుకుంటున్నారు అభిషేక్‌ నామా. 

ఈ సినిమాకి శ్రీకాంత్‌ విస్సా కథ, స్క్రీన్‌ప్లే, మాటలు అందించగా నవీన్‌ మేడారం దర్శకత్వం వహించారు. సినిమా షూటింగ్‌ పూర్తయిన తర్వాత హఠాత్తుగా నవీన్‌ మేడారం ఈ ప్రాజెక్ట్‌ నుంచి తప్పుకున్నాడు. దాంతో ప్రొడ్యూసర్‌ అండ్‌ డైరెక్టర్‌ అభిషేక్‌ నామా అంటూ తన పేరు వేసుకున్నారు. మొదటిసారి పోస్టర్‌పై దర్శకుడిగా అభిషేక్‌ నామా పేరు కనిపించినపుడు ‘వినాశకాలే విపరీత బుద్ధి’ అని హిందీలో ట్వీట్‌ చేశారు నవీన్‌. ఆ తర్వాత మళ్ళీ ఎప్పుడూ ఈ విషయంపై స్పందించలేదు. మరో రెండు రోజుల్లో సినిమా రిలీజ్‌ అవుతుండగా మరోసారి తన స్పందనను ట్విట్టర్‌ వేదికగా తెలిపారు. 

‘డెవిల్‌ సినిమాకి ప్రాణం పెట్టి పనిచేశాను. నా మూడేళ్ల కృషిని అంకితం చేశాను. స్క్రిప్ట్‌, కాన్సెప్ట్‌, స్క్రీన్‌ప్లే కాస్ట్యూమ్స్‌, లొకేషన్స్‌, సెట్స్‌ డిజైనింగ్‌.. ఇలా సినిమాలోని ప్రతి అంశంలోనూ నా పాత్ర ఉంది. నా ఆర్టిస్టిక్‌ విజన్‌ ఉంది. సినిమా మొత్తాన్ని 105 రోజుల్లో కరైకుడి, వైజాగ్‌, హైదరాబాద్‌ తదితర లొకేషన్స్‌లో నేను చిత్రీకరించాను. డెవిల్‌ పూర్తిగా నా సొంత క్రియేషన్‌లో నుంచి పుట్టింది. నాకు ఇది కేవలం ఒక సినిమా మాత్రమే కాదు.. ఇది నా బేబి. ఎవరు ఎన్ని చెప్పినా, ఇది నవీన్‌ మేడారం సినిమా.

నేను మౌనంగా ఉండడం వల్ల నా ప్రశాంతతను స్థిరంగా ఉంచుకోగలిగాను. కానీ, నేను మౌనంగా ఉంటే కొంత మంది నేను తప్పు చేసినట్టు అర్థం చేసుకుంటున్నారు. దానికి నేను స్పష్టత ఇవ్వాల్సిన అవసరం ఉంది. సినిమాను తెరకెక్కించే విషయంలో నేను ఎలాంటి తప్పులు చేయలేదు. ఈరోజు ఈ వివాదానికి కారణం అహం, దురాశతో తీసుకున్న కొన్ని నిర్లక్ష్య నిర్ణయాలు. ఇటీవల వచ్చిన వార్తలకు విరుద్ధంగా, నేను ఏ వ్యక్తి మీదా, సినిమా మీదా చట్టపరమైన చర్యలు తీసుకోవడం లేదు. అయితే, నా సొంత సినిమాకు సంబంధించి నాకు దర్శకుడిగా క్రెడిట్‌ ఇవ్వకపోవడం నన్ను చాలా బాధించింది. నాకు బోలెడంత అనుభవం, నైపుణ్యం, ఆత్మవిశ్వాసం ఉన్నాయి. నా కెరీర్‌ విషయంలో నేను ఎప్పుడూ ఎంతో జాగ్రత్తగా ఉంటాను. మరింత దృఢంగా వెనక్కి వస్తాను.

కళ్యాణ్‌ రామ్‌ సార్‌ ఈ సినిమా కోసం అవిశ్రాంతంగా కష్టపడ్డారు. హండ్రెడ్‌ పర్సెంట్‌ ఔట్‌పుట్‌ ఇచ్చారు. కళ్యాణ్‌రామ్‌ సార్‌కి కృతజ్ఞతలు తెలియజేస్తున్నాను. ఈ ప్రయాణంలో నాకు ప్రోత్సాహాన్ని అందించిన అందరికీ కృతజ్ఞతలు. డెవిల్‌ బ్లాక్‌ బస్టర్‌ అవుతుందని నాకు నమ్మకం ఉంది. ప్రతి ఒక్కరూ డిసెంబర్‌ 29న థియేటర్లకు వెళ్లి సినిమా చూడాలని వేడుకుంటున్నాను. నేను ఒక కొత్త సినిమాను అంగీకరించాను. చాలా ఆసక్తికర స్క్రిప్ట్‌ మీద పనిచేస్తున్నాను. త్వరలోనే వివరాలు వెల్లడిస్తాను. థాంక్యూ’ అని నవీన్‌ మేడారం తన పోస్ట్‌లో పేర్కొన్నారు.