పవర్ స్టార్ పవన్ కళ్యాణ్ (Pawan Kalyan) నటించిన 'ఓజీ' (OG) మూవీ తాజాగా థియేటర్లలో అడుగుపెట్టి.. అభిమానులను విశేషంగా ఆకట్టుకుంటోంది. ఓజాస్ గంభీరగా పవన్ కళ్యాణ్ స్క్రీన్ ప్రజెన్స్ కి, ఎలివేషన్స్ కి థియేటర్లలో ఫ్యాన్స్ 'ఓజీ ఓజీ' అంటూ ఊగిపోతున్నారు. అయితే ఈ సినిమాకి 'ఓజీ' అనే టైటిల్ పెట్టడం వెనుక ప్రముఖ నిర్మాత నాగవంశీ ఉన్నారు. ఈ విషయాన్ని ఓజీ నిర్మాత డీవీవీ దానయ్య స్వయంగా చెప్పడం విశేషం. (They Call Him OG)

ఓజీ సినిమాకి మొదటి షో నుంచే పాజిటివ్ టాక్ వచ్చింది. పవన్ కళ్యాణ్ అభిమానులు, యాక్షన్ ప్రియులు ఈ సినిమాకి బ్రహ్మరథం పడుతున్నారు. ఈ నేపథ్యంలో తాజాగా మూవీ టీమ్.. సక్సెస్ ప్రెస్ మీట్ నిర్వహించింది. ఈ సందర్భంగా డీవీవీ దానయ్య మాట్లాడుతూ.. ఇద్దరికి ప్రత్యేక కృతఙ్ఞతలు తెలిపారు. ఆ ఇద్దరిలో ఒకరు త్రివిక్రమ్ కాగా, మరొకరు నాగవంశీ. 

"నేను మొట్ట మొదటిగా థాంక్స్ చెప్పాల్సింది త్రివిక్రమ్ శ్రీనివాస్ గారికి. ఆయన లేకపోతే ఈ ప్రాజెక్ట్ లేదు. పవన్ కళ్యాణ్ గారితో సినిమా చేద్దాం అనుకున్నప్పుడు.. దర్శకుడు సుజీత్ పేరు త్రివిక్రమ్ గారే సూచించారు. త్రివిక్రమ్ గారు లేకపోతే ఈ సినిమా లేదు, నాకు ఇంత పెద్ద విజయం వచ్చేది కాదు." అంటూ త్రివిక్రమ్ వల్లే సుజీత్ ని కలిసి ఈ ప్రాజెక్ట్ చేసినట్లు దానయ్య తెలిపారు. 

అలాగే నాగవంశీ గురించి మాట్లాడుతూ.. "నాగవంశీ గారికి ప్రత్యేక కృతఙ్ఞతలు. నిజానికి ఓజీ అనే టైటిల్ ను ఆయన రిజిస్టర్ చేసుకున్నారు. కానీ, మా కోసం ఆ టైటిల్ ఇచ్చేశారు. ఓజీ టైటిల్ సినిమాకి ఎంతో హెల్ప్ అయింది." అని దానయ్య చెప్పుకొచ్చారు.

పవన్ కళ్యాణ్ తో త్రివిక్రమ్ కి, నాగవంశీకి మంచి అనుబంధం ఉంది. పవన్-సుజీత్ కాంబినేషన్ లో సినిమాకి త్రివిక్రమ్ బీజం పడేలా చేస్తే.. ఆ కాంబో కోసం తాను రిజిస్టర్ చేసుకున్న 'ఓజీ' టైటిల్ ని నాగవంశీ ఇచ్చేయడం విశేషం.