చాలాకాలం త‌ర్వాత ఓ ఫీల్‌గుడ్ వెబ్ సిరీస్ ఓటీటీ ప్రేక్ష‌కులకు ముందుకొచ్చింది. అయితే ఇది త‌ర‌చూ వ‌చ్చే హిందీ, త‌మిళ‌, మ‌ల‌యాళం భాష‌ల‌కు చెందినది కాకుండా.. రెగ్యుల‌ర్‌గా వ‌చ్చే క్రైమ్‌, లవ్‌, ఇన్వేస్టిగేష‌న్ థ్రిల్ల‌ర్ జాన‌ర్ల‌కు ఏమాత్రం సంబంధం లేని ఓ సింపుల్‌ ఫ్యామిలీ, ఎమోష‌న్ జాన‌ర్‌ లో వ‌చ్చిన మ‌రాఠీ వెబ్ సిరీస్. దీని పేరు లంపన్ (Lampan). తాజాగా ఓటీటీలోకి వ‌చ్చిన ఈ సిరీస్ డిజిట‌ల్ వీక్ష‌కుల‌ను తెగ ఆక‌ట్టుకోవ‌డ‌ంతో పాటుగా వారిని తమ బాల్యంలోకి తీసుకెళ్లి వారి జ్ఞాప‌కాల‌ను గుర్తుచేసి ఆనంద‌భాష్పాలు వ‌చ్చేలా చేస్తోంది. ఇది చూసిన ప్రతీ ఒక్కరి హృద‌యం బ‌రువెక్కడం ఖాయం. ఈ సిరీస్ కి తెలుగు డ‌బ్బింగ్ కూడా అద్భుతంగా కుద‌ర‌డంతో మ‌నం మ‌రాఠీ సిరీస్ చూస్తున్నామ‌నే ఫీలింగ్ కూడా ఎక్క‌డా రాదు. అంత‌లా డ‌బ్బింగ్ సెట్ అయింది.

ప్ర‌ముఖ మ‌రాఠీ ర‌చ‌యిత ప్ర‌కాశ్ నారాయ‌ణ్ సంత్ (Prakash Narayan Sant) ర‌చించిన ప్ర‌ఖ్యాత‌ ‘వ‌న‌వాస్’ అనే బుక్‌లోని ఓ పాత్ర‌తో ఈ సిరీస్ తెర‌కెక్క‌గా ప్రముఖ న‌టుడు,ర‌చ‌యిత‌, ద‌ర్శ‌కుడు నిపున్ అవినాశ్ ధర్మాధికారి (Nipun Dharmadhikari) డైరెక్ట్ చేశారు. బాల న‌టుడు మిహిర్ గోడ్‍బోలే మెయిన్‌లీడ్‌లో న‌టించ‌గా చంద్రకాంత్ కులకర్ణి (Chandrakant Kulkarni), గీతాంజలి కులకర్ణి (Geetanjali Kulkarni), పుష్కరాజ్ చిర్పుక్టర్ (Pushkaraj Chirputkar), కాదంబరి క‌దమ్ (Kadambari Kadam) ఇత‌ర పాత్ర‌ల్లో న‌టించారు. సౌరభ్ భలేరావ్ (Saurabh Bhalerao) బ్యా గ్రౌండ్ మ్యూజిక్, రాహుల్ దేశ్‌పాండే సంగీతం అందించారు. ఎలాంటి అసభ్య పదాలు గానీ వాడకుండా అశ్లీల స‌న్నివేశాలు లేకుండా రూపొందిన ఈ లంపన్ (Lampan) సిరీస్‌ను ఎంచ‌క్కా ఫ్యామిలీతో క‌లిసి చూసి చూసేయొచ్చు. 90s వెబ్ సిరీస్ ని ఎలా ఎంజాయ్ చేస్తూ చూసారో దీనిని కూడా అలాగే చూస్తూ అలనాటి రోజుల‌ను జ్ఞ‌ప్తికి తెచ్చుకోవ‌చ్చు.

చూడ‌డానికి ఈ లంపన్’(Lampan) వెబ్ సిరీస్‌ నాటి క్లాసిక్‌ మాల్గుడి డేస్‌ను గుర్తు చేసిన.. దానికి దీనికి ఏ మాత్రం సంబంధం ఉండ‌దు. చాలా ప్రెష్‌గా 1950, 60ల‌లో మ‌న తాత‌ల కాలంలో జ‌రిగిన క‌థా నేప‌థ్యంలో ఈ సిరీస్ సాగుతూ.. మ‌నల్ని వారితో పాటు ప్ర‌యాణించేలా చేస్తుంది. ఇంకా చెప్పాలంటే ఆ పాత్ర‌లు మ‌న చుట్టూనే ఉన్న‌ట్టుగా, ఆ క్యారెక్ట‌ర్స్‌ మ‌న‌వే అన్న‌ట్లుగా చాలా స‌జీవంగా ఉండ‌డ‌ంతో పాటు.. ఆ సంగీతం, విజువ‌ల్స్‌, ఫొటోగ్ర‌ఫీ అయితే మ‌న‌ల్ని మైమ‌రిపించి అందులో లీన‌మ‌య్యేలా చేస్తాయి. ఈ సిరీస్ లో మొత్తంగా  ఏడు ఏపిసోడ్స్ ఉన్నాయి. ప్రముఖ ఓటీటీ వేదిక సోనీ లీవ్ లో మ‌రాఠీతో పాటు తెలుగు, త‌మిళ‌, మ‌ల‌యాళ‌, క‌న్న‌డ‌, హిందీ భాష‌ల్లో స్ట్రీమింగ్ అవుతోంది. మిమ్మల్ని మీరు గుర్తుకుతెచ్చుకునే ఈ అమూల్యమైన అవకాశాన్ని మీరు మిస్ కాకండి.  ఈ సిరీస్ ని ఫ్యామిలీతో‌ కలిసి ఎంచక్కా చూసేయ్యండి.