ప్రశాంత్ వర్మ సినిమాటిక్ యూనివర్స్ (PVCU) నుంచి వచ్చిన మొదటి చిత్రం 'హనుమాన్' ఎంతటి విజయం సాధించిందో తెలిసిందే. ఈ యూనివర్స్ లో భాగంగా 'అధీర' అనే చిత్రం రూపొందుతోంది. ప్రశాంత్ వర్మ క్రియేటర్ గా వ్యవహరిస్తున్న ఈ చిత్రానికి శరణ్ కొప్పి దర్శకుడు. ఆర్.కె.డి స్టూడియోస్ బ్యానర్ పై రివాజ్ రమేష్ దుగ్గల్ ఈ చిత్రాన్ని నిర్మిస్తున్నారు. ప్రముఖ నిర్మాత డీవీవీ దానయ్య కుమారుడు కళ్యాణ్ దాసరి 'అధీర'తో హీరోగా గ్రాండ్ డెబ్యూ చేస్తుండగా, విలన్ గా ఎస్. జె. సూర్య కనిపించనున్నారు. (Adhira Movie)

'హనుమాన్' తరహాలోనే 'అధీర' కూడా భారతీయ ఇతిహాసాల స్ఫూర్తితో, గ్రేట్ విజువల్స్‌తో రూపొందుతుంది. ప్రస్తుతం ఈ సినిమా షూటింగ్ జోరుగా జరుగుతోంది. గతంలో విడుదల చేసిన గ్లింప్స్ కి మంచి స్పందన లభించిన సంగతి తెలిసిందే. తాజాగా మేకర్స్ ఎస్. జె. సూర్య ఫస్ట్ లుక్ ను రిలీజ్ చేశారు. బ్యాక్‌డ్రాప్‌లో ఒక అగ్నిపర్వతం పేలుడుతో పోస్టర్ పవర్ ఫుల్ గా ఉంది. సూర్య కొమ్ములున్న కిరీటం ధరించి, రాక్షసుడిలా కనిపిస్తున్నాడు. ఇదే పోస్టర్ లో హీరో కళ్యాణ్ కూడా మోడరన్ అవతార్ లో సూపర్ హీరో లుక్ లో ఉన్నాడు. ఇందులో సూర్య పాత్ర ప్రపంచాన్ని కమ్మేసే అంధకారమైతే, ఆ అంధకారాన్ని తొలగించే వెలుగుగా కళ్యాణ్ పాత్ర కనిపిస్తుంది. 

హనుమాన్ ఫేమ్ శివేంద్ర ఈ చిత్రానికి సినిమాటోగ్రాఫర్. శ్రీ చరణ్ పాకాల మ్యూజిక్ అందిస్తున్నారు. శ్రీ నాగేంద్ర తంగల ప్రొడక్షన్ డిజైనర్. మరి ఈ సినిమా కూడా హనుమాన్ బాటలో పాన్ ఇండియా సక్సెస్ అందుకుంటుందేమో చూడాలి.